மதுரை அலங்காநல்லூர் அருகே ஜல்லிகட்டு காளை உயிரிழந்ததால் கிராமமக்கள் சோகம். கிராம மக்கள் மற்றும் ஜல்லிகட்டு ஆர்வலர்கள் மலரஞ்சலி செலுத்தி நல்லடக்கம் செய்தனர்.

மதுரை மாவட்டம் அலங்காநல்லூர் அருகே ஆதனூர் கிராமத்தில் கடந்த 25 ஆண்டுகளாக வளர்க்கப்பட்ட முத்தாலம்மன் கோவில் காளை உடல்நல குறைவால் உயிரிழந்தது.இந்த காளை உலகப்புகழ் பெற்ற அலங்காநல்லூர், பாலமேடு உட்பட பல்வேறு ஜல்லிக்கட்டுகளில் வெற்றி பெற்று தங்கம், வெள்ளி காசுகள் உள்ளிட்ட பல்வேறு பரிசுகள் பெற்று ஊருக்கு பெருமை சேர்த்தது. 

காளை இறந்த தகவலறிந்து சுற்றுவட்டார கிராமமக்கள்,மாடுபிடி வீரர்கள் மற்றும் ஜல்லிகட்டு ஆர்வலர்கள் பலரும் வந்து மாலை, வேட்டி, துண்டு அணிவித்து மரியாதை செலுத்தினர்.ஊருக்குள் செல்ல பிள்ளையாக வலம் வந்த காளை இறந்ததால் கிராம பெண்கள் சோகத்துடன் கும்மியடித்தும், ஒப்பாரி வைத்து கண்ணீர் அஞ்சலி செலுத்தினர்.  

பின் அலங்கரிக்கப்பட்ட காளையை வாணவேடிக்கையுடன் கிராம மக்கள் ஊர்வலமாக எடுத்துச்சென்று நல்லடக்கம் செய்தனர். தங்கள் வீட்டு செல்ல பிள்ளையாக  வளர்க்கபட்ட கிராமத்து கோவில் காளை திடீரென உயிரிழந்ததால் கிராமமக்கள் அனைவரும் ஆழ்ந்த சோகத்தில் உள்ளனர்.

மணப்பாறை அருகே தோட்டத்தில் மர்மமான முறையில் இறந்து கிடந்த 15 மயில்கள்.எலிக்காக வைக்கப்பட்ட விசத்தை சாப்பிட்டதால் உயிரிழப்பு.

திருச்சி மாவட்டம், மணப்பாறையை அடுத்த வையம்பட்டி அருகே புதுமணியாரம்பட்டியில் உள்ள ஒரு தோட்டத்தில் 7 ஆண், 8 பெண் என மொத்தம் 15 மயில்கள் மர்மமான முறையில் இறந்து கிடந்தது. இதுபற்றிய தகவலின் பேரில் மணப்பாறை வனத்துறையினர் சென்று பார்த்த போது விஷம் சாப்பிட்டு மயில்கள் இறந்திருக்கலாம் என்ற சந்தேகம் எழுந்தது. இதையடுத்து தோட்டத்தின் உரிமையாளர் யார் என்று வனத்துறையினர் நடத்திய விசாரணையில் அஞ்சல்காரன்பட்டியை சேர்ந்த ஓய்வு பெற்ற ஆசிரியர் பிச்சை (வயது 80) என்பது தெரியவந்தது.

வயலில் உள்ள பயிர்களை எலி நாசம் செய்வதை தடுக்க அரிசியில் விஷம் கலந்து வைத்த நிலையில் அதை சாப்பிட்டு மயில்கள் இறந்துள்ளது என விசாரணையில் தெரிய வந்தது. பின்னர் கால் நடை மருத்துவர் வரவழைக்கப்பட்டு இறந்த மயில்களை பிரேத பரிசோதனை செய்த பின் புதைக்கப்பட்டது. இச்சம்பவம் தொடர்பாக வனத்துறையினர் வழக்கு பதிவு செய்து முதியவர் பிச்சையை கைது செய்தனர்.

மேலும் படிக்க | பெண் பயணிக்கும் பேருந்தின் நடத்துனருக்கும் இடையே மோதல் ...வைரலாகி வரும் வீடியோ..

சிதம்பரம் அருகே கடலில் ஓடும் படகில் 2 மணி நேரம் 10 நிமிடம் இரு கைகளாலும் சிலம்பம் விளையாடி பள்ளி மாணவ, மாணவி சாதனையை பாராட்டி சான்றிதழ் வழங்கப்பட்டது.

 சிதம்பரம் அருகே உள்ள தாண்டவராயன்சோழகன் பேட்டை கிராமத்தைச் சேர்ந்தவர்கள் கே.ஏ. அதியமான். 12 வயது நிரம்பிய இவர் அந்த ஊரில் உள்ள அரசு மேல்நிலைப் பள்ளியில் 7 ஆம் வகுப்பு படித்து வருகிறார். இவரது சகோதரி கே.ஏ. ஆதிஸ்ரீ அதே ஊரில் உள்ள அரசு துவக்கப்பள்ளியில் 5 ஆம் வகுப்பு படித்து வருகிறார். இவர்கள் இருவரும் தனது தந்தை வைத்தி. கார்த்திகேயன் நடத்தும் சிலம்ப பயிற்சி பள்ளியில் சேர்ந்து சிலம்பம் கற்று விளையாடி பல்வேறு பரிசுகளை வென்றுள்ளனர்.

இந்நிலையில் தமிழக முதல்வர் போதைப்பொருள் ஒழிப்பு குறித்த விழிப்புணர்வை ஏற்படுத்த பல்வேறு நடவடிக்கைகளை மேற்கொண்டு வருகிறார். இதை மக்களிடம் கொண்டு செல்லும் வகையில் மாணவர் அதியமான், மாணவி ஆதிஸ்ரீ இருவரும் போதைப் பொருள் எதிர்ப்பு விழிப்புணர்வை வலியுறுத்தி சுமார் 2 மணி நேரத்திற்கு மேலாக தொடர்ச்சியாக சிலம்பம் விளையாடி சாதனை புரிந்துள்ளனர்.

மேலும் படிக்க | புதிய சுற்றுலா தலமாக மாறும் செங்கல்பட்டு - திருப்பூர் ஏறி.. தமிழ்நாடு சுற்றுலாத்துறை அறிவிப்பு!

தாண்டவராயன் சோழகன் பேட்டை கிராமத்தில் உள்ள கடலில் இருந்து சிறிய இஞ்சின் படகில் ஏறிக்கொண்ட அதியமானும், ஆதிஸ்ரீயும் தங்களது இரண்டு கைகளாலும் சிலம்பம் சுற்றியவாறு கடலில் படகில் சென்றனர். ஓடும் படகில் இருவரும் தங்களது இரண்டு கைகளாலும் தொடர்ச்சியாக 2 மணி நேரம் 10 நிமிடம் சிலம்பம் சுற்றி சாதனை புரிந்தனர். இவர்களது சாதனையை "ஜாக்கி புக் ஆப் வேர்ல்ட் ரெக்கார்ட்" என்ற அமைப்பு பாராட்டி பரிசுகளை வழங்கியது.

இதையடுத்து மாணவர்கள் படிக்கும் தாண்டவராயன் சோழகன் பேட்டை அரசு மேல்நிலைப் பள்ளியில் சாதனை படைத்த மாணவர்களுக்கு பாராட்டு மற்றும் பரிசளிப்பு விழா நடந்தது. பள்ளியின் உதவி தலைமை ஆசிரியர் அசோக்குமார் தலைமை தாங்கினார். இந்நிகழ்ச்சியில் சிலம்பம் சுற்றிய மாணவர்கள் இருவரும் பங்கேற்று தாங்கள் எப்படி சிலம்பம் சுற்றினோம் என்பதை சிறிது நேரம் பள்ளி மாணவர்களுக்கு சுற்றி காண்பித்தனர். 

இதைத்தொடர்ந்து மாணவர்களின் சாதனைகளை பாராட்டி அவர்களுக்கு பரிசு மற்றும் பதக்கம் வழங்கப்பட்டது. பின்னர் பள்ளி நிர்வாகம் சார்பில் ஆசிரியர்கள் மாணவர்களுக்கு சால்வை அணிவித்தும், புத்தகம் உள்ளிட்ட நினைவு பரிசுகளை வழங்கியும் பாராட்டினர். இந்த சாதனை குறித்து மாணவர்களின் தந்தையும், சிலம்ப பள்ளி ஆசிரியருமான வைத்தி கார்த்திகேயன் கூறுகையில்,

 போதைப் பொருள் எதிர்ப்பு விழிப்புணர்வை வலியுறுத்தி சிலம்ப மாணவர்கள் இருவரும் ஓடும் படகில் சுமார் இரண்டே கால் மணி நேரம் இரண்டு கைகளாலும் இடைவிடாது சிலம்பம் சுற்றி சாதனை புரிந்துள்ளனர். பள்ளி, கல்லூரிகளில் பரவி வரும் போதைப் பழக்கத்தை ஒழிப்பதற்காக இதுபோன்ற விளையாட்டு மூலம் விழிப்புணர்வு ஏற்படுத்தப்பட்டு உள்ளதாக கூறிய அவர்,விளையாட்டுத்துறையில் சிலம்பம் விளையாட்டு இன்று முக்கிய அங்கம் வகிக்கிறது. இதன் மூலமாக பள்ளி, கல்லூரிகளில் போதை பொருள் குறித்த விழிப்புணர்வை தொடர்ச்சியாக ஏற்படுத்த திட்டமிட்டு இருப்பதாக தெரிவித்தார்.

பண்ருட்டி அருகே மாணவிக்கு பாலியல் தொல்லை கொடுத்து முதியவர் போக்சோ சட்டத்தின் கீழ் கைது.

கடலூர் மாவட்டம்  பண்ருட்டி அடுத்த வி.ஆண்டிக்குப்பம் கிராமத்தைச் சேர்ந்த முகமது அன்சாரி (வயது 56) .இவர் கடலூரில்  உள்ள காலணி  விற்பனை கடையில் பணிபுரிந்து வருகிறார்.

22.11.22 அன்று அதே ஊரைச் சேர்ந்த 17 வயதுடைய மாணவி வீட்டில் தனியாக இருந்தபோது பாலியல் தொல்லை கொடுத்ததாக மாணவியின் பெற்றோர்கள் முதியவர் மீது பண்ருட்டி அனைத்து மகளிர் காவல் நிலையத்தில் புகார் கொடுத்தார் .புகாரின் பேரில் காவல் ஆய்வாளர் வள்ளி மற்றும் போலீசார் வழக்குப் பதிவு செய்து முதியவரை தேடி வந்த நிலையில் இன்று கைது செய்தனர் .விசாரணையில் குற்றம் நிரூபிக்கப்பட்டதால் முதியவரை போக்சோ வழக்கில் கைது செய்து நீதிமன்றத்தில் ஆஜர் படுத்தி சிறையில் அடைத்தனர்.

சென்னையில் செல்போன் சர்வீஸ் கடையின் ஷட்டர் பூட்டை உடைத்து 45 பழைய செல்போன்கள் உட்பட பல பொருட்கள் கொள்ளையடிக்கப்பட்ட சம்பவத்தின் சி.சி.டி.வி காட்சிகள் வெளியாகியுள்ளது.

சென்னை கோடம்பாக்கம் பகுதியை சேர்ந்தவர் மணிராஜ்(26). இவர் கோடம்பாக்கம் ரங்கராஜபுரத்தில் செல்போன் சர்வீஸ் கடை நடத்தி வருகின்றார். நேற்று முன்தினம் இரவு வழக்கம் போல் மணிராஜ் வேலை முடிந்த பின்னர் கடையை பூட்டி விட்டு வீட்டிற்கு சென்றுள்ளார். நேற்று காலை கடைக்கு வந்து பாரத்த போது கடையின் பூட்டு உடைக்கப்பட்டு இருந்ததை கண்டு அதிர்ச்சியடைந்த மணிராஜ் கடையினுள் சென்று பாரத்தபோது  சர்வீஸ்க்கு வந்திருந்த 25 ஸ்மார்ட் போன்கள் மற்றும் 20 பேசிக் மாடல் செல்போன்கள் கொள்ளை போனது தெரியவந்தது. 

இது குறித்து மணிராஜ் அளித்த புகாரின் பேரில் கோடம்பாக்கம் போலீசார் வழக்குப் பதிவு செய்து சம்பவ இடத்திற்கு வந்து அங்குள்ள சி.சி.டி.வி காட்சிகளை ஆய்வு செய்தனர். அதில் அடையாளம் தெரியாத இருவர் முதலில் செல்போன் சர்வீஸ் கடைக்கு அருகில் உள்ள பால் கடையின் ஷட்டர் பூட்டை உடைத்து உள்ளே சென்றபோது எதுவும் சிக்காததால், அடுத்தப்படியாக செல்போன் சர்வீஸ் கடை மற்றும் மளிகை கடை என தொடர்ச்சியாக மூன்று கடைகள் உடைத்திருப்பது தெரியவந்தது. இதனையடுத்து கொள்ளையடித்துவிட்டு தப்பியோடிய இருவரை சிசிடிவி காட்சிகள் உதவியுடன் போலீசார் தேடி வருகின்றனர். இந்நிலையில் செல்போன்கள் கொள்ளையடிக்கப்பட்ட சம்பவத்தின் சிசிடிவி காட்சிகள் வெளியாகி பரபரப்பை ஏற்படுத்தியுள்ளது.