நாடு முழுவதும் நவம்பர் 4-ம் தேதி தீபாவளி பண்டிகை கொண்டாடப்பட உள்ளது. இந்துக்களின்  முக்கிய பண்டிகையான தீபாவளியின்போது, பொதுமக்கள் பட்டாசுகள் கொளுத்தி கொண்டாடுவது வழக்கம். ஆனால், காற்று மாசு காரணமாக, கடந்த சில ஆண்டுகளாக பட்டாசு வெடிக்க கடும் கட்டுப்பாடுகளை உச்சநீதிமன்றம் விதித்தது. 

இந்த நிலையில், பட்டாசு வெடிக்கும் நேரத்தில் தளர்வு கோரி தமிழ்நாடு பட்டாசு உற்பத்தியாளர்கள் சங்கம் சார்பில் உச்சநீதிமன்றத்தில் இடைக்கால மனு தாக்கல் செய்யப்பட்டது. இந்த மனு நீதிபதிகள் எம்.ஆர்.  ஷா தலைமையிலான அமர்வு முன்  இன்று விசாரணைக்கு வந்தது.  அப்போது பெரிய சரவெடிகள் தடை செய்யப்பட்டும் அவை வெடிக்கப்படுவதை பார்க்கிறோம் என்றும் அரசியல் கட்சிகளின் வெற்றி கூட்டங்கள், திருமணங்கள், திருவிழாக்கள் மற்றும் மத நிகழ்ச்சிகளில் பட்டாசு வெடிக்கின்றன எனவும் நீதிபதிகள் தெரிவித் துள்ளனர்.

300 வகையான பட்டாசுகள் விற்கப்படும் நிலையில், 5 மட்டுமே பசுமை பட்டாசுகள் என மனுதாரர் தரப்பில் தகவல் கூறப்பட்டுள்ளதாக நீதிபதிகள் தெரிவித்தனர். மேலும்  மனுதாரர்கள் தாக்கல் செய்த விவரங்களை பார்த்தால் விதிமீறல் ஏற்படுகிறது என்பதை பார்க்க முடிகிறது என நீதிபதிகள் கருத்து தெரிவித்தனர். இதனையடுத்து இந்த வழக்கு  விசாரணையை நீதிபதிகள் நாளைக்கு   ஒத்தி வைத்தனர். 

பஞ்சாப்பில், காங்கிரஸ் தலைமையிலான ஆட்சி நடைபெற்று வருகிறது. கடந்த சில மாதங்களாக முன்னாள் முதல்அமைச்சர் அமரிந்தர் சிங் மற்றும்  நவ்ஜோத் சித்து இடையே மோதல் போக்கு காணப்பட்டது. இதனை பொதுக்கூட்டங்களில் அவ்வப்போது இருவரும் மறைமுகமாக தெரிவித்து வந்தனர். இந்த சூழலில் அமரிந்தரின்  எதிர்ப்பையும் மீறி நவ்ஜோத் சித்து, அம்மாநிலத்தின் காங்கிரஸ் தலைவராக நியமிக்கப்பட்டார். 

இது கூடுதல் பிளவை ஏற்படுத்த, நவ்ஜோத் சித்து ஆதரவு எம்எல்ஏக்களும் அமரிந்தர் சிங்கிற்கு எதிராக  ஊழல் உள்ளிட்ட பல்வேறு குற்றச்சாட்டுகளை விடுத்து போர்க்கொடி பிடித்தனர்.இருப்பினும் அடுத்தாண்டு நடைபெறவுள்ள தேர்தலை காரணம்காட்டி, இருவரையும் காங்கிரஸ் தலைமை சமரசம் செய்து வந்தது. ஆனால் திடீர் திருப்பமாக அண்மையில் அமரிந்தர் சிங் தனது முதல்வர் பதவியை ராஜினாமா செய்தார். அதனைத்தொடர்ந்து பட்டியலினத்தை சேர்ந்தவரும், நவ்ஜோத்துக்கு நெருக்கமானவருமானவருமான  சரண்ஜித் சிங் சன்னி புதிய முதல்வராக அறிவிக்கப்பட்டார். அமரிந்தர் சிங்கிற்கு ஆதரவாக செயல்பட்ட எம்எல்ஏக்களும், அமைச்சரவையிலிருந்து நீக்கப்பட்டனர்.

நவ்ஜோத் சிங் சித்துவுடனான கடுமையான மோதலைத் தொடர்ந்து ஒரு வாரத்திற்குப் பிறகு,   அமரிந்தர் சிங் இன்று திடீர் பயணமாக  டெல்லி சென்றுள்ளார்.   அங்கு அவர் பா.ஜ.க தலைவர்களை சந்திக்க வாய்ப்பு உள்ளதாக கூறப்படுகிறது.

இதனிடையே இன்று, தனிப்பட்ட காரணத்திற்காக டெல்லி சென்றுள்ள அமரிந்தர் சிங், மத்திய அமைச்சர் அமித் ஷா உள்ளிட்டோரை சந்திக்க உள்ளார். இந்தநிலையில் யாரும் எதிர்பாராதா விதமாக, நவ்ஜோத் சிங் திடீரென தனது ராஜினாமா கடிதத்தை, காங்கிரஸ் தலைவர் சோனியா காந்தியிடம் வழங்கியிருப்பது கட்சியினரிடையே குழப்பத்தை ஏற்படுத்தியுள்ளது.

அந்த கடிதத்தில், பஞ்சாப்பின் எதிர்கால வளர்ச்சியில் தன்னால் சமரசம் செய்து கொள்ள இயலாது என குறிப்பிட்டுள்ளார். மேலும் தலைவர் பொறுப்பிலிருந்து விலகினாலும், கட்சி நலனுக்காக தொடர்ந்து செயல்படுவேன் என கூறியுள்ளார். இதனிடையே நவ்ஜோத் சிங் ஒரு நிலையற்ற மனிதர் எனவும், அவர் எல்லை மாநிலமான பஞ்சாப்பிற்கு பயனற்றவர் எனவும்   அமரிந்தர் சிங் தனது டிவிட்டர் பக்கத்தில் விமர்சித்துள்ளார். காங்கிரஸில் அடுத்தடுத்து நிகழும் குழப்பத்தால், அடுத்தாண்டு பஞ்சாப் தேர்தலில்  அக்கட்சி ஆட்சியை கைப்பற்றுமா என்ற ஐயம் ஏற்பட்டுள்ளது.

நாடு முழுவதும் ஆரம்ப பள்ளிகளுக்கு முன்னுரிமை அளித்து பகுதி பகுதியாக உயர்நிலை வகுப்புகள் வரை பள்ளிகளை திறக்க மாநில அரசுகளுக்கு இந்திய மருத்துவ கவுன்சில் பரிந்துரை செய்துள்ளது.

இது குறித்து ஐசிஎம்  ஆர் வெளியிட்டுள்ள ஆய்வு கட்டுரையில், கொரோனா தொற்று பரவல் காரணமாக 500 நாட்களுக்கு மேலாக பள்ளிகள் மூடப்பட்டுள்ளதாகவும் இதனால் 32 கோடிக்கும் மேற்பட்ட மாணவர்கள் பாதிக்கப்பட்டுள்ளதாகவும் தெரிவிக்கப்பட்டுள்ளது.

1 முதல் 17 வயதுக்கு உட்பட்ட குழந்தைகளுக்கு கொரோனா தொற்றால் லேசான பாதிப்புகே ஏற்படும், என்றும், நோய் பாதிப்பு தீவிரமாக மாறுவதற்கோ, உயிரிழப்பை ஏற்படுத்துவதற்கோ வாய்ப்பு மிகவும் குறைவு தான் என்று ஐ.சி.எம்.  ஆர். தெரிவித்துள்ளது.  

மாணவர்களுக்கு பள்ளியில் உடல்வெப்ப பரிசோதனை செய்வதை காட்டிலும் குறிப்பிட்ட இடைவெளியில் கொரோனா பரிசோதனை மேற்கொள்வது மாணவர்களிடையே தொற்று பரவலை தடுக்கவும் அவர்கள் பள்ளிக்கு வருவதை உறுதி செய்யவும் உதவும் எனவும் அறுவுறுத்தப்பட்டுள்ளது. பள்ளிகளில் முககவசம், சமூக இடைவெளி போன்ற கொரோனா கட்டுப்பாட்டு நெறிமுறைகளை கடுமையாக பின்பற்றுவது அவசியம் எனவும் தெரிவிக்கப்பட்டுள்ளது.

சட்டீஸ்கர் மாநிலம், ராய்பூரில் உயிரியல் சார்ந்த கல்வி நிறுவனத்தில் புதிதாக கட்டப்பட்டுள்ள வளாகத்தை பிரதமர் மோடி டெல்லியிலிருந்து காணொலி வாயிலாக திறந்து வைத்தார். அப்போது தேசிய வேளாண் பல்கலைக்கழகங்களுக்கான பசுமை வளாக விருதுகளையும்  வழங்கினார். அப்போது விவசாயிகளுக்கு நன்மை பயக்கும் 35 புதிய பயிர் வகைகளை பயன்பாட்டிற்கு அறிமுகம் செய்து வைத்தார். இதில் மரபணு மாற்றம் செய்யப்படாத இரு வகை நெல்மணிகளும் இடம்பெற்றுள்ளன. 

விவசாயிகள் பொதுவாக பூசா பாஸ்மதி 1979 மற்றும் பூசா பாஸ்மதி 1985 ஆகிய வகை நெற்பயிர்களை சாகுபடி செய்கின்றனர். இந்த நெல் விதைகளை விவசாயிகள் சிறிய குட்டைகளில் பயிரிட்டு, பின்னர் அதை விளை நிலங்களில் நடுகின்றனர். இதனால் விவாசியகளுக்கு கூடுதல் பணிச்சுமை ஏற்படுவது மட்டுமல்லாமல், அதிகப்படியான நீரும் விரயம் செய்ய நேரிடுகிறது. இதுதவிர நெல்மணிகளில் அசிடோலாக்கேட் சிந்தேஸ் என்ற மரபணுவும் மாற்றப்பட்டிருப்பதால், களைக்கொல்லி மருந்துகளை பயன்படுத்தும்போது, நெற்கதிர்களின் வளர்ச்சி பாதிக்கப்படுகிறது.   

விவசாயிகளின் இத்தகைய சிரமத்தை போக்க தற்போது, இந்திய விவசாய ஆராய்ச்சி நிறுவனம் புதிய வகை நெல்மணிகளை உருவாக்கியுள்ளது. இந்த நெல்மணிகளை, கோதுமை போல் நேரடியாக நிலத்தில் விதைத்தால் மட்டும் போதுமானது என அந்நிறுவனத்தின் இயக்குனர் ஏ.கே.சிங் தெரிவித்துள்ளார். மேலும் இந்த நெல்மணிகளின் டிஎன்ஏக்களில் இயற்கையாகவே, அசிடோலாக்கேட் சிந்தேஸ் என்ற மரபணு  இருப்பதாக கூறப்படுகிறது. இதனால் களைக்கொல்லி ரசாயனத்தை பயன்படுத்தும்போது,  பயிர்களுக்கு பாதிப்பு இருக்காது எனவும், களைகள் மட்டுமே கொல்லப்படும் என கூறியுள்ளார். எதிர்கால சுற்றுச்சூழலை கருத்தில் கொண்டு, தொழில்நுட்பத்தை பயன்படுத்தி இந்திய விவசாய ஆராய்ச்சி நிறுவனம் புதிய வகை பயிர்களை உருவாக்கி இருப்பது குறிப்பிடத்தக்கது.

கொரோனா தாக்கம் காரணமாக நாட்டில் வேலையில்லா திண்டாட்டம் தலைவிரித்து ஆட தொடங்கியது.

தற்போது பொருளாதாரம் மெல்ல மெல்ல செயல்பட தொடங்கியுள்ளதை அடுத்து வேலைவாய்ப்புகள் மறுசீரமைக்கப்பட்டு வருகிறது.  நடப்பாண்டு ஏப்ரல் முதல் ஜுன் வரையிலான காலாண்டில் நாட்டின் வேலை வாய்ப்பு விகிதங்கள் குறித்து நடத்தப்பட்ட ஆய்வில் நாடு முழுவதும் ஐடி, உற்பத்தி உட்பட 9 துறைகளில் வேலைவாய்ப்புகள் 29 சதவீதம் அளவுக்கு அதிகரித்திருப்பது தெரியவந்துள்ளது.

2013 - 14 நடத்தப்பட்ட ஆறாவது பொருளாதார கணக்கெடுப்பில் பிரதிபலித்த 2.  3 கோடி வேலைகளுடன் ஒப்பிடுகையில் தற்போது 3.08 கோடி வேலை வாய்ப்புகள் உருவாகியுள்ளதாக தெரிவிக்கப்பட்டுள்ளது. 
வேலைவாய்ப்பில் ஐடி துறை 152 சதவீத வளர்ச்சியும், சுகாதாரத்துறை 77 சதவீதம் வளர்ச்சியும், கல்வித்துறை 39 சதவீதம் வளர்ச்சியும், போக்குவரத்து 68 சதவீதம், கட்டுமான துறை 42 சதவீத வளர்ச்சியையும் கண்டுள்ளதாக தெரிவிக்கப்பட்டுள்ளது.