அயர்லாந்து அணிக்கு எதிராக இன்று இரவு நடைபெறும் முதல் 20 ஓவர் போட்டியில் வெற்றி முனைப்புடன் இந்திய அணி விளையாட உள்ளது.

அயர்லாந்து சென்றுள்ள ஹர்திக் பாண்ட்யா தலைமையிலான இந்திய அணி, அந்நாட்டு அணியுடன் இரண்டு 20 ஓவர் போட்டிகளில் விளையாட உள்ளது. இரு அணிகளுக்கு இடையேயான முதல் இருபது ஓவர் போட்டி டப்ளின் நகரில் இந்திய நேரப்படி இன்று இரவு 9 மணிக்கு தொடங்குகிறது. 

பால்பரீன் தலைமையிலான அயர்லாந்து அணியும் இந்தியாவுக்கு சவால் கொடுத்து விளையாடும் என கருதப்படுகிறது. இதுகுறித்து செய்தியாளர்களிடம் பேசிய இந்திய கேப்டன் ஹர்திக் பாண்ட்யா, இந்தியாவை வழிநடத்த தனக்கு ஒரு வாய்ப்பு கிடைத்துள்ளதாகவும், எந்த நேரத்தில், அணிக்கு என்ன முடிவு தேவை என்பதில் அதிக கவனம் செலுத்தி வருவதாகவும் குறிப்பிட்டார்.

இந்தியாவில் மகளிருக்கான டி20 கிரிக்கெட் போட்டிகளில் அதிக ரன்களை எடுத்த முன்னாள் வீராங்கணை மிதாலி ராஜை பின்னுக்குத் தள்ளி கேப்டன் ஹர்மன்ப்ரீத் கவுர் முதலிடத்தைப் பிடித்துள்ளார்.

இலங்கைக்கு எதிரான 2வது டி20 போட்டி தம்புல்லா சர்வதேச மைதானத்தில் நடைபெற்றது. இப்போட்டியில் இந்திய அணியின் கேப்டன் ஹர்மன்பரீத் கவுர் 31 ரன்களில் ஆட்டமிழந்த போதும் 31 ரன்கள் வித்தியாசத்தில் இந்தியா வென்றது. இந்த ஆட்டத்தின் மூலம் 123 போட்டிகளில் 2 ஆயிரத்து 372 என்ற அதிக ரன்களை எடுத்த சாதனையை ஹர்மன்ப்ரீத் கவுர் படைத்துள்ளார்.

இதற்கு முன்னதாக முன்னாள் வீரர் மிதாலிராஜ் 2 ஆயிரத்து 364 ரன்கள் எடுத்து முன்னிலையில் இருந்தது குறிப்பிடத்தக்கது. சர்வதேச கிரிக்கெட் போட்டிகளில் இருந்து அவர் வெளியேறிய 6ம் நாள் ஹர்மன்ப்ரீத் கவுர் அவரின் சாதனையை முறியடித்துள்ளார்.

ஜூலை 28-ம் தேதி முதல் ஆகஸ்ட் 10-ம் தேதி வரை 44-வது செஸ் ஒலிம்பியாட் போட்டி மாமல்லபுரத்தில் நடைபெறுகிறது. இதனை முன்னிட்டு ஒலிம்பிக் பாரம்பரியம் போன்று தொடர் ஜோதி ஓட்டத்தை டெல்லியில் கடந்த 19-ம் தேதி பிரதமர் மோடி தொடங்கி வைத்தார்.

இந்த தொடர் ஜோதி ஓட்டமானது இந்தியாவில் உள்ள 75 நகரங்களில் வலம் வருகிறது. அதன்படி, செஸ் ஒலிம்பியாட் ஜோதி தற்போது உத்தரபிரதேசம் மாநிலம் மீராட் பகுதியை வந்தடைந்துள்ளது. 

இந்த ஜோதியை செஸ் கிராண்ட்மாஸ்டர் தேஜஸ் பக்ரேவிடமிருந்து அம்மாநில அமைச்சர் சோமேந்திர தோமர் பெற்றுக்கொண்டார். இந்த ஒலிம்பியாட் ஜோதி  ஜூலை 27-ம்  தேதி மாமல்லபுரத்தை வந்தடையும் என தகவல் வெளியாகியுள்ளது.

இந்தியா - இங்கிலாந்து அணிகளுக்கு இடையேயான டெஸ்ட் போட்டிகள் வரும் ஜூலை 1 ஆம் தேதி தொடங்கவுள்ளன. அதற்கான பயிற்சி ஆட்டத்திற்காக ரோகித் ஷர்மா தலைமையிலான அணி இங்கிலாந்து சென்றுள்ளது.

இந்த நிலையில், ஹர்திக் பாண்ட்யா தலைமையிலான இரண்டாம் தர அணி, அயர்லாந்தில் சுற்றுப்பயணம் மேற்கொண்டுள்ளது. அதன் முதல் 20 ஓவர் கிரிக்கெட் போட்டி டப்ளனில் இன்று நடைபெறுகிறது.  இந்தப் போட்டிக்கு முன்னாள் கிரிக்கெட் வீரர் விவிஎஸ் லட்சுமண் பயிற்சியாளராக சென்றுள்ளார்.

அண்மையில் ஐபிஎல் கோப்பையை வென்ற குஜராத் அணிக்கு தலைமை தாங்கிய ஹர்திக் பாண்ட்யா தலைமையில் இளம் வீரர்கள் களம் இறங்கியுள்ளதால் இந்திய அணியின் வெற்றி குறித்து ரசிகர்கள் அதிக எதிர்பார்ப்பில் உள்ளனர்.

மழை காரணமாக கடந்த ஆண்டு தள்ளி வைக்கப்பட்ட இந்தியா-இங்கிலாந்து அணிகள் இடையிலான 5-வது மற்றும் கடைசி டெஸ்ட் போட்டி, பர்மிங்காமில் வரும் 1-ந் தேதி தொடங்குகிறது. இந்த போட்டியில் பங்கேற்க இங்கிலாந்து சென்றுள்ள ரோகித் சர்மா தலைமையிலான இந்திய அணி, தற்போது அங்கு பயிற்சி ஆட்டத்தில் விளையாடி வருகிறது.

இந்நிலையில் கேப்டன் ரோகித் சர்மாவுக்கு கொரோனா பாதிப்பு உறுதி செய்யப்பட்டுள்ளதாக பி.சி.சி.ஐ தெரிவித்துள்ளது. ரோகித் சர்மாவுக்கு நடத்தப்பட்ட ரேபிட் ஆன்டிஜென் சோதனையில் அவருக்கு கொரோனா பாதிப்பு உறுதி செய்யப்பட்டுள்ளதாகவும், தற்போது அவர் அணி விடுதியில் தனிமைப்படுத்தப்பட்டு மருத்துவக் குழுவின் பராமரிப்பில் உள்ளார் என்றும் பிசிசிஐ தனது ட்விட்டர் பக்கத்தில் தெரிவித்துள்ளது.