.png)
சமூக வலைதளத்தில் மலர்ந்த காதலுக்காக, உலகின் மிகக் கடுமையான பாதுகாப்பு கொண்ட எல்லைகளில் ஒன்றான இந்தியா-பாகிஸ்தான் எல்லையை, பாகிஸ்தான் ஆக்கிரமிப்பு காஷ்மீரைச் சேர்ந்த 22 வயது வாலிபர் ஒரு நபர் கடக்க முயன்ற சம்பவம் பெரும் பரபரப்பை ஏற்படுத்தியுள்ளது. ஜம்மு காஷ்மீரின் உரி பகுதியில் உள்ள ஒரு பெண்ணைச் சந்திப்பதற்காக அவர் இந்த அபாயகரமான முடிவை எடுத்துள்ளார். ஆனால், அவர் இந்திய எல்லைக்குள் நுழைந்த சில நிமிடங்களிலேயே இந்திய ராணுவ வீரர்களால் அவர் மடக்கிப் பிடிக்கப்பட்டார்.
ஞாயிற்றுக்கிழமை காலை சுமார் 9:30 மணியளவில், உரி செக்டாரின் சிலிகோட் பகுதியில் எல்லையைக் கடந்து ஒருவர் வருவதைக் கண்காணிப்பு பணியில் இருந்த வீரர்கள் கவனித்தனர். அவர் இந்திய எல்லைக்குள் நுழைந்த அடுத்த சில நிமிடங்களிலேயே பாதுகாப்புப் படையினரால் தடுத்து நிறுத்தப்பட்டு விசாரணைக்காக அழைத்துச் செல்லப்பட்டார். அவரிடம் இருந்த பாகிஸ்தான் அடையாள அட்டையின் மூலம், அவர் முசாஃபராபாத் பகுதியைச் சேர்ந்த ஜிஷன் அகமது மிர் என்பது உறுதி செய்யப்பட்டது.
தான் காதலியான இரம் பானோவைச் சந்திப்பதற்காகவே எல்லையைக் கடந்ததாக அந்த இளைஞர் பாதுகாப்பு அதிகாரிகளிடம் வாக்குமூலம் அளித்துள்ளார். சமூக வலைதளத்தின் வாயிலாக இவர்கள் இருவருக்கும் பழக்கம் ஏற்பட்டு, அதுவே நாளடைவில் காதலாக மாறியுள்ளது. எல்லையைக் கடந்த இளைஞரிடமும், அவர் சந்திக்க வந்ததாகக் கூறும் பெண்ணிடமும் பாதுகாப்பு முகமைகள் தீவிர விசாரணை நடத்தி வருகின்றன. அவர்களின் சமூக வலைதள உரையாடல்கள் மற்றும் அந்தப் பெண்ணின் பின்னணி குறித்தும் அதிகாரிகள் ஆய்வு செய்து வருகின்றனர்.
இதற்கிடையில், மற்றொரு சம்பவத்தில் சோபோர் பகுதியைச் சேர்ந்த மூன்று பேர் ஹத்லங்கா-நம்பலா பாதை வழியாகப் பாகிஸ்தான் ஆக்கிரமிப்பு காஷ்மீருக்குள் நுழைய முயன்றபோது இந்திய ராணுவத்தால் தடுத்து நிறுத்தப்பட்டனர். அவர்களில் அடில் ஹுசைன் தார் என்பவர் இடைநீக்கம் செய்யப்பட்ட ராணுவ வீரர் என்று கண்டறியப்பட்டுள்ளது. எல்லைப் பகுதியில் ஊடுருவல், போதைப்பொருள் கடத்தல் மற்றும் ட்ரோன் நடமாட்டத்தைத் தடுக்க இந்திய ராணுவம் எப்போதும் தீவிர கண்காணிப்பில் ஈடுபட்டு வருகிறது. ஜம்மு காஷ்மீரின் எல்லைப் பகுதிகள் முழுவதும் ராணுவம் தற்போது பாதுகாப்பை மேலும் பலப்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
