திருப்பத்தூர் மாவட்டம், கந்திலி அடுத்த கொட்டாவூர் கிராமத்தை சேர்ந்தவர்கள் சத்தியமூர்த்தி, திவ்யா தம்பதி. இவர்களுக்கு 3 வயதில் ஒரு மகள் உள்ளார். இந்த நிலையில், கடந்த சில தினங்களுக்கு முன்பு சத்தியமூர்த்தி மனைவி திவ்யாவை மண்ணெண்ணெய் ஊற்றி எரித்து கொலை செய்துவிட்டு மகளுடன் தப்பி சென்றுள்ளார். இதைத்தொடர்ந்து தனக்கு இரண்டு கிட்னியும் செயலிழந்து விட்டதாகவும், இதனால் மனைவியை பிரிந்து வாழ முடியாது என்பதால் மனைவியை கொலை செய்துவிட்டதாக வீடியோ ஒன்றை வெளியிட்டார். மேலும் தானும் தற்கொலை செய்து கொள்ளப்போவதாகவும், தன்னை யாரும் தேட வேண்டாம் என வீடியோவில் குறிப்பிட்டிருந்தார்.

இது குறித்து வழக்கு பதிவு செய்த போலீசார், சத்தியமூர்த்தியை வலைவீசி தேடிவந்தனர்.  இந்தநிலையில் சென்னை போரூரில் உள்ள தனியார் மருத்துவ கல்லூரியில் நர்சிங் படித்து வந்த திவ்யாவின் தாய்மாமன் மகள் அர்ச்சனா காணவில்லை என அப்பகுதி காவல் நிலையத்தில் புகார் அளிக்கப்பட்டது. இது குறித்து வழக்கு பதிவு செய்த போரூர் போலீசார் விசாரணை மேற்கொண்டு வந்தனர். இந்தநிலையில், சத்தியமூர்த்தி திருப்பூரில் இருந்து காரில் போரூரில் உள்ள மருத்துவமனைக்கு வந்தது தெரியவந்துள்ளது. மேலும் மருத்துவமனை வளாகத்தில் காரை நிறுத்திவிட்டு அர்ச்சனாவுடன் மாயமானது விசாரணையில் அம்பலமானது. தொடர்ந்து போலீசார் காரை பறிமுதல் செய்து விசாரணை மேற்கொண்டு வருகின்றனர்.

சென்னை வண்ணாரப்பேட்டை பகுதியில் சட்ட விரோதமாக கஞ்சா விற்பனையில் ஈடுபட்ட இரு பெண்களை போலீசார் கைது செய்து சிறையில் அடைத்தனர்.

சென்னை வண்ணாரப்பேட்டை பகுதிக்குட்பட்ட கத்திவாக்கம் நெடுஞ்சாலையில் உள்ள மூலக்கொத்தளம் சுடுகாட்டில் கஞ்சா விற்பனை தொடர்ந்து நடைபெற்று வருவதாக போலீசாருக்கு ரகசிய தகவல் கிடைத்தது. இந்த தகவலின் அடிப்படையில் வண்ணாரப்பேட்டை சட்டம் ஒழுங்கு ஆய்வாளர் பிரவீன் டேனி  தலைமையிலான போலீசார் சுடுகாடு அமைந்துள்ள பகுதியை திடீர் ஆய்வு மேற்கொண்டனர். அப்போது அப்பகுதியில் இரு பெண்கள் கஞ்சா விற்பனையில் ஈடுபட்டிருந்தது தெரிய வந்ததை அடுத்து அவர்கள் இருவரையும் கையும் களவுமாகப் பிடித்து காவல் நிலையம் அழைத்துச் சென்று விசாரணை மேற்கொண்டனர்.

இந்த விசாரணையில் அவ்விருவரும் சென்னை பார்க் டவுன் பகுதியைச் சேர்ந்த பாலா மற்றும் அன்னை சத்யா நகர் பகுதியைச் சேர்ந்த தேனம்மாள் என்பது தெரியவந்தது.  மேலும், இவர்கள் இருவர் மீதும் கோட்டை மற்றும் பூக்கடை காவல் நிலையங்களில் பல்வேறு குற்ற வழக்குகள் நிலுவையில் உள்ளதும் தெரியவந்தது. அதுமட்டுமல்லாமல் அவர்களிடம் இருந்த 1 1/2 கிலோ கஞ்சா பொட்டலங்களையும் பறிமுதல் செய்த போலீசார் அவர்கள் மீது வழக்குப்பதிவு செய்து நீதிமன்றத்தில் ஆஜர்படுத்தி சிறையில் அடைத்தனர். சட்ட விரோதமாக சுடுகாடு பகுதியில் இரண்டு பெண்கள் கஞ்சா விற்பனையில் ஈடுபட்டு போலீசாரால் கைது செய்யப்பட்டுள்ள சம்பவம் அப்பகுதியில் பரபரப்பை ஏற்படுத்தியுள்ளது.

சென்னையில் கோவிலின் முன்பு கண்டெடுக்கப்பட்ட 3 ஐம்பொன் சிலைகள் தொடர்பாக போலீசார் விசாரணை மேற்கொண்டு வருகின்றனர்.

சென்னை ஜாம்பஜார் பகுதிக்கு உட்பட்ட ஆறுமுகப்பா தெருவில் முத்துமாரியம்மன் கோவில் அமைந்துள்ளது. இந்நிலையில் இன்று காலை இந்த கோவிலின் முன்பு கிடந்த ஒரு பையில் 3 ஐம்பொன்னாலான சிலைகள் கண்டெடுக்கப்பட்டதாக தி.மு.க-வின் 115வது வட்டச் செயலாளர் உட்பட அப்பகுதி மக்கள் ஜாம்பஜார் காவல் நிலையத்தில் புகார் அளித்தனர். அதனடிப்படையில் ஜாம்பஜார் போலீசார் சம்பவ இடத்திற்கு விரைந்து அந்த பையை பரிசோதித்தபோது அதில் 3/4 அடி உயரமுள்ள அம்மன் சிலை, 1 அடி உயரமுள்ள கிருஷ்ணர் சிலை, 5 இஞ்ச் உயரமுள்ள அன்னபூரணி சிலை மற்றும் 2 அடியுள்ள பிரபை சங்கு உள்ளிட்டவை இருப்பது தெரியவந்தது. 

இதனையடுத்து அவற்றை கைப்பற்றிய போலீசார் சிலைகளை காவல் நிலையம் எடுத்துச் சென்று இச்சம்பவம் தொடர்பாக விசாரணை மேற்கொண்டு வருகின்றனர். மேலும், சம்பவ இடத்திலுள்ள சி.சி.டி.வி காட்சிகளை ஆய்வு மேற்கொண்டு சிலைகளை அங்கு வைத்தவர்கள் யார்? என்பது குறித்தும், இந்தச் சிலைகள் ஏதேனும் கோவில்களில் திருடப்பட்ட புராதன சிலைகளா? என்பது குறித்தும் போலீசார் தீவிர விசாரணை மேற்கொண்டு வருகின்றனர். மேலும், கைப்பற்றப்பட்ட சிலைகள் தொடர்பாக அறநிலையத்துறை அதிகாரிகளுக்கும், சிலை கடத்தல் தடுப்புப் பிரிவு அதிகாரிகளுக்கும் தகவல் கொடுக்கப்பட்டுள்ளதாகவும் போலீசார் தகவல் தெரிவித்துள்ளனர்.

சென்னை திருமங்கலம் வ.உ.சி நகரைச் சேர்ந்தவர் தினேஷ் (28). ஆட்டோ ஓட்டும் தொழில் செய்து வரும் இவர் திருமங்கலம் காவல் நிலைய சரித்திரப் பதிவேடு குற்றவாளியாவார். இந்நிலையில் தினேஷ் நேற்று இரவு 9 மணியளவில் திருமங்கலம் டி.வி நகர் பகுதியில் மது அருந்திகொண்டிருந்தார்.  அப்போது ஒரு காரில் அங்கு வந்த 7 பேர் கொண்ட கும்பல் தினேஷை தங்களுடன் காரில் வருமாறு அழைத்துள்ளனர். ஆனால் அவர்களுடன் செல்ல தினேஷ் மறுப்பு தெரிவிக்கவே ஆத்திரமடைந்த அந்த கும்பல் தினேஷ் குடித்துக் கொண்டிருந்த பீர் பாட்டிலைப் பிடுங்கி அவரது தலையில் அடித்து உடைத்து பின் அதே பாட்டிலால் தினேஷின் நெஞ்சுப் பகுதியில் குத்தியுள்ளனர்.

இதில் படுகாயமடைந்த தினேஷ் அங்கிருந்து தப்பியோடி வந்த நிலையில் அவரது நண்பர்களான நரேன் மற்றும் சுரேஷ் ஆகியோரின் உதவியுடன் கீழ்ப்பாக்கம் அரசு மருத்துவமனையில் சிகிச்சைக்காக அனுமதிக்கப்பட்டார். அதனைத் தொடர்ந்து மேல் சிகிச்சைக்காக ராஜீவ் காந்தி அரசு மருத்துவமனையில் சேர்க்கப்பட்டுள்ளார். படுகாயம் ஏற்பட்டுள்ள நிலையில் அவருக்கு தீவிர சிகிச்சைப் பிரிவில் சிகிச்சை அளிக்கப்பட்டு வருகிறது.

இச்சம்பவம் தொடர்பாக திருமங்கலம் போலீசார் வழக்குப்பதிவு செய்து சந்தேகத்தின் அடிப்படையில் ஜெ.ஜெ நகர் சரித்திரப் பதிவேடு குற்றவாளியான முகப்பேரைச் சேர்ந்த மூர்த்தி (எ) ரிப்பன் பிள்டிங் மூர்த்தி (32), குமணன்சாவடியைச் சேர்ந்த சயின்ஷா (18) மற்றும் மாங்காடு பகுதியைச் சேர்ந்த சந்தோஷ் (25) ஆகிய 3 பேரைப் பிடித்து போலீசார் விசாரணை மேற்கொண்டு வருகின்றனர்.

கர்நாடகா மாநிலம் தட்சிண கன்னடா மாவட்டம் மங்களூர் அருகே கடபா பகுதியில் 16 வயது சிறுமி ஒருவர் பாலியல் வன்கொடுமை தொடர்பாக  கடப்பா காவல் நிலையத்திற்கு புகார் அளிக்க சென்றார், அப்போழுது அந்த காவல்நிலையத்தில் காவலராக பணிபுரிந்து வரும் சிவராஜ் என்ற காவலர் விசாரணை நடத்துகிறேன் என்ற போர்வையில் அடிக்கடி சம்மன் கொடுக்கச் சென்ற சிறுமியின் வீட்டுக்கு அடிக்கடி போகும்போது, புகார் அளிக்க வந்த சிறுமியை தானும் வன்கொடுமை செய்து கர்ப்பிணியாக்கியுள்ளார்.

காவலர் சிவராஜ் பாலியல் வன்கொடுமை சம்பவம் தொடர்பாக வழக்குகள் முடிந்து இருந்தாலும், மீண்டும் மீண்டும் ஏதாவது ஒரு சாக்கு போக்கு சொல்லி அடிக்கடி சிறுமியின் வீட்டுக்கு சென்று வந்துள்ளார். மேலும் சிறுமியிடன் ஆசை வார்த்தை கூறியும் மிரட்டியும் பாலியல் வன்கொடுமை செய்துள்ளார். இதனால் தற்போது சிறுமி 5 மாத கர்ப்பிணி ஆனார். இந்நிலையில், சிறுமியின் கர்ப்பம் அறிந்த பெற்றோர் விசாரணை மேற்கொண்டபோது, காவலர் சிவராஜ் தான் தனக்கு திருமண ஆசை காட்டி ஏமாற்றியதாக கூறியுள்ளார். அதனை தொடர்ந்து சிறுமியின் பெற்றோர் சிவராஜை தொடர்பு கொண்டு கேட்ட போது, தன்னால் திருமணம் செய்ய இயலாது. வேண்டுமெனில் கர்ப்பத்தை கலைத்துக் கொள்ளுங்கள் என்று திமிராக கூறியுள்ளார். 

அதனைத் தொடர்ந்து கடந்த 18ம் சிறுமியும் அவரது தாயாரும் மருத்துவமனைக்கு சென்று உள்ளனர். பிறகு இதுவரை வீடு திரும்பவில்லை. இந்த நிலையில், மருத்துவமனைக்கு சென்ற சிறுமியின் தாயார், தன் கணவருக்கு போன் செய்து காவலர் சிவராஜ் 35 ஆயிரம் ரூபாய் கர்ப்பத்தை கலைக்க செலவுக்காக ஆன்லைன் மூலம் அனுப்பி உள்ளார் என்ற விவரத்தை மட்டும் கூறியுள்ளார்.ஆனால், எங்கு இருக்கிறேன் என்ற விவரத்தை தெரிவிக்கவில்லை. இதனைத் தொடர்ந்து சிறுமியின் தந்தை தற்போது, முதலமைச்சர் அலுவலகத்திற்கும் கடப்பா காவல் நிலையத்திற்கும் புகார் கொடுக்கப்பட்டதனை தொடர்ந்து, கடப்பா போலிஸார் வழக்குப்பதிவு செய்து சிவராஜை கைது செய்து செய்து விசாரணை மேற்கொண்டு வருகின்றனர். பாலியல் புகார் அளிக்க சென்ற சிறுமியை காவலர் ஒருவரே வன்கொடுமை செய்து கர்ப்பமாக்கிய சம்பவம் பெரும் பரபரப்பை ஏற்படுத்தியுள்ளது.