உக்ரைன் மீது ரஷ்யா தாக்குதல் நடத்தி 6 மாதங்கள் கடந்த நிலையில், நேற்று உக்ரைனிலிருந்து 50 சதவீதம் படைகளை திரும்பப் பெறுவதாக ரஷ்ய அதிபர் புதின் அறிவித்தார்.

புதின் எச்சரிக்கை

மேலும் உக்ரைன் விவகாரத்தில் மேற்கத்திய நாடுகள் எல்லை மீறிவிட்டதாக எச்சரித்த அவர், ரஷ்யாவை துண்டாக்கவோ, அழிக்கவோ முயற்சித்தால் அனைத்து வழிகளையும் கையில் எடுப்பேன் எனவும் பகிரங்கமாக எச்சரித்தார். இதனை விளையாட்டுக்கு சொல்லவில்லை என அவர் மீண்டும் வலியுறுத்தியதை அடுத்து, ரஷ்யா வரும் நாட்களில் அணு ஆயுதங்களை பயன்படுத்த கூடும் என்ற அச்சம் நிலவுகிறது.

ரஷ்யா மீது பொருளாதாரத் தடை

இந்த நிலையில் புதினின் அறிவிப்பை தொடர்ந்து திடீர் ஆலோசனை கூட்டம் நடத்திய ஐரோப்பிய ஒன்றிய உறுப்பு நாடுகள், ரஷ்யா மீது மேலும் பல பொருளாதார தடைகளை விதிக்க முடிவு செய்துள்ளனர். 

மேலும் உக்ரைனுக்கு தொடர்ந்து ஆயுதங்களை வழங்கவும் உறுப்பினர்கள் ஒப்புதல் அளித்துள்ளனர்.இதனிடையே ஐநா பொதுச்சபை கூட்டத்தில் உரையாற்றிய உக்ரைன் அதிபர் ஜெலன்ஸ்கி, கொடூர தாக்குதல் நடத்தி நாட்டை ஆக்ரமிக்க முயன் ரஷ்யாவுக்கு தண்டனை வழங்க வேண்டும் என மீண்டும் மீண்டும் வலியுறுத்தினார். அதுமட்டுமின்றி உக்ரைனுக்கு ஏற்பட்டுள்ள இழப்புகளுக்கு ரஷ்யா தனது பங்குகளில் இருந்து  இழப்பீடு வழங்க வேண்டும் என கூறினார்.

சுற்றுலா நகரமான புதுச்சேரிக்கு வார இறுதி நாட்கள், பொது விடுமுறை நாட்கள் என்பதால், அண்டை மாநிலமான தமிழகம், மற்றும் கர்நாடகா, ஆந்திரா கேரளா உள்ளிட்ட பல மாநிலங்களை சேர்ந்த சுற்றுலா பயணிகள் அதிக அளவில் வருகை தந்துள்ளனர். புதுச்சேரியில் உள்ள கடற்கரைகள், ஆசிரமம், பிரெஞ்சு கட்டிடங்கள், கோயில்கள் ஆகியவற்றை கண்டுகழிக்கின்றனர். இந்நிலையில் விநாயகர் சதுர்த்தியான இன்று பல்வேறு மாநிலத்தில் இருந்து புதுச்சேரி வந்துள்ள சுற்றுலா பயணிகள் கடற்கரையில் கடலில் குளிக்க கூடாது என்று போலீசார் வைத்துள்ள எச்சரிக்கை பலகை அருகேயே ஆபத்தை உணராமல் கொட்டும் மழையில் கடலில் இறங்கி குளித்தும் செல்ஃபி எடுத்தும் மகிழ்ந்து வருகின்றனர்.

இதனிடையே கடலில் குளிப்பவர்களை அப்புறப்படுத்தும் பணியில் போலீசார் மற்றும் கடற்படை போலீசார் யாரும் ஈடுப்படவில்லை, மேலும் கடந்த 2 மாதங்களில் இதே கடற்கரையில் 5 க்கும் மேற்பட்ட சுற்றுலா பயணிகள் குளிக்கும் போது கடலில் இழுத்து செல்லப்பட்டு உயிரிழிந்தது குறிப்பிடத்தக்கது.

இந்திய ஒன்றியத்தின் பிரதமர் நரேந்திர மோடி கேரளாவில் இரண்டுநாள் சுற்றுப்பயணம் மேற்கொள்கிறார். கேரளாவில் ஆதி சங்கராச்சாரியாரின் பிறந்த ஊரான காலடி கிராமம் உள்ளது. இங்கு நடைபெறும் நிகழ்ச்சியில் பங்கேற்க பிரதமர் மோடி  செப்டம்பர் 1 அன்று கேரளா வருகிறார். மாலை 6 மணிக்கு கேரளா வரும் அவர், காலடி கிராமத்திற்கு செல்கிறார்.

அங்கு ஆதிசங்கரர் ஜென்மபூமியில் தரிசனம் செய்கிறார். அதன்பின்பு நாளை மறுநாள் 2-ந் தேதி கொச்சி துறைமுகத்திற்கு செல்கிறார். அங்கு உள்நாட்டிலேயே தயாரிக்கப்பட்ட ஐ.என்.எஸ்.  விக்ராந்த் போர்க்கப்பலை நாட்டுக்கு அர்ப்பணிக்கிறார். இந்த புதிய கப்பல் கடற்படையில் சேர்க்கப்படுவதன் மூலம் இந்தியாவில் 2 விமானம் தாங்கி போர்க்கப்பல்கள் இருக்கும்.

இந்த நிகழ்ச்சியில் கலந்து கொள்ளும் பிரதமர் மோடி இந்திய கடல்சார் பாரம்பரியத்தை விளக்கும் வகையிலான புதிய கடற்படை கொடியையும் அறிமுகம் செய்கிறார். அதன்பிறகு பிரதமர் மோடி, கர்நாடகா மாநிலம் மங்களூருவுக்கு செல்கிறார். அங்கு ரூ.3,800 கோடி மதிப்பிலான நலத்திட்டங்களுக்கு அடிக்கல் நாட்டுகிறார். பிரதமர் அலுவலகம் வெளியிட்டுள்ள நிகழ்ச்சி நிரலில் இந்த தகவல்கள் வெளியிடப்பட்டுள்ளன.

தெலுங்கானாவில், பாஜக சட்டமன்ற உறுப்பினர் ராஜா சிங், நபிகள் நாயகம் குறித்து சா்ச்சைக்குரிய வகையில் விடியோ வெளியிட்டார். இதையடுத்து கைது செய்யப்பட்ட அவரை, கட்சியில் இருந்து இடைநீக்கம் செய்து பாஜக நடவடிக்கை எடுத்தது.

தொடர்ந்து அவருக்கு உள்ளூா் நீதிமன்றம் ஜாமீன் வழங்கியதை அடுத்து, பல்வேறு பகுதிகளில் இஸ்ஸாமிய அமைப்புகளை சேர்ந்தோர் போராட்டங்களில் ஈடுபட்டு வருகின்றனர். நகரின் பல்வேறு பகுதிகளில் இஸ்லாமியர்கள் கருப்பு கொடி ஏந்தியும், ராஜா சிங்கின் உருவ பொம்மைகளை எரித்தும் போராட்டத்தில் ஈடுபட்டு வருகின்றனர்.

இதையடுத்து அவர்களை சமாதானப்படுத்தும் முயற்சியில் ஏ.  ஐ.எம்.  ஐ.எம் கட்சி சட்டமன்ற உறுப்பினர்கள் ஈடுபட்டுள்ளனர். பெரும் அசம்பாவிதங்களை தவிர்க்கும் வகையில் ஹைதராபாத்தில் உள்ள சார்மினார் பகுதியில் கூடுதல் போலீசார் குவிக்கப்பட்டுள்ளனர். 

இந்நிலையில், பாஜக சட்டமன்ற உறுப்பினரின் கருத்து உலகம் முழுவதும் உள்ள இஸ்லாமியா்களை புண்படுத்தியுள்ளதாக பாகிஸ்தான் வெளியுறவு துறை தெரிவித்துள்ளது. மேலும், பாஜக சட்டமன்ற உறுப்பினர் மீது இந்திய அரசு கடுமையான நடவடிக்கை எடுக்க வேண்டும் என பாகிஸ்தான் அரசு வலியுறுத்தியுள்ளது...

தாய்லாந்து பிரதமர் பிரயுத் சான்-ஓ-சாவை அந்நாட்டு அரசியலமைப்பு நீதிமன்றம் பதவியிலிருந்து இடைநீக்கம் செய்துள்ளது. தாய்லாந்து அரசியலமைப்பு சட்டத்தின்படி பிரதமரின் பதவிக்கால வரம்பை மீறியதாக எதிர்க்கட்சி எம்.பி.க்கள் தாக்கல் செய்யப்பட்ட மனுவை விசாரித்த நீதிமன்றம் இந்த உத்தரவை பிறப்பித்துள்ளது.

ஆட்சிக் கவிழ்ப்பு

கடந்த 2014 ஆம் ஆண்டு தேர்ந்தெடுக்கப்பட்ட அரசாங்கத்தின் ஆட்சியை கவிழ்த்து பிரயுத் ஆட்சியைப் பிடித்தார். அதன்பின்னர் 2019 ஆண்டு பொதுத்தேர்தலில் வெற்றி பெற்று மீண்டும் பிரதமர் ஆனார். பிரதமர் பதவி வகிப்பதற்கான வரம்பு 8 ஆண்டுகள் ஆகும். அந்த சட்டத்தை பிரயுத் மீறியிருப்பதாக எதிர்க்கட்சி நாடாளுமன்ற உறுப்பினர்கள் குற்றம்சாட்டி உள்ளனர். அதாவது, ஆகஸ்ட் 24, 2014 அன்று அவர் அதிகாரப்பூர்வமாக பிரதமராக பதவியேற்றதில் இருந்து நேற்றுடன் 8 ஆண்டு முடிந்துவிட்ட நிலையில், அவர் சட்டத்தை மீறியிருப்பதாக கூறுகின்றனர். 

ஆனால், 2017-ல் கால வரம்பு விதியைக் கொண்ட தற்போதைய அரசியலமைப்பு நடைமுறைக்கு வந்ததிலிருந்து, பதவிக் காலம் கணக்கிடப்பட வேண்டும் என்று பிரயுத் ஆதரவாளர்கள் வாதிடுகின்றனர். பதவிக்கால வரம்பை மீறியதாக தாக்கல் செய்யப்படடுள்ள மனுவை பரிசீலனைக்கு ஏற்ற நீதிமன்றம், பிரயுத்தை இடைநீக்கம் செய்தது.

இடைக்கால பிரதமர் யார்?

மேலும், புகாரின் நகலைப் பெற்ற 15 நாட்களுக்குள் பிரயுத் தனது வாதத்தை சமர்ப்பிக்க வேண்டும் என்று நீதிமன்றம் உத்தரவிட்டு விசாரணையை ஒத்திவைத்துள்ளது. ஆனால் எப்போது தீர்ப்பு வழங்கப்படும் என கூறவில்லை. பதவிக்கால வரம்பு தொடர்பாக சட்டப்பூர்வ மறு ஆய்வு முடிவு வெளியாகும் வரை பிரயுத் பிரதமர் பதவியில் இருந்து சஸ்பெண்ட் செய்யப்பட்டிருக்கிறார்.

அதுவரை பிரயுத்தின் நெருங்கிய அரசியல் கூட்டாளியும், ஆட்சிக் கவிழ்ப்பை நடத்திய அதே ராணுவக் குழுவில் இடம்பெற்றவருமான துணைப் பிரதமர் பிரவித் வாங்சுவான் தற்காலிக பிரதமராக செயல்படுவார் என பிரதமர் அலுவலக செய்தித் தொடர்பாளர் கூறி உள்ளார். அரசியலமைப்பு நீதிமன்றமானது, அரசியல் வழக்குகளில் பொதுவாக அரசாங்கத்திற்கு ஆதரவாகவே தீர்ப்பளித்துள்ளதால், இந்த வழக்கிலும் பிரதமர் பிரயுத் சான்-ஓச்சாவை பதவி நீக்கம் செய்வது சாத்தியமில்லை என கருதப்படுகிறது.