திருப்பூர் மாவட்டம் பல்லடம் பொள்ளாச்சி சாலை வெங்கிட்டாபுரம் பகுதியைச் சேர்ந்தவர் கண்ணன் 40. இவருக்கு கடந்த சில நாட்களுக்கு முன்பு வந்த தொலைபேசி அழைப்பு ஒன்றில் பேசிய வித்யா என்ற பெண் உங்களது செல்போன் எண்ணுக்கு புதிய ஆஃபர் ஒன்று அறிமுகம் செய்வதாகவும் அதன்படி விலை உயர்ந்த ஓப்போ ஏ 12 என்ற செல்போன் ஆப்பர் விலையில் ரூ.2500ஐ அருகில் உள்ள தபால் நிலையத்தில் செலுத்தினால் பெற்றுக் கொள்ளலாம் என கூறியதாக சொல்லப்படுகிறது.

இதனை அடுத்து சுமார் 25000 மதிப்புள்ள அந்த மாடல் செல்போன் தனது மகளின் இணையதள கல்விக்கு பயன்படும் என்று நினைத்த ஹோட்டல் உரிமையாளர் கண்ணன் தனக்கு செல்போன் அனுப்பி வைக்கும்படி கூறியுள்ளார். இதனை அடுத்து நேற்று பல்லடம் தபால் நிலையத்திலிருந்து அழைத்த ஊழியர் ஒருவர் உங்களுக்கு பார்சல் வந்திருக்கிறது என்று கூறியதையடுத்து அங்கு சென்ற கண்ணன் ரூ.2500 பணத்தை கொடுத்து அவரது மனைவி பெயருக்கு வந்திருந்த பார்சலை பிரித்துப் பார்த்து அதிர்ச்சியில் உறைந்துபோனார்.

அந்த பார்சலில் விலை உயர்ந்த செல்போனுக்கு பதிலாக தலை முடியின் ஈரப்பதத்தை காய வைக்கும் டிரையர் மெஷின் அதனுடன் பவர் பேங்க் என்ற பெயரில் அனுப்பி வைக்கப்பட்டு இருந்த ஒரு டப்பாவில் இருந்து எறும்பு கொல்லி மருந்து துகள்கள் விழுந்த வண்ணம் இருந்துள்ளது.  இதனால் கண்ணன் மற்றும் அவரது குடும்பத்தினர் நொந்து போயினர். 

இதனையடுத்து ரூ. 2500 பணத்தை பெற்றுக் கொண்டு விலையை உயர்ந்த செல்போனுக்கு பதிலாக ஹேர் டிரையர் மற்றும் எலும்புக் கொல்லி மருந்துடன் கூடிய பவர் பேங்க் பெட்டி ஆகியவற்றுடன் தங்களை மோசடி செய்த ஆன்லைன் கும்பல் மீது பல்லடம் போலீசில் ஹோட்டல் அதிபர் கண்ணன் புகார் அளித்துள்ளார்.

இது குறித்த அவர் கூறிய அவர், என்னை செல்போனில் அழைத்த பெண் ஒருவர் தொடர்ந்து விலை உயர்ந்த செல்போன் ஆஃபரில் கிடைக்கும் என பலமுறை கூறி நம்ப வைத்து பணத்தையும் பெற்றுக் கொண்டு செல்போனுக்கு பதிலாக ஹேர் டிரையர் மற்றும் எறும்பு கொல்லி மருந்துடன் கூடிய பவர் பேங்க் ஆகியவற்றை அனுப்பி வைத்து நம்பிக்கை மோசடி செய்துள்ளனர். 

தான் ஏமாற்றப்பட்டதை போல பொதுமக்கள் யாரும் இதுபோன்று அழைப்புகளை நம்பி ஏமாற வேண்டாம் என்று கேட்டுக் கொண்ட அவர் மேலும் கூறுகையில் இதுகுறித்து பல்லடம் போலீசார் விசாரித்து உரிய நடவடிக்கை எடுத்து ஆன்லைன் மோசடி கும்பலை கைது செய்ய வேண்டும் என அவர் கேட்டுக் கொண்டார்.பல்லடத்தில் ஆன்லைன் மூலம் ஆஃபரில் குறைந்த விலையில் விலை உயர்ந்த செல்போன் மற்றும் பவர் பேங்க் தருவதாக கூறி மோசடியில் ஈடுபட்டதாக ஆன்லைன் கும்பல் மீது எழுந்துள்ள புகார் இப்பகுதியில் பரபரப்பை ஏற்படுத்தி உள்ளது.

தூத்துக்குடி மாவட்டம் கோவில்பட்டி அருகே கடம்பூரை சேர்ந்த நாரயணன் என்பவரது மகள் பிரவீணா. இவருக்கு திருமணமாகி கணவருடன் பிரிந்து வாழ்கிறார். சூர்யா என்ற தனது மகனுடன் பிரவீணா தந்தை வீட்டில் வசித்து வருகிறார். பழைய கார் வாங்கி, விற்பனை செய்யும் தொழில் செய்து வந்ததாக கூறப்படுகிறது.

கடந்த ஆண்டு 9 மாதம் பிரவீணா 14 பேரிடம் கடன் வாங்கி இருந்ததாகவும், 6 லட்ச ரூபாய் கடன்வாங்கி 3 கோடி ரூபாய் வட்டி செலுத்தியுள்ளதாகவும், அசலுக்கு மேல் 3 மடங்கு செலுத்திய பின்னரும் தன்னிடம் வட்டிக்கு கொடுத்தவர்கள் தன்னை துன்புறுத்தி வருவதாக கடம்பூர் காவல் நிலையத்தில் புகார் அளித்து இருந்தார். அதன் அடிப்படையில் 14 பேர் மீது போலீசார் வழக்கு பதிவு செய்தனர். சிலரை கைதும் செய்தனர். மேலும் பிரவீணாவிற்கு போலீஸ் பாதுகாப்பும் போடப்பட்டு இருந்தது.

இதற்கிடையில் பிரவீணா கொடுத்த புகாரில் வழக்கு பதிவு செய்யப்பட்டவர்களில் ஒருவரான டி.கல்லுப்பட்டியை சேர்ந்த ராம்குமார் என்பவர் பிரவீணா, சரண்யா, சரண்யா கணவர் ஆண்டனி உள்ளிட்ட 8 பேர் தன்னிடம் ஆன்லைன் டிரேடிங் என்று சொல்லி பணத்தினை ஏமாற்றி விட்டமாக டி.கல்லுப்பட்டி காவல் நிலையத்தில் கடந்த ஆண்டு டிசம்பர் மாதம் புகார் கொடுத்தார்.

இது தொடர்பாக போலீசார் விசாரணை நடத்தி வந்த நிலையில் நேற்று பிரவீணா மற்றும் சரண்யாவை டி.கல்லுப்பட்டி போலீசார் கைது செய்தனர். இந்நிலையில் பிரவீணா வழக்கு தொடர்பாக அவரது வழக்கறிஞர் அய்யலுச்சாமி டி.கல்லுப்பட்டி காவல் நிலையத்திற்கு சென்ற போது காவலர் நாரயணசாமி  மற்றும் ராம்குமார் இருவரும் சிலருடன் சேர்ந்தது தாக்கியதாக கூறப்படுகிறது.

இந்நிலையில் பிரவீணா கொடுத்த கந்து வட்டியில் வழக்கு பதிவு செய்யப்பட்டுள்ள சிவசக்தியின் கணவர் விருதுநகரில் காவலராக பணியாற்றும் நாரயணசாமி மற்றும் ராம்குமார் மீது நடவடிக்கை எடுக்க வேண்டும், பிரவீணா மீது பொய் வழக்கு போடப்படடுள்ளதாகவும்,  அதனை கண்டித்து வழக்கறிஞர் அய்யலுச்சாமி, பிரவீணாவின் தாயார் மகேஸ்வரி, சகோதரர் வினோபாலா, சரண்யாவின் கணவர் ஆண்டனி, அவரது மகன் சர்ச்சில் ஆகியோர் கோவில்பட்டி அனைத்து மகளிர் காவல் நிலைய முன்பு திடீரென டீசல் ஊற்றி தற்கொலைக்கு முயன்றனர். போலீசார் அவர்களை தடுத்து அறிவுரைவழங்கி எச்சரித்து அனுப்பிவைத்தனர். இதனால் அப்பகுதியில் சிறிது நேரம் பரபரப்பு ஏற்பட்டது.

சென்னை நுங்கம்பாக்கத்தில் உள்ள தனியார் ஹோட்டலில் தேசிய ஜனநாயக கூட்டணி சார்பாக குடியரசுத்தலைவர் வேட்பாளராக நிறுத்தப்பட்டுள்ள திரெளபதி முர்முவுக்கு ஆதரவு திரட்டும் நிகழ்ச்சி நடைபெற்றது. கடந்த மாதம் 25 ஆம் தேதி வேட்புமனு தாக்கல் செய்தார் திரௌபதி முர்மு. அப்போது ஓ.பி.எஸ். கலந்து கொண்ட நிலையில், ஈபிஎஸ் பங்கேற்கவில். எனவே இன்று நடைபெறும் நிகழ்ச்சியில் கலந்து கொள்வாரா என்ற எதிர்பாப்பு எழுந்த நிலையில் ஈ.பி.எஸ். கலந்து கொண்டார். 

திரௌபதி முர்மு வரும் வரையில், நட்சத்திர விடுதியில் ஓபிஎஸ், இபிஎஸ் ஆகிய இருவரும் தனித்தனி அறையில் காத்திருந்தனர். இபிஎஸ் உடன் ஏராளமானோர் சென்ற நிலையில், ஓபிஎஸ் உடன் வைத்திலிங்கம், மனோஜ் பாண்டியன் உள்ளிட்ட அவரது ஆதரவாளர்கள் சிலர் உடன் சென்றிருந்தனர். ஒற்றை தலைமை விவகாரத்தில் ஓபிஎஸ்- இபிஎஸ் தனித்தனியாக பிரிந்துள்ள நிலையில், ஜனாதிபதி வேட்பாளர் திரௌபதி முர்முவை தனித்தனியாக சந்தித்து ஆதரவு தெரிவித்தனர்.

பாஜக மாநிலத் தலைவர் அண்ணாமலை மற்றும் மத்திய அமைச்சர் எல்.முருகனுடன் மேடை ஏறிய எடப்பாடி பழனிசாமி, திரெளபதி முர்முக்கு பொன்னாடை போர்த்தி தமது ஆதரவு தெரிவித்ததுடன், அவரை வாழ்த்தியும் பேசிவிட்டு தமது ஆதரவாளர்களுடன் மேடையில் இருந்து இறங்கி சென்றார். 

இந்த நிகழ்ச்சியில் கலந்து கொண்ட முன்னாள் அமைச்சர் ஜெயக்குமார், நிகழ்ச்சிக்குப் பிறகு செய்தியாளர்களை சந்தித்த அவர்,

தேசிய ஜனநாயக கூட்டணி சார்பில் குடியரசு தலைவர் தேர்தல் வேட்பாளர் திரௌபதி முர்முவிற்கு ஆதரவு தெரிவிக்கும் வகையில் தலைமை நிலைய செயலாளர் எடப்பாடி பழனிசாமி  ஆதரவு தெரிவித்தார், பழங்குடியினர் குடியரசு தலைவராக வருவது பெருமைக்குரியது.

அதிமுகவில் பொதுக்குழுவே இறுதி அதிகாரம் படைத்தது, பொதுக்குழுவில் கலந்துக்கொண்டு அந்த முடிவிற்கு  ஓ.பி.எஸ் கட்டுப்பட்டு இருக்க வேண்டும் என்றும் ஒற்றை தலைமையே அதிமுக தொண்டனின் விருப்பம் எனவும் கூறிய அவர் அதிமுகவினர் இதுபோன்று தனி தனியாக சந்திப்பதற்கு காரணமே ஓ.பி.எஸ் தான் என்று குற்றம் சாட்டினார்.

பேச்சு வார்த்தை பல முறை மேற்கொண்டபோதும் அவர் எதற்கு ஒற்றுகொள்ளவில்லை, உட்கட்சி விவகாரத்தை  நீதிமன்றத்திற்கு கொண்டு செல்லலாமா? என கேள்வி எழுப்பிய அவர் அப்போதெல்லாம் ஒற்றுகொள்ளாமல் தற்போது பேச்சு வார்த்தைக்கு தயார் என கூறுவது தொண்டர்களை ஏமாற்றும் செயல் என தெரிவித்தார்.

பொதுக்குழுவிற்கு ஓ.பி.எஸ். அழைப்பது குறித்து பொதுக்குழு உறுப்பினர்கள் முடிவெடுப்பார்கள் எனவும் செந்தில் பாலாஜி என்ன பிரம்மாண்டத்தை ஏற்படுத்தப் போகிறார் என தெரியவில்லை என கூறிய அவர் ஆட்சியை கவிழ்க்க செந்தில் பாலாஜி, சேகர்பாபு போதும் என விமர்சனம் செய்தார்.

நிகழ்ச்சிக்கு பின்பு செய்தியாளர்களை சந்தித்த முன்னாள் முதலமைச்சர் ஓ.பன்னீர்செல்வம், "தேசிய ஜனநாயக கூட்டணியின் குடியரசுத் தலைவர் வேட்பாளராக நிறுத்தப்பட்ட திரெளபதி முர்முவுக்கு அதிமுக சார்பாக எங்களின் இதயம் கனிந்த முழு ஆதரவை தருகிறோம். அதிமுக சட்டவிதிப்படி தற்போது வரை நான்தான் கழகத்தின் ஒருங்கிணைப்பாளர்" என்று கூறினார்.

தர்மபுரி வட்டார போக்குவரத்து அலுவலக மைதானத்தில் பள்ளி கல்லூரி வாகனங்கள் சோதனை நடைபெற்றது. சோதனையை பார்வையிட்ட தர்மபுரி மாவட்ட ஆட்சியர் சாந்தி பள்ளி வாகனங்களில் நேரடியாக பார்வையிட்டு ஆய்வு செய்தார்.

அப்போது வாகன ஓட்டுநர் ஒருவரிடம் 100 120 கிலோமீட்டர் வேகத்தில் வண்டியை ஓட்டுவீங்களா என கேள்வி எழுப்பினார். அதற்கு ஓட்டுநர் குறைந்த வேகத்தில் தான் ஓட்டுவோம் என்றார். மாவட்ட ஆட்சியர் வயதானவர்கள் குறைந்த வேகத்தில் வாகனத்தை ஓட்டுவார்கள். 

இளைஞர்கள் வேகமாக வாகனத்தை ஓட்டக்கூடாது என்றும் அதி வேகமாக ஓட்டினால் மாவட்ட நிர்வாகத்திற்கும் தொடர்புடைய பள்ளிக்கும் புகார் தெரிவிக்கும் வகையில் புகார் எண் உள்ளதா என்பதை நேரடியாக சென்று பார்வையிட்டு ஆய்வு செய்தார்.

சில வாகனங்களில் விபத்து காலத்தில் பயன்படுத்தப்படும் சிறப்பு வழி கதவுகள் திறக்கின்றனவா என்பதனை சோதனை செய்தார். தர்மபுரி வட்டார போக்குவரத்து அலுவலக உட்பட்ட 79 பள்ளிகளில் இருந்து 432 வாகனங்களை இன்று வட்டார போக்குவரத்து அலுவலர்கள் சோதனை செய்தனர்.

தமிழ்நாட்டில் ஆசிரியர் தகுதித் தேர்வு எழுதவிருக்கும் விண்ணப்பதாரர்கள் தங்கள் விண்ணப்பங்களில், திருத்தங்களை மேற்கொள்வதற்கு கால அவகாசம் வழங்கப்படுவதாக ஆசிரியர் தேர்வு வாரியம் தெரிவித்துள்ளது.

இதுகுறித்து TRB வெளியிட்ட செய்திக் குறிப்பில், தமிழ்நாடு ஆசிரியர் தகுதித் தேர்வு தாள் I மற்றும் தாள் II  2022ஆம் ஆண்டிற்கான அறிவிக்கை ஆசிரியர் தேர்வு வாரிய இணைய தளம் வாயிலாக   07.03.2022 அன்று வெளியிடப்பட்டது. 

விண்ணப்பதாரர்கள் இணையதளம் வாயிலாக விண்ணப்பிக்க கால அவகாசம் 26.04.2022 வரை வழங்கப்பட்டது. மேலும் ஆசிரியர் தகுதித் தேர்வு தாள் 1-க்கு 2,30,878 பேரும், தாள் IIக்கு 4,01,886 என மொத்தமாக 6,32,764 பேர் விண்ணப்பித்துள்ளனர். மேலும், விண்ணப்பதாரர்கள் தங்களது விண்ணப்பத்தில் திருத்தம் மேற்கொள்ள பல கோரிக்கை மனுக்கள் இவ்வலுவலகத்திற்கு பெறப்பட்டு வருகிறது. 

ஆகையால் விண்ணப்பதாரர்களின் கோரிக்கையினை ஏற்று ஆசிரியர் தகுதித் தேர்வு தாள் I/IIக்கு விண்ணப்பித்தவர்கள் தங்களின் விண்ணப்பத்தில் திருத்தம் மேற்கொள்ள விரும்பினால் 11.  07.2022 - 16.  07.2022 வரை திருத்தம் செய்ய ஆசிரியர் தேர்வு வாரிய இணையதளத்தில் வழிவகை செய்யப்பட்டுள்ளது.

இனிவரும்  காலங்களில் திருத்தம் தொடர்பாக எவ்வித கோரிக்கைகளும் பரிசீலனை செய்யப்படமாட்டாது என்று தெரிவிக்கப்பட்டுள்ளது. அவ்வப்போதைய நிலவரங்களைத் தெரிந்து கொள்வதற்கு, மாணவர்கள் http://trb.tn.nic.in/ என்ற   இணையதளத்தைப் பார்க்குமாறு அறிவுறுத்தப்படுகிறார்கள் என்றும் TRB அறிவித்துள்ளது.