கடந்த 2019ஆம் ஆண்டு மக்களவை தேர்தல் தோல்விக்கு பின் காங்கிரஸ் கட்சியின் தேசியத் தலைவராகயிருந்த ராகுல் காந்தி தேர்தல் தோல்விக்கு முழுப் பொறுப்பையும் தானே ஏற்றுக்கொண்டுத் தனது தலைவர் பதவியை ராஜினாமா செய்தார். அதனையடுத்து 2017ஆம் ஆண்டிற்குப் பின்னர் சோனியா காந்தி மீண்டும் 2019ல் காங்கிரஸ் கட்சியின் தேசிய இடைக்காலத் தலைவராகப் பொறுப்பேற்றுக் கொண்டார்.

உறுதியான ராகுல் காந்தி:

 
ராகுல் மீண்டும் கட்சியின் தலைவராக வேண்டும் என்று அக்கட்சியின் தலைவர்கள் பலர் வலியுறுத்தி வரும் நிலையில் "நான் கட்சிக்காகவும் நாட்டு மக்களின் நலனுக்காகவும் களத்தில் நின்றுப் போராடுகிறேன் ஆனால் உறுதியாக நான் தலைவர் பதவிக்குப் போட்டியிடமாட்டேன்" என திட்டவட்டமாக ராகுல் காந்தி கூறியுள்ளார். தனது உடல்நிலை மற்றும் வயது மூப்பின் காரணமாக அடிக்கடி ஓய்வுவெடுக்க வேண்டியிருப்பதால் சோனியா காந்தியும் கட்சியின் தலைவராக முடியாது என்றுத் தெரிவித்துள்ளார்.

யார் தேசியத் தலைவர்?

சசி தரூரும், அசோக் கெலாட்டும் தேர்தல் அறிவிப்பிற்குப் பின்னர் சோனியா காந்தியை சந்தித்துப் பேச்சு வார்த்தை நடத்தியுள்ளனர். இதனை அடுத்து  இருவரில் தலைவராகும் வாய்ப்பு யாருக்கு அதிகம் இருக்கிறது என்ற எதிர்ப்பார்ப்பு காங்கிரஸை சார்ந்தத் தலைவர்கள் மற்றும் தொண்டர்கள் மத்தியில் அதிகரித்துள்ளது, எனினும் அசோக் கெலாட்டிருக்கு அதிக வாய்ப்புள்ளதாக செய்திகள் பரவி வருகிறது.

நம்பிக்கை நாயகன்:

பாஜக ஆட்சியைப் பிடித்ததிலிருந்து காங்கிரஸ் தொடர் சரிவுகளை சந்தித்து வருகிறது. உள்கட்சியில் ஏற்படும் பிரச்சனைகள், கட்சி தாவல்கள் என காங்கிரஸின் பலம் நாளுக்கு நாள் குறைந்துக் கொண்டேயிருக்கிறது. ஆபரேஷன் தாமரையை செயல்படுத்தி காங்கிரஸ் கட்சியின் சட்டமன்ற உறுப்பினர்களை விலைக்கு வாங்கி கர்நாடகாவிலும் மத்திய பிரதேசத்திலும் ஆட்சியைக் கைப்பற்றியது பாஜக.

அதே பாணியில் ராஜஸ்தான் அரசையும் கவிழ்க்க நினைத்தது, ஆனால் அசோக் கெலாட் தனது சாமர்த்தியத்தால் அதிருப்தி எம்.எல்.ஏக்களை சமாதானம் செய்து பாஜகாவின் ஆபரேஷன் தாமரையைத் தோல்வியுற செய்தார். இதனால் ராகுல் காந்தி குடும்பத்தின் "நம்பிக்கை நாயகனாக"  அசோக் கெலாட் இருப்பதால் கட்சியின் தலைவராகும் வாய்ப்பு அவருக்கே அதிகம் உள்ளதாக அரசியல் வட்டாரங்கள்  தெரிவிக்கின்றன.

மூன்று முறை ராஜஸ்தான் முதல்வராக இருந்த அசோக் கெலாட், திறமையான அரசியல்வாதி. அவர் காங்கிரஸ் தலைவரானால், கட்சியை மீண்டும் கட்டமைப்பதை விட அவருக்கு மிகப்பெரிய சவால் காத்துள்ளது.

சவால்கள்:

காங்கிரஸ் கட்சியின் புதிய தலைவருக்கான போட்டியில் முதல்வர் அசோக் கெலாட் முன்னிலை வகித்து வருகிறார்.  காங்கிரஸ் தலைவராக அசோக் கெலாட் பதவியேற்றால், நலிவடைந்த கட்சிக்கு மீண்டும் புத்துயிர் அளிப்பது மிகப்பெரிய சவாலாக இருக்கும். இது தவிர, கட்சிக்கு வெளியே சவால்கள் இருக்கும் அளவுக்கு, கட்சிக்குள்ளும் அதை விட சவால்கள் இருக்கும். அசோக் கெலாட் தலைவரானால் அவர் முன் என்ன சவால்கள் இருக்கும் என்பதை அறிந்து கொள்ளலாம்.

கட்சி பூசல்:

2014 மற்றும் 2019 லோக்சபா தேர்தல்களில் காங்கிரஸ் தோல்வியை சந்திக்க வேண்டியிருந்தது. இது தவிர, நாட்டின் பழமையான கட்சி ஒன்றன் பின் ஒன்றாக ஒவ்வொரு சட்டசபை தேர்தல்களிலும் தோல்வியையே தழுவியது. இதனால் விரக்தியுற்ற பல எம்எல்ஏக்கள் கட்சியை விட்டு வெளியேறினர். தொண்டர்கள் மத்தியிலும் அதிருப்தியே நிலவுகிறது. இத்தகைய சூழ்நிலையில், தொண்டர்களிடம் உற்சாகத்தை ஏற்படுத்துவது மிகப்பெரிய சவாலாக இருக்கும். 

அதிருப்தி தலைவர்கள்:

காங்கிரஸில் முதல்முறையாக காந்தியல்லாத குடும்பம் தலைவராகும் வாய்ப்பு ஏற்பட்டுள்ளது. முதலமைச்சர் அசோக் கெலாட் தலைவர் பொறுப்பை ஏற்றால், மூத்த காங்கிரஸ் தலைவர்களுடன் இணக்கமாக நடக்க வேண்டும். இதனுடன், அதிருப்தி தலைவர்களின் குழுவான  ஜி 23 என்பதும் கெலாட்டுக்கு முக்கிய சவாலாக இருக்கும். ஜி23இல் உள்ள தலைவர்கள் எப்போதும் விரிவான  மாற்றத்தை கோரிக்கை வைத்து வருகின்றனர். 

ராஜஸ்தான்:

இது தவிர, ராஜஸ்தானில் உள்ள உள் முரண்பாடுகளைச் சமாளிப்பது கெலாட்டுக்கு மிகவும் கடினமாக இருக்கும் . அசோக் கெலாட் தலைவரானதும் சச்சின் பைலட் முதலமைச்சரானால், கெலாட் தனது ஆதரவாளர்களை நம்ப வைப்பதில் சிரமம் ஏற்படும். பல சட்டமன்ற உறுப்பினர்கள் பைலட்டை முதலமைச்சர் ஆவதை எதிர்க்கலாம்.  கெலாட் முதலமைச்சராக பைலட்டை தேர்வு செய்யாவிட்டால் பைலட் பிரிவு கிளர்ச்சி செய்யலாம். அத்தகைய சூழ்நிலையில், கெலாட் தனது சொந்த மாநிலத்திலேயே முரண்பாட்டை சந்திக்க நேர்ந்தால் காங்கிரஸ் தலைவராக  தோல்வியுற்றவராகவே கருதப்படுவார். 

கட்சியின் செயல்திறன்:

காங்கிரஸை புத்துயிர் பெற அவர் உறுதியான நடவடிக்கைகளை எடுக்க வேண்டும். ஏறக்குறைய அறுபது ஆண்டுகளாக நாட்டில் ஆட்சி செய்த கட்சியின் நிலை, தற்போது மிகவும் மோசமான நிலையில் உள்ளது. இதுபோன்ற சூழ்நிலையில், அடுத்த தேர்தலில் கட்சியின் செயல்திறனை மேம்படுத்துவது மிகப்பெரிய சவாலாக இருக்கும்.

இந்துத்துவா அரசியல்:

புதிய தலைவர் முன் இருக்கும் மிகப்பெரிய சவால் பா.ஜ.க.வுடன் போட்டி போடுவதுதான். தேசியவாதம் மற்றும் இந்துத்துவா பிரச்சினையில் பாஜக தேர்தல் களத்தில் இறங்கி காங்கிரசை சுற்றி வளைத்துள்ளது. இதுபோன்ற சூழ்நிலையில், அசோக் கெலாட் காங்கிரஸின் தலைமைப் பொறுப்பை ஏற்றால், பாஜகவுக்கு தகுந்த பதிலடி கொடுக்கும் வியூகத்தை அவர் வகுக்க வேண்டும். 

முதல் சோதனை:

அதே நேரத்தில் 2023 சட்டமன்ற மற்றும் 2024 மக்களவைத் தேர்தல்களில் காங்கிரஸின் செயல்திறனை மேம்படுத்துவது மிகப்பெரிய சவாலாக இருக்கும். குஜராத் மற்றும் ஹிமாச்சல் தேர்தல்களில், புதிய தலைவருக்கான சவால் பெரிய அளவில் இருக்கும். 

பிற்படுத்தப்பட்ட மற்றும் பட்டியல் இன வாக்கு வங்கி:

அசோக் கெலாட் மாலி சமூகத்தைச் சேர்ந்தவர். ஓபிசி வாக்குகளை குறிவைப்பது கெலாட்டுக்கு எளிதாக இருக்கலாம் ஆனால் பிற்படுத்தப்பட்ட மற்றும் பட்டியல் இன சமூகத்தின் வாக்குகளைப் பெற அவர் மிகவும் கடினமாக உழைக்க வேண்டியிருக்கும். குடியரசுத் தலைவர் தேர்தல் முதல் மாநிலங்களவைத் தேர்தல் வரை பிற்படுத்தப்பட்டோர் மற்றும் தாழ்த்தப்பட்டோர் கட்சி என்ற பிம்பத்தை பாஜக உருவாக்கியுள்ளது.

இத்தகைய சூழ்நிலையில், பாஜகவின் இந்த பிம்பத்தை உடைத்தால் மட்டுமே, பிற்படுத்தப்பட்ட மற்றும் பட்டியல் இன சமூகத்தினரின் அதிகபட்ச வாக்குகளைப் பெற முடியும். இதனுடன், சத்திரியர்கள், ஜாட்கள் மற்றும் பிராமணர்கள் ஆதிக்கம் செலுத்தும் ராஜஸ்தானின் அரசியலையும் தக்க வைத்துக் கொள்ள வேண்டும்.

இதையும் படிக்க:  ’அண்ணா மாடல்’ vs ’மோடி மாடல்’

சூடுப் பிடிக்கும் திமுக மாவட்டப் நிர்வாகிகளுக்கான இறுதிக்கட்ட வேட்புமனுத்  தாக்கல்

திமுக உட்கட்சி தேர்தல் 

திமுக நிர்வாகிகளுக்கானத் தேர்தல் கடந்த சில மாதங்களாக நடைபெற்றுக் கொண்டிருக்கிறது. இதில் வட்டப்  பொறுப்புகள் மற்றும் பகுதிப் பொறுப்புகளுக்கானத் தேர்தல் முடிவுகள் வந்த நிலையில், மாவட்ட நிர்வாகிகளுக்கான வேட்புமனுத் தாக்கல் கடந்த 22-ஆம் தேதி தொடங்கி இன்றுடன் முடிவடைகிறது. முதல் நாள் மனுத்தாக்கலின் போது 19 மாவட்டங்களும், இரண்டாவது நாளில் 21 மாவட்டங்களும், மூன்றாவது நாளான நேற்று 16 மாவட்டங்களுக்கான மனுக்களும் பெறப்பட்டது. இந்நிலையில் இறுதி நாளான இன்று சென்னை மாவட்டம் உள்பட 16 மாவட்டங்களுக்கான வேட்புமனு தாக்கல் நடைபெறவுள்ளது.

மாவட்ட நிர்வாகம்

மாவட்ட செயலாளர் மட்டுமல்லாது மாவட்ட துணை செயலாளர், மாவட்ட பொருளாளர், தலைமை செயற்குழு உறுப்பினர் மற்றும் தலைமை பொதுக்குழு உறுப்பினர் உள்ளிட்டப் பதவிகளுக்கும் தேர்தல் நடைப்பெற இருக்கிறது. இப்பதவிகள் அனைத்திற்கும் அந்தந்த மாவட்டத்தை சேர்ந்த செயலாளர்களேப் போட்டியின்றி நிர்வாகிகளைத் தேர்ந்தெடுத்துள்ளனர். அதில் சிலப் பொறுப்புகளுக்குத் தலைமையில் இருந்து சிலப் பெயர்கள் பரிந்துரைக்கப்பட்டதால் தனது ஆதரவாளர்களுக்குப் பொறுப்பைத் தர முடியவில்லை. இதனால் அம்மாவட்டத்தை சேர்ந்த மூத்த உடன்பிறப்புகள் மன வேதனைக்கு ஆளாகியுள்ளதாக தகவல்கள் வெளியாகியுள்ளது.  

மேலும் படிக்க: திமுக மாவட்ட செயலாளர்களுக்கான தேர்தல்.. 26,27-ம் தேதிகளில் வேட்பு மனு பரிசீலனை..!

அதிகார செயலாளர்கள்  

தமிழக அரசியலைப் பொருத்தவரையில் எந்த கட்சியாகயிருந்தாலும்  கழகத் தலைவருக்கு அடுத்தப்படியாக அதிகாரமானப் பொறுப்பென்று பார்த்தால் அது மாவட்ட செயலாளர்கள் தான்.  ஒரு அமைச்சரைப் போன்ற அதிகாரமிக்கவர்கள் மாவட்ட செயலாளர்கள் என்பதாலும், பெரும்பாலும் சட்டமன்ற உறுப்பினருக்கான  வாய்ப்புகள் மாவட்ட செயலார்களுக்கே எளிதில் கிடைப்பதாலும் அப்பதவியை அடையக் திமுகவின் மூத்த உடன்பிறப்புகள் பல்வேறு வழிகளில் முயற்சித்து வருகின்றனர்.

பட்டியலிட்ட சின்னவர் 

மாவட்ட செயலாளர்களுக்கானத் தேர்தல் நடக்கவிருக்கும் நிலையில் 15 பேர் கொண்டப் பட்டியலைத் தயார் செய்துள்ளார் திமுகவின் இளைஞரணி செயலாளர் உதயநிதி ஸ்டாலின். ஏற்கனவே மாவட்ட செயலாளர் பொறுப்புக்கு கடும் போட்டி நடந்துவரும் நிலையில் சின்னவர் கொடுத்தப் பட்டியல் அறிவாலயத்தில் சலசலப்பை ஏற்படுத்தியுள்ளது. அப்பட்டியலில் இளைஞரணியை சேர்ந்தவர்களுக்கு அதிக முக்கியத்துவம் கொடுக்கப்பட்டுள்ளதால் கழகத்தின் மூத்த உடன்பிறப்புகள் மத்தியில் சற்று பதற்றம் நிலவி வருகிறது.

ஸ்டாலினின் முதல் தேர்தல்

திமுக தலைவராக மு.க. ஸ்டாலின் அவர்கள் பொறுப்பேற்ற பின்னர் நடக்கும் முதல் தேர்தல் என்பதால் மாவட்ட நிர்வாகிகளை தேர்ந்தெடுப்பதில் தானே முழு கவனம் செலுத்தி வருகிறார். இதற்கெனக் கட்சியின் தகவல் தொழில்நுட்பப் பிரிவு மற்றும் உளவுத்துறைக் கொடுத்துள்ள அறிக்கையைக் கொண்டும் மற்றும் இளைஞரணியை சேர்ந்தவர்களுக்கு முக்கியத்துவம் கொடுக்கும் வகையில் உதயநிதி ஸ்டாலின் கொடுத்த தனிப் பட்டியலைக் கொண்டும் புதிய மாவட்ட செயலாளர்கள் பட்டியலைக் கழக தலைவர் ஸ்டாலின் இறுதி செய்துள்ளார் என அரசியல் வட்டாரங்கள் தெரிவிக்கின்றன. 

தேர்தல் முடிவுகள் 

இன்றுடன் வேட்புமனுத் தாக்கல் முடிவடையவுள்ள நிலையில், வரும் செப்டம்பர் 26 மற்றும் செப்டம்பர் 27-ஆம் தேதிகளில் மனுக்கள் பரிசீலனை செய்யப்பட்டு வேட்பாளர்கள் அறிவிக்கப்படுவார்கள். அதன் பின்னர் மாவட்ட நிர்வாகிகளுக்கானத் தேர்தல் நடைபெற்று முடிவுகள் வெளியிடப்படும் என்று திமுகவின் பொதுச்செயலாளர் துரைமுருகன் அறிவித்துள்ளார்.

-------- அறிவுமதி அன்பரசன்

கிரிக்கெட் காதலரகளால் மறக்க முடியாத தினமான இன்று 2007 ஆம் ஆண்டு முதலாவது டி20 உலகக் கோப்பையை தோனி தலைமையிலான இந்திய அணி அபாரமாக வென்று சாதனை படைத்தது.

இந்திய அணி:

நீண்ட தலைமுடியுடன் தோனி, முழுவதும் இளம் வீரர்கள், உற்சாகம் பீறிடும் வகையில் பந்துவீச்சு, ஃபீல்டிங், தேவைக்கு ஏற்பட அதிரடி ஆட்டம் என அனைத்தும் கலந்த கலவையாக இந்திய அணி இருந்தது.

2007 டி20 போட்டி:

2007-ம் ஆண்டு டி20 உலகக் கோப்பைப் போட்டி தென் ஆப்பிரிக்காவில் நடந்தது. மொத்தம் 12 அணிகள் போட்டியிட்டன. 3 ஆட்டங்களில் இந்திய அணி 2 வெற்றிகளுடன் அரையிறுதிக்கு முன்னேறியது. அரையிறுதியில் பலமிக்க ஆஸ்திரேலிய அணியை வீழ்த்தி இறுதி போட்டிக்கு முன்னேறியது இந்தியா.

இந்தியா - பாகிஸ்தான்:

மறுபுறம், நியூஸிலாந்தை வீழ்த்திய பாகி்ஸ்தான் அணி இறுதிப் போட்டிக்குத் தகுதி பெற்றது. பரபரப்பான இறுதி ஆட்டம், அதிலும் பாகிஸ்தானுடன் இறுதி போட்டி என்றால் கேட்கவா வேண்டும். தொடக்கம் முதல் கடைசி ஓவரை வரை போட்டியை பார்த்த அனைவரும் இருக்கையின் நுனியில் இருந்தனர் என்றே கூறலாம்.

இறுதி ஆட்டம்:

செப்டம்பர் 24-ம் தேதி இந்தியா, பாகிஸ்தான் அணிகள் இறுதிப் போட்டியில் மோதின. டாஸ் வென்ற இந்திய அணி முதலில் பேட்டிங் செய்தது.

முதலில் பேட் செய்த இந்திய அணி 20 ஓவர்களில் 5 விக்கெட் இழப்புக்கு 157 ரன்களில் சேர்த்தது. 158 ரன்கள் சேர்த்தால் வெற்றி எனும் இலக்குடன் பாகிஸ்தான் அணி களமிறங்கியது. முதல் ஓவரிலேயே முகமது ஹபீஸ் ஆட்டமிழக்க, 3-வது ஓவரில் கம்ரான் அக்மல் டக்அவுட்டில் வெளியேறினர். இரு பெரிய விக்கெட்டுகள் வீழ்ந்ததால் இந்திய ரசிகர்கள் நிம்மதிப் பெருமூச்சு விட்டனர்.

பரபரப்பான நிமிடங்கள்:

கடைசி ஓவரில் வெற்றிக்கு 13 ரன்கள் தேவை என்ற நிலையில்,  பாகிஸ்தானிடம் ஒருவிக்கெட் மட்டுமே மீதம் இருந்தது. கடைசி ஓவரை அனுபவமில்லாத ஜோகிந்தர் சர்மாவிடம் தோனி அளித்தார். முதலிரண்டு பந்துகளை வீணாக்கிய மிஸ்பா , 3-வது பந்தில் சிக்ஸர் அடித்து பரபரப்பை எகிறச் செய்தார்.

வெற்றி:

கடைசி 4 பந்துகளுக்கு 6 ரன்கள் தேவை. 4-வது பந்தை ஜோகிந்தர் சர்மா வீசும் முன்னர் தோனி அவரிடம் சென்று ஏதோ பேசினார். அதன்பின் நன்றாக மூச்சை இழுத்துவிட்டு, ஜோகிந்தசர் சிங் வீசிய பந்தை மிஸ்பா உல் ஹக் ஸ்கூப் ஷாட் அடிக்க முயன்று பின்புறம் தூக்கி அடித்தார். சிக்ஸர் போகும் என்று எதிர்பார்க்கப்பட்ட நிலையில் தேர்டுமேன் திசையில் நின்றிருந்த ஸ்ரீசாந்த் கையில் கேட்ச்சாக விழுந்தது. இந்திய அணைக்கு வெற்றியாகவும் மாறியது.

கொண்டாட்டங்கள்:

ஜோகிந்தர் சர்மாவை பார்த்து ஓடிவந்த தோனி அவரைக் கட்டி அணைத்து, தூக்கி தனது மகிழ்ச்சியை வெளிப்படுத்தினார். இந்திய அணி தனது முதலாவது டி20 உலகக் கோப்பையை தோனி தலைமையில் அபாரமாக வென்றது. இந்திய கிரிக்கெட் ரசிகர்கள் அந்த வெற்றியை கொண்டாடி தீர்த்தனர்.

அழகிய அந்த தருணத்தைக் கடந்து ஏறக்குறைய 15 ஆண்டுகள் ஓடிவிட்டன. ஆனால் இன்னும் அந்தப் போட்டி இன்றும் கிரிக்கெட் ரசிகர்கள் நினைவில் உள்ளது. உலகக் கோப்பை வென்ற அந்த தருணத்தை நினைவுகூர்ந்து பிசிசிஐ, ஐசிசி, சென்னை சூப்பர் கிங்ஸ் தனது அதிகாரபூர்வ இணைய பக்கத்தில் பகிர்ந்து மகிழ்ச்சி தெரிவித்துள்ளனர். கிரிக்கெட் ரசிகர்களும் புகைப்படங்களை தங்களது மகிழ்ச்சியை வெளிப்படுத்தி வருகின்றனர்.

விருதுநகரில்  அண்ணா பிறந்தநாள் விழா பொதுக்கூட்டத்தில் பேசிய முன்னாள் அமைச்சர் கே.டி ராஜேந்திர பாலாஜி, அண்ணாவை திமுக மறந்துவிட்டதாகவும், அண்ணாவின் பெயரையும் புகழையும் குப்பையில் தூக்கி போட்டு விட்டதாகவும்  குற்றம் சாட்டினார். 

அண்ணாவை மறந்த திமுக:

விருதுநகரில்  அ.இ.அ.தி.மு.க சார்பில் நடைபெற்ற  அண்ணா பிறந்தநாள் விழா பொதுக்கூட்டத்தில் முன்னாள் அமைச்சர் கே.டி ராஜேந்திர பாலாஜி கலந்து கொண்டு உரையாற்றினார். அப்போது பேசிய அவர், அண்ணாவின் பெயரை சொல்லி  குறுக்கு வழியில் கட்சியை கைப்பற்றி ஆட்சிக்கு வந்த திமுக அண்ணாவின் பெயரையும் புகழையும் குப்பையில் தூக்கி போட்டு விட்டதாக திமுகவை சாடி பேசினார். மேலும், வாக்களித்த மக்களையும், தாய்மார்களைப் பற்றி சிந்திக்காமல் அதிமுக ஆட்சியில் இருந்த தாலிக்கு தங்கம் திட்டம், அம்மா மகப்பேறு சஞ்சீவி திட்டம் ஆகியவை கைவிடப்பட்டதாகவும் குற்றம் சாட்டினார். அதேபோன்று முதியோர் மற்றும் விதவை பென்ஷன் பாதிக்கு மேல் குறைந்துவிட்டதாகவும் கூறினார். இப்படி ஓட்டு போட்ட மக்களை சிந்திக்காமல் தன் குடும்ப வளர்ச்சியை மட்டும் பார்க்கும் திமுக விடிகின்ற அரசா? இல்லை விடியா அரசு என்று கடுமையாக விமர்சனம் செய்தார்.

அதிமுக ஆட்சியில் விலைவாசி அதிகரிக்கவில்லை:

தொடர்ந்து பேசிய அவர், தமிழகத்தில் சொத்துவரி, மின்கட்டண வரி, குடிநீர் கட்டண வரி என எல்லா விலைவாசியும் அதிகரித்துவிட்டது. அதிமுக ஆட்சியில் பத்து ஆண்டுகளில் ஏதாவது விலையை உயர்த்தினோமா? என்று கேள்வி எழுப்பிய அவர், திமுக ஆட்சியில் எல்லா விலைவாசியும் ஏறிவிட்டது. அதை எதிர்த்து யாராவது பேசினால் உடனே சிறைச்சாலை. இந்த நிலையில் இனி தமிழகத்தில் திமுக தான் ஆளும் என்கிறார் மு.க.ஸ்டாலின் வேடிக்கையாக இருக்கிறது என்று விமர்சித்தார்.

2024 ல் சட்டமன்ற தேர்தல்:

இதனைத்தொடர்ந்து, ”திமுக ஆட்சிக்கு வந்து ஒன்றரை வருடம் ஆகிவிட்டது. ஆனால், இன்னும் நீட் தேர்வை ஒழிக்கவில்லை. நாங்கள் ஆட்சிக்கு வந்தால் முதல் கையெழுத்து நீட் தேர்வு விலக்கு மசோதாவுக்கு முதல் கையெழுத்து போடுவோம் என்றார்கள். ஆனால் இப்போ அவர்களிடம் பேனா இல்லை போல; அதற்கு பதிலாக எழுதாத பேனா, மையில்லாத பேனாவுக்கு மட்டும் மத்திய அரசிடம் போராடி அனுமதி வாங்குகிறார்கள்;

இதையும் படிக்க: கழுதை தேய்ந்த கட்டெறும்பாக...பாரத் ஜோடோ யாத்ராவை கிண்டலாக விமர்சித்த அண்ணாமலை..!

அதேபோன்று நீட் தேர்வு விலக்கு மசோதாவுக்கு வாங்க வேண்டியதுதானே. செய்ய 
முடியாதவற்றையெல்லாம் செய்வதாக சொன்னீர்களே. அதை செய்ய முயற்சியாவது செய்தீர்களா” என்று சாடினார். இனி உங்கள் ஆட்டம் அதிக பட்சம் ஒருவருடம் தான். ஏனென்றால்,  2024 ல் வரும் நாடாளுமன்றத் தேர்தலின் போது சட்டமன்றத் தேர்தலும் நிச்சயம்  நடைபெறும்; அதுவரை அதிகமு தொண்டர்களை சீண்டாதீர்கள் என்று கே டி ராஜேந்திர பாலாஜி திமுகவை எச்சரித்து பேசியுள்ளார். 

ஈரானில், ஒரு 22 வயது பெண்ணை, ஹிஜாப் சரியாக அணியாத காரணத்தால், அடித்தே கொலை செய்த சம்பவம் தொடர்ந்து, ஈரான் மட்டுமின்றி உலகளவில் பெரும் எதிர்ப்பை கிளப்பியுள்ளது.

கடந்த வாரம், மாசா அமினி (Mahsa Amini) என்பவரது இறப்பு, உலகளவில் பெரும் போர்க்களத்தை உருவாக்கியுள்ளது. குர்திஷ் பகுதியைச் சேர்ந்த மாசா, சரியான முறையில், ஹிஜாப் அணியாத காரணத்தால், அறநெறி காவலர்கள், அவரை கைது செய்து அடித்து துன்புருத்திய நிலையில், அவர் கோமா நிலைக்கு தள்ளபட்டார். பின் அவர் மரணித்த நிலையில், இதனை ஒரு கொலையாகவே உலக மக்கள் பார்க்கின்றனர்.

மேலும் படிக்க | ஹிஜாப் அணியாத குர்திஷ் பெண் அடித்துக் கொலை…போராட்டம் வெடித்தது!

இதனைத் தொடர்ந்து, உலகில் உள்ள பல பெண்கள், ஹிஜாபை தூக்கி எரிந்தும், முடியை வெட்டியும் தங்களது எதிர்ப்பு குரல்களை எழுப்பி வந்தனர். மேலும், பல சோசியல் மீடியா கணக்குகள் இது குறித்து மீம்களைப் பகிர்ந்து விழிப்புணர்வு கிளப்பி வந்தனர்.

இந்நிலையில், அமெரிக்க பத்திரிக்கையாளர், கிரிஸ்டியேன் அமென்போர் என்பவர், ஈரானிய அதிபரான இப்ராகிம் பாய்சியை நேரில் சந்தித்து இச்சம்பவம் குறித்து நேர்காணல் நடத்த அனுமதி பெற்றிருந்தார். அவர் அதிபரை சந்திக்க, முக்காடு அணிய வேண்டும் என அறிவுறுத்தப்பட்ட நிலையில், பத்திரிக்கையாளர் கிரிஸ்டியேன் மறுப்பு தெரிவித்து, நேர்காணலுக்கு காத்திருந்தார்.

மேலும் படிக்க | மறைந்த ராணியின் இறுதி அஞ்சலியில் கலந்து கொள்ள பல நாடுகளுக்கு தடை.. ரஷ்யா உட்பட..!

ஆனால், அதிபர் இப்ராகிம் நேர்காணலை கடைசி நிமிடத்தில் ரத்து செய்துவிட்ட நிலையில், தனிமையில் இருக்கும் போட்டோ ஒன்றை, கிரிஸ்டியேன் சோசியல் மீடியாவில் பதிவிட்டார். இது படு வைரலாகி, அமெரிக்காவிற்கு கோபத்தைக் கிளப்பியது.

இதனால், அமெரிக்க கருவூலத் துறையின் ஒரு பிரிவான வெளிநாட்டு சொத்துக் கட்டுப்பாட்டு அலுவலகம் ஈரான் மீது தடைகளை விதித்துள்ளது. அவை விதித்த தடைகள்  ஈரானின் பாதுகாப்பு அமைப்புகளின் ஏழு மூத்த தலைவர்களையும் குறிவைத்தன.

ஈரானின் உளவுத்துறை அமைச்சர் எஸ்மாயில் காதிப், ஈரானிய இராணுவத்தின் தரைப்படைத் தளபதி கியூமர்ஸ் ஹெய்டாரி மற்றும் அறநெறிக் காவல்துறையின் தலைவரான முகமது ரோஸ்டமி செஷ்மே கச்சி உள்ளிட்ட மூத்த பாதுகாப்பு அதிகாரிகளுக்கும் அமெரிக்க கருவூலம் அனுமதி அளித்துள்ளது.

மேலும் படிக்க | ஈராக்கில் வன்முறை…பலி எண்ணிக்கை அதிகரிப்பு!

"இந்த அதிகாரிகள் அமைதியான எதிர்ப்பாளர்கள் மற்றும் ஈரானிய சிவில் சமூகத்தின் உறுப்பினர்கள், அரசியல் எதிர்ப்பாளர்கள், பெண்கள் உரிமை ஆர்வலர்கள் மற்றும் ஈரானிய பஹாய் சமூகத்தின் உறுப்பினர்களை ஒடுக்குவதற்கு வன்முறையை வழக்கமாகக் கையாளும் அமைப்புகளை மேற்பார்வையிடுகின்றனர்" என்று கருவூலம் கூறியது.

தடைசெய்யப்பட்டவர்களுடன் தொடர்புடைய எந்தவொரு அமெரிக்க சொத்துக்களும் தடைகளின் ஒரு பகுதியாக முடக்கப்படும்.

பொருளாதாரத் தடைகள் அமெரிக்க செயல்பாடுகளைக் கொண்ட சர்வதேச வங்கிகள் உட்பட அமெரிக்கர்களுடன் வணிகம் செய்வதைத் தடைசெய்கிறது, உலகளாவிய நிதி நெட்வொர்க்குகளுக்கான அவர்களின் அணுகலை திறம்பட கட்டுப்படுத்துகிறது.

தற்போது விதிக்கப்பட்ட தடைகளை ஒட்டி, ஈரானுக்கு பெரும் பிரச்சனை கிளம்பி இருப்பதாக நிபுணர்கள் தெரிவிக்கின்றனர். ஏற்கனவே, தாலிபன்கள் மற்றும் ரஷ்யர்கள் மீது கடும் கோபத்தில் இருக்கும் அமெரிக்கா, இந்த ஹிஜாப் பிரச்சனை வைத்து, பெரும் கிளர்ச்சியை உலகளவில் கிளப்பி விடுமோ என்ற பதற்றம் உலக நாடுகளில் உருவாகியுள்ளது குறிப்பிடத்தக்கது.