பாரதிய ஜனதா கட்சி தலைமையிலான தேசிய ஜனநாயக கூட்டணியில் இருந்து விலகுவதாக அதிமுக பொதுச் செயலாளர் எடப்பாடி பழனிசாமி தலைமையில் நடைபெற்ற மாவட்ட செயலாளர்கள் கூட்டத்தில் அதிரடி முடிவு எடுக்கப்பட்டுள்ளது. இதன்மூலம் கடந்த சில மாதங்களாக  நீடித்துவந்த அதிமுக - பாஜ.க தலைவர்கள் இடையிலான பனிப்போர் முடிவுக்கு வந்துள்ளது.

நாடாளுமன்ற தேர்தல் அடுத்த ஆண்டு நடைபெற உள்ள நிலையில் அதிமுக - பாஜக கூட்டணியில் கடந்த சில மாதங்களாக பனிப்போர் நிலவியது. பேரறிஞர் அண்ணாவை பற்றி விமர்சித்து பேசிய மாநில பாஜக தலைவர் அண்ணாமலையின் கருத்து அதிமுக நிர்வாகிகள் இடையே கடும் கொந்தளிப்பை ஏற்படுத்தியது. இது தொடர்பாக முன்னாள் அமைச்சர்கள் டி.ஜெயக்குமார், சி.வி.சண்முகம் ஆகியோருக்கும் அண்ணாமலைக்கும் வார்த்தை மோதல் வெடித்தது.

அண்ணாவை பற்றிய தமது கருத்துக்கு வருத்தமோ மன்னிப்போ கேட்க முடியாது என பாஜக மாநில தலைவர் அண்ணாமலை கூறி வந்தார். இதையடுத்து அண்ணாமலையை பாஜக தலைவர் பதவியில் இருந்து நீக்கினால் மட்டுமே கூட்டணியில் நீடிக்க முடியும் என்று பாஜக மேலிட தலைவர்களை சந்தித்து அதிமுக முன்னாள் அமைச்சர்கள் குழு வலியுறுத்தியது.  

ஆனால், அதிமுகவின் கோரிக்கையை பாஜக தலைமை நிராகரித்த நிலையில்  அதிமுக பொதுச் செயலாளர் எடப்பாடி பழனிச்சாமி தலைமையில் சென்னை ராயப்பேட்டையில் உள்ள அதிமுக தலைமை அலுவலகத்தில் மாவட்ட செயலாளர்கள் கூட்டம் நடைபெற்றது.  இதில் கலந்து கொண்ட மூத்த நிர்வாகிகள், மாவட்ட செயலாளர்கள், சட்டமன்ற உறுப்  பினர்கள் உள்ளிட்டோர் பாஜக கூட்டணியில் இருந்து உடனடியாக வெளியேற வேண்டும் என வலியுறுத்தியதாக தெரிகிறது.

சுமார் 1 மணி நேரம் நீடித்த இந்த கூட்டத்திற்கு   பிறகு செய்தியாளர்களை சந்தித்த கட்சியின் துணை பொது செயலலாளர் கே.  பி.முனுசாமி, தேசிய ஜனநாயக கூட்டணியில் இருந்து அதிமுக விலகுவதென கூட்டத்தில் தீர்மானம் நிறைவேற்றப்பட்டதாக தெரிவித்தார். மேலும், மாநில பாஜக தலைவர் அண்ணாமலை, திட்டமிட்டு அதிமுக தலைவர்களை அவதூறாக பேசியதால் இந்த முடிவை எடுத்ததாக கே.  பி.முனுசாமி விளக்கம் அளித்தார்.

மேலும், வரும் நாடாளுமன்றத் தேர்தலில் அதிமுக தலைமையில் புதிய கூட்டணி அமைத்து  தேர்தலை சந்திப்போம் என்றும் அப்போது அவர் உறுதிபடத் தெரிவித்தார்.

பாஜக தலைமையிலான தேசிய ஜனநாயக கூட்டணியில் இருந்து வெளியேறுவதாக அறிவிப்பு வெளியானதை அடுத்து அதிமுக தொண்டர்கள் பட்டாசு வெடித்தும், இனிப்புகள் வழங்கியும் தங்களது மகிழ்ச்சியை வெளிப்படுத்தி வருகின்றனர். 

இதனிடையே, ’நன்றி! மீண்டும் வராதீர்கள்’ என அதிமுகவின் எக்ஸ் தளத்தில் பதிவிடப்பட்டுள்ளது. இதனை அதிமுகவினர் ட்ரெண்டாகி வருகின்றனர். 

முன்னதாக கூட்டத்திற்கு வருகை தந்த பொதுச்செயலளார் எடப்பாடி பழனிச்சாமிக்கு அக்கட்சி தொண்டர்கள் உற்சாக வரவேற்பு அளித்தனர்.   பின்னர், முன்னாள் முதலமைச்சர்கள் எம்.ஜி.ஆர்., ஜெயலலிதா ஆகியோரின் திருவுருவச் சிலைகளுக்கு அவர் மலர் தூவி மரியாதை செலுத்தினார். 

இதையும் படிக்க: உலகின் மிக பெரிய இந்து கோயில் அக்டோபரில் திறப்பு..! 

ராஜஸ்தான் மாநில சட்டப்பேரவை தேர்தலில் காங்கிரஸ் கட்சியின் வார் ரூம் செயலாளராக சசிகாந்த் செந்தில்  நியமிக்கப்பட்டதை அடுத்து, கர்நாடகாவை போல ராஜஸ்தானிலும் வெற்றிக்கொடி நாட்டுவாரா என்ற எதிர்பார்ப்பு நிலவி வருகிறது. 

கர்நாடக தேர்தலும் சசிகாந்த் செந்திலும் 

கடந்த  மே மாதத்தில் கர்நாடக சட்டபேரவை தேர்தல் முடிவுகள் வெளியாகின. இதில் பல்வேறு கருத்துகணிப்புகளை பொய்யாக்கி காங்கிரஸ் கட்சி அறுதி பெரும்பான்மையையான இடங்களை கைப்பற்றி ஆட்சியமைத்தது. கர்நாடகாவில் பாஜக மீண்டும் ஆட்சியை தக்க வைக்கும் போராட்டத்தில் தோல்வியை தழுவியது.

2024 ஆம் ஆண்டு மக்களவை பொதுத் தேர்தல் விரைவில் நடைபெற உள்ள நிலையில், அதற்கு முன்னோட்டமாக கருதப்பட்ட கர்நாடக தேர்தலில் பாஜக தோல்வியடைந்தது பாஜகவினரிடையே மாபெரும் அதிர்ச்சியை ஏற்படுத்தியது. அதே நேரத்தில் சோர்ந்துபோய் கிடந்த காங்கிரஸ் கூட்டணிக்கு இது புத்துணர்ச்சியையும் ஏற்படுத்தியது. இதற்கான காரணம் என்ன? இந்த மாற்றம் எப்படி சாத்தியமானது? என்ற தேடுதலை தொடங்கியபோதுதான் சசிகாந்த் செந்திலின் பெயர் வெளியில் தெரிய ஆரம்பித்தது. பாஜகவை வீழ்த்திய ஐஏஎஸ், வார் ரூமை அலங்கரித்த தமிழர் என சசிகாந்தின் புகழ் தமிழ்நாடு காங்கிரஸ் மட்டுமின்றி பாஜகவிற்கு எதிரான அனைத்து வட்டாரங்களிலும் பிரபலமடைந்தது.

யார் இந்த சசிகாந்த் செந்தில்?

2019 ஆம் ஆண்டு மத்திய அரசு குடியுரிமை திருத்தச் சட்டத்தை கொண்டு வந்ததையடுத்து நாடெங்கும் போராட்டங்கள் நடைபெற்றன. அப்போது ஐஏஸ் அதிகாரியாக கர்நாடகாகாவில் பணியாற்றி வந்த சசிகாந்த் செந்தில் இச்சட்டத்தை கண்டித்து அப்போது தனது பதவியை ராஜினாமா செய்தார். இது அப்போதைய அரசியலில் பரபரப்பை உண்டாக்கியது.

இதனைத் தொடர்ந்து இவர் தமிழ்நாடு காங்கிரஸ் தலைவர் கே எஸ் அழகிரி தலைமையில் கட்சியில் இணைந்தார். சில காலத்திலேயே தமிழ்நாடு காங்கிரஸ் கமிட்டியின் ஒருங்கிணைப்பாளராகவும் நியமிக்கப்பட்டார். ஆனால் அவர் காங்கிரஸ் கட்சியில் இணைந்ததும் அதன் மாநில ஒருங்கிணைப்பாளராக நியமிக்கப்பட்டதும் அவரது கட்சிக்காரர்களுக்கே தெரிந்திருக்குமா? என்ற கேள்வி ஒருபுறம் இருந்து கொண்டிருந்தது. இந்த நிலையில்தான் கர்நாடக தேர்தல் முடிவுகள் அவரை பற்றிய தேடல்களை அதிகப்படுத்தி அவருக்கு புகழை தேடித்தந்தன. 

தமிழ்நாடு தலைவர் போட்டியில்

கர்நாடக தேர்தலில் வெற்றிக்கு காரணமாக இருந்ததால் தமிழ்நாடு காங்கிரஸ் கமிட்டிக்கு புதிய தலைவராக இவர் நியமிக்கப்படலாம் என்ற எதிர்பார்ப்பும் நிலவி வந்தது. ஐபிஎஸ் அதிகாரியாக இருந்து எந்த காரணமும் இல்லாமல் ஓய்வு பெற்று பின்னர் பாஜகவின் தலைவராக மாறியுள்ள அண்ணாமலை போன்றவர்களை எதிர்க்க .சசிகாந்தை போன்ற திறமையும், இலட்சிய உறுதியும் கொண்டவர்கள் தலைவராக வேண்டும் என காங்கிரஸ் கட்சிக்குள்ளேயும் குரல்கள் எழத்தொடங்கின. 

இதனையடுத்து தமிழ்நாடு காங்கிரஸ் தலைவருக்கான போட்டியில் இவரது பெயரும் இருப்பதாக கூறப்படுவது மட்டுமில்லாமல், இவரை தலைவராக நியமிப்பதற்காவே தமிழ்நாடு கமிட்டிக்கு தலைவரை நியமிப்பதை தாமதபடுத்தி வருவதாகவும் கூறப்படுகிறது. 

வெல்லுமா ராஜஸ்தான் வார் ரூம்?

இப்படிப்பட்ட சூழலில்தான் சசிகாந்த் செந்தில் ராஜஸ்தான் தேர்தலில் வார் ரூம் செயலாளராக நியமிக்கப்பட்டுள்ளதாக தகவல்கள் வெளியாகியுள்ளது.  இதுத் தொடர்பாக காங்கிரஸ் பொதுச்செயலாளர் கேசி வேணுகோபால் வெளியிட்டுள்ள அறிக்கையில் சசிகாந்த் செந்திலை ராஜஸ்தான் சட்டப்பேரவை செயலாராகவும் லோகேஷ் ஷர்மா, கேப்டன் அரவிந்த் குமார் மற்றும் ஜஸ்வந்த் குஜ்ஜார் ஆகியோர் இணை செயலாளராகவும் நியமிக்கப்பட்டுள்ளனர்.

இந்த ஆண்டு இறுதி அல்லது அடுத்த ஆண்டு தொடக்கத்தில் ராஜஸ்தான், மத்திய பிரதேசம், தெலங்கானா உள்ளிட்ட 5 மாநில தேர்தல்கள் நடைபெற உள்ளன. இந்த தேர்தல் முடிவுகள் கட்டாயமாக அடுத்து வர இருக்கும் மக்களவை தேர்தலில் தாக்கத்தை ஏற்படுத்தும். இதனால் இதில் வெற்றியை ஈட்டவதற்கு என்டிஏ கூட்டணியும் இந்தியா கூட்டணியும் கடுமையாக போட்டியிட்டு வருகின்றனர். இதில் காங்கிரஸ் வசமிருக்கும் ராஜஸ்தானை கைப்பற்ற பாஜக முயற்சித்து வருகிறது. இதற்காக பிரதமர் மோடியை நேரடியாக களத்தில் இறக்கி பிரச்சாரம் செய்ய திட்டமிட்டிருக்கிறது.

அதே நேரத்தில் இராஜஸ்தானில் ஆட்சியை தக்க வைக்க ராகுல்காந்தியும் விரிவான பிரச்சார பயணத்தை மேற்க்கொள்ள இருக்கிறார். முதலமைச்சர் அசோக் கெலாட்டும் அதற்கேற்ப கேஸ் விலை குறைப்பு, மகளிருக்கான மானியம் என பல்வேறு அறிவிப்புகளை வெளியிட்டுள்ளார். இந்நிலையில் தனது வார் ரூம் பணிகளை சிறப்பாக செய்து காங்கிரஸின் ஆட்சியையும், பாஜகவை வீழ்த்தும் போர்க்களத் தலைவர் எனும் பெருமையையும் சசிகாந்த் செந்தில் தக்க வைப்பாரா? என்பதை பொறுத்திருந்து பார்க்கலாம்.

இதையும் படிக்க|| 800 திரைப்படம் 5 ஆண்டுகள் உழைப்பு - முத்தையா முரளிதரன் பேச்சு

கீழடியில் நடத்தப்பட்ட 9ம் கட்ட அகழாய்வில் அழகிய வேலைப்பாட்டுடன் கூடிய சூது பவளம் கண்டெடுக்கப்பட்டுள்ளது. 

9 ஆம் கட்ட அகழாய்வு

கீழடி ஒன்பதாம் கட்ட அகழாய்வில் முதன் முறையாக அழகிய வேலைப்பாட்டுடன் கூடிய சூதுபவளம் கண்டறியப்பட்டது ஆச்சர்யத்தை ஏற்படுத்தியுள்ளது. கீழடியில் தமிழக தொல்லியல் துறை சார்பில் 9ம் கட்ட அகழாய்வு கீழடி, கொந்தகை ஆகிய இரு தளங்களில் கடந்த ஏப்ரல் 6ல் தொடங்கி நடந்து வருகிறது.

கொந்தகை தளத்தில் 9ம் கட்ட அகழாய்வில் இரண்டு குழிகளில் இதுவரை 26 முதுமக்கள் தாழிகள் கண்டறியப்பட்டு அதில் 14 தாழிகளில் உள்ள மண்டை ஓடுகள், சுடுமண் பானைகள் உள்ளிட்ட பொருட்கள் வெளியே எடுக்கப்பட்டு வருகின்றன. முதுமக்கள் தாழியினுள் உள்ள எலும்புகள் மற்றும் சுடுமண், பானைகளில் உள்ள உணவு பொருட்கள் மதுரை காமராஜர் பல்கலை கழக மரபணு பிரிவு ஆய்வு செய்து வருகிறது. 

145 தாழிகள்

கொந்தகை தளத்தில்  இதுவரை நடந்த அகழாய்வில் மொத்தம் 158 முதுமக்கள் தாழிகள் கண்டறியப்பட்டுள்ளன. நேற்று 145வது முதுமக்கள் தாழியினுள் உள்ள பொருட்களை வெளியே எடுக்கும் பணி நடந்து வந்தது. இதில் 17.5 செ.  மீ ஆழத்தில் ஆய்வு செய்த போது தாழியினுள் 1.4 செ.மீ நீளமும், இரண்டு செ.மீ விட்டமும் கொண்ட இரண்டு சூதுபவளங்கள் (கார்னிலியன்) கண்டறியப்பட்டுள்ளது. 

கீழடியில் ஏற்கனவே ஆறாம் கட்ட அகழாய்வின் போது பன்றி  உருவம் பதித்த சூதுபவளம் கண்டறியப்பட்டு கீழடி அருங்காட்சியகத்தில் காட்சிப்படுத்தப்பட்டுள்ளது.  அதன்பின் கடந்த 8ம் கட்ட  அகழாய்வில் 80வது முதுமக்கள் தாழியினுள் 74  செந்நிறம் கொண்ட சூதுபவளங்கள் கண்டறியப்பட்டன. தற்போது கிடைத்த இரண்டு சூதுபவளங்களில் ஒன்றில் மேலும் கீழும் தலா இரண்டு கோடுகளும் நடுவில் அலைகள் போன்ற குறியீடும் வெண்மை நிறத்தில் உள்ளது ஆச்சர்யத்தை ஏற்படுத்தியுள்ளது.

இதையும் படிக்க||  800 திரைப்படம் 5 ஆண்டுகள் உழைப்பு - முத்தையா முரளிதரன் பேச்சு

நாடாளுமன்றம் மற்றும் சட்டமன்றத்தில் மகளிருக்கு 33 சதவீதம் இடமளிக்கும் வரலாற்று சிறப்பு மிக்க மசோதா மக்களவை மற்றும் மாநிலங்களவையில் ஒருமனதாக நிறைவேற்றப்பட்டுள்ளது. மகளிருக்கான இட ஒதுக்கீடு மசோதாவை அமல்படுத்துவதன் மூலம் ஏற்படும் மாற்றங்கள் என்னென்ன என்பதை பார்க்கலாம்...

மக்களவை, மாநிலங்களவை, மாநில சட்டப்பேரவைகளில் பெண்களுக்கு 33 சதவீத இடஒதுக்கீட்டை "மகளிர் இடஒதுக்கீடு மசோதா" உறுதி செய்கிறது. ராஜீவ்காந்தி தலைமையிலான அரசு 1989-ம் ஆண்டு மே மாதம் முதன்முதலாக மகளிர் இட ஒதுக்கீடு மசோதாவை கொண்டு வந்தது. மக்களவையில் நிறைவேற்றப்பட்ட இந்த மசோதா மாநிலங்களைவையில் தோல்வி அடைந்தது.

அதன் பின்னர் 1996-ல் பிரதமர் தேவகவுடா தலைமையிலான அரசு, அதனைத் தொடர்ந்து, வாஜ்பாய் தலைமையிலான அரசு இந்த மகளிர் இட ஒதுக்கீடு மசோதாவை கொண்டு வந்தது. ஆனால் மாநிலங்களவையில் நிறைவேற்றப்பட்டாலும், மக்களவையில் எடுத்துக் கொள்ளப்படவில்லை. 

அதன் பின்னர் 2008-ம் ஆண்டு மன்மோகன்சிங் அரசால் மாநிலங்களவையில் நிறைவேற்றப்பட்ட இந்த மசோதா, நாடாளுமன்ற நிலைக்குழுவுக்கு அனுப்பப்பட்டது. 2009ம் ஆண்டில் நிலைக்குழு அறிக்கை தாக்கல் செய்ய, 2010ம் ஆண்டு மத்திய அமைச்சரவை மசோதாவுக்கு ஒப்புதல் அளித்தது.

2010ம் ஆண்டு மாநிலங்களவையில் 186க்கு ஒன்று என்ற வாக்குகளின் அடிப்படையில் இம்மசோதா நிறைவேற்றப்பட்டும் மக்களவையில் எடுத்துக் கொள்ளப்படவில்லை. இப்படி இந்திய நாடாளுமன்றத்தில் பலமுறை அறிமுகப்படுத்தப்பட்டு நிறைவேற்றப்படாமல் போன இந்த மசோதா, கடந்த 13 ஆண்டுகளுக்குப்பின் தற்போது மக்களவை மற்றும்  மாநிலங்களவையில் ஒருமனதாக நிறைவேற்றப்பட்டுள்ளது. 

இந்த மசோதாவிற்கு மட்டும் ஏன் இத்தனை எதிர்ப்புகள்? இந்த மசோதாவை  எதிர்ப்பவர்கள் சொல்லும் காரணங்கள் என்ன? இந்தியாவின் பல்வேறு மாநிலங்களில் உள்ளாட்சிகளில் பெண்களுக்கான 50 சதவீத இட ஒதுக்கீடு அமலில் உள்ளது. ஆனால் சட்டமன்றம் மற்றும் நாடாளுமன்றத்தில் பெண்களின் பிரதிநிதித்துவம் மிகவும் குறைவாகவே உள்ளது.  

543 உறுப்பினர்களைக் கொண்ட மக்களவையில், 78 பெண் உறுப்பினர்களும், 245 உறுப்பினர்களைக் கொண்ட மாநிலங்களவையில், 11 பெண் உறுப்பினர்கள் மட்டுமே உள்ளனர்.  பல்வேறு மாநில சட்டப்பேரவைகளில் இந்த எண்ணிக்கை மிகவும் குறைவாகவே உள்ளது. மகளிருக்கான இந்த இடஒதுக்கீட்டிற்குள் எஸ்.சி.எஸ்.டி மற்றும் ஆங்கிலோ - இந்தியர்களுக்கு துணை இடஒதுக்கீடும் முன்மொழியப்படுகிறது.   

இந்த இட ஒதுக்கீட்டிற்குள் பட்டியலினத்தோர், பழங்குடியினருக்கான இட ஒதுக்கீடு இருக்கும் எனவும், இந்த மசோதா 15 ஆண்டுகளுக்கு நடைமுறையில் இருக்கும் தெரிவிக்கப்பட்டுள்ளது.   

இந்தப் பின்னணியில் பார்க்கும்போது, பெண்களுக்கு 33 சதவீத இட ஒதுக்கீடு அளிக்கும் இந்த மசோதா மிக முக்கியமானதுதான். ஆனால், ராஷ்ட்ரிய ஜனதா தளம், சமாஜ்வாதி ஆகிய கட்சிகள் நீண்ட காலமாகவே இதற்கு நேரடி எதிர்ப்பு தெரிவித்து வருகின்றன. அதற்கு அவர்கள் அளிக்கும் விளக்கம், பெண்களுக்கு இட ஒதுக்கீடு அளித்தால், அதற்குள் பிற்படுத்தப்பட்டோருக்கான இடங்களை உள் ஒதுக்கீடு செய்ய வேண்டும் என்பதுதான். 

பகுஜன் சமாஜ் கட்சியும் இந்த கருத்தை வலியுறுத்தி வருகிறது. பழங்குடியினர், பட்டியலினத்தோர், பிற்படுத்தப்பட்டோருக்கு 50 சதவீதம் இட ஒதுக்கீடு அளிக்க வேண்டும், என வலியுறுத்துகிறது. 

பெண்களுக்கென இட ஒதுக்கீடு செய்யப்பட்டால், பெரும்பாலான இடங்களை உயர் சாதியைச் சேர்ந்த பெண்களே கைப்பற்றும் சூழல் உள்ளது. எனவே, இதில் உள் ஒதுக்கீடு தேவை என்பதே சமூகநீதியை வலியுறுத்தும் கட்சிகளின் ஒருமித்த குரலாக உள்ளது. 

ஓபிசி பெண்களுக்கு உள் ஒதுக்கீடு தரப்படாவிட்டால், மகளிருக்கான ஒதுக்கீட்டை உயர்வகுப்பினரே நிரப்பிக்கொண்டு விடுவார்கள் என அனைத்து கட்சிகளும் அச்சம் தெரிவிக்கின்றன. 

இந்த மசோதா இரு அவைகளிலும் நிறைவேற்றப்பட்டாலும், தமிழ்நாட்டை சேர்ந்த திமுக, பாமக, மதிமுக உள்ளிட்ட கட்சிகள் எஸ் சி ,எஸ் டி ,ஓ பி சி மற்றும் சிறுபான்மையினப் பெண்களுக்கு உள் ஒதுக்கீடு வழங்கப்பட வேண்டும் என்பதை வலியுறுத்தி இருந்தன.

இந்த மசோதா இப்போது நிறைவேற்றப்பட்டாலும் 2024ஆம் ஆண்டு நாடாளுமன்றத் தேர்தலில் அமலுக்கு வராது என்றும் தொகுதிகள் மறுசீரமைக்கப்பட்ட பிறகே இது அமலுக்கு வரும் என்றும் கூறப்படுகிறது.

இந்த தருணத்தில் அனைத்து கட்சிகளும் ஆதரவு தெரிவித்தாலும், ஜாதிவாரிய கணக்கெடுப்பை நடத்தி சட்டத்தை உடனடியாக அமல்படுத்த வேண்டும் என்று எதிர்கட்சிகள் வலியுறுத்துகின்றன. 

பாஜகவின் 10 ஆண்டு கால ஆட்சியில், கொண்டுவரப்படாத இந்த மசோதா, 9-வது ஆண்டு காலத்தில் கொண்டுவருவது தேர்தலுக்கான கண்துடைப்பு நாடகம் என்றும் எதிர் கட்சிகள் குற்றம் சாட்டி வருகின்றன. 

அத்துடன், மக்கள்தொகை அடிப்படையில் மகளிர் இடஒதுக்கீடு மசோதாவை அமல்படுத்தினால் தென்மாநில பெண் பிரதிநிதிகள் பங்கேற்பு குறையும் என்றும், தொகுதிகளின் அடிப்படையில் தற்போதைய நிலையை தொடர்ந்தால் மட்டுமே உரிய அங்கீகாரம் கிடைக்கும் என்றும் எதிர் கட்சிகள் வலியுறுத்தியுள்ளன.  

எந்த சமூகத்தையும் ஒடுக்காமல் அனைத்து தரப்பினரையும் முன்னுக்கு கொண்டு வரும் சட்டம் மட்டுமே சிறந்த சமுதாயத்தை உருவாக்க முடியும்.....

ரயில்கள் நின்று செல்லக்கோரி கடைகளை அடைத்து முழு பந்த், மற்றும் ரயில் மறியல் போராட்டம்.

சிவகங்கை மாவட்டம், சிவகங்கை ரயில் நிலையத்தை கடந்து செல்லும் அனைத்து ரயில்களும் ரயில் நிலையத்தில் நின்று செல்ல கோரி 30 ஆண்டுகளாக கோரிக்கைவிடுத்தும் கண்டுகொள்ளாத தெற்கு ரயில்வே நிர்வாகத்தை கண்டித்து நகர் பொது மக்கள், வர்த்தகர்கள் மற்றும் அனைத்து கட்சியினர் சார்பில் இன்று கடைகளை அடைத்து பந்த் மற்றும் ரயில் மறியல் போராட்டம் நடைபெற்று வரும் நிலையில் முதல் கட்டமாக அனைத்து கடைகளையும் அடைத்து முழு ஆதரவை வர்த்தகர்கள் தெரிவித்துள்ளனர்.

மாவட்டத்தின் தலைநகராக சிவகங்கை உருவாகி 38 ஆண்டுகளை கடந்த நிலையில் நகரின் வளர்ச்சி என்பது இன்றளவும் கேள்விக்குரியாகவே உள்ளது. மேலும் சிவகங்கை வழியாக ஏராளமான பயனிகள் ரயில் கடந்து செல்லும் நிலையில் ஒரு சில ரயில் தவிர மற்ற ரயில்கள் நின்று செல்வதில்லை. மேலும் தெற்கு ரயில்வே சார்பில் அன்மையில் இயக்கப்பட்டுவரும் பல்லவன் ரயிலும் காரைக்குடி வரை மட்டுமே இயக்கப்பட்டு வருகிறது. கடந்த 30 ஆண்டுகளாக சிவகங்கையை கடந்து செல்லும் அனைத்து ரயிகளையும் நிறுத்த கோரி பொது மக்கள் மற்றும் வர்த்தகர்கள் சார்பில் பலமுறை கோரிக்கைவிடுத்தும் இதுவரை தெற்கு ரயில்வே கண்டு கொள்ளவில்லை.   

இந்நிலையில் சிவகங்கை நகர் பொது மக்கள் மற்றும் வர்த்தகர்கள் சார்பில் சிவகங்கை நலக்குழு என்கிற குழுவை உருவாக்கி அதன் கீழ் அனைவரும் ஒன்றுபட செய்து அதன் ஒருங்கினைப்பாளராக சிவகங்கை நகர்மன்ற தலைவர் துரை ஆனந்த் நியமிக்கப்பட்டு அவரின் தலைமையில் இன்று கடைகளை அடைத்து முழு பந்த் மற்றும் ரயில் மறியல் போராட்டம் அறிவிக்கப்பட்டது. 

அரசின் தரப்பில் சமாதான பேச்சுவார்த்தை நடத்தியும் அதில் உடன்பாடு எட்டப்படாததால் இன்று அறிவிக்கப்பட்டதுபோல் அனைத்து போராட்டமும் நடைபெறுகிறது. இதில் முதல் கட்டமாக சிவகங்கை நகர் முழுவதுமுள்ள அனைத்து கடைகளையும் அடைத்து வர்த்தகர்கள் தங்களது முழு ஆதரவையும் வழங்கியுள்ளனர். இதன் காரணமாக நகரின் முக்கிய வீதிகள் வெறிச்சோடி காணப்படுகிறது.  இதனை தொடர்ந்து சிவகங்கை ரயில் நிலையத்தில் பொது மக்கள், அனைத்து கட்சியினர், வர்த்தகர்கள் சுமார் 500க்கும் மேற்பட்டோர் ரயில் மறியல் போராட்டத்தில் ஈடுபடுகின்றனர்.