.png)
உலகின் முன்னணி மென்பொருள் நிறுவனமான ஆரக்கிள் (Oracle), தனது வரலாற்றிலேயே இல்லாத வகையில் ஒரு மிகப்பெரிய ஆட்குறிப்பு நடவடிக்கையை அறிவித்துள்ளது. உலகம் முழுவதும் சுமார் 20,000 முதல் 30,000 ஊழியர்களை அந்த நிறுவனம் வேலையை விட்டு நீக்கியுள்ளது. அதிகாலை நேரத்தில் வந்த மின்னஞ்சல்கள் மூலம் இந்தத் தகவல் ஊழியர்களுக்குத் தெரிவிக்கப்பட்டது. இந்த ஆட்குறிப்பு நடவடிக்கை அமெரிக்கா, இந்தியா, கனடா மற்றும் லத்தீன் அமெரிக்கா என அனைத்து நாடுகளிலும் உள்ள கிளைகளைப் பாதித்துள்ளது.
இந்த முறை நடந்த ஆட்குறிப்பு வெறும் எண்ணிக்கையினால் மட்டும் அதிர்ச்சியை ஏற்படுத்தவில்லை, மாறாக நிறுவனத்தில் பல ஆண்டுகளாக உழைத்த மிகத்திறமையான சீனியர் ஊழியர்கள் குறிவைக்கப்பட்டிருப்பதுதான் பெரும் விவாதத்தை ஏற்படுத்தியுள்ளது. குறிப்பாக, ஆரக்கிள் நிறுவனத்தில் 33 ஆண்டுகளுக்கும் மேலாகப் பணியாற்றிய நினா லூயிஸ் என்ற சீனியர் செக்யூரிட்டி நிபுணர் வேலையை விட்டு நீக்கப்பட்டிருப்பது அனைவரையும் திகைக்க வைத்துள்ளது. ஏப்ரல் 1-ம் தேதி அன்று தனது லிங்க்டுஇன் பக்கத்தில் பதிவிட்ட அவர், 30 ஆண்டுகால உழைப்பிற்குப் பிறகு இந்த முடிவு தனக்கு மிகப்பெரிய அதிர்ச்சியாக இருப்பதாகக் குறிப்பிட்டுள்ளார்.
நினா லூயிஸ் 1990-களின் தொடக்கத்தில் ஆரக்கிளில் சேர்ந்தவர். மூன்று தசாப்தங்களாக டேட்டாபேஸ் மற்றும் செக்யூரிட்டி தளங்களில் பணியாற்றிய அவர், எத்திக்கல் ஹேக்கிங் மற்றும் செக்யூரிட்டி அனலிஸ்ட் போன்ற முக்கியப் பொறுப்புகளை வகித்தவர். தனது பணிநீக்கம் குறித்து அவர் ஒரு முக்கியமான சந்தேகத்தை எழுப்பியுள்ளார். அதாவது, நிறுவனத்தின் உள்நாட்டு அல்காரிதம் (Algorithm) ஒன்று, அதிக சம்பளம் வாங்கும் சீனியர் ஊழியர்களையும், அதிக ஸ்டாக் ஆப்ஷன் வைத்திருப்பவர்களையும் தானாகவே அடையாளம் கண்டு இந்தப் பணிநீக்கப் பட்டியலில் சேர்த்திருக்கலாம் என்று அவர் கணித்துள்ளார்.
ஆரக்கிள் நிறுவனத்தின் இந்த நடவடிக்கை ஒரு தனிப்பட்ட சம்பவம் அல்ல. கடந்த ஒரு மாதத்தில் மட்டும் மெட்டா, மைக்ரோசாப்ட், டிஸ்னி மற்றும் ஏஎஸ்எம்எல் (ASML) போன்ற முன்னணி நிறுவனங்கள் தங்களின் ஆட்குறிப்பு நடவடிக்கைகளை அறிவித்துள்ளன. இதில் மெட்டா மற்றும் மைக்ரோசாப்ட் நிறுவனங்கள் மட்டும் சுமார் 20,000-க்கும் மேற்பட்ட ஊழியர்களை நீக்கியுள்ளன. ஆச்சரியமான விஷயம் என்னவென்றால், நஷ்டத்தில் இயங்கும் நிறுவனங்கள் மட்டுமல்லாமல், நல்ல லாபத்தில் இயங்கும் நிறுவனங்களும் கூட தற்போது ஊழியர்களைக் குறைப்பதில் ஆர்வம் காட்டி வருகின்றன.
இந்த அனைத்து மாற்றங்களுக்கும் பின்னால் இருக்கும் ஒரே சக்தி 'செயற்கை நுண்ணறிவு' (AI) ஆகும். நிறுவனங்கள் தற்போது ஏஐ தொழில்நுட்பத்தில் பில்லியன் கணக்கில் முதலீடு செய்து வருகின்றன. இதன் மூலம் வேலைகளைத் தானியங்கி மயமாக்கி, செலவுகளைக் குறைத்து, லாபத்தை அதிகரிக்கத் திட்டமிடுகின்றன. ஒரு நிறுவனம் ஆட்குறிப்பை அறிவித்தவுடன் அதன் பங்குச் சந்தை மதிப்பு உயர்வது வழக்கமாகிவிட்டது. ஊழியர்களுக்கான சம்பளச் செலவு குறையும்போது லாபம் அதிகரிக்கும் என்ற நம்பிக்கையில் முதலீட்டாளர்கள் அந்த நிறுவனங்களின் பங்குகளை வாங்க ஆர்வம் காட்டுகின்றனர்.
இந்த ஏஐ புரட்சியால் ஜூனியர் ஊழியர்கள் மட்டுமல்லாமல், சீனியர் ஊழியர்களும் பெரும் நெருக்கடியைச் சந்தித்து வருகின்றனர். அதிக சம்பளம் வாங்கும் அனுபவம் வாய்ந்த ஊழியர்களுக்குப் பதிலாக, ஏஐ தொழில்நுட்பத்தையும், குறைந்த சம்பளத்தில் வேலை செய்யும் இளைஞர்களையும் கொண்டு வேலையை முடித்துவிட நிறுவனங்கள் கணக்குப் போடுகின்றன. அதே சமயம், ஆரம்ப நிலை வேலைகள் முழுமையாக ஏஐ மூலம் தானியங்கி மயமாக்கப்படுவதால், கல்லூரியை விட்டு வெளியே வரும் மாணவர்களுக்கு வேலை கிடைப்பது குதிரைக் கொம்பாக மாறியுள்ளது. பல பெரிய நிறுவனங்கள் புதிய ஊழியர்களை எடுப்பதை நிறுத்தி வைத்துள்ளன.
முன்பெல்லாம் பொருளாதாரச் சரிவின் போது மட்டுமே ஆட்குறிப்பு நடவடிக்கைகள் எடுக்கப்படும். ஆனால் இப்போது 'ஏஐ-க்கான எதிர்காலம்' என்ற பெயரில் நிறுவனங்கள் தங்களை மறுசீரமைப்பு செய்து வருகின்றன. கிளவுட் மற்றும் ஏஐ உள்கட்டமைப்புகளில் முதலீடு செய்வது, பழைய ஊழியர்களை வெளியேற்றுவது, அதிக ஆட்டோமேஷன் மூலம் லாபத்தைப் பெருக்குவது என்பதே தற்போதைய கார்ப்பரேட் நிறுவனங்களின் தாரக மந்திரமாக உள்ளது. தொழில்நுட்பம் வளர வளர, மனித உழைப்பிற்கான தேவை குறைந்து வருவது ஊழியர்கள் மத்தியில் பெரும் கவலையை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
