சேலம் மாவட்டம் ஓமலூர் அடுத்த காடையாம்பட்டி தாலுக்கா தும்பிப்பாடி கிராமம் ரெட்டியூர் காலனி பகுதியைச் சேர்ந்தவர் சாமிநாதன். இவரது மனைவி பழனியம்மாள் (52), இவர்களுக்கு கந்தசாமி சண்முகம் கார்த்திக் என்ற மூன்று மகன்கள் உள்ளனர். இந்த நிலையில் மூன்று குழந்தைகளும் சிறு வயது இருக்கும் பொழுதே சாமிநாதன் சுமார் 30 வருடங்களுக்கு முன்பு இறந்துவிட்டார்.

அந்த சூழ்நிலையில் பழனியம்மாள் தனது வீட்டிலேயே காய்கறி வியாபாரம் மற்றும் ஆடுகள் மேய்க்கும் கூலி வேலைகள் செய்தும் தனது மூன்று குழந்தைகளையும் காப்பாற்றி வந்துள்ளார். தனது மூன்று மகன்களையும் ஆளாக்கிய பழனியம்மாள் இரண்டு மகன்களுக்கு திருமணம் செய்து வைத்துள்ளார் இன்னும் கடைசி மகன் கார்த்திக் மட்டும் திருமணம் ஆகாமல் உள்ளார்.

மூன்று மகன்களுமே வெளியில் தங்கி டிரைவர் வேலை செய்து வருகின்றனர் கடைசி மகன் கார்த்திக் மட்டும் அவ்வப்போது அம்மாவை வந்து பார்த்துவிட்டு வேலைக்கு செல்வது வழக்கம். இந்த நிலையில் பழனியம்மாளின் பக்கத்து வீட்டைச் சேர்ந்தவர் சேர்வராயன் என்பவரது மகன் மாது (37) இவர் பெயிண்ட் அடிக்கும் கூலித் தொழிலாளியாக வேலை செய்து வருகிறார்.

இவருக்கும் பக்கத்து வீடுகாரர்களான பழனியம்மாள் குடும்பத்தார் ஆகிய இருவருக்கும் தடவழிப் பிரச்சனையில் அடிக்கடி தகராறு ஏற்பட்டு வந்துள்ளது. இதைத்தொடர்ந்து நேற்று இரவு குடிபோதையில் வந்த மாது பக்கத்து வீட்டைச் சேர்ந்த பழனியம்மாளிடம் தகராறில் ஈடுபட்டுள்ளார். அப்போது மாது பழனியம்மாளின் மாமியாரை கீழே தள்ளி விட்டு அருகில் இருந்த அம்மிக்கல்லை தூக்கி பழனியம்மாள் மீது தாக்கி உள்ளார்.  இதில் பலத்த காயமடைந்த பழனியம்மாளை அக்கம் பக்கத்தினர் மீட்டு சேலம் அரசு மருத்துவமனைக்கு அனுப்பி வைத்தனர். அங்கு சிகிச்சை  பலனளிக்காமல் பழனியம்மாள் பரிதாபமாக உயிரிழந்தார்.

இது குறித்து ஓமலூர் டிஎஸ்பி சங்கீதா மற்றும் போலீசார் சம்பவ இடத்தில் விசாரணை மேற்கொண்டு வருகின்றனர். இச்சம்பவம் பற்றி தீவட்டிப்பட்டி போலீசார் வழக்கு பதிவு செய்து விசாரணை நடத்தி வருகின்றனர். மேலும் தப்பி ஓடிய கொலை குற்றவாளியான மாதுவை தீவிரமாக தேடி வருகின்றனர். இந்த சம்பவம் பற்றி அப்பகுதி மக்கள் கூறுகையில் மாது அடிக்கடி குடித்துவிட்டு ஊரில் உள்ள பல பேரிடம் தொடர்ந்து இது போன்ற பிரச்சனைகள் செய்து வருவதாகவும்,  இவனை கைது செய்து சிறையில் நிரந்தரமாக அடைத்தால் தான் இப்பகுதியில் மக்கள் நிம்மதியாக வாழ முடியும் என்றும் தெரிவித்தனர்.

தேனி மாவட்டம் சின்னமனூர் அருகே உள்ள எரசக்கநாயக்கனூரைச் சேர்ந்த விஸ்வநாதன், சபரிசூர்யா தம்பதியினரின் மூத்த மகள் மிரயம்ஜோபிதா(8). விஸ்வநாதன் குடும்பத்தை விட்டு பிரிந்து சென்ற நிலையில் தாயும் வேறொரு திருமணம் செய்து கொண்டு சென்று விட்டார்.

மிரயம்ஜோபிதா தனது பாட்டி  அமலபுஷ்பத்தின் பராமரிப்பில் இருந்து அதே ஊரில் உள்ள 3ம் வகுப்பு படித்து வருகிறார். அமலபுஷ்பம் அதே ஊரில் உள்ள அங்கன்வாடியில் சமையலராக பணியாற்றி வருகிறார். இந்த நிலையில் இன்று பள்ளி மற்றும் அங்கன்வாடிகளுக்கு விடுமுறை விடப்பட்ட நிலையில், அங்கன்வாடிக்கு தனது பேத்தியை அழைத்துச் சென்றுள்ளார் அமலபுஷ்பம்.

அப்பகுதியில் விளையாடிக் கொண்டிருந்த  மிரயம் ஜோபிதாவிடம் வந்த மர்ம நபர், அவரது பெயர் மற்றும் தாய், தந்தையரின் பெயர் குறித்து விசாரித்துள்ளார்.
அப்போது யாரும் எதிர்பாராத விதமாக தனது கையில் இருந்த ஏதோ ஒரு ரசாயன பவுடரை குழந்தையின் உடல் முழுவதும் பூசி தீ வைத்து விட்டு தப்பிச் சென்றுள்ளார். 

இதில் சிறுமியின் உடல் முழுவதும் தீப்பற்றி எரிந்ததால் துடிதுடித்த சிறுமியின் அலறல் சத்தம் கேட்டு கேட்டு அவரது பாட்டி ஓடிவந்து உடலில் நீரை ஊற்றி தீயை அணைத்துள்ளார். பின்னர் சிறுமி 108 ஆம்புலன்ஸ் மூலம் தேனி அரசு மருத்துவக் கல்லூரி மருத்துவமனையில் சிகிச்சைக்காக அனுமதிக்கப்பட்டு அங்கு தீவிர சிகிச்சை அளிக்கப்பட்டு வருகிறது.

தீ வைத்த நபர் யார்? எதற்காக தீ வைத்தார்? என்பது குறித்து எந்த விவரமும் தெரியவில்லை. அந்த அங்கன்வாடியில் இருந்த சிசிடிவி கேமராவும் இயக்கத்தில் இல்லை என்று கூறப்படுகிறது. சின்னமனூர் காவல்துறையினர் இந்த விவகாரம் தொடர்பாக வழக்கு பதிவு செய்து விசாரணை நடத்தி வருகின்றனர்.

சென்னை எழும்பூர் பகுதியைச் சேர்ந்தவர் அப்துல் ரஷீத். இவர் துபாயில் ஏ.சி மெக்கானிக்காக வேலை பார்த்து வந்த நிலையில் கடந்த ஜனவரி மாதம் சென்னை வந்த அவருக்கு பிப்ரவரி மாதம் திருமணம் நடைபெற்றுள்ளது.

இந்நிலையில் கடந்த 25 ஆம் தேதி மாலை அப்துல் ரஷீத் தனது மனைவியுடன் எழும்பூர் காவல் நிலையத்தில் தனது வீட்டின் கதவு மற்றும் பீரோவை உடைத்து மனைவியின் 17 சவரன் நகைகள் கொள்ளை அடிக்கப்பட்டதாக புகார் அளித்தார். புகாரின் அடிப்படையில் போலீசார் வழக்குப்பதிவு செய்து விசாரணை நடத்தினர்.

சி.சி.டி.  வி காட்சிகளை ஆய்வு செய்ததில் அப்துல் ரஷீத் அவரது மனைவி வருவதற்கு முன் வீட்டிற்குள் சென்று வருவது பதிவாகியிருக்கவே, சந்தேகமடைந்து அவரை விசாரித்த போது, அப்துல் ரஷீதே தனது மனைவியின் நகையைத் திருடி விற்றுவிட்டு கொள்ளை நாடகம் ஆடியது அம்பலமானது.

மேலும், துபாயில் இருந்து வந்த பின் வேலைக்கு எதுவும் செல்லாமல், வீட்டில் வேலைக்குச் செல்வதுபோல் உணவைக் கட்டிக்கொண்டு மெரினாவிற்குச் சென்று பொழுதைப் போக்கிவிட்டு மாலை வீட்டுக்கு வந்து மனைவியை ஏமாற்றி வந்ததும் தெரியவந்தது.

மேலும், நண்பர்கள் பலர் புல்லட் வைத்திருந்ததால், தானும் புல்லட் வாங்க ஆசைப்பட்டு நகையைத் திருடியதாக போலீசாரிடம் வாக்குமூலம் அளித்த அப்துல் ரஷீத், ஆன்லைன் ரம்மிக்கு அடிமையானவர் என்பதால் நகை விற்ற 2.50 லட்சம் பணத்தை ஆன்லைன் ரம்மியில் செலவு செய்து அழித்ததும் போலீசார் விசாரணையில் தெரியவந்தது. 

இதனைத் தொடர்ந்து சொந்த வீட்டில் நகையைத் திருடி கொள்ளை நாடகம் நடத்திய அப்துல் ரஷீத் மற்றும் அவருக்கு நகையை விற்று 2.50 லட்சம் பணம் பெற்றுக் கொடுத்த அவரது உறவினர் முகம்மது சாயி ஆகிய இருவரையும் எழும்பூர் போலீசார் கைது செய்து நீதிமன்றத்தில் ஆஜர்படுத்தி சிறையில் அடைத்தனர்.

சிவகங்கை மாவட்ட ஆட்சியர் மதுசூதன் ரெட்டியின் விவசாயத்துறை நேரடி உதவியாளராக பணிபுரிந்து வருபவர் சர்மிளா.

இவரது வாட்சப் எண்ணிற்கு ஆட்சியரின் புகைப்படத்துடன் கூடிய போலி கணக்கிலிருந்து லிங்க் மூலம் பத்தாயிரம் ரூபாய் அனுப்பக் கோரி குறுஞ்செய்தி ஒன்று வந்துள்ளது. அதனை நம்பிய உதவியாளர் சர்மிளா பத்தாயிரம் ரூபாயை அந்த லிங்க் மூலம் அனுப்பியுள்ளார்.

தொடர்ந்து அந்த லிங்கிற்கு 3 லட்சம் ரூபாய் வரை சர்மிளா அனுப்பியதாக கூறப்படுகிறது. அடிக்கடி குறுஞ்செய்தி வரவே சந்தேகமடைந்த சர்மிளா.  இது பற்றி ஆட்சியர் அலுவலகத்தில் விசாரித்ததில் அது போலி கணக்கு எண் என்பது தெரியவந்தது.

இதையடுத்து, அவர் சைபர் கிரைம் போலிசாரிடம் புகார் அளித்தார். புகாரின் பேரில், வழக்குப்பதிவு செய்த சைபர் கிரைம் போலீசார் மேற்கொண்ட விசாரணையில், அந்த போலி செல்போன் எண் பீகார் மாநிலத்திலிருந்து செயல்பட்டு வருவது தெரியவந்தது. மேலும், இச்சம்வபம் குறித்த முதற்கட்ட விசாரணையை சைபர் கிரைம் போலீசார் தொடங்கியுள்ளனர்.

பட்டியலின பிரிவின் கீழ் ஒதுக்கப்பட்ட கீழ்வணக்கம்பாடி ஊராட்சியில், அவ்வகுப்பைச் சேர்ந்த குமார் என்பவர் ஆயிரத்துக்கும் மேற்பட்ட வாக்குகள் வித்தியாசத்தில் வெற்றி பெற்று ஊராட்சிமன்றத் தலைவராக தேர்ந்தெடுக்கப்பட்டார்.

இந்நிலையில் மாற்று சமூகத்தைச் சேர்ந்த துணைத்தலைவர் மற்றும் ஊராட்சி செயலாளர் ஆகியோர் தாம் சொல்வதை மட்டுமே கேட்க வேண்டும் எனக் கூறி அவரை பணி செய்ய விடாமல் தடுத்ததாக கூறப்படுகிறது.

தொடர்ந்து நலத்திட்ட உதவிகளை மக்களுக்கு அளிக்க முடியாத நிலை ஏற்பட்டதால், வட்டார வளர்ச்சி அலுவலர் மகாதேவனிடம் குமார் புகார் அளித்துள்ளார். அப்போது குமாரை ஒருமையில் பேசிய மகாதேவன், துணைத்தலைவர் சொல்வதை மட்டுமே கேட்க வேண்டும் எனக்கூ றி மிரட்டியதாக தெரிகிறது. 

இதனால் மனஉளைச்சலுக்கு ஆளான குமார் திடீரென மாயமாகியுள்ளது அதிர்ச்சியை ஏற்படுத்தியுள்ளது. இது தொடர்பாக தண்டராம்பட்டு காவல் நிலையத்தில் புகார் அளித்தும் அதன்பேரில் நடவடிக்கை எடுக்காமல் போலீசார் அலட்சியம் காட்டி வருவதாக குமாரின் மனைவி கண்ணீருடன் தெரிவித்துள்ளார்.