நாடாளுமன்றத்தில் ஆண்டுதோறும் தாக்கல் செய்யப்படும் மத்திய பட்ஜெட்டானது அதிகமான பக்கங்களில் அச்சிடப்பட்டு துணிப்பைகளில் கட்டப்படும். இந்த அச்சிடும் பணிகள் பட்ஜெட் தாக்கல் செய்வதற்கு சுமார் 2 வாரங்களுக்கு முன்பே தொடங்கி விடும்.

பட்ஜெட் ஆவணங்களில் நூற்றுக்கணக்கான பிரதிகள் அச்சிடப்படுவதால் ஏராளமான காகிதம் உள்ளிட்ட பொருட்களின் தேவை உள்ளது. காகித பயன்பாட்டை குறைக்கும் வகையில் டிஜிட்டல் முறையில் பட்ஜெட் ஆவணங்களை உருவாக்க மத்திய அரசு முடிவு செய்தது. 

இதனால் அச்சிடப்படும் பட்ஜெட் பிரதிகளின் எண்ணிக்கை மிகவும் குறைந்துள்ளன. இதன் விளைவாக கடந்த ஆண்டை போலவே இந்த ஆண்டும் மத்திய பட்ஜெட்டை டிஜிட்டல் முறையில் தாக்கல் மத்திய அரசு திட்டமிட்டுள்ளது.

ஆந்திரப் பிரதேச மாநிலத்தில் உள்ள மொத்த மாவட்டங்களின் எண்ணிக்கையை 13-லிருந்து 26 ஆக அதிகரிக்கப்பட்டுள்ளது. 

அதற்கான அதிகாரப்பூர்வ அறிவிப்பு அம்மாநில அரசிதழில் வெளியிடப்பட்டுள்ளது. ஆந்திர மாநிலத்தில் உள்ள 13 மாவட்டங்களை 26 மாவட்டங்களாக பிரிக்க முதல்வர் ஜெகன் மோகன் ரெட்டி தலைமையிலான அமைச்சரவை கடந்த ஆண்டு ஜுலை மாதம் ஒப்புதல் அளித்தது. 

தற்போது குடியரசு தினத்தையொட்டி மாவட்டங்களை பிரித்ததற்கான அதிகாரப்பூர்வ அறிவிப்பு அம்மாநில அரசிதழில் வெளியிடப்பட்டுள்ளது. 

குடியரசு தினவிழா அணிவகுப்பு நிகழ்ச்சியில் 5 ரஃபேல் விமானங்கள் ,17 ஜாகுவார், P8 போசைடன், சினுக், மிக் ரக விமானங்கள் என மொத்தம் 75 போர் விமானங்கள் அணிவகுப்பில் பங்கேற்கும் என்று இந்திய விமானப்படை ஏற்கெனவே அறிவித்திருந்தது.

இந்த நிலையில் வானில் வட்டமடிக்கும் மற்றும் சாகசத்தில் ஈடுபடும் விமானங்களின் காட்சியை பொதுமக்கள் தெளிவாக பார்த்து ரசிக்கும் வண்ணம் போர் விமானத்தில் காக்பிட் என்று சொல்லக்கூடிய விமானியின் அறையில் கேமராக்கள் பொருத்தப்பட்டு காட்சிகள் பதிவு செய்யப்பட்டுள்ளது. அதன் காட்சியை இந்திய ராணுவம் வெளியிட்டுள்ளது.

அதன்படி போர் விமானங்கள் இரண்டு துருவ் ஹெலிகாப்டர்கள் மற்றும் இரண்டு ஏஎல்எச் ருத்ரா ஹெலிகாப்டர்கள் வானில் வட்டமடித்ததன் வான் நோக்கு காட்சி இணையத்தில் வெளியாகியுள்ளது. 

இதேபோல் 17 ஜாகுவார் போர் விமானங்கள் வானில் 75 என்ற வடிவில் நீந்தி சென்றதன் வீடியோ காட்சியை இந்திய விமானப்படை வெளியிட்டுள்ளது. 

ஒரு ரஃபேல், இரண்டு ஜாகுவார், இரண்டு MiG-29 UPG, இரண்டு Su-30 MI என மொத்தம் 7 போர் விமானங்கள் 'பாஸ்' உருவாக்கத்தின் வான்நோக்கு காட்சியும் வெளியாகியுள்ளது. 

அம்புக்குறி அமைப்பில் பறக்கும் ஐந்து ரஃபேல் போர் விமானங்களின் காட்சியும் வெளியிடப்பட்டுள்ளது

மத்திய அரசு தனக்கு அளித்துள்ள பத்ம பூஷன் விருதை வேண்டாம் என மறுத்துள்ளார் மேற்குவங்க முன்னாள் முதல்வர் புத்ததேவ் பட்டாச்சார்யா.

குடியரசு தினத்தை முன்னிட்டு, கலை, கல்வி, தொழில், இலக்கியம், அறிவியல், விளையாட்டு உள்ளிட்ட துறைகளில் சிறந்து விளங்கும்  குடிமக்களுக்கு நாட்டின் உயரிய பத்ம விருதுகள் வழங்கப்படுகிறது.

அந்தவகையில் மேற்கு வங்க முன்னாள் முதல்வரும், மார்க்சிஸ்ட் கம்யூனிஸ்ட் கட்சியின் முதுபெரும் தலைவரான புத்ததேவ் பட்டாச்சார்யாவுக்கு பத்ம பூஷன் விருது அறிவிக்கப்பட்டது. இந்நிலையில், தாம் அந்த விருதினை வாங்கிக்கொள்ள மாட்டேன் என தெரிவித்துள்ளார். 

இதேபோல், 90 வயதான பழம்பெரும் பாடகி சந்தியா முகர்ஜியும் தனக்கு அளிக்கப்பட்ட பத்ம ஸ்ரீ விருதினை வாங்க மறுத்துள்ளார். இதனை வளர்ந்து வரும் இளம் தலைமுறை பாடகர்களுக்கு வழங்குவதே பொருத்தமானது எனவும் கூறியுள்ளார். 

டெல்லியில் குடியரசு தின விழாவில் கலந்து கொண்ட பிரதமர் மோடியின் உடை அனைவரின் கவனத்தை ஈர்த்துள்ளது. நாட்டின் 73வது குடியரசு தினம் டெல்லி ராஜபாதையில் கோலாகலமாகக் கொண்டாடப்பட்டது.

நிகழ்ச்சியில் பங்கேற்ற பிரதமர் மோடி அணிந்திருந்த தொப்பி, உத்தராகண்ட் மாநிலத்தின் பாரம்பரிய தொப்பியாகும். அந்த தொப்பி "பிரம்மகமால்"  மலர்களால் அலங்கரிக்கப்பட்டிருந்தது.  உத்தரகாண்ட் மாநிலம் கேதார்நாத் செல்லும் போதெல்லாம் பிரம்மகமால் மலர்களால் பிரதமர் கடவுளை பூஜிப்பார்.  தங்கள் மாநிலத்தின் பாரம்பரிய தொப்பியை அணிந்ததற்காக மக்கள் சார்பாக உத்தர்காண்ட் முதல்வர் புஷ்கர் சிங் டாமி நன்றி கூறியுள்ளார்.

இதேபோல் கழுத்தில் அணிந்திருந்த சால்வை மணிப்பூர் மாநிலத்தின் மெட்டே பழங்குடியின மக்களின் பாரம்பரிய "லீரம் பீ" ஆகும். அடுத்த மாதம் உத்தரகாண்ட் மற்றும் மணிப்பூர் மாநில தேர்தல் நடைபெற உள்ள நிலையில் இருமாநிலத்தையும் தனது உடையில் பிரிதிபலித்தவாறு மோடி அணிந்திருந்த உடை கவனத்தை ஈர்த்துள்ளது.