.png)
அமெரிக்காவில் வேலை கிடைப்பது பல இந்திய ஐ.டி. ஊழியர்களின் கனவாக உள்ளது. குறிப்பாக H-1B விசா மூலம் அங்கு சென்று பணிபுரிபவர்கள், நிரந்தரக் குடியுரிமையான கிரீன் கார்டு கிடைக்கும் என்ற நம்பிக்கையுடன் பல ஆண்டுகளாகக் காத்திருக்கின்றனர். இந்நிலையில், உலகின் முன்னணி தொழில்நுட்ப நிறுவனங்களில் ஒன்றான IBM எடுத்துள்ள புதிய முடிவு, அங்கு பணிபுரியும் வெளிநாட்டு ஊழியர்களுக்கு அதிர்ச்சியை ஏற்படுத்தியுள்ளது. அமெரிக்காவில் உள்ள தனது ஆலோசனைப் பிரிவின் பெரும்பாலான பணிகளுக்கு இனி விசா மற்றும் கிரீன் கார்டு ஸ்பான்சர்ஷிப் வழங்கப்போவதில்லை என்று நிறுவனம் அறிவித்துள்ளது.
IBM நிறுவனத்தின் மிகப்பெரிய பிரிவான IBM Consulting-இல் 1.5 லட்சத்துக்கும் அதிகமானோர் பணியாற்றி வருகின்றனர். இந்தப் பிரிவில்தான் புதிய முடிவு அமலுக்கு வரவுள்ளது. இதனால் பாதிக்கப்படும் ஊழியர்களுக்கு இரண்டு வாய்ப்புகள் வழங்கப்பட்டுள்ளதாகத் தகவல்கள் தெரிவிக்கின்றன. அமெரிக்காவுக்கு வெளியே உள்ள வேறு நாட்டில் IBM நிறுவனத்துடன் இணைந்து தொடர்ந்து பணியாற்றலாம் அல்லது இந்த ஆண்டு இறுதிக்குள் நிறுவனத்திலிருந்து வெளியேறலாம் என்பதே அந்த இரண்டு வாய்ப்புகள். இதனால் அமெரிக்காவில் குடும்பத்துடன் வசித்து வரும் வெளிநாட்டு ஊழியர்கள் அடுத்து என்ன செய்வது என்று முடிவெடுக்க வேண்டிய கட்டாயம் ஏற்பட்டுள்ளது.
இந்த முடிவு IBM நிறுவனத்தின் அனைத்து ஊழியர்களுக்கும் பொருந்தும் என்று நினைத்துவிடக் கூடாது. குறிப்பாக அதன் Consulting பிரிவில் உள்ள பெரும்பாலான பணிகளுக்கான அமெரிக்க விசா மற்றும் கிரீன் கார்டு ஸ்பான்சர்ஷிப்பையே நிறுவனம் நிறுத்துகிறது. எத்தனை ஊழியர்கள் நேரடியாகப் பாதிக்கப்படுவார்கள், எந்தெந்த பணிகளுக்கு மட்டும் இனி ஸ்பான்சர்ஷிப் வழங்கப்படும் போன்ற விவரங்களை IBM இதுவரை வெளியிடவில்லை. எனவே, நிறுவனத்தின் 1.5 லட்சம் ஊழியர்களும் வேலையை இழக்கப் போகிறார்கள் என்று கூறுவது தவறானது.
இந்த முடிவு குறித்து IBM செய்தித் தொடர்பாளர் கூறுகையில், திறமையான பணியாளர்கள் பற்றாக்குறையைச் சமாளிப்பதற்காக அமெரிக்காவின் உயர் திறன் கொண்ட வெளிநாட்டு விசா திட்டங்களை நிறுவனம் பயன்படுத்தி வந்ததாகத் தெரிவித்தார். ஆனால், கடந்த சில ஆண்டுகளாக இந்தத் திட்டங்களைப் பயன்படுத்துவது குறைந்து வருவதாகவும், அமெரிக்காவில் கிடைக்கும் திறமையான பணியாளர்களின் எண்ணிக்கை மற்றும் வாடிக்கையாளர்களின் தேவைகள் மாறியுள்ளதால் பெரும்பாலான Consulting பணிகளுக்கு விசா மற்றும் கிரீன் கார்டு ஸ்பான்சர்ஷிப்பை நிறுத்த முடிவு செய்துள்ளதாகவும் விளக்கமளித்துள்ளார்.
அமெரிக்க அதிபர் டொனால்ட் டிரம்ப் தலைமையிலான நிர்வாகம் வெளிநாட்டு ஊழியர்களை வேலைக்கு எடுக்கும் நிறுவனங்கள் மீது கடுமையான கட்டுப்பாடுகளை விதித்து வருகிறது. குறிப்பாக H-1B விசா திட்டத்தில் பல்வேறு மாற்றங்களைக் கொண்டுவர முயற்சிகள் மேற்கொள்ளப்பட்டுள்ளன. புதிய H-1B விண்ணப்பங்களுக்கு 1 லட்சம் டாலர் ஒருமுறை கட்டணம் விதிக்கும் அறிவிப்பும் இதில் முக்கியமானது. மேலும், வெளிநாட்டு ஊழியர்களுக்குக் கிரீன் கார்டு பெற உதவும் PERM எனப்படும் தொழிலாளர் சான்றிதழ் நடைமுறையிலும் அமெரிக்க அரசு கடுமையான நடவடிக்கைகளை எடுத்துள்ளது. கடந்த மாதம் Microsoft, Adobe, Cognizant, Infosys, TCS உள்ளிட்ட நிறுவனங்கள் இந்த நடைமுறையில் இருந்து இடைநிறுத்தப்பட்டதாகத் தகவல்கள் வெளியாகின.
இந்தச் சூழலில் IBM எடுத்துள்ள முடிவு, அமெரிக்காவில் பணிபுரியும் இந்தியத் தொழில்நுட்ப ஊழியர்களிடையே கவலையை ஏற்படுத்தியுள்ளது. குறிப்பாக H-1B விசாவில் இருப்பவர்கள், கிரீன் கார்டுக்காகக் காத்திருப்பவர்கள் தங்களுடைய அடுத்தகட்டத் திட்டங்களை மறுபரிசீலனை செய்ய வேண்டிய நிலை உருவாகியுள்ளது. இருப்பினும், IBM-ன் முடிவால் பாதிக்கப்படும் அனைவரும் உடனடியாக வேலையை இழப்பார்கள் என்று அர்த்தமில்லை. நிறுவனத்துக்கு வெளியே வேறு வேலை தேடுவது, வேறு நாட்டில் பணியைத் தொடர்வது போன்ற வாய்ப்புகள் அவர்களுக்கு இருக்கலாம். அவரவர் விசா நிலை மற்றும் கிரீன் கார்டு விண்ணப்பத்தின் தற்போதைய கட்டத்தைப் பொறுத்து ஏற்படும் விளைவுகளும் மாறுபடும்.
அமெரிக்காவில் வேலைவாய்ப்பைப் பெறுவதற்காகப் பல ஆண்டுகள் உழைக்கும் இந்திய இளைஞர்களுக்கு இந்தச் செய்தி ஒரு முக்கியமான எச்சரிக்கையாக அமைந்துள்ளது. வெளிநாட்டு நிறுவனங்களில் நல்ல சம்பளத்தில் வேலை கிடைத்துவிட்டால் எதிர்காலம் பாதுகாப்பானது என்ற எண்ணம் மட்டும் போதாது என்பதையும் இந்தச் சம்பவம் உணர்த்துகிறது. விசா விதிமுறைகள், நிறுவனங்களின் கொள்கைகள், அரசின் குடியேற்ற முடிவுகள் ஆகியவை ஒரே நேரத்தில் மாறும்போது, ஊழியர்களின் வாழ்க்கைத் திட்டங்களும் பாதிக்கப்படலாம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.