திருவள்ளூர் மாவட்டம் பட்டாபிராம் பகுதியில் 16 வயது பெண்ணை கடத்தி 11 மாதங்களாக போலீசுக்கு போக்கு காட்டிய இளைஞர் கைது செய்யப்பட்டார்.

பட்டாபிராம் பகுதியில் 10ம் வகுப்பு பயின்று வரும் மாணவி கடந்த மார்ச் மாதம் காணாமல் போகியுள்ளார். இதுகுறித்து காவல்நிலையத்தில் மாணவியின் பெற்றோர் அளித்த புகாரின் அடிப்படையில் விசாரணை நடத்திய தனிப்படை போலீசார், கிருஷ்ணகிரியைச் சேர்ந்த சிலம்பரசன் என்ற இளைஞர் தான், மாணவியை கடத்திச் சென்றுள்ளார் என்பதை கண்டுபிடித்தனர். 

இதையடுத்து, தலைமறைவாக இருந்த ஜோடியை பிடித்து போலீசார் விசாரித்த போது, இருவரும் காதலித்து வந்ததும், திருமணம் செய்துகொள்ள முடிவெடுத்து வீட்டைவிட்டு வெளியேறியதும் தெரியவந்துள்ளது. இதனையடுத்து, இளைஞரை கைது செய்த போலீசார் ஆள்கடத்தல், போக்சோ உள்ளிட்ட சட்டத்தின் கீழ் வழக்குப்பதிவு செய்து சிறையில் அடைத்தனர்.

கன்னியாகுமரி மாவட்டம் நாகர்கோவில் அருகே மனைவியுடனான தவறான உறவை கண்டித்த ரவுடி வெட்டிக்கொலை செய்யப்பட்ட வழக்கில் மேலும் 3 பேரை போலீசார் கைது செய்துள்ளனர்.

நாகர்கோவில் அருகேயுள்ள குஞ்சன்விளை பகுதியை சேர்ந்தவர் ரவுடி தங்க கிருஷ்ணன். வெல்டிங் பட்டறை நடத்தி வரும் இவர் மீது, கொலை மற்றும் கொலை மிரட்டல் உள்ளிட்ட பல்வேறு வழக்குகள் நிலுவையில் உள்ளன.

இந்நிலையில் கடந்த வாரம் 8 பேர் கொண்ட மர்ம கும்பல் ஒன்று அவரை வீட்டின் அருகிலேயே வெட்டிக் கொலை செய்துவிட்டு தப்பிச் சென்றது.

இதுகுறித்து போலீசார்.  வழக்குப்பதிவு செய்து விசாரணை நடத்திய வந்த நிலையில், 4 பேரை கைது செய்தனர். அவர்களிடம் நடத்திய விசாரணையில், ரவுடி தங்க கிருஷ்ணன் மனைவிக்கும், பிரபு ஜெகதீஸ் என்பவருக்கும் தவறான உறவு இருந்தததும் அதனை தட்டிக்கேட்டதால் வெட்டிக் கொலை செய்ததும் தெரியவந்தது.

தொடர் விசாரணையில் மேலும் மூவரை கைது செய்த போலீசார், முக்கிய குற்றவாளியான பிரபு ஜெகதீசனை தேடி வருகின்றனர்.

செங்கல்பட்டு மாவட்டம் மறைமலைநகர் அடுத்த கடம்பூர் பகுதியில் உள்ள விவசாய கிணற்றில் மூன்று பேரின் உடல்களை கண்ட அப்பகுதியினர் போலீசாருக்கு தகவல் தெரிவித்தனர். தகவலின் பேரில் சம்பவ இடத்திற்கு விரைந்து சென்ற மறைமலைநகர் போலீசார் கிணற்றில் இருந்து  பெரியவர் ஒருவரின் சடலத்தையும் இரண்டு குழந்தைகளின் சடலத்தையும் மீட்டனர். 

இதனைத்தொடர்ந்து உயிரிழந்தவர்கள் குறித்து நடத்தப்பட்ட விசாரணையில், சென்னை புதுப்பேட்டை பகுதியைச் சேர்ந்த ஆட்டோ ஓட்டுனர் ஞானவேல் என்பதும், அவரது மகள்கள் ஐஸ்வர்யா மற்றும் பூஜா என்பது தெரியவந்தது. 

இந்நிலையில் கடந்த மூன்று நாட்களுக்கு முன்பு ஞானவேல் மற்றும் அவரது மனைவி ஜெயந்தி இடையே தகராறு ஏற்பட்டுள்ளது. அப்போது மனைவியிடம் கோபித்துக் கொண்ட ஞானவேல் தனது இரு மகள்களையும் ஆட்டோவில் அழைத்து வந்து கடம்பூர் பகுதியில் உள்ள விவசாய கிணற்றில் குதித்து தற்கொலை செய்து கொண்டது தெரியவந்தது.  பின்னர் உடல்களை கைப்பற்றிய போலீசார் பிரேத பரிசோதனைக்காக செங்கல்பட்டு அரசு மருத்துவமனைக்கு அனுப்பி வைத்தனர்.

மேலும் இச்சம்பவம் குறித்து வழக்குப்பதிவு செய்த போலீசார் குடும்ப பிரச்சனை காரணமாக மூவரும் தற்கொலை செய்து கொண்டாரா? அல்லது வேறு ஏதேனும் காரணம் உள்ளதா என்று தீவிர விசாரணை மேற்கொண்டு வருகின்றனர். 

ஒரே குடும்பத்தை சேர்ந்த 3 பேர் கிணற்றில் விழுந்து தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது.

தர்மபுரி மாவட்டம் பாலக்கோடு அருகேயுள்ள கிருஷ்ணன் கொட்டாய் கிராமத்தை சேர்ந்தவர் வசந்தகுமார். கட்டிட தொழிலாளியான இவர், ஓசூர் பகுதியில் தங்கியிருந்து கட்டிட வேலை செய்து வருகிறார்.

மதுபிரியரான இவர், நேற்று இரவு கர்நாடக மாநில எல்லையான பல்லூர் பகுதியில் உள்ள ஒரு மதுபான கடைக்கு மது அருந்த சென்றுள்ளார். அளவுக்கு அதிகமாக மது அருந்திய அவரிடம் அங்கு மதுபோதையில் நின்ற வடமாநில வாலிபர்கள் பணம் கேட்டு மிரட்டியுள்ளனர்.

மதுபோதையில் இருந்த வசந்தகுமார் அவர்களுக்கு பணம் கொடுக்க மறுத்ததால் ஆத்திரமடைந்த வடமாநில வாலிபர்கள், தாங்கள் வைத்திருந்த கத்தியால் வசந்தகுமாரின் வயிறு முகம் உள்ளிட்ட பகுதிகளில் சரமாரியாக குத்திவிட்டு அங்கிருந்த சென்றனர்.

இந்த தாக்குதலில் பலத்தகாயமடைந்த வசந்தகுமார் அங்கிருந்து தமிழக எல்லைக்கு நடந்து வந்துள்ளார்.  ஒருகட்டத்தில் வலியால் துடித்த அவர், நடக்க முடியாமல் மயக்கமடைந்து விழுந்துள்ளதாக கூறப்படுகிறது.

அதனைதொடர்ந்து இன்று அதிகாலை அந்த வழியாக வந்தவர்கள், படுகாயத்துடன் மயங்கி கிடந்த வசந்தகுமாரை மீட்டு சிகிச்சைக்காக ஒசூர் அரசு மருத்துவமனைக்கு அனுப்பி வைத்தனர். தகவலறிந்து வந்த போலீசார். இச்சம்பவம் குறித்து வழக்குபதிவு செய்து விசாரணை செய்து வருகின்றனர்.

அரியலூர்மாவட்டம் வடுகபாளையம் கீழத்தெருவை சேர்ந்தவர் முருகானந்தம். இவரின் முதல் மனைவி கனிமொழி 8 ஆண்டுகளுக்கு முன் இறந்துவிட்டார். இவர்களது 17 வயது மகள் மைக்கேல்பட்டி தூயஇருதய மேல்நிலைப் பள்ளியில்  12ஆம் வகுப்பில் படித்து வருகிறார். அருகில்உள்ள செயின்ட். மைக்கேல் மகளிர் விடுதியில் தங்கி படித்து வந்தார்.

இந்நிலையில் கடந்த 9ஆம் மாணவி வாந்தி எடுத்துள்ளார். தனக்கு வயிற்று வலி என்று மாணவி கூறியதால் அருகில் உள்ள மருத்துவமனையில் சிகிச்சை அளித்துள்ளனர். மறுதினம் மாணவியின் தந்தைக்கு தெரியப்படுத்தியதும்.  அவர் வந்து அழைத்துச் சென்று விட்டார். கடந்த 15ஆம் தேதி அன்று மீண்டும் உடல்நிலை சரியில்லாமல்  போகவே, தஞ்சை மருத்துவ கல்லூரி மருத்துவமனையில் சிகிச்சைக்காக சேர்த்துள்ளனர். அங்கு பரிசோதித்த டாக்டர்களிடம் தான் பூச்சிக்கொல்லி மருந்தை குடித்ததாகவும், விடுதியில் தன்னை அனைத்து அறைகளையும் தூய்மை செய்யவேண்டும் என்று வார்டன் கூறியதால் ஏற்பட்ட மன உளைச்சலினால் பூச்சி மருந்து குடித்ததாகவும் மாணவி கூறியுள்ளார்.

உடனடியாக இதுகுறித்து டாக்டர்கள் திருக்காட்டுப்பள்ளி போலீசாருக்கு தெரியப்படுத்தி உள்ளனர். இதுகுறித்து போலீசார் மாணவியிடம் விசாரணை மேற்கொண்டனர். இந்நிலையில் திங்கள்கிழமை முருகானந்தம் தரப்பினர், திருக்காட்டுப்பள்ளி காவல் நிலையம் வந்து விடுதி வார்டன் மதம் மாற வற்புறுத்தியதால் மாணவி பூச்சிகொல்லி மருந்தை குடித்ததாக கூறி கூச்சலிட்டனர். இதுகுறித்து திருக்காட்டுப்பள்ளி காவல் துறையினர் வார்டன் சகாயமேரியை கைது செய்து விசாரித்து வருகின்றனர்.