அடிதடி, வெட்டு-குத்து, ஆட்கடத்தல், கொலை, கொள்ளையென தொடர்கதையாகி வரும் ரவுடிகளின் அட்டகாசம் நாளுக்கு நாள் அதிகரித்து வருகிறது. குறிப்பாக தி.மு.க-வின் ஆட்சி காலத்தில் ரவுடிகளின் அராஜகம்  அதிகமாக இருக்கும் என்ற ஒரு கருத்து மக்களிடையே இருந்து வருவது நாம் அறியாததல்ல. இக்கருத்தை வேரறுக்க ஆளும் தி.மு.க ஆட்சிக்கு வந்தது முதலே பல்வேறு முயற்சிகளை காவல் துறை மூலம் மேற்கொண்டு வருகின்றனர். குறிப்பாக தலைநகரான சென்னையில் காவல் ஆணையர் சங்கர் ஜிவால் தலைமையிலான காவல் துறையினர் ரவுடிகளுக்கு எதிரான நடவடிக்கைகளை தீவிரப்படுத்தியுள்ளனர்.

இந்நிலையில் பெருகி வரும் ரவுடிகளின் அட்டகாசத்தை ஒடுக்க சென்னை காவல்துறை DARE எனப்படும் Direct Action against Rowdy Elements என்ற ஆப்பரேஷனை கையில் எடுத்துள்ளனர். இந்த ஆப்பரேஷன் மூலம் குறிப்பாக முக்கிய ரவுடிகளை A+ கேட்டகரி, A கேட்டகரி, B கேட்டகரி என அவர்களின் குற்றச் செயல்களுக்கு ஏற்ப வகைப்படுத்தி அடுத்தடுத்து கைது நடவடிக்கைகளை மேற்கொண்டு வருகின்றனர். கடந்த 10 ஆண்டுகளாக உள்ள ரவுடிகளின் செயல்பாடுகள் தொடர்ந்து கண்காணிக்கப்பட்டு வகைப்படுத்தும் பணி நடைபெற்று வருவதாக கூறுகிறார் சென்னை காவல் ஆணையர் சங்கர் ஜிவால்..

குறிப்பாக இந்த DARE ஆப்பரேஷனின் கீழ் பிரபல ரவுடிகளான சி.டி மணி, காக்காத் தோப்பு பாலாஜி உட்பட பலர் போலீசாரின் அதிரடி நடவடிக்கையின் கீழ் கைது செய்யப்பட்டு குண்டர் தடுப்புச் சட்டத்தின் கீழ் சிறையில் அடைக்கப்பட்டனர். மேலும், கடந்த சட்டமன்றத் தேர்தலின்போது வகைப்படுத்தி கைது செய்யப்பட்ட 166 முக்கிய குற்றவாளிகள் உட்பட 21 ஆயிரத்து 289 ரவுடிகளின் பட்டியலையும் சேகரித்து , அதில் எத்தனை பேர் தற்பொழுது சிறையில் உள்ளனர்? எத்தனை பேர் பிணையில் வெளியே சென்றுள்ளனர்? உள்ளிட்ட விவரங்களை பதிவு செய்து அதன் மூலமும் ரவுடிகளின் குற்ற நடவடிக்கைகளுக்கு ஏற்ப வகைப்படுத்தும் பணியானது தொடர்ந்து நடைபெற்று வருகிறது. மேலும் பிணையில் வெளியே சென்ற ரவுடிகளின் பட்டியலில் 39 பேர் தற்பொழுது தலைமறைவாக இருந்து வருவதால் தனிப்படை அமைத்து அவர்களை தேடும் பணியும் முடுக்கி விடப்பட்டுள்ளது.

இந்த ஆண்டு மட்டும் இதுவரை பல்வேறு குற்றச் செயல்கள் புரிந்த 194 குற்றவாளிகள் மீது குண்டர் தடுப்புச் சட்டத்தின் கீழ் நடவடிக்கை எடுக்கப்பட்டு சிறையில் அடைக்கப்பட்டுள்ளனர். மேலும், A+ கேட்டகரியைச் சேர்ந்த தொடர் குற்றச் செயல்களில் ஈடுபடும் 21 குள்ளவாளிகளின் பட்டியலையும் சென்னை காவல்துறை தயார் செய்து நடவடிக்கை மேற்கொள்ளவுள்ளதாகவும் தெரிவிக்கப்பட்டுள்ளது. எனினும் குண்டர் தடுப்புச் சட்டத்தின் கீழ் எடுக்கப்படும் நடவடிக்கை, கைது செய்யப்பட்ட ரவுடிகள் பாத்ரூமில் வழுக்கி விழும் சம்பவங்கள், அதையும்தாண்டி தங்களைத் தாக்க வரும் ரவுடிகளைத் தற்காப்புக்காக என்கவுண்டர் செய்யும் சம்பவங்கள் என காவல் துறையினரின் இத்தனை செயல்பாடுகளையும் தாண்டி ரவுடியிசம் தொடர்கதையாகியுள்ளது.

ஒவ்வொரு A+ கேட்டகரி ரவுடிகள் மீதும் நீதிமன்றங்களில் 30-40 வழக்குகள் நிலுவையில் இருந்து வருவதாக தரவுகள் தெரிவிக்கின்றன. வழக்குகள் முடிவடையாமல் நிலுவையில் இருக்கும்போதும் பிணையில் வெளியே வந்து மீண்டும் ரவுடிகள் குற்றச் செயல்களில் ஈடுபடுட்டு வருவதோடு சட்டத்தில் உள்ள ஓட்டையைப் பயன்படுத்தியே இவர்கள் தப்பித்து வருகின்றனர். காவல் துறையினரின் நடவடிக்கை எத்தனை கடுமையானதாக இருந்தாலும், சட்டத்தில் உள்ள ஓட்டைகளை அடைத்து நிலுவையில் உள்ள வழக்குகளை இரு முடிவுக்குக் கொண்டு வந்து குற்றவாளிகளை நிரந்தரமாக சிறைகளில் அடைத்தாலே ரவுடி கும்பலின் இந்த சாம்ராஜ்யம் ஒரு முடிவுக்கு வரும் என்பதில் மாற்றுக்கருத்தில்லை.

போலி தங்க நகைகளைக் கொடுத்து வாடிக்கையாளரை இரண்டு முறை ஏமாற்றிய பிரபல தி.நகர் சரவணா ஸ்டோர் தங்க நகை மாளிகை நிர்வாகத்தின் மீது இரண்டு பிரிவுகளில் வழக்குப் பதிவு செய்யப்பட்டுள்ளது.

சென்னை ஐயப்பன் தாங்கல், ஸ்ரீராம் நகரை சேர்ந்தவர் திரிவேணி(37). மருத்துவரான இவர்,  சென்னை அரசு மருத்துவ கல்லூரியில் பேராசிரியராக பணியாற்றி வருகிறார்.

இவர் கடந்த ஜூன் மாதம் 22-ம் தேதி மாம்பலம் காவல் நிலையம் மற்றும் சென்னை காவல் ஆணையர் அலுவலகத்துக்கு தபால் மூலம் புகார் ஒன்றை அளித்திருந்தார். 

அந்த புகாரில், "தான் 2015-ம் ஆண்டு தி.நகரில் உள்ள சரவணா ஸ்டோர் தங்க நகை மாளிகையில் 24 கிராம் தங்க வளையல் வாங்கியதாகவும், அதேபோல 2016-ம் ஆண்டு 23.630 கிராம் தங்க செயின் வாங்கியதாகவும் தெரிவித்திருந்தார். இந்த நிலையில் 2016ஆம் ஆண்டு வாங்கிய தங்கச் செயினானது கடந்த 2019ஆம் ஆண்டு அறுந்து விழுந்ததாகவும் அறுந்து விழுந்த செயினை எடுத்து பார்த்தபோது அதனுள் வெள்ளி கம்பிகள் இருந்ததாகவும்" தெரிவித்துள்ளார்.   

மேலும், "இது குறித்து சரவணா ஸ்டோர் தங்க நகை மாளிகை மேலாளரிடம் சென்று முறையிட்டபோது, நகை செய்யும் போது இது தெரியாமல் நடந்திருக்கலாம் எனவும் அதற்காக அவர் மன்னிப்புக் கேட்டு வேறு நகைகளை மாற்றி கொடுத்ததாகவும்" புகாரில் தெரிவித்த மருத்துவர் திரிவேணி, அதனால் காவல்நிலையத்தில் புகார் எதுவும் கொடுக்காமல் நகையை மாற்றிக் கொண்டு வந்து விட்டதாக தெரிவித்திருந்தார். 

இந்த நிலையில் கடந்த 2015-ம் ஆண்டு வாங்கிய வளையல் சமீபத்தில் உடைந்து போனதாகவும் அப்போது அதை சோதனை செய்து பார்த்தபோது வளையல் கற்களுக்கு கீழே அதிக அளவில் அரக்கு வைக்கப்பட்டு தங்களை ஏமாற்றியதாகவும், தாங்கள் வாங்கிய இரண்டு நகைகளிலும் தங்களை ஏமாற்றியது போல், பல வாடிக்கையாளர்களை இதேபோல் போலியாக தங்கநகை கொடுத்து ஏமாற்றி இருக்கலாம்? எனவும் இதனால் சரவணா ஸ்டோர் தங்க நகை மாளிகை மீது தக்க நடவடிக்கை எடுக்க வேண்டும் எனவும் அவர் கடந்த ஜூன் 22ஆம் தேதி மாம்பலம் காவல் நிலையம் மற்றும் காவல் ஆணையர் அலுவலகத்தில் தபால் மூலம் அளிக்கப்பட்ட புகாரில் தெரிவித்திருந்தார். 

இதனையடுத்து காவல்துறை சரவணா ஸ்டோர் தங்க நகை மாளிகையின் மீது சரியான முறையில் நடவடிக்கை எடுக்காததால் மருத்துவர் திரிவேணி நீதிமன்றத்தில் வழக்கு தொடுத்துள்ளார். 

மருத்துவர் திரிவேணியிடம் இரண்டு முறை போலியான தங்க நகைகளை கொடுத்ததாக அளிக்கப்பட்ட புகாரில் உடனடியாக விசாரணையை தொடங்க வேண்டும் என நீதிமன்றம் மாம்பலம் காவல் நிலையத்திற்கு உத்தரவிட்டிருந்தது. 

நீதிமன்ற உத்தரவின்படி வழக்கை விசாரித்த போது சரவணா ஸ்டோர் தங்க நகை மாளிகை மருத்துவர் திரிவேணியை இரண்டு முறை போலியான தங்க நகைகளை கொடுத்து ஏமாற்றியது தெரிய வந்தது. 

இதனடிப்படையில் சரவணா ஸ்டோர் தங்க நகை மாளிகை நிர்வாகத்தின் மீது மோசடி செய்தல் மற்றும் நம்பிக்கை மோசடி ஆகிய இரண்டு பிரிவுகளின் கீழ் வழக்குப்பதிவு செய்து மாம்பலம் போலீசார் விசாரணை மேற்கொண்டு வருகின்றனர்.

பிரபல நகை கடையான தி.நகர் சரவணா ஸ்டோரில் வாடிக்கையாளர் ஒருவர் இரண்டு முறை தங்க நகைகள் வாங்கியதும், 2 முறை வாங்கிய தங்க நகைகளிலும் வெள்ளிக் கம்பிகள் மற்றும் அரக்குகள் வைத்து வாடிக்கையாளரை சரவணா ஸ்டோர் தங்க நகை மாளிகை ஏமாற்றியதால் அதன்மீது வழக்கு பதியப்பட்டு இருப்பதும் சரவணா ஸ்டோர் தங்க நகை மாளிகை வாடிக்கையாளர்கள் இடையே பெரும் அதிர்ச்சியை ஏற்படுத்தியுள்ளது.

கேரளாவில் 31 வயதான ஒரு பெண் திருவனந்தபுரத்தில் டெக்னோபார்க்கில் பணிபுரிந்த மென்பொருள் பொறியாளரை திருமணம் செய்து கொண்டார். அந்த பெண் அங்குள்ள ஒரு பள்ளியில் டீச்சராக பணியாற்றினார். முன்னதாக திருமணத்தின் போது பெண் வீட்டில் இருந்து 50 சவரன் நகை போடப்பட்டுள்ளது. சில நாட்களுக்கு பிறகு புதிய வீடு ஒன்று வாங்குவதற்காக 50 சவரன் நகையை கணவரும் மாமியாரும் கேட்டுள்ளனர். ஆனால் அப்பெண் நகையை தர மறுத்துவிட்டார்.

அதனால் அந்த பெண்ணை அந்த கணவரும் மாமியாரும் கடுமையாக தினமும் தாக்கியுள்ளனர். மேலும் அவருக்கு சாப்பாடு கூட போடாமல் பல நாட்கள் வீட்டில் அடைத்து வைத்து பட்டினி போட்டுள்ளனர். பின்னர் ஒரு நாள் அங்கிருந்து தப்பித்த அவர் தந்தை வீட்டிற்கு வந்த நடந்ததை கூறியுள்ளார். இதுகுறித்து மாபிள்ளையை தட்டிக்கேட்ட அந்த பெண்ணின் தந்தையையே கணவர் வீட்டார் அடித்து உதைத்துள்ளார்கள். இதனால் அதிர்ச்சி அடைந்த அவர், சம்பவம் குறித்து காவல் நிலையத்தில் மகளுடன் சென்று புகார் கொடுத்தனர்.

தொடர்ந்து போலீசார் வழக்கு பதிந்து அந்த பெண்ணின் கணவர் மற்றும் அவரின் குடும்பத்தினரை கைது செய்து விசாரித்து வருகின்றனர். போலீஸ் விசாரணையில் அந்த பெண்ணின் கணவர் ஏற்கனவே திருமணமானவர் என்றும், அவரின் கொடுமை தாங்காமல் முதல் மனைவி பிரிந்து சென்று விட்டதையும் ,இதை மறைத்து அந்த பெண்ணை இரண்டாவது திருமணம் செய்து கொண்டதையும் கண்டுபிடித்தனர். தொடர்ந்து விசாரணை நடைபெற்று வருகிறது.

10 நிமிடங்களில் அப்டேட் செய்யாவிட்டால் உங்கள் வங்கி கணக்கு முடக்கப்படும் என மொபைலுக்கு வரும் மெசேஜ் லிங்கை கிளிக் செய்ய வேண்டாம் என சைபர் கிரைம் போலீசார் பொதுமக்களுக்கு எச்சரிக்கை விடுத்துள்ளனர்.

அண்மைகாலமாக செல்போன்களில் வரும் மெசேஜ்கள் மூலம் மோசடி செய்வது அதிகரித்து வருகிறது. இதனால் பொதுமக்கள் விழிப்புணர்வுடன் இருக்க வேண்டும் என போலீசார் எச்சரித்து வருகின்றனர். அந்த வகையில், 10 நிமிடங்களில் அப்டேட் செய்யாவிட்டால் உங்கள் வங்கி கணக்கு முடக்கப்படும் என மொபைலுக்கு வரும் மெசேஜ் லிங்கை கிளிக் செய்ய வேண்டாம் என சைபர் கிரைம் போலீசார் பொதுமக்களுக்கு எச்சரிக்கை விடுத்துள்ளனர். அவ்வாறு கிளிக் செய்து விபரங்களை பதிவிடுவதன் மூலம் மோசடி கும்பல் பணத்தை திருடி வருகின்றனர். அதனால் இது போல் வரும் மெசேஜை யாரும் நம்பவேண்டாம் என்றும் தெரிவித்துள்ளனர்.

தமிழகத்தில் கடந்த சில நாட்களாக பணமோசடி அதிக அளவு நடைபெற்று வருவதால் இந்த எச்சரிக்கை பொதுமக்களுக்கு விடுக்கப்பட்டுள்ளது.