உ.பி.யில் அதிகமுள்ள ஷியா முஸ்லிம்களின் தலைவராக இருப்பவர் சையது வசீம் ரிஜ்வீ. ஷியா மத்திய வக்ஃபு வாரியத் முன்னாள் தலைவரான இவர் சர்ச்சைக்குரிய கருத்துகளுக்கு பெயர் பெற்றவர்.

இவர் அயோத்தி வழக்கில் ராமர் கோயிலுக்கு ஆதரவாக பேசினார். இதனால் முஸ்லிம் மவுலானாக்கள் இவரை காஃபீர் (முஸ்லிம் அல்லாதவர்) என மதத்திலிருந்து ஒதுக்கினர். முஸ்லிம்களின் மறைநூலான திருக்குர்ஆனின் 26 பக்கங்களில் கூறப்படும் கருத்துகள் தீவிரவாதத்தை வளர்ப்பதாகவும் அவற்றை நீக்கவும் கோரி உச்சநீதிமன்றத்தில் ரிஜ்வீ தொடர்ந்த வழக்கால் பெரும் எதிர்ப்பு கிளம்பியது. ஆனால், அந்த மனுவை தள்ளுபடி செய்த நீதிமன்றம், ரிஜ்வீக்கு ரூ.50,000 அபராதமும் விதித்தது. இந்நிலையில் தனது உயிருக்கு ஆபத்து என போலீஸ் பாதுகாப்பை பெற்ற ரிஜ்வீயை அவரது குடும்பத்தாரும் ஒதுக்கி வைத்தனர்.

இந்நிலையில் ரிஜ்வீ நேற்று காலை காஸியாபாத்தின் மகாகால் தாஸ்னா கோயில் மடத்துக்கு சென்றார். மடத்தின் தலைவர் நரசிம்மானந்த்கிரி மஹராஜ் முன்னிலையில் இந்து மதத்துக்கு மாறினார். திரளான சாதுக்களும், இந்துத்துவாவினரும் இதில் கலந்துகொண்டனர். இந்த சடங்கு களில் ரிஜ்வீக்கு பூணூலும் அணிவிக் கப்பட்டது. பிறகு நரசிம்மானந்த்கிரி அறிவித்தபடி தனது பெயரை 'ஜிதேந்தர் நாராயண்சிங் தியாகி' என மாற்றிக்கொண்டார் ரிஜ்வீ. மதமாற்ற சடங்கில் சிவலிங்கத்திற்கு பாலாபிஷேகமும் செய்த ரிஜ்வீ பிறகு யாகம் வளர்த்து பூஜையும் செய்தார்.

இதுகுறித்து 'இந்து தமிழ்' நாளிதழிடம் ஜிதேந்தர் நாராயண் சிங் கூறும்போது, 'இஸ்லாத் திலிருந்து வெளியேற்றப்பட்டதால் எனது விருப்பப்படி இந்துவாக மாறி விட்டேன். உலகின் மிகப்பெரிய புனித மதமாக சனாதன தர்மம் உள்ளது. இஸ்லாம் ஒரு மதமே அல்ல. இனி இந்து மதத்தை வளர்க்க பாடுபடுவேன்' என்றார்.

முஸ்லிம்களின் இறைத்தூதரான முகம்மது நபி பற்றி 'முகம்மது'என்ற பெயரில் ரிஜ்வீ கடந்த நவம்பர் 4-ம் தேதி வெளியிட்ட நூல் சர்ச்சையை ஏற்படுத்தியது. தற்போது கூட உ.பி. ஷியா வக்ஃபு வாரியத்தின் உறுப்பினராக 21 மசூதிகளின் முத்தவல்லிகள் சார்பில் ரிஜ்வீ தேர்வு செய்யப்பட்டி ருந்தார். இந்த வாரியத்தில் அவர் தலைவராக இருந்தபோது வக்ஃபு நிலம் விற்றதில் ஊழல் புகார் எழுந்தது. இதில் ரிஜ்வீ மீதும் பதிவான வழக்குகள் உ.பி. பாஜக அரசால் சிபிஐக்கு மாற்றப்பட்டது. தன் மீதான வழக்குகளை கைவிட வேண்டும் என ரிஜ்வீ அளித்த கோரிக்கையை முதல்வர் யோகி ஆதித்யநாத் ஏற்காதது குறிப்பிடத்தக்கது.

மத்தியப்பிரதேச மாநிலம் விதிஷா பகுதியில் கிறிஸ்தவ மெஷினரிக்கு சொந்தமான தனியார் பள்ளி செயல்பட்டு வருகிறது. இந்நிலையில், 12-ம் வகுப்பு மாணவர்கள் கணிதத் தேர்வு எழுதி கொண்டிருந்த போது, திடீரென பள்ளி வளாகத்திற்குள் நுழைந்த கும்பல், பள்ளி மீது கற்களை வீசி தாக்குதல் நடத்தினர். இதில் பள்ளியில் இருந்த கதவுகள், கண்ணாடி ஜன்னல்கள் சேதமடைந்தன. இதனால் தேர்வு எழுதிக்கொண்டிருந்த 12-ம் வகுப்பு மாணவர்கள் அச்சம் அடைந்தனர்.

தொடர் தாக்குதலால் பள்ளி வளாகத்தில் பதற்றம் நிலவியது.  இதனால் அங்கிருந்த மாணவர்கள், ஆசிரியர்கள் மற்றும் பள்ளி ஊழியர்கள், சிறிது நேரத்தில் வெளியே ஓட்டம் பிடித்து அதிர்ஷ்டவசமாக உயிர் தப்பினர். பஜ்ரங் தல் என்ற இந்து அமைப்பை சேர்ந்தவர்கள் பள்ளி மீது தாக்குதல் நடத்தியதாகவும், அதற்கு பள்ளியில் படிக்கும் மாணவர்களில் 8 பேர் கிறிஸ்தவ மெஷினரியால் மதமாற்றம் செய்யப்பட்டதே காரணம் எனவும் கூறப்படுகிறது.

ஆனால், பள்ளியில் மத மாற்றம் நடந்ததாக கூறப்படும் சம்பவத்திற்கு மறுப்பு தெரிவித்த பள்ளி மேலாளர், மத மாற்றம் செய்யப்பட்டதாக கூறப்படும் மாணவர்கள் யாரும் தங்கள் பள்ளியில் இல்லை என குறிப்பிட்டுள்ளார்.

இந்தியா-ரஷ்யா இடையேயான 21-வது உச்சி மாநாடு, டெல்லியில் உள்ள ஐதராபாத் இல்லத்தில் நடைபெற்றது. இதில் இந்திய பிரதமர் நரேந்திர மோடி மற்றும் ரஷ்ய அதிபர் விளாடிமிர் புதின் பங்கேற்று உரையாடினர். இரு நாடுகள் இடையேயான நல்லுறவுகளை வலுப்படுத்துவது குறித்தும், திட்டங்கள் குறித்தும் விவாதிக்கப்பட்டன.

உச்சி மாநாட்டில் பேசிய பிரதமர் மோடி, கொரோனா வைரஸ் தொற்றால் பெரும் சவால்கள் ஏற்பட்ட போதிலும் இந்தியா-ரஷ்யா இடையிலான உறவில் பாதிப்பு ஏற்படவில்லை என கூறியுள்ளார்.

இந்தியாவுக்கு ரஷ்யா அளித்து வரும் ஒத்துழைப்புக்கு நன்றி தெரிவித்துள்ள அவர், இந்தியா-ரஷ்யா இடையே அதிக முதலீடுகள் செய்யப்பட வேண்டும் என வலியுறுத்தியுள்ளார்.

இதனையடுத்து பேசிய ரஷ்ய அதிபர் புதின், இந்தியாவை மிகப்பெரிய சக்தியாகவும், நம்பகமான நண்பனாகவும் கருதுவதாக வர்ணித்துள்ளார்.

இரு நாடுகளின் உறவு வளர்ச்சியடைந்து வருகிறது என்றும், இது மேலும் வளர்ச்சியடைய விரும்புவதாகவும் குறிப்பிட்டுள்ள அவர், இந்தியாவில் மேலும் அதிக முதலீடுகளை செய்ய உள்ளதாக தெரிவித்தார். தீவிரவாதம், தீவிரவாதத்திற்கு நிதி அளிப்பது மற்றும் போதைப்பொருள் கடத்தல் தொடர்பான அனைத்தையும் பற்றி தாங்கள் இயல்பாகவே கவலைப்படுவதாக கூறியுள்ள புதின்,

ஆப்கானிஸ்தான் நிலவரம் குறித்து தாங்கள் கவலை கொள்வதாகவும், அங்கு நிலவி வரும் சூழல் குறித்து கவனித்து வருவதாகவும் சுட்டிக் காட்டியுள்ளார்.  இதனையடுத்து, ரஷ்யாவிடமிருந்து 6 லட்சம் ஏ.கே.203 ரக துப்பாக்கிகளை கொள்முதல் செய்வது உள்பட  28 புரிந்துணர்வு ஒப்பந்தங்கள், இருநாட்டு தலைவர்களின் முன்னிலையில் கையெழுத்தானது.

விண்வெளி, எரிசக்தி துறை, ராணுவம் ஆகியவற்றில் முக்கிய ஒப்பந்தங்கள் கையெழுத்தாகின. இந்த பாதுகாப்பு ஒப்பந்தம் 2021 முதல் 2031-ம் ஆண்டு வரை, அதாவது 10 ஆண்டுகளுக்கு அமலில் இருக்கும் என தெரிவிக்கப்பட்டுள்ளது.

உச்சி மாநாட்டின் நிறைவாக, ரஷ்ய அதிபருக்கு பிரத்யேகமாக தயாரிக்கப்பட்ட உணவுகளுடன் இரவு விருந்து அளித்துள்ள பிரதமர் மோடி, வாசல் வரை சென்று, கையசைத்து புதினை வழியனுப்பி வைத்தார்.

நாகலாந்தில் நேற்று பொதுமக்கள் மீது ராணுவத்தினர் நடத்திய  துப்பாக்கிச் சூடு தாக்குதலில் 13 பேர் உயிரிழந்தனர். இதனால் ஆத்திரமடைந்த உள்ளூர் மக்கள் ராணுவம் மீது நடத்தியத் தாக்குதலில் வீரர் ஒருவர் உயிரிழந்தார். 

இந்நிலையில் இந்த விவகாரம் நாடாளுமன்றத்தின் இரு அவைகளிலும் எதிரொலித்தது. மக்களவையில் அமளியில் ஈடுபட்ட எதிர்க்கட்சிகள்  நாகாலாந்தில் அமலில் உள்ள ஆயுதப்படையினருக்கான சிறப்புச் சட்டத்தை வாபஸ் பெற  வலியுறுத்தினர்.

உயிரிழந்தவர்களின் குடும்பங்களுக்கு அறிவிக்கப்பட்டுள்ள இழப்பீட்டுத் தொகையை உயர்த்தி வழங்கவும் கோரிக்கை விடுத்தனர்.  நாகலாந்தில் பொதுமக்கள் மீது நடத்தப்பட்ட தாக்குதல் குறித்து மக்களவையில் விளக்கமளித்த உள்துறை அமைச்சர் அமித் ஷா, தீவிரவாதிகள் ஊடுருவல் குறித்து ராணுவத்துக்கு தகவல் கிடைத்ததாகவும், அதன்பேரில் சந்தேகத்திற்குரிய பகுதியில் அவர்களை எதிர்கொள்ள 21 ராணுவ வீரர்கள் தயார் நிலையில் இருந்ததாகவும் தெரிவித்தார். 

அந்த நேரத்தில் அப்பகுதியில் சோதனைச்சாவடியில் வந்த வாகனத்தை நிறுத்துமாறு அதிகாரிகள் கூறியதாகவும் ஆனால் உத்தரவை மீறி வேகமாக சென்றதால் சந்தேகத்தின் பேரில் துப்பாக்கிச் சூடு நடத்தப்பட்டதாகவும் தெரிவித்தார். 

இந்த துப்பாக்கிச் சூடு குறித்து விசாரணை நடத்த குழு அமைக்கப்பட்டுள்ளதாகவும், ஒரு மாதத்தில் அந்தக் குழு தனது அறிக்கையைத் தாக்கல் செய்யும் எனவும் அவர் கூறினார். நாகலாந்தில் தற்போது பதற்றமான சூழல் காணப்பட்டாலும் , நிலைமை கட்டுப்பாட்டில் உள்ளதாக கூறிய அவர், மத்திய அரசு தீவிரமாக கண்காணித்து வருவதாகவும் தெரிவித்தார்.

இந்தியா- ரஷ்யா இடையேயான வருடாந்திர உச்சிமாநாடு இரண்டு ஆண்டுகள் கழித்து இன்று டெல்லியில் நடைபெறுகிறது. இதில் பங்கேற்பதற்காக ரஷ்ய அதிபர் விளாடிமிர் புதின் இன்னும் சற்று நேரத்தில் இந்தியா வருகிறார். முன்னதாக இருநாடுகளின் வெளியுறவு மற்றும் பாதுகாப்பு அமைச்சர்களின் உச்சி மாநாடு டெல்லியில் தொடங்கியுள்ளது. 

அதன்படி டெல்லியில் உள்ள சுஷ்மா ஸ்வராஜ் பவனில் ரஷ்ய பாதுகாப்பு அமைச்சர் செர்ஜி ஷோய்கு மற்றும் மத்திய பாதுகாப்பு அமைச்சர் ராஜ்நாத் சிங் இடையேயான பேச்சுவார்த்தை தொடங்கியுள்ளது. முன்னாதாக, சுஷ்மா ஸ்வராஜ் பவனுக்கு வருகை தந்த ரஷ்ய பாதுகாப்பு அமைச்சர் செர்ஜி ஷோய்குவிற்கு, ராஜ்நாத் சிங் வரவேற்பு அளித்தார். அப்போது நட்பின் அடையாளமாக  நினைவு பரிசும் வழங்கினார்.   

இந்தநிலையில், இந்தியா, ரஷ்யா இடையே பாதுகாப்பு தளவாடங்கள் கொள்முதல் செய்வது தொடர்பான இரு ஒப்பந்தங்கள் கையெழுத்தாகியுள்ளது. அதன்படி அதிநவீன தானியங்கி ஏஜே-203 ரக ஏவுகணை துப்பாக்கிகளை ரஷ்யாவிடம் இருந்து வாங்கும் ஒப்பந்ததில் இரு நாடுகளின் தலைவர்களும் கையெழுத்திட்டுள்ளனர். 5 ஆயிரத்து 100 கோடி ரூபாய் மதிப்பீட்டில் சுமார் 7 லட்சம் துப்பாக்கிகள் வாங்கப்பட உள்ளன. இதேபோல் கலாஷ்னிகோவ் ரகத்தை சேர்ந்த சிறிய வகை இயந்திர துப்பாக்கிகளை வாங்குவது தொடர்பான ஒப்பந்தத்திலும் இருநாட்டு தலைவர்களும் கையெழுத்திட்டுள்ளனர்.