உலகின் நம்பர் ஒன் கிரிக்கெட் லீக்கான ஐ.பி.எல். தொடர் இறுதி கட்டத்தை நெருங்கி வருகிறது. இதுவரை 63 போட்டிகள் முடிந்துள்ள நிலையில், கடைசி 2 இடங்களில் உள்ள முன்னாள் சாம்பியன்களான சென்னை மற்றும் மும்பை அணிகள் பிளே ஆஃப் வாய்ப்பை இழந்துவிட்டன.

குஜராத் அணி பிளே ஆஃப் சுற்றுக்கு தகுதி பெற்றுவிட்ட நிலையில், மற்று 3 இடங்களுக்கு 7 அணிகள் இடையே கடும் போட்டி நிலவி வருகிறது. இந்த நிலையில், இன்றைய ஆட்டத்தில் டெல்லி மற்றும் பஞ்சாப் அணிகள் மோதுகின்றன.  அணிகளும் தலா 12 ஆட்டங்களில் ஆடி, 6 வெற்றி, 6 தோல்வியுடன் 12 புள்ளிகள் பெற்றுள்ள நிலையில், ரன்ரேட் அடிப்படையில் டெல்லி 5வது இடத்திலும், பஞ்சாப் 7வது இடத்தில் உள்ளன.

பிளே ஆஃப் வாய்ப்பில் தொடர, இந்த ஆட்டம் இரு அணிகளுக்கும் மிகவும் முக்கியமானதாகும். இதில் வெற்றி பெற்றால் தான் அடுத்த சுற்று வாய்ப்பில் நீடிக்க முடியும். தோல்வி அடைந்தால் அடுத்த சுற்று வாய்ப்பு மங்கி விடும். எனவே இரு அணிகளும் வெற்றிக்காக கடுமையாக மல்லுக்கட்டும் என்பதால், இந்த ஆட்டத்தில் விறுவிறுப்புக்கு பஞ்சம் இருக்காது.

73 ஆண்டுகளாக நடைபெறும் தாமஸ் கோப்பை பேட்மிண்டன் போட்டியில் முதன்முறையாக இறுதி சுற்றுக்குள் நுழைந்துள்ள இந்திய ஆடவர் அணி, இந்தோனேஷியாவை இன்று எதிர்கொள்கிறது.

தாமஸ் கோப்பைக்கான பேட்மிண்டன் போட்டி, தாய்லாந்தின் தலைநகர் பாங்காக்கில் நடைபெற்று வருகிறது. இதில் அரையிறுதி போட்டியில் முன்னாள் சாம்பியனான டென்மார்க்கை எதிர்கொண்ட இந்திய அணி, போராடி 3-க்கு 2 என்ற கோல் கணக்கில் வெற்றிப்பெற்றது. 

1949-ம் ஆண்டிலிருந்து நடைபெற்று வரும் இப்போட்டியில் இறுதி போட்டிக்குள் இந்தியா நுழைந்திருப்பது இதுவே முதல் முறையாகும். இந்தநிலையில் இன்று நடைபெறும் இறுதிப்போட்டியில் நடப்பு சாம்பியனான இந்தோனேஷியாவுடன் இந்தியா ஆடவர் அணியினர் மோதவுள்ளனர்.

நடப்பு ஐபிஎல் தொடருடன், ஐபிஎல் போட்டிகளில் இருந்து ஓய்வு பெறுவதாக அறிவித்த சென்னை அணி வீரர் அம்பத்தி ராயுடு, சற்று நேரத்தில் தன்னுடைய ட்வீட்டை நீக்கியுள்ளார்.

ஐ.பி.எல். தொடரில் சென்னை அணிக்காக விளையாடி வரும் அம்பத்தி ராயுடு, ஐ.பி.எல். போட்டிகளில் இருந்து ஓய்வு பெறுவதாக தனது ட்விட்டரில் பதிவிட்டிருந்தார். அதில், சென்னை மற்றும் மும்பை ஆகிய ஐ.பி.எல்லின் தலைசிறந்த 2 அணிகளுக்காக, 13 ஆண்டுகாலம் விளையாடியது மகிழ்ச்சி அளிப்பதாகக் குறிப்பிட்டுள்ள ராயுடு, இதுவே தன்னுடைய கடைசி ஐ.பி.எல். தொடராக இருக்கும் எனப் பதிவிட்டிருந்தார்.

ஆனால், அடுத்த சிறிது நிமிடங்களிலேயே தன்னுடைய ட்விட்டர் பதிவை ராயுடு நீக்கியுள்ளது கிரிக்கெட் ரசிகர்களிடையே குழப்பத்தை ஏற்படுத்தியுள்ளது.

ஐபிஎல் 15வது சீசனின் 60 ஆவது லீக் போட்டியில், பெங்களூரு  - பஞ்சாப்  அணிகள் மோதின. முதலாவதாக டாஸ் வென்ற பெங்களூரு அணி, பந்துவீச்சை தேர்ந்தெடுத்தது. தொடக்கத்திலேயே பஞ்சாப் அணி வீரர்கள் ஷிகர் தவான், ஜானி பேர்ஸ்டோ அதிரடியாக விளையாடினர்.

2 வது ஓவரிலேயே ஜானி பேர்ஸ்டோ 2 சிக்ஸர், 2 பவுண்டரி பறக்க விட, மறுபுறம் நிதனமாக விளையாடிய தவான் 21 ரன்களில் ஆட்டமிழந்தார். பின்னர் அடுத்தடுத்து களம் கண்டவர்களும் விரைவில் ஆட்டம் இழக்க, பேர்ஸ்டோ நிதானமாக ஆடி அணிக்கு வலு சேர்த்தார்.

தொடர்ந்து வந்த லியாம் லிவிங்ஸ்டனும் அதிரடி காட்டினார். அதன்மூலம் 20 ஓவர்கள் முடிவில் 209 ரன்கள் எடுத்தது பஞ்சாப் அணி. 

வெற்றிக்கு 210 ரன்கள் தேவை என்ற இலக்குடன் களம் கண்ட பெங்களூரு அணியில், தொடக்கத்திலேயே கோலியும் கேப்டன் டூ பிளெசிஸும் அடுத்தட்ய்த்துஅவுட் ஆகி ஏமாற்றத்தையே கொடுத்தனர்.

அதன்பின் வந்த ரஜத் படிதார், கிளென் மேக்ஸ்வெல் இருவரும் பார்ட்னர்ஷிப்பில் அணிக்கு ரன்களை சேர்த்துக் கொடுத்தனர். ஆனாலும், படிதார் 26  ரன்களிலும் மேக்ஸ்வெல் 35 ரன்களிலும் ஆட்டமிழந்தனர். அதன்பின் அடுத்தடுத்து களம் கண்ட வீரர்களின் ரன் குவிப்பிலும் தொடர் சரிவு ஏற்பட்ட நிலையில், பெங்களூரு அணி 20 ஓவர்கள் முடிவில் 9 விக்கெட் இழப்பிற்கு 155 ரன்கள் எடுத்து தோல்வி அடைந்தது.

ராபாடாவின் பந்துவீச்சு பெங்களூரு அணியை திணறச் செய்தது. இதன்மூலம் பெங்களூரு அணியை 54 ரன்கள் வித்தியாசத்தில் வீழ்த்தி பஞ்சாப் அணி பிளே ஆஃப் வாய்ப்பை தக்க வைத்துள்ளது.

மும்பை வான்கடே மைதானத்தில் நடைபெற்ற இப்போட்டியில், டாஸ் வென்ற மும்பை அணி பந்துவீச்சை தேர்வு செய்தது. அதன்படி முதலில் பேட்டிங் செய்த சென்னை அணி, மும்பை அணி வீரர்களின் அபார பந்துவீச்சால் சரசரவென விக்கெட்டுகளை இழந்து நிலைகுலைந்தது. முடிவில், 16 ஓவரில் 97 ரன் மட்டுமே எடுத்து சென்னை அணி சுருண்டது. கேப்டன் தோனி மட்டும் பொறுப்புடன் விளையாடி, கடைசி வரை ஆட்டமிழக்காமல் 36 ரன் எடுத்தார்.

98 ரன் எடுத்தால் வெற்றி என்ற எளிய இலக்குடன் களமிறங்கிய மும்பை அணி, 14 புள்ளி 5 ஓவரில் 5 விக்கெட்டுகளை மட்டுமே இழந்து 103 ரன் எடுத்து வெற்றி பெற்றது.  அதிகபட்சமாக திலக்வர்மா, ஆட்டமிழக்காமல் 34 ரன் விளாசினார்.

இதன்மூலம் 5 விக்கெட் வித்தியாசத்தில் சென்னை அணியை வீழ்த்திய மும்பை அணி, தொடரில் 3வது வெற்றியை பதிவு செய்து ஆறுதல் அடைந்தது. அதேநேரம், இப்போட்டியில் தோல்வியடைந்ததால், ப்ளே ஆஃப் சுற்றுக்கு முன்னேறும் வாய்ப்பை சென்னை அணி தவறவிட்டுள்ளது. இதனால், ரசிகர்கள் மிகுந்த ஏமாற்றம்  அடைந்துள்ளனர்.