சென்னையில் போலி பாஸ்போர்ட் தயாரித்து விற்பனை செய்த வழக்கில் மேலும் ஒரு டிராவல்ஸ் ஏஜெண்டை மத்திய குற்றப்பிரிவு போலீசார் கைது செய்துள்ளனர். 150 போலி பாஸ்போர்ட்டுகள் தயாரித்து கொடுத்து வெளிநாட்டிற்கு அனுப்பி வைத்தது விசாரணையில் தெரியவந்துள்ளது.

கடந்த 19 ஆம் தேதி சென்னை மண்டல  வருவாய் புலனாய்வு இயக்குநரகம் சார்பாக சென்னை  மத்திய குற்றப்பிரிவு போலி பாஸ்போர்ட் பிரிவில் கொடுத்த புகாரில், முகமது ஷேக் இலியாஸ் என்பவர் பாஸ்போர்ட் மற்றும் விசா போன்ற ஆவணங்களை போலியாக தயாரித்திருப்பதாகவும், அதற்கு தேவையான உபகரணங்களை வைத்திருப்பதாகவும் தெரிவித்திருந்தனர்.

அதன் அடிப்படையில், மத்திய குற்றப்பிரிவு போலீசார் வழக்கு பதிவு செய்து, விசாரணை செய்ததில் ராயபுரத்தை சேர்ந்த முகமது ஷேக் இலியாஸ் என்பவரை கைது செய்து விசாரணை மேற்கொண்டனர்.  அவர் கொடுத்த தகவலின் அடிப்படையில் மத்திய குற்றப்பிரிவு போலீசார், போலி பாஸ்போர்ட் மற்றும் போலி விசா தயார் செய்யும் ஏஜெண்டுகளை பற்றி விசாரணை மேற்கொண்டு  திருவொற்றியூரைச் சேர்ந்த சிவகுமார் மற்றும் ராயபுரத்தை சேர்ந்த முகமது புகாரி ஆகியோரை கடந்த 30ஆம் தேதி கைது செய்து தீவிர விசாரணை மேற்கொண்டனர்.
 
மேலும், விசாரணையில்  முகமது  புகாரியிடமிருந்து பாஸ்போர்ட்டுகள், பாஸ்போர்ட் தாள்கள், இந்திய அரசு மற்றும் வெளிநாடுகளின் போலியான ரப்பர் ஸ்டாம்புகள், அதை தயாரிக்கும் உபகரணங்கள், கம்ப்யூட்டர்கள், ஸ்டாம்ப் அடிக்கும் இயந்திரம், 2 செல்போன்கள் என மொத்தம் 160க்கும் மேற்பட்ட பொருட்களை கைப்பற்றினர்.

அதோடு, பாஸ்போர்ட் வாங்கி தரும் ஏஜெண்டுகளிடம் பழைய பாஸ்போர்ட்கள் மற்றும் விசா பேப்பர்களை வாங்கி அதன் உள்பக்க தாள்களை பிரித்து எடுத்து தகுதியில்லாத இந்திய மற்றும் வெளிநாட்டு நபர்களுக்கு போலியாக பாஸ்போர்ட்கள் மற்றும் விசா ஸ்டாம்பிங் செய்து தந்து பணம் பெற்று மோசடியில் ஈடுபட்டு வந்தது விசாரணையில் தெரியவந்துள்ளது. 

இவர்கள் அமெரிக்கா, மலேசியா, சிங்கப்பூர் போன்ற நாடுகளுக்கு போலி பாஸ்போர்ட் மற்றும் விசாக்கள் தயாரித்து கொடுத்ததும் விசாரணையில் தெரியவந்தது. கடந்த நான்கு வருடமாக போலி பாஸ்போர்ட், விசாக்கள் தயாரித்ததும், இதுவரை நூற்றுக்கும் மேற்பட்ட போலி பாஸ்போர்ட்டுகள் தயாரித்து விற்கப்பட்டுள்ளதாக விசாரணையில் தெரியவந்துள்ளது. 

இதையும் படிக்க      | மது நாட்டுக்கும், வீட்டுக்கும் கேடு.....! அரசுக்கு?

இந்த நிலையில் போலி பாஸ்போர்ட் விற்பனை செய்த ஏஜெண்டுகளை பற்றி மத்திய குற்றப்பிரிவு போலீசார் நடத்திய தொடர் விசாரணையில், ஹைதரபாத்தை சேர்ந்த ஏஜெண்ட் அஹமது அலிகான்(42) என்பவர் போலி பாஸ்போர்ட் விற்பனை செய்து வந்தது தெரியவந்தது. இதனையடுத்து போலீசார் அவரை கைது செய்து விசாரணை நடத்தும் போது, மும்பை மற்றும் விசாகபட்டினத்தில் 8 வருடங்களாக அகமது அலிகான் விசா சர்வீஸ் மற்றும் டிராவல்ஸ் ஏஜென்சி நடத்தி வந்ததும், வெளிநாட்டிற்கு செல்லக்கூடிய நபர்கள் தகுந்த ஆவணங்கள் இல்லாமல் வரும் போது, அவர்களது தகவல்களை அகமது அலிகான் சேகரித்து ஏற்கனவே கைது செய்யப்பட்டுள்ள முகமது இலியாஸ் என்பவரிடம் கொடுத்துள்ளார். அவர்கள் போலி பாஸ்போர்ட் தயாரித்து கொடுத்து அதற்கான கமிஷன் தொகையை பெற்று வந்ததும் தெரியவந்துள்ளது. 

இதே போல அகமது அலிகான் சுமார் 150 போலி பாஸ்போர்ட்கள் மற்றும் விசா ஸ்டாம்பிங் செய்து கொடுத்து பணம் பெற்று மோசடியில் ஈடுபட்டிருப்பதும் விசாரணையில் தெரியவந்துள்ளது. பின்னர் கைது செய்யப்பட்ட அகமது அலிகானை மத்திய குற்றப்பிரிவு போலீசார் நீதிமன்றத்தில் ஆஜர்படுத்தி சிறையில் அடைத்தனர். 

ஏஜெண்டுகள் மூலமாக பாஸ்போர்ட் மற்றும் விசா பெற விண்ணப்பிக்கும் பொதுமக்கள் இது தொடர்பாக மண்டல பாஸ்போர்ட் அலுவலகம் மூலமாக முறையான ஆவணங்களை சமர்பித்து பாஸ்போர்ட் மற்றும் சம்பந்தப்பட்ட நாடுகளின் தூதரகங்களை அணுகி விசாக்களை பெறுமாறும் காவல்துறை வேண்டுகோள் விடுத்துள்ளனர்.

இதையும் படிக்க     | பெங்களுருவில் கண்டறியப்பட்ட தமிழ்நாடு இளைஞரின் உடல்..! அடையாளங்களை வெளியிட்டுள்ளது காவல்துறை..!

திண்டுக்கல் மாவட்டம் பெத்தய கவுண்டன்பட்டியைச் சேர்ந்தவர் அழகுபாண்டி. 26 வயதான இவர் செட்டிநாயக்கன்பட்டியில் உள்ள வெல்டிங் பட்டறையில் வேலை பார்த்து வருகிறார். 

இந்நிலையில் 9-ம் தேதியன்று திண்டுக்கல் - பழனி சாலையில் உள்ள பெட்ரோல் பங்குக்கு சென்ற அழகுபாண்டியை சுற்று போட்ட 2 பேர் அரிவாளால் சரமாரியாக வெட்டி வீசி விட்டு தப்பியோடினர். 

முகத்தில் கடுமையாக வெட்டப்பட்டு சம்பவ இடத்திலேயே உயிரிழந்த அழகுபாண்டியை கண்ட பொதுமக்கள் கடும் அதிர்ச்சியில் உறைந்தனர். இதுகுறித்து சம்பவ இடத்துக்கு விரைந்த திண்டுக்கல் மேற்கு போலீசார் கொலை குறித்து விசாரணையில் இறங்கியபோது திடுக்கிடும் தகவல்கள் வெளியானது.  

அழகுபாண்டி வேலை செய்த வெல்டிங் பட்டைறையின் உரிமையாளருக்கு கடந்த 7-ம் தேதி பிறந்தநாள் விழா நடத்தப்பட்டது. இந்த விழாவில் உடன் வேலை பார்த்து வந்த கே.குரும்பப் பட்டியைச் சேர்ந்த அசோக்குமார், மகேந்திரன் ஆகிய 2 பேரும் அழகுபாண்டியுடன் சேர்ந்து மதுஅருந்தியுள்ளனர். 

அப்போது தங்களில் யார் பெரியவர் என கேட்டபோது மூவருக்கும் இடையே தகராறு எழுந்துள்ளது. இந்த ஈகோ பிரச்சினையால் 7-ம் தேதியன்று கலைந்து போன அசோக்குமாரும், மகேந்திரனும் அழகுபாண்டிக்கு குறி வைத்தனர்.   

அதன்படி முருகபவனம் பகுதியில் உள்ள பெட்ரோல் பங்க்-கில் அழகுபாண்டி நிற்பதை கண்ட இருவரும் அவரிடம் சென்று வாக்குவாதத்தில் ஈடுபட்டனர். அப்போது எழுந்த தகராறில் ஆத்திரமடைந்த அசோக்குமார் கத்தியை எடுக்க, மகேந்திரன் அரிவாளை எடுக்க இதைப் பார்த்து அதிர்ந்த அழகுபாண்டி ஓட்டமெடுக்க முயன்றார். 

ஆனால் சுதாரித்துக் கொண்ட இருவரும், அழகுபாண்டியை வண்டியில் இருந்து காலை எடுத்து வைப்பதற்கு முன்பே முகத்தை சரமாரியாக வெட்டி வீசி விட்டு தப்பியோடினர். 

பிறந்தநாள் கொண்டாட்டத்தின்போது யார் பெரியவர் என்ற மோதலில் இளைஞர் ஒருவர் கொலை செய்யப்பட்டது திண்டுக்கல் மக்களை திகைப்பில் ஆழ்த்தியுள்ளது.

இதையும் படிக்க     | மேல்பாதி கோவிலுக்கு சீல் வைத்த விவகாரம்; இரு தரப்பினரிடையே விசாரணை..!

சேலம்: சில்லி சிக்கன் தர மறுத்ததால் மறைத்து வைத்திருந்த கத்தியை எடுத்து கடை ஊழியரை சரமாரியாக தாக்கிய நபர்.

சேலம் கருங்கல்பட்டி பகுதியை சேர்ந்தவர் சதீஷ். இவர் அதே பகுதியில், சில்லி சிக்கன் கடை ஒன்றில் பணியாற்றி வருகிறார். இந்நிலையில், நேற்று இரவு கருங்கல்பட்டி முனியப்பன் கோவில் தெரு பகுதியை சேர்ந்த முரளிதரன் என்பவர், சதிஷ் பணிபுரியும் கடைக்குச் சென்றுள்ளார். 

அங்கு, குடிபோதையில் இருந்த முரளிதரன், சதீஷிடம் சில்லி சிக்கன் கேட்டு தகராறு செய்துள்ளார். அவருக்கு, சில்லி சிக்கன் தர மறுத்த சதீஷை, முரளிதரன் மறைத்து வைத்திருந்த கத்தியை எடுத்து சரமாரியாக தாக்கியுள்ளார்.   

இதில்  சதீஷிற்கு கழுத்து, தோள்பட்டை, வயிறு, ஆகிய பகுதிகளில் காயம் ஏற்பட்டு சேலம் அரசு மருத்துவமனையில் சிகிச்சைக்காக அனுமதிக்கப்பட்டார். சம்பவமறிந்த செவ்வாய்பேட்டை காவல்துறையினர், முரளிதரன் மேல் வாழக்கு பதிவு செய்து, முரளிதரனை தேடி வருகின்றனர்.

சில்லி சிக்கனுக்காக ஒருவரை கத்தியால் தாக்கியதால், அப்பகுதியில் பரபரப்பு ஏற்பட்டுள்ளது.

இதையும் படிக்க: விசாரணைக்கு வந்தால், தாக்கும் காவல் உதவி ஆய்வாளர்!

தூத்துக்குடி: தூத்துக்குடியில், விசாரணைக்கு வந்த நபரை தாக்கியுள்ளார் காவல் உதவி ஆய்வாளர்.

தூத்துக்குடி மாவட்டம் விளாத்திகுளம் அருகே உள்ள எம் சண்முகபுரம் கிராமத்தைச் சேர்ந்த   ஜெகநாதன். அவருக்கும்  சூரங்குடி கிராமத்தைச் சேர்ந்த  அழகு முருகேசன் என்பவருக்கும் நிலப் பிரச்சனை இருந்து வந்துள்ளது. இது தொடர்பாக முன்பே, புகார் மனு அளிக்கப்பட்டிருந்ததை தொடர்ந்து,  சூரங்குடி காவல் நிலைய உதவி ஆய்வாளர் சுந்தரம்  தலைமையில் நேற்று வியாழக்கிழமை  சூரங்குடி காவல் நிலையத்தில் விசாரணை நடைபெற்றுள்ளது. 

அப்பொழுது, விசாரணைக்காக அழகு முருகன் உடன் அவரது சகோதரர் ராஜகனி என்பவரும்  உடன் வந்துள்ளார். விசாரணை நடைபெற்றுக் கொண்டிருக்கும் பொழுது காவல் உதவி ஆய்வாளர் சுந்தரத்திற்கும், ராஜகனிக்கும் இடையே கடுமையான வாக்குவாதம் ஏற்பட்டுள்ளது. இதில் ஆத்திரமடைந்த ஆய்வாளர் சுந்தரம், ராஜகனியை தள்ளிவிட்டு தாக்கியதாக கூறப்படுகிறது. இந்த தாக்குதலில், காயமடைந்த ராஜகனி தற்போது தூத்துக்குடி அரசு மருத்துவமனையில் சிகிச்சை பெற்று வருகிறார். 

இதுபோல, கடந்த 2018ல், உயர் நீதி மன்ற வக்கீல் பெரியசாமி என்பவர், தட்டார்மடம் காவல் நிலையத்தில், ஒரு புகார் தெரிவிக்க சென்றுள்ளார். அப்பொழுது, அங்கு பணியில் இருந்த ஆய்வாளர் சுந்தரம், அவரை கடுமையாக தாக்கியும், தான் ரத்தக் கறையுடன் இருப்பதய் பதிவு செய்வதற்காக தனது தொலைபேசியில், செல்பி எடுத்துள்ளார். அப்பொழுது, ஆய்வாளர் சுந்தரம், உன்னால் என்ன செய்ய முடியும் என்றவாறு, புகைப்படத்திற்கு போஸ் கொடுத்துள்ளார்.  

தொடர்ந்து, இதுபோல விசாரணைக்கு வருபவர்களை தாக்கும் ஆய்வாளருக்கு கடுமையான நடவடிக்கை எடுக்கப்படாமல் இருப்பது கேள்விக் குறியாகியுள்ளது.