இந்தியாவின் அருணாச்சலப் பிரதேச மாநிலத்தை சொந்தம் கொண்டாடி வரும் சீனா, அதை தெற்கு திபெத் என்று அழைத்து வருகிறது. மேலும் அந்த மாநிலத்தில் உள்ள 5 இடங்களின் பெயர்களையும் சீன வெளியுறவுத்துறை அமைச்சகம் மாற்றி அமைத்துள்ளது. சீனாவின் நடவடிக்கைக்கு கடும் கண்டனம் தெரிவித்துள்ள மத்திய அரசு, அருணாச்சலப் பிரதேசம் இந்தியாவின் ஒருங்கிணைந்த பகுதி என்பதில் எந்த மாற்றமும் இல்லை என திட்டவட்டமாக தெரிவித்துள்ளது. 

இந்நிலையில் அருணாசல பிரதேசத்தை சேர்ந்த மிரம் தரோன் என்ற 17 வயது சிறுவன் வேட்டையாடுவதற்காக வெளியே சென்றபோது, சீன ராணுவம் அவனை கடத்தி சென்றுள்ளதாக புகார் எழுந்துள்ளது. சீன வீரர்கள் இந்திய பகுதிக்குள்ளே நுழைந்து அவனை கடத்தியதாக தகவல்கள் வெளியாகின.   மேல் சியாங் மாவட்டத்தின் ஜிடோ கிராமத்தில் வசிக்கும் மிரன் தரோன், இரு நாடுகளுக்கு இடையேயான எல்லைப் பகுதியில் வேட்டையாடச் சென்ற போது சீன ராணுவத்தினரால் கடத்தப்பட்டதாக மாவட்ட அதிகாரிகள் தெரிவித்தனர்.

இந்த சம்பவம் மத்திய அரசு வட்டாரங்களில் பெரும் அதிர்ச்சியை ஏற்படுத்தி உள்ளது. அந்த சிறுவன் வழிதவறி சீன பகுதிக்குள் நுழைந்திருந்தால், உடனே ஒப்படைக்குமாறு சீனாவுக்கு இந்திய ராணுவம் அறிவுறுத்தி உள்ளது. இந்நிலையில் சிறுவனை மீட்கும் முயற்சிகள் தொடர்ந்து நடைபெற்று வருவதாக இந்திய ராணுவ அதிகாரிகள் தெரிவித்துள்ளனர்.

தூத்துக்குடி மாவட்டத்தில் அமைந்துள்ள வேதாந்தா நிறுவனத்திற்கு சொந்தமான ஸ்டெர்லைட் ஆலையை மீண்டும் திறக்க உத்தரவிட கோரிய மேல்முறையீடு மனு மற்றும் ஆலையில் பராமரிப்பு பணிகளை மேற்கொள்ள அனுமதி கோரி தாக்கல் செய்யப்பட்ட இடைக்கால மனுக்கள் ஆகியவை உச்ச நீதிமன்றத்தில் நிலுவையில் உள்ளது.

இந்த நிலையில் வேதாந்தா நிறுவனம் தரப்பில் கடந்த நவம்பரில் ஒரு இடைக்கால மனு தாக்கல் செய்யப்பட்டது. ஆலையில் உள்ள உயர் ரக இயந்திரங்கள்,  உபகரணங்கள் துருப்பிடித்து சேதமாகும் நிலை உருவாகியுள்ளதால், பராமரிப்பு பணி மேற்கொள்ள அனுமதிக்க வேண்டும் என கோரப்பட்டிருந்தது.

இந்த வழக்கு உச்சநீதிமன்றத்தில் நீதிபதி சந்திரசூட் தலைமையிலான அமர்வில் நேற்று விசாரணைக்கு பட்டியலிடப்பட்ட நிலையில் பின்னர் விசாரணை பட்டியலில் இருந்து நீக்கப்பட்டது.  வேதாந்தா நிறுவனம் தரப்பில், வழக்கு விசாரணைக்கு பட்டியலிடப்பட்டு பின்னர் நீக்கப்பட்டதால், இந்த வழக்கை விரைந்து விசாரிக்க வேண்டும் என மீண்டும் கோரிக்கை வைக்கப்பட்டது.  இதனையடுத்து நீதிபதி,  ஸ்டெர்லைட் ஆலை தொடர்பான பிரதான வழக்கு விரைவில் விசாரணைக்கு பட்டியலிடப்படும் என தெரிவித்தார்.

சர்வதேச சந்தையில் நேற்று 1 பீப்பாய் கச்சா எண்ணெய் விலை ஆறாயிரத்து 600 ரூபாயாக உயர்ந்தது. கடந்த 2021 டிசம்பர் மாதத்தில் 1 பீப்பாய் கச்சா எண்ணெய் விலை ஐந்தாயிரத்து 175 ரூபாயாக இருந்தது. நான்கு வாரங்களில் கச்சா எண்ணெய் விலை 20 சதவீதத்திற்கும் அதிகமாக உயர்ந்துள்ளது. ஏழு ஆண்டுகளில் இல்லாத அளவிற்கு கச்சா எண்ணெய் விலை அதிகரித்துள்ளது. 

ஈரான் - துருக்கி இடையிலான எண்ணெய் குழாயில் ஏற்பட்டுள்ள சேதம், உக்ரைன் மீது ரஷ்யா தாக்குதல் நடத்தக் கூடும் என்பதால் ஏற்பட்டுள்ள பதற்றம் போன்ற காரணங்களால் கச்சா எண்ணெய் விலை உயர்ந்துள்ளது.  ஐக்கிய அரபு எமிரேட்ஸ் தலைநகர் அபுதாபியில் மூன்று எண்ணெய் 'டேங்கர்'கள் மீது, ஏமன் நாட்டின் ஹவுதி பயங்கரவாதிகள் நடத்திய தாக்குதலும் கச்சா எண்ணெய் விலை தொடர்ந்து உயர வழி வகுத்துள்ளது. சர்வதேச கச்சா எண்ணெய் விலை அடிப்படையில், உள்நாட்டில் பெட்ரோல், டீசல் விலையை எண்ணெய் நிறுவனங்கள் நிர்ணயிக்கின்றன.

கச்சா எண்ணெய் விலை தொடர்ந்து உயர்ந்து வருவதால், பெட்ரோல், டீசல் விலை உயரும் என எதிர்பார்க்கப்படுகிறது.  கடந்த ஆண்டு நவம்பரில் 1 லிட்டர் பெட்ரோல் விலை, 100 ரூபாயை தாண்டியது. இதையடுத்து மத்திய அரசு, பெட்ரோல், டீசல் மீதான கலால் வரியை குறைத்தது. அதுபோல, பா.ஜ.க, ஆளும் மாநில அரசுகளும் பெட்ரோல், டீசல் மீதான வரியை குறைத்தன. ஆனால் தமிழகம் உட்பட எதிர்க்கட்சிகள் ஆளும் மாநிலங்களில் வரி குறைக்கப்படவில்லை. இதனால் இம்மாநில மக்கள், பெட்ரோல், டீசல் விலை மேலும் உயரும்பட்சத்தில் அதிகம் பாதிக்கப்படுவார்கள் என கருதப்படுகிறது.

பெண்களை முன்னிலைப்படுத்தி காங்கிரஸ் சார்பில் மேற்கொள்ளப்படும் பிரச்சார சுவரொட்டியில் இடம்பெற்றுள்ள பெண், பாஜகவில் இணைய போவதாக தகவல் வெளியாகியுள்ளது.

நடைபெறவுள்ள உத்தரபிரதேச சட்டமன்ற தேர்தலில் பிரியங்கா காந்தி ஒரு புதிய யுக்தியை கையில் எடுத்துள்ளார். அதாவது பாஜகவால் உரிமை மறுக்கப்பட்ட பெண்களை தேர்ந்தெடுத்து வேட்பாளர்களாக களமிறக்கியிருப்பதன் மூலம் வெற்றிபெற்றுவிடலாம் என பிரியங்கா திட்டமிட்டுள்ளார்.

இதற்காக மொத்த இடங்களில் 40 சதவீதத்தை பெண்களுக்கு வழங்கியுள்ளார். இதனை மக்களிடையே கொண்டு சேர்க்கும் வகையில் ”நான் ஒரு பெண், என்னால் போராட முடியும்” என்ற வாசகம் அடங்கிய பிரச்சார சுவரொட்டி உத்தரபிரதேசத்தில் ஆங்காங்கே ஒட்டப்பட்டுள்ளது.

இந்த விளம்பர சுவரொட்டியில் இடம்பெற்ற பெண் தற்போது பாஜகவில் இணைய உள்ளதாக தகவல் வெளியாகியுள்ளது. தேர்தலில் அப்பெண்ணுக்கு சீட் மறுக்கப்பட்டதால் இம்முடிவுக்கு வந்ததாகவும் கூறப்படுகிறது. 

பஞ்சாப் முன்னாள் முதலமைச்சர் பிரகாஷ் சிங் பாதலுக்கு கொரோனா தொற்று உறுதி செய்யப்பட்டுள்ளது. இதனை தொடர்ந்து அவர் மருத்துவமனையில் அனுமதிக்கப்பட்டு சிகிச்சை பெற்று வருகிறார்.

இந்த செய்தியை அவரது மகன் சுக்பீர் சிங் பாதல் உறுதிப்படுத்தியுள்ளார்.  இந்தநிலையில் பஞ்சாப் முன்னாள் முதலமைச்சர் பிரகாஷ் சிங் பாதலுடன் தொலைபேசி வாயிலாக தொடர்பு கொண்டு பேசிய பிரதமர் மோடி அவரது உடல் நலன் குறித்து விசாரித்துள்ளார்.

பிரகாஷ் சிங் பாதலுக்கு லேசான அறிகுறிகளே தென்படுவதாகவும், அவர் நலமுடன் இருப்பதாகவும் கூறப்படுகிறது.