இந்திய கிரிக்கெட் வீரர் தோனி சமூக வலைதளப் பக்கமான இன்ஸ்டாவில் தனது முகப்பு படத்தில் தேசியக் கொடியை வைத்துள்ளார்.

75-வது சுதந்திர தினம்: நாட்டின் 75-வது சுதந்திர தினம் நாளை நாடு முழுவதும் கோலாகலமாக கொண்டாடப்படவுள்ளது. இதனையொட்டி நாடு முழுவதும் ஒவ்வொருவரும் தங்களது வீடுகளில் தேசியக் கொடியை பறக்க விட வேண்டும் என பிரதமர் மோடி கேட்டுக்கொண்டிருந்தார். இந்தாண்டு தொடக்கம் முதலே 75-வது சுதந்திர தினக் கொண்டாட்டம் ஆரம்பித்து நடைபெற்று வருகிறது. 

முகப்பு பக்க தேசியக்கொடி விவகாரம்: சுதந்திர தினத்தை முன்னிட்டு முதன் முதலாக காங்கிரஸ் முன்னாள் தலைவர் ராகுல்காந்தி தனது சமூக வலைதளப்பக்கத்தில் முகப்பு படத்தை மாற்றி தேசியக் கொடியை ஏந்திய நேருவின் புகைப்படத்தை வைத்தார். அதனை தொடர்ந்து பிரதமர் மோடி உட்பட பாஜக தலைவர்கள் பலரும் தங்களது சமூக வலைதளப் பக்கத்தில் இருந்த தங்களது புகைப்படங்களை மாற்றி தேசியக் கொடியை பதிவிட்டனர். 

சமூக வலைதளப் பக்கத்தில் தோனி: இந்திய நட்சத்திர கிரிக்கெட் வீரரான மகேந்திரசிங் தோனி, சமூக வலைதளங்களில் அவ்வளவு ஆக்டிவாக இருக்க மாட்டார். உதாரணத்திற்கு கடந்த 2020-ம் ஆண்டு ஆகஸ்ட் 15-ம் தேதி தனது இன்ஸ்டாவில் ஓய்வு குறித்த அறிவிப்புக்கு ரசிகர்களின் ஆதரவிற்கு நன்றி தெரிவிக்கும் வகையில் ஒரு வீடியோவை பதிவிட்டு இருந்தார். அதன் பிறகு 2021-ம் ஆண்டு ஜனவரியில் தனது ஸ்டாபெர்ரி தோட்டம் குறித்த வீடியோவை பதிவிட்டிருந்தார். 

முகப்பு பக்கத்தை மாற்றிய தோனி: இந்த நிலையில், தோனி தனது சமூக வலைதளப் பக்கமான இன்ஸ்டாவில் முகப்பு புகைப்படத்தை தேசியக் கொடியாக மாற்றியுள்ளார். இந்திய கிரிக்கெட் அணிக்காக பெரும் பங்காற்றியவர் தோனி. ஆகையால் அவருக்கு நாட்டின் பற்று நிச்சயம் இருக்கத் தான் செய்யும். ஆனாலும் கூட எங்கு அவரும், பாஜக பக்கம் சென்று விடுவாரோ என்ற சந்தேகம் மக்களிடத்தில் எழுந்துள்ளது. ஏற்கனவே இந்திய கிரிக்கெட் வீரர்களில் ஹர்பஜன் சிங் ஆம் ஆத்மி கட்சியிலும் மற்றும் கவுதம் கம்பீர் பாஜகவிலும் இருந்து வருவது குறிப்பிடத்தக்கது. 

காயம் காரணமாக உலக பேட்மிண்டன் சாம்பியன்ஷிப் போட்டியிலிருந்து விலகுவதாக பிவி.சிந்து அறிவித்துள்ளார்.  27-வது உலக பேட்மிண்டன் சாம்பியன்ஷிப் போட்டி, ஜப்பான் தலைநகர் டோக்கியோவில் வரும் 21-ம் தேதி தொடங்குகிறது. இந்த போட்டிக்கான அட்டவணையில், முன்னாள் உலக சாம்பியனான இந்தியாவின் பி.வி.சிந்து கடினமான பிரிவில் இடம் பெற்றிருந்தார்.  இந்நிலையில் இடது காலில் ஏற்பட்டுள்ள காயம் காரணமாக போட்டியிலிருந்து விலகுவதாக பி.வி.சிந்து தெரிவித்துள்ளார். இதுதொடர்பாக அவர் வெளியிட்டுள்ள அறிக்கையில் காமன்வெல்த் பேட்மிண்டன் காலிறுதிப்போட்டியின் போதே காலில் காயம் ஏற்பட்டதாகவும், பயிற்சியாளர் மற்றும் பிசியோவின் உதவியுடன் காமன்வெல்த் போட்டியில் விளையாடியதாகவும்  கூறியுள்ளார். ஐதராபாத் திரும்பியவுடன் ஸ்கேன் செய்ததில் இடது காலில் அழுத்த முறிவு ஏற்பட்டிருப்பதாகவும் சில வாரங்கள் ஓய்வு எடுக்கும்படியும் மருத்துவர்கள் அறிவுறுத்தியுள்ளதாகவும் பிவி சிந்து தெரிவித்துள்ளார்.

உலக ஜூனியர் தடகள சாம்பியன்ஷிப் போட்டியில் தமிழக வீரர்கள் 2 பேர் வெள்ளிப்பதக்கம் வென்றுள்ளனர்.

உலக ஜூனியர் தடகள சாம்பியன்ஷிப் போட்டி:

உலக ஜூனியர் தடகள சாம்பியன்ஷிப் போட்டி கொலம்பியாவில் நடைபெற்றது. இந்த போட்டியில்  20 வயதுக்குட்பட்டோருக்கான உலக ஜூனியர் தடகள சாம்பியன்ஷிப் போட்டியில் தமிழகத்தை சேர்ந்த இரண்டு பேர் வெள்ளிப் பதக்கம் வென்றனர். தடகள வீரர்கள் செல்வ பிரபு மற்றும் பரத் ஸ்ரீதர் இருவரும் சென்னை வந்தனர். அவர்களுக்கு சென்னை விமான நிலையத்தில்  உற்சாக வரவேற்பு அளிக்கப்பட்டது.

பரத் ஸ்ரீதர்:

தமிழகத்தில் விழுப்புரம் மாவட்டத்தை சேர்ந்த பரத் ஸ்ரீதர், உலக ஜூனியர் தடகள சாம்பியன்ஷிப் 4*400மீ தொடர் ஓட்டம் கலப்பு பிரிவில் கலந்து கொண்டு வெள்ளிப்பதக்கம் பெற்றுள்ளார். இது குறித்து செய்தியாளர்களிடம் அவர் கூறிய போது, இந்த தடவை போட்டி கடினமானதாக இருந்ததாகவும், நாங்கள் கொண்ட பயிற்சியின் காரணமாக இந்த பதக்கத்தை வென்றதாகவும் கூறினார்.

மேலும் தன்னை தயார் படுத்திய பயிற்சியாளருக்கும், குடும்பத்தாருக்கும், நண்பர்களுக்கும் நன்றியை தெரிவித்துக்கொண்டார். தொடர்ந்து பேசிய அவர், தற்போது ஜூனியர் பிரிவில் பதக்கங்களை வென்ற நான் அடுத்ததாக சீனியர் ஆட்டப்பிரிவில் பதக்கங்களை வெல்ல வேண்டும் என்பதே தன்னுடைய இலக்கு என்று கூறினார். 

செல்வ பிரபு:

இவரைத்தொடர்ந்து, உலக ஜுனியர் தடகள சாம்பியன்ஷிப் ஆண்களுக்கான டிரிபிள் ஜம் போட்டியில் மதுரை மாவட்டத்தை சேர்ந்த 17 வயதான செல்வ பிரபு, 16.15 மீட்டர் நீளம் தாண்டி வெள்ளிப்பதக்கத்தை பெற்றுள்ளார். இது குறித்து செய்தியாளர்களிடம் பேசிய செல்வ பிரபு, இந்த போட்டிக்காக தன்னை ஊக்குவித்த அரசுக்கும், தமிழ்நாடு தடகள அசோசியேசனுக்கும் நன்றி தெரிவிப்பதாகக் கூறினார்.

தமிழ்நாடு தடகள அசோசியேசன்:

உலக ஜுனியர் தடகள சாம்பியன்ஷிப் போட்டியில் வெள்ளிப்பதக்கம் வென்ற இருவருக்கும், அரசு வேலை வாய்ப்பை வழங்க வேண்டும் என்று தமிழ்நாடு தடகள அசோசியேசன் சார்பில் கோரிக்கை விடுக்கப்பட்டுள்ளது.

23 கிராண்ட்ஸ்லாம் பட்டங்களை வென்று உலகின் நட்சத்திர டென்னிஸ் வீராங்கனையாக இருந்து வரும் செரீனா வில்லியம்ஸ் தனது ஓய்வு முடிவை அறிவித்துள்ளார். 

வில்லியம்ஸ் சகோதரிகள்: சர்வதேச டென்னிஸ் போட்டிகளில் ஆதிக்கம் செலுத்தி வந்தவர் செரீனா வில்லியம்ஸ். 1999-ம் ஆண்டு அமெரிக்க ஓபன் கிராண்ட்ஸ்லாம் பட்டத்தை வென்றதன் மூலம் உலக மக்களை தன்பக்கம் திரும்பி பார்க்க வைத்தவர். இவர் மட்டுமில்லாது இவரது சகோதரியும் டென்னிஸ் வீராங்கனை ஆவார். இவர்கள் இருவரும் சேர்ந்து சர்வதேச அரங்கில் தங்களுக்கென ஒரு தனி இடத்தை பிடித்து வைத்துள்ளனர். 

39 கிராண்ட்ஸ்லாம் பட்டங்கள்: அமெரிக்காவை சேர்ந்த செரீனா வில்லியம்ஸ், ஒற்றையர் பிரிவில் 23 முறை கிராண்ட்ஸ்லாம் பட்டங்களையும், இரட்டையர் பிரிவில் 14 கிராண்ட்ஸ்லாம் பட்டங்களையும், கலப்பு இரட்டையர் பிரிவில் 2  கிராண்ட்ஸ்லாம் பட்டங்களையும் வென்றவர். 

319 வாரங்கள் முதல் இடம்: இதுதவிர மகளிர் WTA 73 ஒற்றையர் பட்டங்களையும், 23 இரட்டையர் பிரிவு பட்டங்களுடன் சேர்த்து 4 முறை ஒலிம்பிக் பதக்கத்தையும் வென்று அசத்தியவர். 40 வயதாகும் செரீனா தனது டென்னிஸ் வாழ்க்கையில் 319வாரங்கள் சர்வதேச வீராங்கனை பட்டியலில் முதல் இடத்தை பிடித்து சாதனை படைத்தவர். 

2017-க்கு பிறகு வெற்றி இல்லை: கடைசியாக இவர் 2017-ம் ஆண்டு ஆஸ்திரேலியன் ஓபன் தொடரில் சாம்பியன் பட்டத்தை வென்ற பிறகு, வேறு எந்த ஒரு கிராண்ட்ஸ்லாம் பட்டத்தையும் வெல்லவில்லை. கடந்த ஜூன் மாதம் நடைபெற்ற விம்பிள்டன் கிராண்ட்ஸ்லாம் தொடரில் கூட முதல் சுற்றுடன் வெளியேறி அதிர்ச்சியளித்தார். 

ஓய்வு அறிவிப்பு: எதிர்வரும் அமெரிக்க ஓபன் தொடரில் களமிறங்கவுள்ள செரீனா, அதன் பிறகு டென்னிஸ்ஸில் இருந்து ஓய்வு பெற இருப்பதாக அறிவித்திருப்பது அவரது ரசிகர்களிடையே அதிர்ச்சியையும், சோகத்தையும் ஏற்படுத்தியுள்ளது. 

குடும்பத்திற்காக நாட்களை செலவழிக்க திட்டம்: வாழ்க்கையில் அனைவருக்கும் எப்போதாவது வேறு திசையில் பயணிக்க வேண்டிய கட்டாயம் ஏற்படலாம் என்றும், அதுவும் நமக்கு பிடித்தமான ஒன்றை விட்டு விலக வேண்டியிருக்கும் எனவும் குறிப்பிட்ட செரீனா வில்லியம்ஸ், தற்போது டென்னிஸை விட்டு விலகிதான் ஆக வேண்டும் எனக் கூறியுள்ளார். இனி தனது குடும்பத்திற்காக நாட்களை செலவழிக்க விரும்புவதாக அவர் 
தெரிவித்துள்ளார். 

இளைஞர்களின் கிரிக்கெட் கனவை நினைவாக்கும் வகையில் தொடங்கப்படவுள்ள South India Schools Cricket Associations  அமைப்பின் தலைவராக ஜான் அமலன் தேர்வு செய்யப்பட்டுள்ளார்.

சௌத் இந்தியன் ஸ்கூல் கிரிக்கெட் அசோசியேசன் அமைப்பு:

இளைஞர்களின் கிரிக்கெட் கனவை நனவாக்கும் விதமாக சௌத் இந்தியன் ஸ்கூல் கிரிக்கெட் அசோசியேசன்
(South India Schools Cricket Associations) அமைப்பு தொடங்கப்பட உள்ளதாக அமைப்பின் நிர்வாகிகள்  ஜான் அமலன்,பிரதீப் குமார், ஏபிஜேஎம்ஜே ஷேக் சலீம், ஜோஷ்வா எடிசன், குடந்தை அஷ்ரப், விக்னேஷ் மாஜினி  ஆகியோர்  அறிவித்துள்ளனர்.

திறமை இருந்தும் சாதிக்க முடியாத நிலை:

இந்தியாவில் அதிக மக்களால் விளையாடப்படும் மற்றும் விரும்பப்படும் விளையாட்டு கிரிக்கெட் போட்டி. ஆனால், பலர் திறமை இருந்தும் கிரிக்கெட் விளையாட்டில் சாதிக்க முடியாமல் போகிறது. காரணம், இளம் வயதில் திறமையாக கிரிக்கெட் விளையாடும் பலருக்கு அடுத்த கட்டத்திற்கு செல்ல வழி தெரியாததும், சரியான வழிகாட்டி இல்லாததும் தான்.

தேசிய அளவில் எடுத்து செல்லும் அமைப்பு:

அந்த வகையில் கிரிக்கெட்டில் திறமை மிக்க இளைஞர்களை அடுத்த கட்டத்திற்கு அழைத்து செல்வதோடு  திறமையாளர்களை தேசிய அளவிலான போட்டிகளில்  பங்கேற்க வைப்பதற்கான தளமாக South India Schools Cricket Associations தற்போது உருவாக்கப்பட்டுள்ளது.

தலைவர்கள் தேர்வு:

அதன்படி, பள்ளி காலத்திலேயே இளைஞர்களை ஊக்குவித்து கிரிக்கெட் உலகில் ஜொலிக்க வைக்கும் நோக்கத்தோடு உருவாக்கப்பட்டுள்ள இந்த அமைப்பின் நிறுவனர் மற்றும் தலைவராக ஜான் அமலன்  தேர்வு செய்யப்பட்டுள்ளார். பொதுச்செயலாளராக பிரதீப்குமார் தேர்வு செய்யப்பட்டுள்ளார். செயலாளராக ஜோஸ்வா எடிசன், பொருளாளராக குடந்தை அஷ்ரப் தேர்வு செய்யப்பட்டுள்ளனர்.   

மேலும், South India Schools Cricket Associations கௌரவத் தலைவராக சினேகா நாயரும், தமிழ்நாடு ஸ்கூல் கிரிக்கெட் பெடரேஷன் கௌரவத் தலைவராக அப்துல்கலாம் அவர்களின் பேரனுமான ஏ.பி.ஜே.எம்.ஜே.ஷேக் சலீம் தேர்வு செய்யப்பட்டுள்ளனர். தற்போது தேர்வு செய்யப்பட்டுள்ள நிர்வாகிகள் அனைவரும் வரும் ஆகஸ்ட் 16ஆம் தேதி நடைபெற உள்ள பிரம்மாண்ட நிகழ்ச்சியில் பதவி ஏற்க உள்ளனர்.