திண்டுக்கல் மாவட்டம் வேடசந்தூர் பூலாங்குளம் என்ற பகுதியில் சாக்குமூட்டையில் ரத்த காயங்களுடன் சடலம் கிடப்பதாக போலீசாருக்கு தகவல் கிடைத்தது. அதனைத்தொடர்ந்து போலீசார் சம்பவ இடத்திற்கு சென்று சாக்குமூட்டையை பிரித்து பார்த்த போது பெண் என்பதும் கன்னிவாடி அருகே உள்ள கீழதிப்பம்பட்டியை சேர்ந்த பாண்டீஸ்வரி என்பதும் தெரிய வந்தது.

மேலும் பாண்டீஸ்வரி தனது முதல் கணவரை பிரிந்து இரண்டாவதாக அமுல்ராஜ் என்பவரைத் திருமணம் செய்து அவருடன் வசித்து வந்துள்ளார். ஆனால் கடந்த சில மாதங்களுக்கு முன்னர் கஞ்சா கடத்திய  வழக்கில்  அமுல்ராஜ் கைது செய்யப்பட்டு  சிறையில் அடைக்கப்பட்டுள்ள நிலையில் தனியாக வசித்து வந்த பாண்டீஸ்வரிக்கு, சேடபட்டியை சேர்ந்த ஹவுஸ் பாண்டி என்பவருடன் பழக்கம் ஏற்பட்டு நாளடைவில் கள்ளக்காதலாக மாறியுள்ளது.

கடந்த சில மாதங்களாக இருவரும் சேர்ந்து திருட்டு, கஞ்சா உள்ளிட்ட பல்வேறு குற்றச்செயல்களில் ஈடுபட்டு வந்துள்ளனர்.  அவ்வாறு கிடைக்கும் பணத்தை பங்கு  பிரிப்பதில் அவர்கள் இருவருக்கும் இடையே அடிக்கடி தகராறு ஏற்பட்டு வந்துள்ளது. இதனால் ஆத்திரமடைந்த ஹவுஸ் பாண்டி,  பாண்டீஸ்வரியை ஆள் நடமாட்டம் இல்லாத பகுதிக்கு அழைத்துச் சென்று அரிவாளால் சரமாரியாக வெட்டி கொலை செய்துள்ளார்.

அதன் பின்னர் அவரது உடலை சாக்குமூட்டையில் கட்டி சாலையோரம் வீசிச் சென்றதும் போலீஸ் விசாரணையில் தெரியவந்தது.இதையடுத்து  பாண்டீஸ்வரியை கொலை செய்த கள்ளக்காதலன்  ஹவுஸ் பாண்டியை போலீசார் கைது செய்து தீவிர விசாரணை நடத்தி வருகின்றனர்.

செங்கல்பட்டு மாவட்டம் திருப்போரூர் அடுத்த இடயாம் குப்பம் வனப்பகுதியில் அழுகிய நிலையில் ஆண் சடலம் கிடப்பதாக திருப்போரூர் போலீசாருக்கு பொதுமக்கள் தகவல் கொடுத்தனர்.

தகவலின் பேரில் சம்பவ இடத்திற்கு விரைந்து போலீசார் மற்றும் வனத்துறையினர், அழுகிய நிலையில் சுமார் 40 வயது மதிக்கத்தக்க ஆண் சடலம் இருப்பதை கண்டனர். சடலத்தை மீட்ட போலீசார் உடற்கூறு ஆய்வுக்காக செங்கல்பட்டு அரசு மருத்துவமனைக்கு அனுப்பி வைத்தனர். 

பின்பு இது குறித்து வழக்கு பதிவு செய்து கொலையா? அல்லது  தற்கொலையா? என பல்வேறு கோணத்தில் போலீசார் விசாரணை மேற்கொண்டு வருகின்றனர். மேலும் அழுகிய நிலையில் கிடந்த சலத்தால் அப்பகுதியில் பெரும் பரபரப்பு நிலவியது.

கடலூர் மாவட்டம் விருத்தாசலம் அருகே கம்மாபுரம் கிராமத்தைச் சேர்ந்த ஆறுமுகம் மகள் ராஜலட்சுமி இவருக்கும் ஒகலூர் கிராமத்தைச் சேர்ந்த வாலிபருக்கும் கடந்த 7 ஆண்டுகள் முன்பு திருமணம் நடைபெற்றது திருமணம் முடிந்து ஒரு ஆண்டில் கணவர் விபத்தில் இறந்ததால் ராஜலட்சுமி தனது பெற்றோருடன் வசித்து வந்தார். இந்த நிலையில் ராஜலட்சுமிக்கும் ஆவினங்குடி கிராமத்தைச் சேர்ந்த கந்தசாமி மகன் நாகராஜன் என்பவருக்கும் கடந்த 5 ஆண்டுகள் முன்பு இரண்டாவது திருமணம்  நடைபெற்றுள்ளது.

இந்த நிலையில் முதல் கணவர் விபத்தில் இறந்ததற்கு நஷ்ட ஈட்டு  பணம் ராஜலட்சுமியிடம் 3 லட்சம் இருந்துள்ளது. அந்தப் பணத்தை வாங்கி நாகராஜன் செலவழித்து விட்டதாகவும் பின்னர் ராஜலட்சுமியிடம் தகராறு செய்ததால் ராஜலட்சுமி தனது தந்தை ஊருக்கு கம்மாபுரம் வந்துவிட்டார்.

இந்த நிலையில் மீண்டும் நாகராஜன் தன் மனைவியிடம் சமாதானம் செய்து நாம் இரண்டுபேரும் கம்மாபுரம் கிராமத்தில் தனியாக வீடு எடுத்து இருக்கலாம் என்று கூறியுள்ளார். பின்னர் இரண்டு பேரும் தனியாக வீடு எடுத்து தங்கி வசித்துவந்தனர் ராஜலட்சுமி கம்மாபுரம் ஊராட்சி ஒன்றிய துவக்கப் பள்ளியில் சத்துணவு ஊழியராக பணியாற்றி வருகிறார். நாகராஜன் சித்தாள் வேலை செய்து வந்தார். இந்த நிலையில் நாகராஜன் மீண்டும் ராஜலட்சுமி மீது சந்தேகப்பட்டு அடிக்கடி சண்டை போட்டு ராஜலட்சுமியின் சம்பளப் பணத்தையும் வாங்கி செலவழித்து வந்தார்.

இந்த நிலையில்  நாகராஜன் தனது அக்கா பேச்சைக் கேட்டுக் கொண்டு அடிக்கடி ராஜலட்சுமியிடம்  தகராறு செய்து வந்ததாக கூறப்படுகிறது. இந்த நிலையில் இன்று காலை நாகராஜ் தனது மனைவி ராஜலட்சுமியிடம் தகராறு செய்துள்ளார். பின்னர் நாகராஜ் மாமியார் வீட்டுக்குச் சென்று சாப்பிட்டுவிட்டு ஆவினங்குடிக்கு சென்று அவரது அக்காவை பார்த்து விட்டு மீண்டும் கம்மாபுரம் வீட்டிற்கு வந்துள்ளார். 

ராஜலட்சுமி  பள்ளி மாணவ, மாணவிகளுக்கு மதிய உணவு கொடுத்துவிட்டு  வீட்டுக்கு வந்துள்ளார். அப்பொழுது நாகராஜனுக்கும், ராஜலட்சுமிக்கும் தகராறு ஏற்பட்டுள்ளது. அப்போது நாகராஜன் மனைவியை கொலை செய்யும் நோக்கத்தோடு வீட்டில் டி.வி. சப்தத்தை அதிகரித்து வைத்து ராஜலட்சுமியின் கையைக் கட்டி விட்டு  நாகராஜன் தான் மறைத்து வைத்திருந்த கத்தியால் மனைவியின் முதுகிலும், கழுத்திலும் தாக்கியுள்ளார்.

இதில் ரத்த வெள்ளத்தில் ராஜலட்சுமி துடிதுடித்து சம்பவ இடத்திலேயே இறந்தார். பின்னர் நாகராஜன் வீட்டை விட்டு வெளியேறும் பொழுது ரத்த கரையுடன் சென்றதால் அக்கம்பக்கத்தினர் சந்தேகப்பட்டு வீட்டில் சென்று பார்த்தபோது ராஜலட்சுமி ரத்தவெள்ளத்தில் இறந்து கிடப்பது தெரியவந்தது.

பின்னர் அக்கம்பக்கத்தினர் கூச்சலிட நாகராஜ் அங்கிருந்து தப்பித்து ஓடி கம்மாபுரம் காவல் நிலையத்தில் சரணடைந்தார். பின்னர் சம்பவ இடத்திற்கு கம்மாபுரம் போலீசார் சென்று ராஜலட்சுமி உடலை கைப்பற்றி பிரேத பரிசோதனைக்காக முண்டியம்பாக்கம் அனுப்பிவைத்தனர். மனைவியை சந்தேகப்பட்டு கணவன் மனைவியை கொலை செய்த சம்பவம்  அப்பகுதியில் பெரும் பரபரப்பை ஏற்படுத்தியது.

மதுரை மாவட்டம் திருப்பரங்குன்றத்தை அடுத்த திருநகர் லயன் சிட்டி பகுதியை சேர்ந்தவர் பொன்ராஜ்(55). இவர் மனைவி ராமலட்சுமி, இவருக்கு 2 மகன்கள் உள்ளனர் ஒருவர் அமெரிக்காவிலும் மற்றொருவர் பெங்களூரில் உள்ளனர். பொன்ராஜ் திருநகர் மூன்றாவது பேருந்து நிறுத்தத்தில் அய்யனார் என்னும் பெயரில் பலசரக்கு கடை நடத்தி வருகிறார். வழக்கமாக பொன்ராஜ் மற்றும் அவரது மனைவி இருவரும் வியாபாரத்திற்காக கடைக்கு செல்வது வழக்கம்.

இந்த நிலையில் நேற்று காலை வழக்கம்போல் பொன்ராஜ் தனது மனைவி ராமலட்சுமியுடன் வீட்டின் கதவை பூட்டி விட்டு வியாபாரத்திற்காக கடைக்கு சென்றுள்ளனர். பின்னர் இரவு 11 மணி அளவில் கடையை அடைத்துவிட்டு வீடு திரும்பிய பொன்ராஜ்க்கு அதிர்ச்சி காத்திருந்தது.  பொன்ராஜின் வீட்டு கதவுகள் உடைக்கப்பட்டு வீட்டுக்குள் இருந்த பொருட்கள் அனைத்தும் சிதறி கிடந்தன. 

மேலும் படுக்கை அறையில் இருந்த பீரோவின் கதவு உடைக்கப்பட்டு பீரோவில் இருந்த 60 சவரன் நகை கொள்ளை அடிக்கப்பட்டுள்ளது. பொன்ராஜ் திருநகர் காவல் நிலையத்திற்கு தகவல் தெரிவித்துள்ளார். சம்பவ இடத்திற்கு வந்த திருநகர் காவல் துறையினர் கைரேகை நிபுணர்கள் உதவியுடன் தீவிர விசாரணை மேற்கொண்டு வருகின்றனர். பூட்டியிருந்த வீட்டின் கதவை உடைத்து 20 பவுன் நகை கொள்ளை பெயர்ப்பது இந்த பகுதியில் பெரும் பரபரப்பை ஏற்படுத்தியுள்ளது.

நாமக்கல் மாவட்டத்தில் கஞ்சா மற்றும் போதைப் பொருள்கள் விற்பனை செய்த வழக்கில் இதுவரை 48 பேர் கைது செய்யப்பட்டுள்ளதாக காவல் கண்காணிப்பாளர் சாய்சரண் தேஜஸ்வி தெரிவித்துள்ளார்.

நாமக்கல் மாவட்ட காவல் துறை மற்றும் உணவு பாதுகாப்புத் துறையினர் இணைந்து மாவட்டம் முழுவதும் போதைப் பொருள் தடுப்பு நடவடிக்கையாக பல்வேறு இடங்களில் தீவிர சோதனை செய்தனர். இதில், கடந்த 6 மாதங்களில் மட்டும்  48 பேர் கைது செய்யப்பட்டு அவர்களிடம் இருந்து, 557 கிலோ கஞ்சாவும் பறிமுதல் செய்யப்பட்டுள்ளது.

மேலும் கஞ்சா வழக்கில் தொடா்புடைய 7 பேர் மீது குண்டா் தடுப்பு சட்டத்தின் கீழ் நடவடிக்கை எடுக்கப்பட்டுள்ளதாகவும் இவ்வழக்கில் சம்பந்தப்பட்டவர்களின் 150 வங்கிக் கணக்குகள் முடக்கப்பட்டுள்ளதாகவும் இவ்வாறான குற்றச்செயல்களில் ஈடுபடுவோா் தகவல் தெரியவந்தால் மாவட்ட காவல் கட்டுப்பாட்டு அறை எண் 94981-81216-க்கு தகவல் அளிக்கலாம் எனவும் மாவட்ட காவல் கண்காணிப்பாளர் சாய் சரண் தேஜஸ்வி தெரிவித்துள்ளார்.