புதுச்சேரி மாநிலம் காரைக்காலில் கடந்த 10 நாட்களுக்கு மேலாக பொதுமக்கள் ஆயிரக்கணக்கானோர் உடல் நலக்குறைவு காரணமாக அரசு மருத்துவமனையில் சிகிச்சை பெற்று வீடு திரும்புவது தொடர் கதையாகி வருகிறது.

வாந்தி, பேதி, மயக்கத்தால் மக்கள் பாதிக்கப்பட்டு வருவதால் காரைக்காலில் பொது சுகாதார அவசர நிலையை புதுச்சேரி அரசு பிறப்பித்தது.

இதன் தொடர்ச்சியாக, காரைக்காலில் தற்போது 144 தடை உத்தரவை ஆட்சியர் முகமது மன்சூர் பிறப்பித்துள்ளார். அதன்படி, அனைத்து உணவங்கள், கல்வி நிலையங்கள், திருமணக் கூடங்கள், மருத்துவமனைகளில் கட்டாயம் காய்ச்சிய குடிநீர் வினியோகம் செய்யப்பட வேண்டும் என அறிவுறுத்தப்பட்டுள்ளது.

மேலும், கொதிக்க வைத்த குடிநீரை மட்டுமே மக்கள் பருக வேண்டும், அனைத்து வீடுகளிலும் உள்ள குடிநீர் தொட்டிகளை உடனடியாக சுத்தம் செய்ய வேண்டும் என்றும் கேட்டுக் கொள்ளப்பட்டுள்ளது.  இந்த உத்தரவை மீறுபவர்கள் மீது கடும் நடவடிக்கை எடுக்கப்படும் என்றும் மாவட்ட நிர்வாகம் எச்சரிக்கை விடுத்துள்ளது.

இதனிடையே, காலரா நோய் பரவல் குறித்த வதந்திகளை மக்கள் நம்ப வேண்டாம் என காரைக்கால் அரசு மருத்துவமனை முதல்வர் கேட்டுக்கொண்டுள்ளார். அரசு மருத்துவமனையில் வயிற்றுபோக்கு காரணமாக அனுமதிக்கப்பட்டவர்கள் நலமுடன் வீடு திரும்பியதாகவும், மற்றவர்களுக்கு உரிய சிகிச்சை அளிக்கப்பட்டு வருவதாகவும் அவர் தெரிவித்தார்.

சென்னை மாமல்லபுரத்தில் வரும் ஜூலை 28- ஆம் தேதி முதல் ஆகஸ்ட் 10- ஆம் தேதி வரை 44 வது உலக செஸ் ஒலிம்பியாட் போட்டி நடைபெறவுள்ளது.

இதற்கான இலச்சினை மற்றும் சின்னம் சமீபத்தில் முதலமைச்சர் மு.க.ஸ்டாலின் மற்றும் விளையாட்டுத் துறை அமைச்சர் மெய்யநாதன் உள்ளிட்டோர் தலைமையில் வெளியிடப்பட்டது.

முன்னதாக செஸ் ஒலிம்பியாட் போட்டிகளுக்கான பிரத்யேக ஒலிம்பியாட் தீபம் ஏற்றப்படும் என அறிவிக்கப்பட்டு இருந்தது. 

இந்நிலையில், இன்று மாலை செஸ் ஒலிம்பியாட் போட்டிகளுக்கான ஒலிம்பியாட் தீபத்தை மோடி தொடங்கி வைக்க இருக்கிறார்.

டெல்லி செங்கோட்டையில் இருந்து தொடங்கப்பட்டு, இந்தியாவில் உள்ள 26 மாநிலங்களின் 75 நகரங்களுக்கு பயணித்து, இறுதியாக ஜூலை 28 ஆம் தேதிக்கு முன்பு சென்னை வந்தடையும். ஒலிம்பியாட் தீபம் ஏற்றும் நிகழ்ச்சி டெல்லியில் உள்ள AT IG அரங்கத்தில் இன்று மாலை 5 மணிக்கு பிரம்மாண்டமாக தொடங்க உள்ளது.

இந்நிகழ்ச்சியில் மத்திய விளையாட்டுத்துறை அமைச்சர் அனுராக் சிங் தாக்கூர், தமிழ்நாடு விளையாட்டுத்துறை அமைச்சர் மெய்யநாதன், அகில இந்திய சதுரங்க கூட்டமைப்பின் தலைவர் சஞ்சய் கபூர்,  விஸ்வநாதன் ஆனந்த் மற்றும் இந்திய அணியின் வீரர் வீராங்கனைகள் உள்ளிட்டோர் பங்கேற்க உள்ளனர்.

அக்னிபாத்’ திட்டத்திற்கான ஆட்சேர்ப்பு செயல்முறைக்கான அதிகபட்ச வயது வரம்பு 23 ஆக அதிகரிக்கப்பட்டுள்ள நிலையில் இது இளைஞர்களுக்கு பெரும் பயனுடையதாக இருக்கும் என மத்திய உள்துறை அமைச்சர் அமித்ஷா தெரிவித்துள்ளார்.

அக்னிபாத் திட்டத்திற்கு எதிராக நாடு முழுவதும் ராணுவத்தில் சேருவதற்காக காத்திருக்கும் இளைஞர்கள் போராட்டத்தில் இறங்கியுள்ளனர். இந்த நிலையில் அக்னிபாத்’ திட்டம் குறித்து மத்திய உள்துறை அமைச்சர் அமித்ஷா தனது டுவிட்டர் பக்கத்தில் பதிவு ஒன்றை வெளியிட்டுள்ளார்.

அதில் வயது வரம்பை உயர்த்தியதன் மூலம் ஏராளமான இளைஞர்கள் பயனடைவார்கள் என்றும் அக்னிபத் திட்டத்தின் மூலம் அவர்கள் நாட்டிற்கு சேவையாற்றுவதுடன், அவர்களின் எதிர்காலம் பிரகாசமாக இருக்கும் எனவும் தெரிவித்துள்ளார். 

இளைஞர்கள் மீதான அக்கறையின் விளைவாகவே வயது உச்ச வரம்பில் தளர்வு அளிக்கப்பட்டுள்ளதாகவும் கூறினார். நாட்டுக்கு சேவையாற்ற துடிக்கும் இளைஞர்கள் மன கொதிப்பில் போராட்டத்தில் ஈடுபட்டுக் கொண்டிருக்க அவர்களின் கோரிக்கைக்கு செவி கொடுக்கும் விதமாக மத்திய அமைச்சர் டுவிட்டரில் பதிவிட்டுள்ளது குறிப்பிடத்தக்கது. 

சத்தீஸ்கர் மாநிலம் ஜாங்கிர் சம்பா மாவட்டத்தின் பிக்ரித் கிராமத்தைச் சேர்ந்த 10 வயது சிறுவன் ராகுல், கடந்த வெள்ளிக் கிழமை 80 அடி ஆழ ஆழ்துளை கிணறு ஒன்றில் தவறி விழுந்தான். தகவல் அறிந்து விரைந்து வந்த தீயணைப்புத்துறை, காவல்துறை, ராணுவம், தேசிய பேரிடர் மீட்புக்குழு மற்றும் மருத்துவக் குழு என 500க்கும் மேற்பட்டோர் 60 அடி ஆழத்தில் சிக்கியிருந்த சிறுவனை மீட்கும் பணியில் தீவிரமாக ஈடுபட்டனர். ஆழ்துளை கிணற்றில் பைப் மூலமாக ஆக்ஸிஜனை செலுத்தி சிறுவனின் உடல்நிலையை மருத்துவக் குழுவினர் கண்காணித்து வந்தனர். இந்நிலையில், 104 மணி நேர போராட்டத்திற்குப் பின் சிறுவனை மீட்புக்குழுவினர் பத்திரமாக மீட்டனர்.

இதனையடுத்து, ஆம்புலன்ஸ் மூலம் சிறுவனை மருத்துவமனைக்கு அனுப்பி வைத்தனர்.  அங்கு, சிறுவன் ராகுலுக்கு தீவிர சிகிச்சை அளிக்கப்பட்டு வருகிறது. இந்த சந்தாஷமான செய்தியை தனது ட்விட்டரில் பகிர்ந்துள்ள சத்தீஷ்கர் முதலமைச்சர் பூபேஷ் பாகேல், அனைவரின் பிரார்த்தனையாலும், மீட்புக் குழுவினரின் இடைவிடாத அர்ப்பணிப்பு முயற்சியாலும், ராகுல் பத்திரமாக மீட்கப்பட்டுள்ளார் என்றும் சிறுவன் விரைவில் பூரண குணமடைய வேண்டுவதாகவும் தெரிவித்துள்ளார். மேலும், மீட்புக்குழுவில் ஈடுபட்ட அனைவருக்கும் பாராட்டுகளையும் முதலமைச்சர் பூபேஷ் பாகேல் கூறியுள்ளார்.

இலங்கையில் வரும் 2024ஆம் ஆண்டு வரை உணவுப் பற்றாக்குறை நீடிக்கலாம் என பிரதமர் ரணில் விக்ரமசிங்கே தெரிவித்தள்ளார். தற்போது ஏற்பட்டுள்ள நெருக்கடிக்கு இலங்கை அரசுதான் காரணம் என்றும், அதேநேரத்தில் உக்ரைன் போர் அதனை கூடுதலாக வலுப்படுத்தி விட்டதாகவும் கூறியுள்ளார். 

சீனாவிடம் இருந்து மேலும் நிதி உதவிகளை ஏற்கவும், ரஷ்யாவிடம் இருந்து எண்ணெய் வாங்கவும், இலங்கை தயாராக இருப்பதாகவும் குறிப்பிட்டுள்ள அவர், அதேநேரம் தேவையான எரிபொருளை கொள்முதல் செய்ய முதலில் வேறு வழிகள் தேடப்பட்டு வருவதாகவும் தெரிவித்துள்ளார். பிரதமர் ரணில் விக்ரமசிங்கே பேச்சு இலங்கை மக்களை அதிர்ச்சியில் ஆழ்த்தியுள்ளது