திருப்பதியில் உள்ள செம்மரக் கடத்தல் தடுப்பு பிரிவு போலீசார் நேற்று இரவு நேரம் ரோந்து பணியில் ஈடுபட்டு வந்தனர்.  அப்போது திருப்பதியை அடுத்த ஹரிதா காலனி, கரங்கம்பாடி போன்ற இடங்களில் செம்மரம் கடத்தி வந்தது தெரியவந்தது. இதனை அடுத்து  செம்மரக் கடத்தல் தடுப்பு பிரிவு போலீசார் 3 தனிப்படை அமைத்து சம்பவ இடத்திற்கு சென்றனர். 

அதில் மூன்று இடங்களிலிருந்து  32 செம்மரக்கட்டைகள் மற்றும் கடத்தலுக்கு பயன்படுத்திய கார் உள்ளிட்டவைகளை போலீசார் பறிமுதல் செய்தனர். அதனைதொடர்ந்து செம்மரங்களை சுமந்து சென்ற 10 க்கும் மேற்ப்பட்டோரை போலீசார் பிடிக்க முயன்றனர்.

அதில் 3 பேர் மட்டுமே பிடிபட்ட நிலையில் அவர்களிடம் போலீசார் விசாரணை மேற்க்கொண்டனர். அதில் ஒருவர் சிறுவன் என்பது தெரியவந்தது. இதனை அடுத்து இருவர் மீது வழக்கு பதிவு செய்த போலீசார் சிறுவனை சிறுவர் சீர்திருத்த பள்ளியில் சேர்க்க உள்ளனர்.

மேலும் இது குறித்து பேசிய செம்மரக் கடத்தல் தடுப்பு பிரிவு எஸ் பி, ஒரு கோடி மதிப்பிலான முப்பத்தி இரண்டு செம்மரக்கட்டைகள் பிடித்திருப்பதாகவும் தப்பித்து ஓடியவர்களை இரண்டு தனிப்படை அமைத்து தேடி வருவதாகவும் தெரிவித்துள்ளார்.

இந்திய மருத்துவ ஆராய்ச்சி கவுன்சிலுடன் இணைந்து பாரத் பயோடெக் நிறுவனம் தயாரித்துள்ள கோவேக்சின் தடுப்பூசிக்கு இந்தியாவில் அவசர கால பயன்பாட்டுக்கு ஒப்புதல் அளிக்கப்பட்டுள்ளது. எனினும், இந்த தடுப்பூசியை அவசர கால பயன்பாட்டுக்கு பயன்படுத்த உலக சுகாதார அமைப்பு இன்னும் ஒப்புதல் அளிக்கவில்லை. அண்மையில், கோவேக்சின் தடுப்பூசி நிறுவனம் மூன்றாம் கட்ட பரிசோதனை முடிவுகளையும், செயல் திறன் பற்றிய தரவுகளையும் வெளியிட்டது. 

இந்த நிலையில் கோவாக்சின் தடுப்பூசிக்கு உலக சுகாதார அமைப்பு அடுத்த மாதம் 5 ஆம் தேதிக்கு பிறகு அவசர கால பயன்பாட்டுக்கான அங்கீகார வழங்கப்பட வாய்ப்பு உள்ளதாக கூறப்படுகிறது. அக்டோபர் 5 ஆம் தேதி கூட உள்ள உலக சுகாதார அமைப்பின் நோய்த் தடுப்புக்கான பகுப்பாய்வு ஆலோசனை குழு கோவாக்சின் தடுப்பூசிக்கு அங்கீகாரம் அளிப்பதற்கான ஆலோசனையை மேற்கொள்ள உள்ளது குறிப்பிடதக்கது.

ஆந்திராவில் வீடுகளில் சேரும் குப்பையை சேகரித்து எடுத்துச் சொல்வதற்கு கூட ஆளும் ஒய்.எஸ்.ஆர் காங்கிரஸ் கட்சி வரி வசூல் செய்கிறது என்று தெலுங்கு தேசம் கட்சியினர் குற்றம் சாட்டி இருந்தனர். இந்த நடவடிக்கை மூலம் வீடுகளில் குப்பை சேர்வது கூட ஏழை மக்களுக்கு கவலையளிக்கும் விஷயமாக மாறிவிட்டது என்றும் அவர்கள் குறிப்பிட்டிருந்தனர்.

இதற்கிடையில் தெலுங்கு தேசம் கட்சியினர் குற்றச்சாட்டை கண்டித்து ஒய்.எஸ்.ஆர் காங்கிரஸ் கட்சி எம்எல்ஏ ரமேஷ் இன்று உண்டவள்ளியில் இருக்கும் சந்திரபாபு நாயுடு வீட்டு முன் போராட்டம் நடத்துவதற்காக நூற்றுக்கணக்கான கட்சித் தொண்டர்களுடன் சென்றார்.    

இரண்டு கட்சித் தொண்டர்களும் ஒரே இடத்தில் சந்தித்துக் கொண்ட நிலையில் முதலில் ஒருவருக்கு ஒருவர் எதிராக கோஷம் எழுப்பினர். பின்னர் ஒரு சாரார் மற்றொரு சாரார் மீது கற்களை வீசி தாக்குதல் நடத்த முற்பட்டனர். இதனால் அங்கு பெரும் பரபரப்பு ஏற்பட்டது. 

இந்தநிலையில் போராட்டம் நடத்துவதற்காக சென்ற சட்டமன்ற உறுப்பினர் ரமேஷை போலீசார் கைது செய்து அழைத்துச் சென்றனர்.  நடைபெற்ற மோதலில் ஆளுங்கட்சி எம்எல்ஏ ரமேஷ் கார் கண்ணாடி உடைக்கப்பட்டது. தொடர்ந்து அங்கு பதட்டம் நிலவுவதால் போலீசார் பாதுகாப்பை பலப்படுத்தி உள்ளனர்.

குஜராத்தின் தாகூத் பகுதியில் அண்மையில், இருசக்கர வாகனத்தில் சென்ற இளைஞர் ஒருவர் வேகமாக சென்ற பேருந்தை வளைவில் முந்த முயன்றதாக தெரிகிறது. இதில் எதிர்பாராத விதமாக அவர் பேருந்து சக்கரத்தில் விழவே, சுதாரித்துக்கொண்ட பேருந்து ஓட்டுனர், உடனடியாக வாகனத்தை நிறுத்தியுள்ளார். இதனால் அந்த இளைஞர் உயிருடன் பேருந்துக்கு அடியிலிருந்து எழுந்து வந்தது பலரையும் ஆச்சரியத்தில் ஆழ்த்தியுள்ளது.

இதேபோல் மழைநீர் தேங்கியிருந்த சேதமடைந்த தாகூத் சாலையில், மனைவி, குழந்தையுடன் இருசக்கர வாகனத்தில் சென்ற நபர் நிலைத்தடுமாறி கீழே விழுந்துள்ளார். இதில் எதிரே வந்த டிராக்டர் அவர் தலை மீது ஏறி இறங்கியுள்ளது.   அந்த நபர் தலைக்கவசம் அணிந்திருந்ததால், உயிரிழப்பு தவிர்க்கப்பட்டதாக அங்கிருந்தோர் தெரிவிக்கின்றனர்.

ஒடிசா மாநிலம் நபரங்குபூர்  மாவட்டம்  உமார்கோட் பகுதியில் உள்ள ஒரு கிராமத்தை சேர்ந்த சில சிறுவர்கள், அந்த பகுதியில் உள்ள வனத்தில் கால்பந்து விளையாடிவிட்டு, பந்தை அங்கேயே விட்டு சென்றதாக கூறப்படுகிறது.

பின்னர் அங்கு வந்த இரண்டு கரடிகள் கால்பந்தை ஒரு வினோதப்பொருளாக பார்ப்பது மட்டுமல்லாமல் அதை வாயால் எடுப்பதும், தட்டியும் உதைத்தும் விளையாடி மகிழ்ந்தன. இந்த காட்சிகளை துரமாக நின்று வேடிக்கை பார்த்த சிறுவர்கள் கைதட்டி ஆரவாரம் செய்தனர்.

பின்னர் அங்கிருந்த கரடிகள் பந்தை கவ்விக்கொண்டு வேகமாக காட்டிலுள் சென்றன.  இந்த காட்சியை அங்கிருந்த  சிலர் தங்களது ஸ்மார்ட் போன்களில் படம்பிடித்தனர்.  தற்போது இந்த காட்சிகள் சமூக வலைதளங்களில் பரவி வைரலாகி வருகிறது.