திருப்பூர் மாவட்டம் 15 வேலம்பாளையம் பகுதியில் டாஸ்மாக் கடை செயல்பட்டு வருகிறது. இந்த கடையில் அமர்ந்து மது அருந்திய  இருதரப்பினர் இடையே தகராறு ஏற்பட்டதாக கூறப்படுகிறது.

இதையடுத்து ஒரு தரப்பினர் அங்கிருந்த சென்ற போது அவர்கள் அமர்ந்திருந்த சேர் அருகில் இருந்தவர்கள் மீது பட்டுள்ளது. இதனால் இரு தரப்பினர் இடையே தகராறு ஏற்பட்டுள்ளது. அப்போது ஒருவருடைய செல்போன் காணாமல் போயுள்ளது.  செல்போன் பறிகொடுத்த நபர் எதிர் தரப்பினரை மடக்கி விசாரித்துள்ளார்.

அப்போது அங்கு வந்த 4 பேர் 3 பேரை அரிவாளால் தாக்கிவிட்டு தப்பி சென்றுள்ளனர். இந்த காட்சிகள் அந்த பகுதியில் இருந்த சிசிடிவி கேமராவில் பதிவாகி இருந்தது.

இதையடுத்து வழக்கு பதிவு செய்த போலீசார், 2 பேரை கைது செய்து விசாரணை மேற்கொண்டு வருகின்றனர்.

தமிழகத்தில் இன்று ஒரே நாளில் ஆயிரத்து 630 பேருக்கு கொரோனா தொற்று உறுதி செய்யப்பட்டுள்ளது.

இதுதொடர்பாக தமிழக சுகாதாரத்துறை வெளியிட்டுள்ள அறிக்கையில், கொரோனா தொற்றுக்கு இதுவரை 26 லட்சத்து 60 ஆயிரத்து 553 பேர் பாதிக்கப்பட்டுள்ளனர். கொரோனாவால் பாதிக்கப்பட்டு ஒரே நாளில் 17 பேர் உயிரிழந்த நிலையில், இதுவரை உயிரிழந்தவர்கள் மொத்த எண்ணிக்கை 35 ஆயிரத்து 526 ஆக அதிகரித்துள்ளது. மேலும், கடந்த 24 மணி நேரத்தில், ஆயிரத்து 643 பேர் நலம் பெற்று வீடு திரும்பியுள்ள நிலையில், இதுவரை 26 லட்சத்துக்கும் அதிகமானோர் தொற்றில் இருந்து மீண்டுள்ளனர்.  இதனிடையே, தமிழகத்தில் கொரோனா தினசரி பாதிப்பில் அதிகபட்சமாக கோவையில் 183 பேருக்கும், சென்னையில் 184 பேருக்கும் தொற்று உறுதி செய்யப்பட்டுள்ளது. கொரோனா தொற்றுக்கு சிகிச்சை பெறுவோர் எண்ணிக்கை 17 ஆயிரத்து 231ஆக உள்ளது.

கொரோனா தொற்று காரணமாக சிதம்பரம் நடராஜர் கோயிலில் பொற்சபை மீது ஏறி பக்தர்கள் சாமி கும்பிடுவதற்கு சுமார் ஒரு வருட காலமாகவே தடை விதிக்கப்பட்டு உள்ளது.

 இந்நிலையில் நடராஜர் கோயிலுக்கு சாமி கும்பிட வந்த பக்தர்கள் சிலர், கோயில் பொற்சபை மீது ஏறி ஏன் சாமி கும்பிட அனுமதி மறுக்கிறீர்கள்? என்ன காரணம்? என கோயில் தீட்சிதர்களிடம்  கேட்டுள்ளனர்.

அதற்கு தீட்சிதர்கள் பக்தர்களுக்கு பதிலளித்துள்ளனர்.  அப்போது இரு இரு தரப்பினருக்குமிடையே வாக்குவாதம் ஏற்பட்டுள்ளது. இந்த வீடியோ தற்போது வெளியாகி சமூக வலைதளத்தில் வைரலாகி வருகிறது.

அதிமுக முன்னாள் எம்.ஆர். விஜயபாஸ்கர் லஞ்ச ஒழிப்பு துறையில் நேரில் ஆஜராக சம்மன் அனுப்பப்பட்டுள்ளது. 

கடந்த அதிமுக ஆட்சிக்காலத்தில்  போக்குவரத்து துறை அமைச்சர் எம்.ஆர்.விஜயபாஸ்கர் வீடு மற்றும் தொழில் நிறுவனங்கள் போன்றவற்றில் ஜூலை 22-ஆம் தேதி லஞ்ச ஒழிப்புத் துறையினர் சோதனை மேற்கொண்டு பல்வேறு ஆவணங்களை கைப்பற்றி வழக்குப்பதிவு செய்திருந்தனர். 

 வருமானத்துக்கு அதிகமாக சொத்து சேர்த்ததாக லஞ்ச ஒழிப்புத்துறை போலீசார் நடத்திய சோதனையில் முக்கிய ஆவணங்கள் கைப்பற்றப்பட்டதை அடுத்து வரும் செப்டம்பர் 30 ஆம் தேதி  நேரில் ஆஜராக லஞ்ச ஒழிப்புத்துறை சம்மன் அனுப்பியுள்ளது.

முன்னதாக ஜூலை 21ஆம் தேதி கரூர், சென்னை உள்ளிட்ட 22 இடங்களில் எம்.ஆர்.விஜயபாஸ்கர் மற்றும் அவருக்கு நெருங்கிய நண்பர்கள் நிறுவனங்களில்  லஞ்ச ஒழிப்புத்துறை போலீசார் சோதனை நடத்தினர் என்பது குறிப்பிடதக்கது.

சென்னையில் டி.ஆர் பௌண்டேஷன் மற்றும் எஸ்டேட்ஸ் என்ற பெயரில் ரியல் எஸ்டேட் நிறுவனம் நடத்தி வந்தவரான தன்ராஜ் கோச்சார் உட்பட அவரது உறவினர்களுக்குச் சொந்தமான 10 இடங்களில் அமலாக்கத்துறை அதிகாரிகள் திடீர் சோதனை மேற்கொண்டு வருகின்றனர். கடந்த 2006 ஆம் ஆண்டு தனது நிறுவனத்தின் பங்குதாரர்களான ஹமீத் மற்றும் அப்துல் ரவூபை ஏமாற்றி நிறுவன நிதியில் இருந்த பணத்தைக் கொண்டு தனது குடும்பத்தார் மற்றும் உறவினர்கள் பெயரில் தன்ராஜ் கோச்சார் சட்ட விரோதமாக 200 கோடி ரூபாய் மதிப்புடைய சுமார் 33 ஏக்கர் நிலம் வாங்கியதாக ஹமீத் என்பவர் புகாரின் அடிப்படையில் மத்திய குற்றப்பிரிவு நிலமோசடி தடுப்புப் பிரிவு போலீசார் வழக்குப்பதிவு செய்தனர்.

இந்த வழக்கில் தன்ராஜ் கோச்சார் உட்பட குடும்பத்தார் 7 பேருக்கு 6 வருட சிறை தண்டனையும், ஆளுக்கு தலா 20 ஆயிரம் ரூபாய் அபராதமும் விதித்து நீதிமன்றம் தீர்ப்பளித்தது. இது தவிற நிலப் பத்திரங்களைப் பெற்றுக்கொண்டு வட்டிக்கு பணம் கொடுத்து பின் அந்த நிலங்களை அபகரித்துக் கொண்டதாகவும் தர்மராஜ் கோச்சார் மீது மத்தியக் குற்றப் பிரிவில் 10 க்கும் மேற்பட்ட வழக்குகள் நிலுவையில் உள்ளது. இது தொடர்பாக பாதிக்கப்பட்டவர்கள் மூலம் தன்ராஜ் கோச்சாரின் நிலமோசடி தொடர்பாகவும், சட்ட விரோதப் பணப்பரிவர்த்தனை தொடர்பாகவும் அமலாக்கத் துறையினருக்கு புகார் அளிக்கப்பட்டுள்ளது.

 அதனடிப்படையில் தன்ராஜ் கோச்சார், ரமேஷ் குமார் கோச்சார் உட்பட அவரது குடும்பத்தார் மற்றும் உறவினர்களுக்குச் சொந்தமான 10 இடங்களில் அமலாக்கத்துறை அதிகாரிகள் இன்று திடீர் சோதனை மேற்கொண்டுள்ளனர். குறிப்பாக வேப்பேரியில் உள்ள வீடு, எழும்பூரில் உள்ள அலுவலகம், என்.எஸ்.சி போஸ் சாலையில் உள்ள வீடு மற்றும் அலுவலகம் உள்பட 10 இடங்களில் இந்த சோதனையானது நடைபெற்று வருகிறது.  இந்த சோதனையின் மூலம் தன்ராஜ் கோச்சார் பல்வேறு சட்டவிரோத செயல்களில் ஈடுபட்டுள்ளது கண்டுபிடிக்கப்பட்டுள்ளதாக முதற்கட்ட தகவல் வெளியாகியுள்ளது. தொடர்ந்து சட்ட விரோதப் பணப் பரிவர்த்தனை ஏதும் நடைபெற்றுள்ளதா? என்பது குறித்தும் அமலாக்கத்துறையினர் தீவிர விசாரணை மேற்கொண்டு வருவதாகவும் தகவல் வெளியாகியுள்ளது. இந்த் சோதனைகள் முடிவுக்கு வந்தபின் இந்த நடவடிக்கை தொடர்பான முழு விபரங்கள் வெளியிடப்படும் எனவும் அமலாக்கத்துறை சார்பில் தகவல் தெரிவிக்கப்பட்டுள்ளது.

இதனிடையே ஈ.வி.கே சம்பத் சாலையில் உள்ள தன்ராஜ் கோச்சாருக்கு சொந்தமான வீட்டில் ஊழியர்கள் கதவைத் திறக்காததால் அமலாக்கத் துறையினர் நீண்ட நேரம் வீட்டு வாயிலில் காத்திருக்கும் சூழ்நிலை ஏற்பட்டது. பின்னர் குடும்பத்தார் வரவழைக்கப்பட்டு அதிகாரிகள் வீட்டிற்குள் சென்று சோதனை மேற்கொண்டு வருகின்றனர். காலை 5 மணியளவில் அமலாக்கத்துறையின் இந்த சோதனை துவங்கிய நிலையில் தொடர்ந்து சோதனை மேற்கொள்ளப்பட்டு வருகிறது. சட்டவிரோத செயல்பாடுகள் தொடர்பான முக்கிய ஆவணங்கள் சிக்கியுள்ளதாகவும் தகவல்கள் வெளியாகியுள்ளது.