உள்ளாட்சி தேர்தலையொட்டி, விழுப்புரம் மாவட்டத்தில் ஊராட்சி மன்ற தலைவர் பதவி லட்சக் கணக்கில் ஏலம் எடுக்கப்பட்டு வருவது பரபரப்பை அதிகப்படுத்தியுள்ளது.

தமிழகத்தில் விடுபட்டுள்ள 9 மாவட்டங்களுக்கு அடுத்த மாதம் ஊரக உள்ளாட்சி தேர்தல் நடைபெறவுள்ளது. இதையொட்டி, ஒன்பது மாவட்டங்களிலும் தேர்தலுக்கான பணிகள் விறுவிறுப்பாக நடைபெற்று வருகிறது. இந்த நிலையில், விழுப்புரம் மாவட்டம், கானை ஒன்றியத்திற்கு உட்பட்ட சித்தேரி ஊராட்சி மன்ற தலைவர் பதவிக்கு 5 பேருக்கு மேல் போட்டியிடப் போவதாகக் கூறப்படுகிறது. இதில், தலைவர் பதவிக்கு போட்டியிடுபவர்களில் யார் அதிக பணம் தருகிறார்களோ? அவரையே பொதுமக்கள் ஓட்டுப்போட்டு வெற்றிபெற செய்ய வேண்டும் என்று ஊர் முக்கியஸ்தர்கள் முன்னிலையில் தெரிவிக்கப்பட்டுள்ளது.

இதையடுத்து ஊராட்சி மன்ற தலைவர் பதவிக்கான ஏலம், அக்கிராம மாரியம்மன் கோயில் எதிரிலுள்ள ஆலமரத்தடியில் நடைபெற்றது. லட்சம் ரூபாயில் இருந்து தொடங்கிய ஏலத்தை, வெள்ளேரிப்பட்டு பகுதியைச் சேர்ந்த   சற்குணம் என்பவர் 14 லட்சத்திற்கு எடுத்துள்ளதாக கூறப்படுகிறது. இதுகுறித்து,அக்கிராம இளைஞர்கள் அளித்த புகாரையடுத்து, போலீசார் விசாரணை மேற்கொண்டுள்ளனர். இதேபோன்று செஞ்சி தாலுகாவிற்கு உட்பட்ட பொண்ணங்குப்பம் ஊராட்சி ஒன்றியத்தில்  ஊராட்சி மன்ற தலைவர் பதவி நேற்று 13 லட்சம் ரூபாய்க்கு ஏலம் விடப்பட்ட பரபரப்பு அடங்குவதற்குள்ளேயே, இன்று அரங்கேறியுள்ள இந்நிகழ்வு, பரபரப்பை அதிகரித்துள்ளது.

ஊரக உள்ளாட்சி தேர்தல் நெருங்கி வரும்நிலையில், இத்தகைய செயலில் ஈடுபடக் கூடாது,மீறினால் கடும் நடவடிக்கை எடுக்கப்படும் என மாவட்ட நிர்வாகம் எச்சரிக்கை விடுத்திருந்த நிலையிலும், எவ்வித அச்சமுமின்றி உலா வரும் நபர்கள் மீது உரிய நடவடிக்கை எடுக்கப்பட வேண்டுமென சமூக ஆர்வலர்கள் வலியுறுத்தியுள்ளனர்.

மைசூரு அருகே  பிரபல கன்னட ஹீரோ தர்ஷன். இவருக்கு சொந்தமான பண்ணைத்தோட்டத்தில் குதிரைகளை வளர்த்து வருகிறார் தர்ஷன் . ஓய்வு நேரத்தில் அங்கு குதிரை சவாரி செய்வது வழக்கமாக வைத்துள்ளார். அவற்றைக் கவனித்துக் கொள்ள சிலர் அங்கு பணியாற்றி வருகிறார்கள்.

 சிவமூக்கா மாவட்டத்தைச் சேர்ந்த ஒரு குடும்பத்தினர் அந்தப் பண்ணை தோட்டத்தில் தங்கி வேலை பார்த்து வருகிறார்கள். அவர்களின் பத்து வயது மகளை, கடந்த 13-ஆம் தேதி பீகார் மாநிலத்தை சேர்ந்த நசீர் என்ற குதிரை பராமரிப்பாளர் சிறுமியை பாலியல் வன்கொடுமை செய்துள்ளார். இந்தச்சம்பவம் குறித்து சிறுமி , பெற்றோரிடம் கூறியதை அடுத்து, அவர்கள் போலீசில் புகார் செய்தனர்.

வழக்குப்பதிவு செய்து விசாரித்த காவல்துறையினர் போக்சோ சட்டத்தின் கீழ் நசீமை கைது செய்து சிறையில் அடைத்தனர்.நடிகரின் பண்ணை வீட்டில் சிறுமி பாலியல் வன்கொடுமை செய்யப்பட்டிருப்பது அந்தப் பகுதியில் அதிர்ச்சியும் பரபரப்பையும் ஏற்படுத்தியுள்ளது.

தேனியில் காப்பகத்தில் இரண்டு குழந்தைகளுடன் தங்கியிருந்த மனைவியை அரிவாளால் வெட்டிய கணவனை போலீசார் கைது சிறையில் அடைத்தனர்.

கள்ளக்குறிச்சி மாவட்டம் உளுந்தூர்பேட்டை பகுதியைச் சேர்ந்த துரைப்பாண்டியன் லாரி ஓட்டுநராக இருந்து வருகிறார். இவருக்கு உமாமகேஸ்வரி என்ற பெண்ணுடன் திருமணமாகி இரண்டு குழந்தைகள் உள்ளனர்.இந்நிலையில் இருவருக்கும் இடையே அடிக்கடி தகராறு ஏற்பட்டு வந்துள்ளது. இதனால் உமாமகேஸ்வரி தனது குழந்தைகளுடன் தேனி மாவட்டம் கொடுவிலார் பட்டியில் உள்ள தொண்டு நிறுவனத்துக்கு சொந்தமான காப்பகத்தில் இருந்து வருகிறார்.

இந்தநிலையில் காப்பகத்தின் உள்ளே சென்று அரிவாளால் துரைபாண்டியன் தனது மனைவியை கொடூரமாக கொலை வெறி தாக்குதல் நடத்தியுள்ளார். இதுகுறித்து தகவலறிந்து வந்த காவல்துறையினர் உமாமகேஸ்வரியை மீட்டு மருத்துவமனைக்கு அனுப்பி வைத்து, துரைப்பாண்டியனை கைது செய்து விசாரணை மேற்கொண்டு வருகின்றனர். 

தூத்துக்குடி டி.எம்.பி காலனியை சேர்ந்தவர் சிவபெருமாள். ஆட்டோ டிரைவரான இவர், சொந்தமாக ஆட்டோ வைத்து தொழில் செய்து வருகிறார். இவரும் தொம்மையார் காலனியை சேர்ந்த  ஆறுமுகம் மற்றும் அவரது தம்பி சொர்ண ராஜ் ஆகிய மூன்று பேரும் நண்பர்கள். இவர்கள் 3 பேரும் தினசரி தூத்துக்குடி சிதம்பர நகர் அருகே உள்ள மைய வாடியில் வைத்து மதுபானம் குடிப்பது வழக்கம்.

வெள்ளிக்கிழமை மாலை 5 மணி அளவில் 3 பேரும் வழக்கம்போல் மையவாடி அருகில் உள்ள எம்ஜிஆர் பூங்கா முன்பு உட்கார்ந்து மது அருந்தியுள்ளனர்.  போதை அதிகம் ஆனதால் அவர்களுக்குள் தகராறு ஏற்பட்டுள்ளதாக கூறப்படுகிறது. அப்போது ஆறுமுகம் தனது இடுப்பில் மறைத்து வைத்திருந்த கத்தியை எடுத்து சிவபெருமாளை விரட்டி விரட்டி  சரமாரியாக குத்தி கொலை செய்தார்.

இச்சம்பவம் அங்கிருந்த சிசிடிவி கேமிராவில் பதிவாகியது. தற்போது இந்த வீடியோ சமூக வலைதளங்களில் வெளியாகி பெரும் பரபரப்பை ஏற்படுத்தி உள்ளது. இந்த சம்பவம் தொடர்பாக தென்பாகம் போலீஸ்  வழக்குப் பதிவு செய்து ஆறுமுகம் மற்றும் அவரது தம்பி சொர்ணராஜ் ஆகிய இருவரையும் கைது செய்து விசாரணை நடத்தி வருகின்றனர்.

சேலம் மாவட்டம் அயோத்தியாபட்டணம் பகுதியை  சேர்ந்தவர் கிருபைராஜ்(23). தனியார் ஆலை ஒன்றில் வேலைக்கு சென்று வந்தார். இவருக்கும், அதே பகுதியைச் சேர்ந்த கலைமணி(23) என்ற திருமணமான பெண்ணுக்கும் பழக்கம் ஏற்பட்டது. பின்னர் இருவரும் நெருங்கி பழகி வந்தனர். கள்ளக்காதலி கலைமணியை சந்திக்கச் செல்லும்போது கிருபைராஜ், அவரது நண்பன் கலையரசனையும் உடன் அழைத்துச் செல்வார்.

அப்போது கலையரசனுக்கும் கலைமணிக்கும் பழக்கம் ஏற்பட்டது. இதனால் நண்பர்களிடையே கலைமணியை திருமணம் செய்து கொள்வது தொடர்பாக தகராறு ஏற்பட்டு இருவரும் மோதிக் கொண்டனர். இதனால் நண்பர்கள் இருவரும் பேசாமல் இருந்து வந்தனர். இந்த நிலையில் சேலம் குமரகிரி அருகே உள்ள மலைப் பகுதிக்கு கிருபைராஜும், கலைமணியும் வந்துள்ளனர். அப்போது அங்கு வந்த கலையரசன் இருவரையும் பார்த்து கோபமடைந்து தகராற்றில் ஈடுபட்டுள்ளார். 

அப்போது கிருபைராஜ்  கலைமணியை திருமணம் செய்து கொள்ள ஏற்பாடு செய்து வருவதால் ஒத்துழைப்பு தருமாறு  கேட்டுள்ளார். ஆனால் இதற்கு கலையரசன் மறுப்பு தெரிவித்து நான்தான் கலைமணியை திருமணம் செய்து கொள்வேன் என தெரிவித்துள்ளார். அப்போது மோதல் ஏற்பட்டுள்ளது. இதில் ஆத்திரமடைந்த கலையரசன் தான் இரண்டு சக்கர வாகனத்தில் மறைத்து வைத்திருந்த கத்தியை எடுத்து வந்து கிருபைராஜை சரமாரியாக குத்தியுள்ளார். இதில் கிருபைராஜ் ரத்த வெள்ளத்தில் சம்பவ இடத்திலையே உயிரிழந்தார்.

இதனால் அதிர்ச்சியடைந்த கலைமணி அருகில் வசிக்கும் பொதுமக்களிடம் தெரிவித்துள்ளார். இது குறித்து பொதுமக்கள்    கிச்சிபாளையம் காவல் நிலையத்திற்கு தகவல் கொடுத்தனர். இதனையடுத்து கிச்சிபாளையம் உதவி ஆணையர் வெங்கடேசன் தலைமையிலான போலீசார் விரைந்து சென்று கிருபைராஜின் சடலத்தை மீட்டு உடற்கூறு ஆய்வு செய்ய சேலம் அரசு மோகன் குமாரமங்கலம் மருத்துவமனைக்கு அனுப்பி வைத்தனர். இதையடுத்து கொலை செய்த வாலிபர் கலையரசன் உடனே காவல்துறையினர் கைது செய்து விசாரணை செய்து வருகின்றனர்.