சென்னை விமான நிலையத்திலிருந்து கிண்டி கத்திப்பாரா மேம்பாலம் நோக்கி செல்லக்கூடிய  ஜி.எஸ்.டி சாலையில் சென்றுகொண்டிருந்த காரின் முன்புறத்தில் இருந்து கரும்புகை வெளியேறியது. இதனைக் கண்ட காரின் உரிமையாளர் சூரஜ் குமார் காரை சாலையோரம் நிறுத்திவிட்டு வெளியேறினார்.

அப்போது காரின் முன்புறத்தில் பற்றிய தீ மளமளவென பரவி கார் முழுவதும் தீப்பிடித்து எரிந்து நாசமானது.  கரும்புகையைக் கண்டு கார் உரிமையாளர் சூரஜ் சுதாரித்துக்கொண்டு காரை சாலையோரம் நிறுத்திவிட்டு வெளியேறியதால் உயிர்சேதம் தவிர்க்கப்பட்டது.

தகவல் அறிந்து சம்பவ இடத்திற்கு வந்த மீனம்பாக்கம் போலீசாரும், விமான நிறுவனம் நிலைய தீயணைப்பு வீரர்களும் விரைந்து செயல்பட்டு காரில் பற்றி எரிந்த தீயை அணைத்தனர். இந்த விபத்து குறித்து மீனம்பாக்கம் போலீசார் வழக்குப்பதிவு செய்து விசாரணை மேற்கொண்டு வருகின்றனர்.மேலும்   சமீப நாட்களாக சாலையில் செல்லும் வாகனங்களில் தீப்பிடித்து எரியும் சம்பவங்கள் தொடர்ந்து அரங்கேறி வருவது குறிப்பிடத்தக்கது.

பீகார் மாநிலத்தைச் சேர்ந்தவர் 26-வயது இளைஞர் நிர்பய்குமார், இவர் சென்னை அடையாறில் கல்வி நிறுவனம் ஒன்றில் காவலாளியாக பணியாற்றி வந்தார். கடந்த 2018-ஆம் ஆண்டு அப்பகுதியில் உள்ள அடுக்குமாடி குடியிருப்பில் இருந்த வீட்டிற்குள் புகுந்து, அங்கிருந்த இளம்பெண்ணை பாலியல் வன்கொடுமை செய்துள்ளார்.

பெண்ணின் அலறல் சத்ததால் ஆத்திரமடைந்த நிர்பய்குமார், அவரை கொலை செய்யவும் முயன்றுள்ளதாக கூறப்படுகிறது. பின்னர் பாதிக்கப்பட்ட அந்த கல்லூரி மாணவியை அக்கம்பக்கத்தினர் மீட்டதுடன்,  நிர்பய்குமாரை அடையாறு காவல் நிலையத்தினரிடம் ஒப்படைத்தனர்.

இது தொடர்பான வழக்கு சென்னை மாவட்ட மகளிர் நீதிமன்றத்தில் நீதிபதி டி.எச்.  முகமது பாரூக் முன்பு விசாரணைக்கு வந்தது. அப்போது, அரசு சிறப்பு குற்றவியல் வழக்கறிஞர் பி.ஆர்த்தி ஆஜராகி இளம்பெண்ணிற்கு காவலாளி நிர்பய்குமார் பாலியல் துன்புறுத்தல் செய்ததற்கான ஆதாரங்களும், சாட்சியங்களும் வலுவாக இருப்பதாக எடுத்துரைத்தார்

பின்னர் இந்த வழக்கில் நீதிபதி பிறப்பித்துள்ள தீர்ப்பில், நிர்பய்குமார் மீதான குற்றச்சாட்டு நிரூபிக்கப்பட்டுள்ளதாக கூறி 10 ஆண்டு ஜெயில் தண்டனையும், 15 ஆயிரம் ரூபாய் அபராதமும் விதித்துள்ளார்.

மேலும், பாதிக்கப்பட்ட கல்லூரி மாணவிக்கு அபராத தொகையிலிருந்து 10 ஆயிரம் ரூபாயை இழப்பீடாக வழங்கவும், கூடுதல் இழப்பீடு வழங்குவது குறித்து சென்னை மாவட்ட சட்டப்பணிகள் ஆணைக்குழு உரிய முடிவெடுக்க வேண்டும் என்றும் உத்தரவிட்டுள்ளர்.

சென்னை கிண்டியில் உள்ள கிங்ஸ் மருத்துவமனையில்,  மருத்துவம் மற்றும் மக்கள் நல்வாழ்வுத் துறை அமைச்சர் மா. சுப்ரமணியன் வெளிநாட்டில் இருந்து சென்னை வந்த கொரோனா தொற்றால் பாதிக்கப்பட்டவர்களை பார்வையிடுவதற்கு முன் செய்தியாளர்களை சந்தித்து பேசினர்

அப்போது பேசிய அவர் ,தென் ஆப்பிரிக்காவில் பரவி வரும் ஒமிக்ரான் வைரஸ் தொற்றை தடுப்பதற்கு தமிழகத்தில்அனைத்து விமான நிலையங்களிலும் தீவிரமாக கண்காணிப்பு ஏற்படுத்தப்பட்டுள்ளது என்றார்.

மேலும் லண்டனில் இருந்து நேற்று சென்னை வந்த 8 நபர்களை பரிசோதித்ததில் அதில் 2 நபர்களுக்கும் மேலும் சிங்கப்பூரில் இருந்து திருச்சி வந்த ஒரு நபருக்கும் என மொத்தமாக மூன்று நபர்களுக்கு தொற்று பாதிப்பு உறுதி செய்யப்பட்டுள்ளது.

தொற்று பாதித்தவர்களுக்கு ஒமிக்ரான் உள்ளதா என்பதை மரபணு பரிசோதனை முடிவுகள் வந்த பின் அறியப்படும் என்றும் இன்னும் 5 நாட்களில் முடிவுகள் தெரியப்படும் என கூறிய அவர், மேலும் 8 நபர்களும் சென்னை கிங்ஸ் மருத்துவமனையில் தீவிர கண்காணிப்பில் இருந்து வருவதாகவும் கூறினார்.

மேலும் சிங்கப்பூரில் இருந்து திருச்சி வந்த பயணிக்கு தொற்று இருப்பது கண்டறியப்பட்ட நிலையில்  அவர் திருச்சி மருத்துவமனையில் அனுமதிக்கப்பட்டுள்ளதாகவும் தெரிவித்தார். மேலும் ஹை ரிக்ஸ் நாடுகளில் இருந்து வந்த 2928 பேரும், non high risk நாடுகளில் 10,736 பேரும் 3 நாட்களில் பரிசோதனை செய்யப்பட்டுள்ளனர்.  இவர்களில் 3 பேருக்கு மட்டுமே தொற்று உறுதியாகியுள்ளது என்றும் 3 பேரும் தற்போது நலமுடன் உள்ளதாகவும் கூறினார்

நாளை 13 ஆவது மெகா தடுப்பூசி நடைபெற உள்ளது. உலக நாடுகளில் ஓமிக்ரான் அச்சம் நிலவி வரும் நிலையில் பொதுமக்கள் இந்த முகாமை பயன்படுத்தி தடுப்பூசியை முழுமையாக செலுத்திட வேண்டும் என்றும் கூறினார்.

மேலும் வெளிநாட்டில் இருந்து வருபவர்களுக்கு கிங்ஸ் மருத்துவமனையில் 200 படுக்கைகள் தயார் நிலையில் உள்ளது என்றும் ,நேற்றய நாள் வரை 1868 நபர்கள் பரிசோதனைக்கு உட்படுத்தப்பட்டுள்ளார்கள் என்றும் கூறினார்

அதேபோல் இரண்டு தவணை தடுப்பூசி எடுத்துக் கொன்டவர்களுக்கும் தொற்று பாதிப்பு ஏற்படுவதற்கு வாய்ப்புள்ளது  ஆனால் அவர்களுக்கு உயிராபத்து  ஏற்படுவதற்கு வாய்ப்பு இல்லை என்றும் கூறினார்.

தமிழகத்தில் மீண்டும் ஊரடங்கு என்ற நிலை வரக்கூடாது என்பதற்காகவே அனைத்து முன்னெச்சரிக்கைகளும் தொடர்ந்து மேற்கொள்ளப்பட்டு வருவதாகவும் தெரிவித்தார். மேலும் பொதுமக்கள் அனைவரும் கட்டாயமாக மேலும் ஒரு வருடத்திற்கு முக கவசம் அணிய வேண்டும் கேட்டுக்கொண்டார்.

சென்னையை அடுத்த மதுராந்தகம் ரயில் நிலைய மேலாளருக்கு மேல்மருவத்தூரைச் சேர்ந்த கங்காதரன் என்ற நபர் மூலம் கடிதம் ஒன்று வந்தது. அந்தக் கடிதத்தில் சென்னையிலுள்ள ஆளுநர் மாளிகை, தலைமைச் செயலகம், எழும்பூர் ரயில் நிலையம் உள்ளிட்ட இடங்களில் வெடிகுண்டு வைக்க சில கேரள மாவோயிஸ்டு அமைப்புகள் திட்டமிட்டுள்ளதாகவும், அங்கெல்லாம் வெடிகுண்டு வெடிக்கும் எனவும் தெரிவிக்கப்பட்டிருந்தது.

இதனையடுத்து மதுராந்தகம் ரயில் நிலைய மேலாளர் அளித்த தகவலின் அடிப்படையில் எழும்பூர் ரயில்வே போலீசார் மற்றும் ரயில்வே பாதுகாப்பு படையினர் மோப்ப நாய் டைசன் மற்றும் வெடிகுண்டு நிபுணர்கள் உதவியுடன் எழும்பூர் ரயில் நிலைய நடைமேடைகளில் உள்ள பயணிகளின் உடமைகள், ரயில் நிலையத்திற்கு வந்த ரயில்கள் ஆகிய இடங்களில் தீவிர சோதனை மேற்கொண்டனர்.

சோதனையில் வெடிகுண்டு ஏதும் இல்லை என்பது உறுதியான நிலையில், மிரட்டல் வந்தது வதந்தி எனத் தெரியவந்தது. இதனையடுத்து மதுராந்தகம் ரயில்வே போலீசார் இச்சம்பவம் தொடர்பாக வழக்குப்பதிவு செய்து போலி மிரட்டல் கடிதத்தை அனுப்பிய கங்காதரன் குறித்து விசாரணை மேற்கொண்டு வருகின்றனர்.

முதற்கட்ட விசாரணையில் கங்காதரன் சற்று மனநலம் பாதிக்கப்பட்டவர் எனவும், ஏற்கனவே இதுபோன்ற போலியான மிரட்டல்கள் விடுத்த காரணத்திற்காக கைதாகி சிறைக்குச் சென்றவர் என்பதும் தெரியவந்துள்ளதாக மதுராந்தகம் ரயில்வே போலீசார் தகவல் தெரிவித்துள்ளனர்.

சேலத்தில் செய்தியாளர்களை சந்தித்த முன்னாள் மத்திய அமைச்சர் பொன் ராதாகிருஷ்ணன் கூறுகையில்,

நகர்புற உள்ளாட்சித் தேர்தல் எப்போது அறிவித்தாலும் தேர்தலை எதிர்கொள்ள பாஜக தயார் என்றும் நகர்புற உள்ளாட்சித் தேர்தலிலும் அ.தி.மு.க கூட்டணி தொடரும் என நம்புவதாக தெரிவித்தார்.

மத்திய அரசு எந்த வகையில் சர்வாதிகாரமாக செயல்படுகிறது என்பதை முதல்வர் விளக்கமாக சொன்னால் நல்லது என கூறிய அவர், ஏற்கனவே தமிழகத்தின் துணை முதல்வர், அமைச்சர் உள்ளிட்ட பதவிகளில் இருந்த ஸ்டாலினுக்கு முல்லை பெரியாறு அணை விவகாரத்தில் அப்போதைய மத்திய அரசு எடுத்த நடவடிக்கைகள் பற்றி தெரியாதா? அவர்கள் ஆட்சியில் இருந்த போது முல்லை பெரியாறு அணை விவகாரத்தில் என்ன நல்லது செய்தார்கள் என்றும் கேள்வி எழுப்பினார்.   

மேலும் தமிழில் படித்தவர்களுக்கு வேலை வாய்ப்பை ஏற்படுத்தி தராமல் தமிழை வைத்து திமுக பிழைப்பு நடத்துகிறது. என்றும் வள்ளுவர் பிறந்தநாள் மற்றும் தமிழ் புத்தாண்டு தேதியை மாற்ற திமுக அரசுக்கு யார் அதிகாரம் கொடுத்தது என ஆவேசமாக கூறினார். 

தமிழகத்தில் நீடிக்கும் பள்ளி, கல்லூரி மாணவிகள் மீதான பாலியல் பலாத்காரம் வேதனை அளிக்கிறது என்றும் தமிழகம் போதை மாநிலமாக மாறி கொண்டிருக்கிறது. தமிழகத்தின் தலைநகரில் சர்வ சாதாரணமாக போதை பொருட்கள் விற்பனை செய்யப்படுகிறது என அவர் குற்றம் சாட்டினார்.