முன்னாள் நிதியமைச்சர் ப.சிதம்பரத்தின் மகன் கார்த்தி சிதம்பரம் சீன பிரஜைகளுக்கு விசா வழங்குவதற்கு 50 லட்சம் ரூபாய் லஞ்சம் பெறப்பட்டதாக குற்றச்சாட்டு எழுந்துள்ளது. இது தொடர்பாக நாடாளுமன்ற உறுப்பினர் கார்த்தி சிதம்பரம் உள்ளிட்ட 5க்கும் மேற்பட்டோர் மீது சிபிஐ அதிகாரிகள்  வழக்குப்பதிவு செய்துள்ளனர். 

மேலும் லஞ்சம் பெறப்பட்டது தொடர்பாக கடந்த 17ஆம் தேதி ப.சிதம்பரம் மற்றும் கார்த்தி சிதம்பரத்தின் வீடு மற்றும் அலுவலகங்களில் அதிரடி சோதனை நடத்தினர். டெல்லி, மும்பை, சென்னை உள்ளிட்ட 9 இடங்களில் ஒரே நேரத்தில் சிபிஐ அதிகாரிகள் தனித்தனி குழுக்களாக பிரிந்து சோதனையில் ஈடுபட்டனர்.   

இதன்பின், சென்னையில் கைது செய்யப்பட்ட கார்த்தி சிதம்பரத்தின் ஆடிட்டர் பாஸ்கர ராமனுக்கு 4 நாள் சிபிஐ காவல் விதித்து கடந்த சில நாட்களுக்கு முன் டெல்லி சிபிஐ சிறப்பு நீதிமன்றம் உத்தரவிட்டிருந்தது. வெளிநாடு சென்ற கார்த்தி சிதம்பரம் நாடு திரும்பிய 16 மணி நேரத்தில் விசாரணைக்கு ஆஜராக வேண்டுமென சிறப்பு நீதிமன்றம் உத்தரவிட்டது. இந்த நிலையில் டெல்லியில் சிபிஐ தலைமை அலுவலகத்தில் விசாரணைக்காக கார்த்தி சிதம்பரம் இன்று ஆஜராகி உள்ளார். அவரிடம் சிபிஐ அதிகாரிகள் விசாரணை மேற்கொண்டு வருகின்றனர். 

இந்தியாவில் 4 நிலைகளில் ஜி.எஸ்.டி. வசூலிக்கப்படுகிறது. அதாவது 5 சதவீதம், 12 சதவீதம், 18 சதவீதம் மற்றும் 28 சதவீதம் என 4 நிலைகளில் பொருட்களுக்கு வரி விதிக்கப்பட்டு உள்ளது.

இந்த 4 நிலைகளை மாற்றியமைக்க, அதாவது 3 நிலைகளாக குறைக்க மத்திய அரசு பரிசீலித்து வருகிறது. இதன்மூலம் சில பொருட்களின் வரி விகிதத்தை அதிகரிக்கவும், சில பொருட்களின் விகிதத்தை குறைக்கவும் திட்டமிட்டுள்ளது. 

ஆனால் தற்போது நாட்டின் பணவீக்கம் முன்எப்போதும் இல்லாத அளவுக்கு அதிகமாக உள்ளது. இதனால் இந்த ஜி.எஸ்.டி. விகித மாற்றியமைப்பு தாமதமாகும் வாய்ப்பு இருப்பதாக மத்திய அரசு வட்டாரங்கள் தெரிவித்து உள்ளன.

ஜம்மு காஷ்மீர் மாநிலத்தில் வீடு புகுந்து பிரபல டிவி நடிகையை தீவிரவாதிகள் சுட்டுக் கொன்ற சம்பவம் பரபரப்பை ஏற்படுத்தியுள்ளது.

பட்காம் மாவட்டத்தின் ஹிஷோரா பகுதியை சேர்ந்தவர் அம்பிரீன் பட். பிரபல டிவி நாடக நடிகையான இவரது வீட்டிற்குள் நுழைந்த தீவிரவாதிகள், திடீரென அம்பிரீன் மீதும், அவருடன் இருந்த 10 வயது சிறுமி மீதும் துப்பாக்கிச்சூடு நடத்திவிட்டு தப்பிச்சென்றனர்.

இதில் படுகாயம் அடைந்த இருவரையும் அக்கம்பக்கத்தினர், மீட்டு அருகிலுள்ள மருத்துவமனையில் அனுமதித்தனர்.  இதில் அம்பிரீன் சிகிச்சை பலனின்றி உயிரிழந்தார்.

காயமடைந்த 10 வயது குழந்தைக்கு தீவிர சிகிச்சை அளிக்கப்பட்டு வருகிறது. இதையடுத்து, அப்பகுதியில் பாதுகாப்புப் படையினர் குவிக்கப்பட்டு தப்பியோடிய தீவிரவாதிகளை தேடிவருகின்றனர்.

கர்நாடக மாநிலம் மங்களூரில் கேரள முறைப்படி கட்டப்பட்டிருந்த அசாயத் அப்துல் லாஹில் மதானி ஜும்மா என்ற மசூதி இருந்துள்ளது. பழமையான கட்டடம் என்பதால் புனரமைப்பதற்காக மசூதி நிர்வாகிகள் ஒரு பகுதி கட்டடத்தை இடித்து தள்ளினர்.

இதனையடுத்து அங்கிருந்த மசூதி கட்டடத்தில் கோவில் சாயல் இருப்பதாக இந்துத்துவா அமைப்பினர்கள் குற்றம்சாட்டினர். மேலும் இதுதொடர்பாக மங்களூரு நீதிமன்றத்தில் வழக்கு தொடர்ந்த அவர்கள், புனரமைப்பு பணி செய்வதற்கும் எதிராக கடந்த இரண்டு வாரங்களுக்கு முன்பே தடை உத்தரவு வாங்கியுள்ளனர். 

இதனையடுத்து கேரளாவில் இருந்து கோபால் கிருஷ்ணா பணிகர் என்ற பூசாரியை வரவழைத்து குறிப்பிட்ட இடத்தில் கோவில் இருந்ததா? இல்லையா? என அஷ்டமங்கள பூஜைசெய்து இந்து அமைப்பினர் குறி கேட்டனர்.  பூஜையை ஆரம்பித்த பூசாரி முன்னொரு காலத்தில் இங்கு சிவன் கோவில் இருந்ததாக தெரிவித்து சர்ச்சையை கிளப்பினார்.

விஷ்வ ஹிந்து பரிஷத் அமைப்பினர் நடத்திய இந்த பூஜைக்கு பல தரப்பினரும் எதிர்ப்பு தெரிவித்துள்ள நிலையில், மங்களூரு நகரில் 144 தடை உத்தரவு போடப்பட்டு போலீசார் குவிக்கப்பட்டுள்ளனர். 

கர்நாடக மாநிலம் பெங்களூர் பள்ளி வளாகத்தில் மன்னிக்கவும் என்ற வாசகத்தை எழுதியுள்ள மர்ம நபா்களை காவல்துறையினா்  தேடி வருகின்றனா்.

 காமக்ஷிபல்யா பகுதி சாந்திதாமா தனியார் பள்ளியின் பள்ளி நுழைவாயில் மற்றும் சுவர்கள், மற்றும் சுற்றியுள்ள சாலைகள் முழுவதும் இந்த மன்னிப்பு என்ற வாசகம் எழுதப்பட்டுள்ளது.

இந்நிலையில், வழக்கம் போல் பள்ளிக்கு வந்த ஆசிரியா்கள் மற்றும் பள்ளி மாணவா்கள் இதனை பார்த்து அதிரச்சியடைந்தனா்.  தகவலறிந்து சென்ற  காவல்துறையினா்,  அங்கு பதிவான சிசிடிவி  காட்சிகள் கொண்டு மா்ம நபா்களை தேடி வருகின்றனா்.