இலங்கையை புரட்டி எடுத்த ‘டித்வா’ - பலி எண்ணிக்கை 159 -ஆக அதிகரிப்பு!!

வங்கக்கடலில் தற்போது நிலைகொண்டு, தமிழகக் கடற்கரையை அச்சுறுத்திக் கொண்டிருக்கும் 'டித்வா' புயல் (Cyclone Ditwah), அதன் முதல் தாக்குதலிலேயே இலங்கையின் பல பகுதிகளைச் சீரழித்துப் போட்டுள்ளது. பலத்த மழை மற்றும் நிலச்சரிவுகளின் காரணமாக அந்தத் தீவு நாடு முழுவதும் கடுமையான பாதிப்புகளும், உயிர் இழப்புகளும் ஏற்பட்டுள்ளன. அந்நாட்டுப் பேரிடர் மேலாண்மை மையம் அளித்துள்ள தகவல்படி, இந்தப் புயலால் இதுவரை எண்பதுக்கும் மேற்பட்ட மக்கள் தங்கள் உயிரை இழந்திருக்கிறார்கள்; மேலும் பலர் காணாமல் போயிருக்கிறார்கள். அறுபதாயிரத்திற்கும் அதிகமான குடும்பங்களைச் சேர்ந்த இரண்டு இலட்சத்திற்கும் மேற்பட்ட மக்கள் இதனால் கடுமையாகப் பாதிக்கப்பட்டு, பாதுகாப்பான இடங்களுக்கு இடம்பெயர்ந்துள்ளனர். குறிப்பாக, மேற்கு மாகாணம் முழுவதும் வெள்ள அபாயம் தீவிரமடைந்திருப்பதோடு, கண்டி மற்றும் பதுளை போன்ற மத்திய மலைப்பகுதிகள் நிலச்சரிவுகளால் முற்றிலும் சிதைந்து போயுள்ளன. இந்த இயற்கைப் பேரிடரால் இலங்கை முழுவதும் நிலவும் அவசரச் சூழலைக் கருத்தில் கொண்டு, இலங்கைக்கு உடனடியாக உதவ 'சாகர் பந்து நடவடிக்கை' (Operation Sagar Bandhu) என்ற மனிதாபிமான நிவாரண ஆதரவுத் திட்டத்தை இந்தியா அதிரடியாக அறிவித்து, உதவிக் கரத்தை நீட்டியுள்ளது.

இந்தியா, தன் அண்டை நாடான இலங்கைக்கு உதவுவதில் எந்தவிதத் தாமதமும் இன்றிப் படுவேகமாகக் களமிறங்கியுள்ளது. இலங்கையின் நெருக்கடி நிலைக்கு உடனடியாகப் பதிலளிக்கும் வகையில், இந்தியப் பிரதமர் நரேந்திர மோடி அவர்கள், புயலால் பாதிக்கப்பட்ட மக்களுக்குத் தனது ஆழ்ந்த இரங்கலையும் ஆறுதலையும் தெரிவித்ததுடன், அண்டை நாடாகிய இந்தியா உறுதுணையாக இருக்கும் என்று உறுதியளித்துள்ளார். இதனைத் தொடர்ந்து, இந்திய வெளியுறவுத் துறை அமைச்சர் ஜெய்சங்கர் அவர்கள் 'சாகர் பந்து நடவடிக்கை' என்ற நிவாரணத் திட்டத்தை அதிகாரப்பூர்வமாகத் தொடங்கி வைத்தார். இந்தப் பேரிடர் நிவாரண நடவடிக்கையின் கீழ், இந்தியக் கடற்படையின் 'ஐ.என்.எஸ் விக்ராந்த்' விமானம் தாங்கிக் கப்பல் மற்றும் 'ஐ.என்.எஸ் உதைகிரி' போர்க்கப்பல் ஆகியவை மூலம் முதற்கட்ட நிவாரணப் பொருட்கள் கொழும்பில் உள்ள இலங்கை அதிகாரிகளிடம் ஒப்படைக்கப்பட்டுள்ளன. இந்த கப்பல்கள், இலங்கை கடற்படையின் எழுபத்தைந்தாம் ஆண்டு விழாவையொட்டி அங்குச் சென்றிருந்த நிலையிலேயே, உடனடியாக நிவாரணப் பணிகளில் ஈடுபடுத்தப்பட்டுள்ளன.

புயல் மற்றும் நிலச்சரிவால் இலங்கையின் பல பகுதிகளின் இயல்பு வாழ்க்கை தலைகீழாகப் புரண்டுள்ளது. வெள்ளத்தின் காரணமாகக் களனி மற்றும் அத்தனகாலு ஆறுகளில் அபாய கட்டத்தைத் தாண்டி நீர் மட்டம் உயர்ந்து, கரையோரப் பகுதிகளில் வரலாறு காணாத வெள்ளப் பெருக்கு ஏற்பட்டுள்ளது. இதன் காரணமாகப் பல மாவட்டங்களில் உள்ள அரசு அலுவலகங்கள் மற்றும் பள்ளிக்கூடங்கள் அனைத்தும் மூடப்பட்டுள்ளன. சுமார் எழுபது இலட்சம் மின்சாரப் பாவனையாளர்கள் மின்சாரம் இல்லாமல் தவிப்பதாகவும் தகவல்கள் வெளியாகியுள்ளன. நிலைமை தொடர்ந்து மோசமடைந்து வருவதால், இலங்கை அரசு வெள்ள அபாயம் நிறைந்த பகுதிகளில் உள்ள மக்களைப் பாதுகாப்பான இடங்களுக்கு உடனடியாக அப்புறப்படுத்த வேண்டும் என்று உத்தரவிட்டுள்ளது. 

இந்நிலையில் சீரற்ற வானிலை காரணமாக இதுவரை ஏற்பட்ட உயிரிழப்புகளின் எண்ணிக்கை 159 ஆக அதிகரித்துள்ளது. அத்துடன், 203 -பேர் இதுவரை காணாமல் போயுள்ளதாக தகவல் வெளியாகியுள்ளது. இந்த புயலால் 25 மாவட்டங்களைச் சேர்ந்த 234,503 குடும்பங்களைச் சேர்ந்த 833,985 பேர் பாதிக்கப்பட்டுள்ளனர்.  அதேபோல், 34,119 குடும்பங்களைச் சேர்ந்த 122,822 பேர் தற்போது 919 பாதுகாப்பான நிலையங்களில் தங்கவைக்கப்பட்டுள்ளனர். 

மேலும் 11 மாவட்டங்களின் 93 பிரதேசங்களுக்கு மண்சரிவு எச்சரிக்கை அறிவிப்புகள் மேலும் நீடிக்கப்பட்டுள்ளதாக தேசிய கட்டிட ஆராய்ச்சி நிறுவனம் தெரிவித்துள்ளது. மேலும் 10 பாலங்களுக்கும் சேதம் ஏற்பட்டுள்ள நிலையில், நுவரெலியா மற்றும் அனுராதபுரம் நகரங்களுக்கான அனைத்து நுழைவு மற்றும் வெளியேறும் வீதிகளும் தற்போது தடைப்பட்டுள்ளதாக அறிவிக்கப்பட்டுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.