அமெரிக்காவின் அடுத்த மாஸ்டர் பிளான்.. கியூபா வானில் வட்டமிடும் பிரம்மாண்ட டிரோன்... சீனாவுக்கு வைத்த செக்!

உலக வரைபடத்தில் கியூபா ஒரு சிறிய தீவு நாடாக இருக்கலாம், ஆனால் தற்போது அது அமெரிக்கா மற்றும் சீனா இடையேயான ஒரு மாபெரும் சதுரங்க ஆட்டத்தின் முக்கிய களமாக மாறியுள்ளது. கரீபியன் கடலின் ஆழமான நீல நிறப் பரப்பிற்கு மேலே, வர்த்தக விமானங்கள் கூட எட்ட முடியாத உயரத்தில், போயிங் 737 விமானத்தின் இறக்கை அகலத்திற்கு இணையான ஒரு பிரம்மாண்டமான இயந்திரம் அமைதியாக வட்டமிட்டு வருகிறது. அது ஒரு சாதாரண விமானம் அல்ல; அமெரிக்க கடற்படையின் மிகவும் சக்திவாய்ந்த மற்றும் விலையுயர்ந்த ஆயுதமான 'MQ-4C ட்ரைட்டான்' உளவு டிரோன் ஆகும். சுமார் 240 மில்லியன் டாலர் மதிப்பிலான இந்த அதிநவீன இயந்திரம், ஆயுதங்களைச் சுமந்து செல்லவில்லை என்றாலும், உலகையே உற்று நோக்கும் அதன் கண்கள் எந்த ஏவுகணையை விடவும் ஆபத்தானவை. கியூபாவின் கடற்கரைப் பகுதிகளில் இந்த வாரம் முழுவதும் இந்த டிரோன் மேற்கொண்ட பயணங்கள், வெறும் கண்காணிப்பு மட்டுமல்ல, இது சீனாவுக்கு விடுக்கப்பட்ட ஒரு மறைமுக எச்சரிக்கை என்று சர்வதேச அரசியல் வல்லுநர்கள் கருதுகின்றனர்.

அமெரிக்காவின் இந்த அதிரடி நடவடிக்கைக்கும் சீனாவிற்கும் என்ன சம்பந்தம் என்ற கேள்வி எழலாம். உண்மையில், அமெரிக்கா ஒரு நீண்ட காலத் திட்டத்தின் அடிப்படையில் காய்களை நகர்த்தி வருகிறது. வெனிசுலாவில் தொடங்கி, ஹார்முஸ் ஜலசந்தி மற்றும் மலாக்கா ஜலசந்தி வழியாக சீனாவின் கச்சா எண்ணெய் விநியோகப் பாதையை முடக்க அமெரிக்கா ஏற்கனவே மூன்று முக்கிய மூவ்களை செய்து முடித்துவிட்டது. இப்போது கியூபா வானில் இந்த டிரோனை பறக்கவிட்டிருப்பது அதன் நான்காவது மூவ் ஆகும். இந்த டிரோன் ஜமைக்கா மற்றும் கியூபாவுக்கு இடைப்பட்ட கடல் பகுதியைத் தீவிரமாக கண்காணித்து வருகிறது. இது பனாமா கால்வாயிலிருந்து அட்லாண்டிக் கடலுக்குச் செல்லும் மிக முக்கியமான கப்பல் போக்குவரத்துப் பாதையாகும். இந்த வழியாகத்தான் சீனாவின் கச்சா எண்ணெய் மற்றும் இதர எரிபொருள் விநியோகங்கள் நடக்கின்றன. இந்தப் பாதையைக் தனது கட்டுப்பாட்டில் கொண்டு வருவதன் மூலம், சீனாவின் பொருளாதாரத்தின் உயிர்நாடியாக இருக்கும் எரிபொருள் விநியோகத்தை எப்போது வேண்டுமானாலும் துண்டிக்க முடியும் என்ற செய்தியை அமெரிக்கா அழுத்தமாகப் பதிவு செய்துள்ளது.

இதில் சுவாரசியமான விஷயம் என்னவென்றால், இந்த உளவு டிரோனின் பயணப் பாதை பொதுவெளியில் உள்ள விமான கண்காணிப்பு இணையதளங்களில் தெரியும்படி அமெரிக்கா அனுமதித்துள்ளது. வழக்கமாக உளவு வேலைகளை ரகசியமாகச் செய்யும் அமெரிக்கா, இம்முறை வேண்டுமென்றே தனது இருப்பைக் காட்டியுள்ளது. "நாங்கள் உங்களைக் கவனித்துக் கொண்டிருக்கிறோம்" என்று பெய்ஜிங்கிற்கு ஒரு வெளிப்படையான மெசேஜ் அனுப்பவே இப்படிச் செய்யப்பட்டுள்ளது. இந்த MQ-4C ட்ரைட்டான் டிரோன் சுமார் 55,000 அடி உயரத்திற்கு மேல் பறக்கக்கூடியது மற்றும் தொடர்ந்து 24 மணி நேரத்திற்கு மேல் வானில் நிலைத்திருக்கக்கூடியது. இதனால் கியூபாவைச் சுற்றியுள்ள கடல் பகுதிகளில் நடக்கும் ஒவ்வொரு அசைவையும் துல்லியமாகப் படம் பிடித்து அமெரிக்க ராணுவக் கட்டுப்பாட்டு அறைக்கு அனுப்ப முடிகிறது. இது சீனாவின் கடல்வழி வணிகத் திட்டங்களுக்குப் பெரும் முட்டுக்கட்டையாக அமையும் என்பதில் சந்தேகமில்லை.

மறுபுறம், கியூபாவில் நிலவும் தற்போதைய அரசியல் சூழலையும் அமெரிக்கா தனக்குச் சாதகமாகப் பயன்படுத்திக் கொள்ளப் பார்க்கிறது. கியூபா அதிபர் மிகுவல் டயஸ்-கானல் அமெரிக்காவின் அழுத்தங்களுக்குப் பணியப்போவதில்லை என்று வீரவசனம் பேசினாலும், அந்நாடு கடும் எரிபொருள் தட்டுப்பாட்டிலும் பொருளாதார நெருக்கடியிலும் சிக்கித் தவிக்கிறது. அமெரிக்காவின் இந்த எரிசக்தி முற்றுகை கியூபாவை மட்டுமல்லாமல், அந்தத் தீவின் வழியாகத் தனது ஆதிக்கத்தைச் செலுத்த நினைக்கும் சீனா மற்றும் ரஷ்யாவையும் சேர்த்துப் பாதிக்கிறது. குறிப்பாக, டொனால்ட் ட்ரம்ப் தலைமையிலான அமெரிக்க நிர்வாகம் கியூபா மீது அதிக ஆர்வம் காட்டி வருவது, இந்த சதுரங்க ஆட்டத்தின் இறுதிக்கட்டத்தை நெருங்கிவிட்டதைக் காட்டுகிறது. சீனாவுக்குச் செல்லும் எண்ணெய் கப்பல்கள் ஒவ்வொன்றும் இப்போது அமெரிக்காவின் இந்த 'மின்னணுப் பறவையின்' நேரடிப் பார்வையில் உள்ளன.

இந்த உளவு டிரோன் கண்காணிப்பு என்பது வெறும் ஒரு நாட்டின் எல்லைப் பாதுகாப்பு சார்ந்தது மட்டுமல்ல, இது ஒரு உலகளாவிய புவிசார் அரசியலின் அங்கமாகும். சீனா தனது 'பெல்ட் அண்ட் ரோடு' திட்டத்தின் மூலம் உலக நாடுகளைத் தனது பிடிக்குள் கொண்டு வர முயலும் வேளையில், அதன் கடல்வழிப் பாதைகளை ஒவ்வொன்றாக முடக்கும் பணியில் அமெரிக்கா தீவிரமாக இறங்கியுள்ளது. ஹார்முஸ் ஜலசந்தியில் சமீபத்தில் ஒரு உளவு டிரோன் விபத்துக்குள்ளான போதிலும், அமெரிக்கா சற்றும் பின்வாங்காமல் கியூபா அருகே தனது அடுத்த கட்ட நடவடிக்கையைத் தொடங்கியிருப்பது அதன் பிடிவாதத்தைக் காட்டுகிறது. இந்த ஒரு டிரோன் மூலம் கரீபியன் கடல் பகுதி முழுவதும் அமெரிக்காவின் முழுக் கட்டுப்பாட்டிற்குள் வந்துள்ளது. இனி வரும் நாட்களில், இந்த பிராந்தியத்தில் சீனாவின் கப்பல் போக்குவரத்து அமெரிக்காவின் அனுமதியின்றி நகர்வது என்பது மிகப்பெரிய சவாலாக இருக்கும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.