ட்ரம்ப் அறிவித்த போர்நிறுத்த ஒப்பந்தம் ஒரே நாளில் சுக்குநூறு - மிரண்டு நிற்கும் மத்திய கிழக்கு நாடுகள்!

அமெரிக்க அதிபர் டொனால்ட் ட்ரம்ப் மத்திய கிழக்கு நாடுகளில் நிலவி வரும் பதற்றத்தைத் தணிக்கக் கொண்டு வந்த போர்நிறுத்த ஒப்பந்தம், அமல்படுத்தப்பட்ட சில மணி நேரங்களிலேயே மிகப்பெரிய கேள்விக்குறியாகி உள்ளது. அமெரிக்கா மற்றும் ஈரான் இடையே இரண்டு வார கால தற்காலிகப் போர்நிறுத்தம் எட்டப்பட்டதாக அறிவிக்கப்பட்ட நிலையில், இஸ்ரேல் மற்றும் ஹிஸ்புல்லா அமைப்பினரிடையே ஏற்பட்ட மோதல் காரணமாக ஒட்டுமொத்தப் பிராந்தியமும் மீண்டும் ஒரு போர் மேகத்தின் பிடியில் சிக்கியுள்ளது.

அதிபர் ட்ரம்ப் தனது அதிரடிப் பேச்சுக்கள் மற்றும் ராஜதந்திர நடவடிக்கைகள் மூலம் ஈரானுடன் ஒரு உடன்பாட்டை ஏற்படுத்தினார். அதன்படி, ஈரான் தனது கட்டுப்பாட்டில் உள்ள ஹார்முஸ் ஜலசந்தியை மீண்டும் சர்வதேசப் போக்குவரத்திற்காகத் திறந்து விடுவதாகவும், ஈரானின் அணுசக்தி மையங்கள் மீதான தாக்குதல்களை அமெரிக்கா நிறுத்தி வைப்பதாகவும் முடிவு செய்யப்பட்டது. ஆனால், இந்த ஒப்பந்தம் ஈரானுக்கும் அமெரிக்காவுக்கும் மட்டுமே பொருந்தும் என்றும், லெபனானில் உள்ள ஹிஸ்புல்லா மீதான தாக்குதல்களைத் தாங்கள் நிறுத்தப் போவதில்லை என்றும் இஸ்ரேல் பிரதமர் பெஞ்சமின் நெதன்யாகு தடாலடியாக அறிவித்துள்ளார்.

நெதன்யாகுவின் இந்த அறிவிப்பைத் தொடர்ந்து, இஸ்ரேலிய போர் விமானங்கள் லெபனான் மீது மிகக் கடுமையானத் தாக்குதல்களைத் தொடுத்துள்ளன. வெறும் 10 நிமிட இடைவெளியில் லெபனானின் பல்வேறு பகுதிகளில் 100-க்கும் மேற்பட்ட ஏவுகணைகளை இஸ்ரேல் வீசியுள்ளதாகத் தகவல்கள் தெரிவிக்கின்றன. இதில் லெபனான் தலைநகர் பெய்ரூட் மற்றும் அதன் சுற்றுவட்டாரப் பகுதிகளில் உள்ள ஹிஸ்புல்லா அமைப்பின் முக்கியத் தளங்கள் சிதைக்கப்பட்டுள்ளன. இந்தத் தாக்குதல்களில் சுமார் 250-க்கும் மேற்பட்டோர் உயிரிழந்துள்ளதாகவும், ஆயிரக்கணக்கானோர் காயமடைந்துள்ளதாகவும் அதிர்ச்சித் தகவல்கள் வெளியாகியுள்ளன.

இஸ்ரேலின் இந்த அதிரடித் தாக்குதல் ஈரானைக் கடும் கோபத்திற்கு உள்ளாக்கியுள்ளது. போர்நிறுத்த ஒப்பந்தம் என்பது அனைத்துப் பகுதிகளுக்கும் பொருந்தும் என்று தாங்கள் கருதியதாகவும், லெபனான் மீதான இஸ்ரேலின் தாக்குதல் ஒப்பந்தத்தை மீறும் செயல் என்றும் ஈரான் எச்சரித்துள்ளது. இதற்குப் பதிலடியாக ஈரான் மீண்டும் ஏவுகணைகளை ஏவித் தாக்குதல் நடத்தியுள்ளதாகக் கூறப்படுகிறது. இதனால் ஹார்முஸ் ஜலசந்தியை மீண்டும் மூடுவதற்கும், போர்நிறுத்தத்திலிருந்து விலகுவதற்கும் ஈரான் தற்போது தீவிரமாக ஆலோசித்து வருகிறது. இது உலக நாடுகளிடையே பெரும் கலக்கத்தை ஏற்படுத்தியுள்ளது.

இந்த விவகாரத்தில் பாகிஸ்தான் பிரதமர் ஷேபாஸ் ஷெரீப் ஒரு முக்கிய மத்தியஸ்தராகச் செயல்பட்டு வந்தார். அவர் லெபனான் உட்பட அனைத்துப் பகுதிகளிலும் அமைதி நிலவும் என்று நம்பிக்கை தெரிவித்திருந்த நிலையில், இஸ்ரேலின் தன்னிச்சையான முடிவு அவரது முயற்சிகளுக்குப் பின்னடைவை ஏற்படுத்தியுள்ளது. அமெரிக்கத் தரப்போ, ஈரான் மீதான தாக்குதல் தற்காலிகமாக நிறுத்தப்பட்டுள்ளதை ஒரு வெற்றியாகப் பார்க்கிறது. ஆனால், லெபனானில் நடக்கும் மோதல் ஒப்பந்தத்தைப் பாதிக்குமா என்ற கேள்விக்கு வெள்ளை மாளிகை அதிகாரிகளிடம் இருந்து தெளிவான பதில்வரவில்லை.

அதிபர் டொனால்ட் ட்ரம்ப் அடுத்து என்ன செய்யப் போகிறார் என்பதே இப்போது ஒட்டுமொத்த உலகின் எதிர்பார்ப்பாக இருக்கிறது. ஒருபுறம் ஈரானை வழிக்குக் கொண்டு வரத் துடிக்கும் அவர், மறுபுறம் தனது நெருங்கிய கூட்டாளியான இஸ்ரேலைக் கட்டுப்படுத்த வேண்டிய கட்டாயத்தில் உள்ளார். ஈரானின் அணு ஆயுதத் திட்டங்களை முடக்குவதே தனது முக்கிய நோக்கம் என்று ட்ரம்ப் கூறி வருகிறார். அதே நேரத்தில், போர் நீண்டுகொண்டே போனால் உலகப் பொருளாதாரம் மற்றும் கச்சா எண்ணெய் விலை கடுமையாகப் பாதிக்கும் என்பதை அவர் நன்கு அறிவார்.

தற்போது நிலவும் இந்த குழப்பமான சூழலால் சர்வதேசச் சந்தையில் கச்சா எண்ணெய் விலை கிடுகிடுவென உயர்ந்து வருகிறது. ஈரானும் இஸ்ரேலும் நேரடியாக மோதிக்கொண்டால், அது ஒரு முழு அளவிலான போராக மாறி வல்லரசு நாடுகளையும் உள்ளே இழுக்கும் அபாயம் உள்ளது. ட்ரம்பின் 'அமைதித் திட்டம்' லெபனான் விவகாரத்தில் சிக்கித் தவிப்பதால், வரப்போகும் சில நாட்கள் மத்திய கிழக்கு நாடுகளுக்கும், உலக அமைதிக்கும் மிகவும் சவாலானதாக இருக்கும் என்பதில் சந்தேகமில்லை.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.