முதலமைச்சர் மு.க.ஸ்டாலின், சர்வதேச மாற்றுத்திறனாளிகள் நாளையொட்டி, அவர்களுக்கு வாழ்த்து தெரிவித்துள்ளார். 

சர்வதேச மாற்றுத்திறனாளிகள் நாளையொட்டி, முதலமைச்சர் மு.க. ஸ்டாலின் வாழ்த்துத் தெரிவித்துள்ளார்.  இதுகுறித்து அவர் வெளியிட்டுள்ள வாழ்த்துச் செய்தியில், திமுக அரசு, மாற்றுத்திறனாளிகள் நலனுக்காக பல்வேறு நடவடிக்கைகளை மேற்கொண்டு வருகிறது என்றும், அவர்களின் நலனுக்காக செயல்படுத்தப்படும் பிற நலத்திட்டங்களுக்காகவும் வழங்கப்படும் நிதியினை உயர்த்திக் கொண்டே வருகிறது என்றும் குறிப்பிட்டுள்ளார். 

இதையும் படிக்க : தமிழ்நாட்டின் முதல் பெண் கிராண்ட் மாஸ்டர் வைஷாலி!

இந்நாளில் "மாற்றுத்திறனாளிகளுக்கான நிலையான நீடித்த இலக்குகளை அடைந்திடவும், அவர்களின் நலனை பாதுகாக்கவும் நாம் ஒன்றிணைந்து செயல்படுவோம்" என அனைவரும் ஒன்றிணைந்து உறுதி ஏற்க வேண்டும் என்றும் முதலமைச்சர் மு.க. ஸ்டாலின் தெரிவித்துள்ளார்.

சென்னையில் பல்வேறு பகுதிகளில் புயல் முன்னெச்சரிக்கை நடவடிக்கைகளை அமைச்சர்கள் ஆய்வு மேற்கொண்டு பார்வையிட்டனர். 

சென்னை எழிலகத்தில் உள்ள மாநில பேரிடர் கட்டுப்பாட்டு மையத்தில் ஆய்வு மேற்கொண்ட பின் அமைச்சர் கே.கே.எஸ்.எஸ்.ஆர் ராமசந்திரன் செய்தியாளர்களை சந்தித்தார்.  அப்போது பேசிய அவர், புயலால் சென்னை, திருவள்ளூர் மாவட்டங்களில் அதிகளவில் மழை இருக்கும் என எதிர்பார்க்கப்படுவதால், தேசிய மற்றும் மாநில பேரிடர் மீட்பு படையினர் மொத்தம் 435 பேர் தயார் நிலையில் உள்ளதாக கூறினார்.

இதையும் படிக்க : தமிழ்நாட்டின் முதல் பெண் கிராண்ட் மாஸ்டர் வைஷாலி!

இதேபோல் சென்னை, வள்ளுவர்கோட்டத்தில் உள்ள மின்வாரிய அலுவலகத்தில் அமைச்சர் தங்கம் தென்னரசு ஆய்வு மேற்கொண்டார். பின்னர் செய்தியாளர்களை சந்தித்த அவர், மருத்துவமனைகள், அரசு அலுவலகங்கள் உள்ள இடங்களில் மின் வெட்டு ஏதும் ஏற்படாத வகையில் அனைத்து அலுவலர்களும் தயார் நிலையில் இருக்க அறிவுறுத்தியுள்ளதாகவும் கூறினார்.

ரேசிங் ப்ரோமோஷன்ஸ் பிரைவேட் லிமிடெட் நடத்தும் இந்தியன் ரேசிங் Festival 2023-ல், இந்தியன் ரேசிங் லீக் மற்றும் ஃபார்முலா 4 சாம்பியன்ஷிப் போட்டிகள், சென்னையை அடுத்த இருங்காட்டுக்கோட்டை மெட்ராஸ் இண்டர்நேஷனல் சர்க்யூட்டில் வெள்ளிக்கிழமை தொடங்கி மூன்று நாட்கள் நடைபெறுகிறது.

இருங்காட்டுக்கோட்டையில் நடைபெற்ற போட்டியில், சென்னை, ஹைதராபாத், கோவா, பெங்களூரு, கொச்சி, டெல்லியைச் சேர்ந்த 6 அணிகள் பங்கேற்றன. ஒவ்வொரு அணியிலும் 2 கார்கள் மற்றும் 4 வீரர்கள் என மொத்தம் 24 பேர் போட்டியில் பங்கேற்றனர்.

போட்டியில் பங்கேற்கும் கார்கள், பந்தயத்தில் பங்கேற்பதற்கு முன்னதாக, பல்வேறு விதிமுறைகள் கடைபிடிக்கப்பட்டது. குறிப்பாக, போட்டியில் பங்குபெறும் கார்கள், ஓட்டுநர் மற்றும் எரிபொருள் உட்பட, நிகழ்வின் அனைத்து நேரங்களிலும், காரின் குறைந்தபட்ச எடை 460 கிலோவாக இருக்க வேண்டும். அதேபோல், பிரேக் குளிரூட்டலுக்கான குழாயை சேர்க்க அணிகளுக்கு அனுமதியும் வழங்கப்பட்டுள்ளது. 

இதையும் படிக்க : "ED அதிகாரி கைது செய்யப்பட்டதை அரசியலாக்கக் கூடாது" - அண்ணாமலை

இந்த போட்டியில் பங்கேற்றுள்ளவர்கள், உலகம் முழுவதும் நடைபெற்ற பல்வேறு போட்டிகளில் பங்கேற்று வெற்றி பெற்றவர்கள் என்பதோடு, சிறு வயது முதலே பல்வேறு கட்டங்களாக பயிற்சி பெற்று, போட்டிகளில் பங்கேற்றவர்கள்.

இந்த போட்டி நடைபெறும் வளாகத்தில், கால்ஸ் குழுமத்தின் ஹெல்மெட் பிராண்டான ஃபாஸ்டர்ஸ் ஹெல்மெட்டுகள் பார்வைக்கு வைக்கப்பட்டிருந்தன. கால்ஸ் குழுமம் இந்த போட்டியில் ஒரு ஸ்பான்சராகவும் உள்ளது குறிப்பிடத்தக்கது. இந்த ஃபார்முலா 4-ன் இறுதிப்போட்டி, டிசம்பர் 9 மற்றும் 10-ம் தேதிகளில், சென்னை தீவுத்திடலில் நடைபெற உள்ளது குறிப்பிடத்தக்கது.

வங்கக்கடலில் உருவாகி உள்ள காற்றழுத்த தாழ்வு மண்டலம் ஆழ்ந்த காற்றழுத்த தாழ்வு மண்டலமாக வலுப்பெற்றதாக இந்திய வானிலை ஆய்வு மையம் தெரிவித்துள்ளது. 

தென்மேற்கு வங்கக்கடலில் நிலை கொண்டு உள்ள காற்றழுத்த தாழ்வு மண்டலம் மேற்கு-வடமேற்கு திசையில் நகர்ந்து வருவதாகவும், சென்னைக்கு கிழக்கு தென்கிழக்கு திசையில் சுமார் 510 கிலோ மீட்டர் தொலைவில் உள்ளதாகவும் இந்திய வானிலை ஆய்வு மையம் தெரிவித்துள்ளது.

இது மேற்கு-வடமேற்கு நோக்கி நகர்ந்து, ஆழ்ந்த காற்றழுத்த தாழ்வு மண்டலமாக வலுப்பெற்றதாகவும், அதனைத் தொடர்ந்து நாளை தென்மேற்கு வங்கக் கடலில் புயலாக மாற வாய்ப்பு உள்ளதாகவும் வானிலை ஆய்வு  மையம் அறிவித்துள்ளது.

இதையும் படிக்க : "ED அதிகாரி கைது செய்யப்பட்டதை அரசியலாக்கக் கூடாது" - அண்ணாமலை

மிக்ஜம் என்று பெயரிடப்பட்டுள்ள இந்த புயல் வடமேற்கு திசை நோக்கி நகர்ந்து, டிசம்பர் 4ஆம் தேதி தெற்கு ஆந்திரா மற்றும் அதை ஒட்டிய வட தமிழ்நாடு கடற்கரையை அடையும் என்றும், 5ஆம் தேதி பிற்பகலில் நெல்லூர் மற்றும் மச்சிலிப்பட்டினம் இடையே புயல் கரையை கடக்கும் என்றும் வானிலை ஆய்வு  மையம் தெரிவித்துள்ளது.

இந்நிலையில் சென்னையில் அதிகாலையில் அண்ணா சாலை, தேனாம்பேட்டை, நந்தனம், சென்ட்ரல், பாரிமுனை, அடையாறு, மயிலாப்பூர் உள்ளிட்ட இடங்களில் மிதமான மழையும், பெரம்பூர், கொளத்தூர், அயனாவரம், வில்லிவாக்கம், பகுதிகளில் கனமழையும் பெய்தது.

அமலாக்கத்துறை அதிகாரி கைது செய்யப்பட்டதை அரசியலாக்கக் கூடாது என தமிழ்நாடு பாஜக தலைவர் அண்ணாமலை கூறியுள்ளார்.

கன்னியாகுமரியில் நடைபெறும் ஆர்.எஸ்.எஸ் நிகழ்ச்சியில் பங்கேற்பதற்காக தமிழ்நாடு பாஜக தலைவர் அண்ணாமலை,சென்னையில் இருந்து விமானம் மூலம் தூத்துக்குடி சென்றார். அப்போது விமான நிலையத்தில் செய்தியாளர்களை சந்தித்த அவர், அமலாக்கத் துறை அதிகாரி கைது குறித்து கேள்வி எழுப்பப்பட்டது. 

இதையும் படிக்க : லஞ்சம் வாங்கிய அமலாக்கத்துறை அதிகாரி...  மதுரையில் நடக்கும் தொடர் சோதனை!

அதற்கு பதிலளித்த பாஜக தலைவர் அண்ணாமலை, அமலாக்கத்துறையில் இது போன்று பலர் கைதாகி இருக்கிறார்கள் என்றும், அமலாக்கத்துறை அதிகாரி கைது செய்யப்பட்டதை அரசியலாக்கக் கூடாது என்றும் கூறினார். ஒரு மனிதன் தவறு செய்ததற்காக அமலாக்கத்துறையே மோசம் என கூற முடியாது என்றும், இந்த விவகாரத்தில் தமிழ்நாடு காவல் துறை நேர்மையாக அணுக வேண்டும் என்றார். இதில் சிபிஐ, தமிழ்நாடு காவல் துறை என அனைவரும் தலையிட வேண்டியது இல்லை என்று கூறிய அண்ணாமலை,  மெச்சூரிட்டி இல்லாத அரசியல்வாதிகளை வைத்து தமிழ்நாடு வாழ்ந்து கொண்டிருப்பதாக கூறினார்.  

சென்னை மழையை பொறுத்தவரையில் கருணாநிதி காலத்தில் இருந்து தற்போது வரை மழைநீரில் வேட்டியை மடித்து கட்டிக்கொண்டு நடப்பதாக விமர்சித்தார். தற்போது ஸ்டாலினின் மகன் உதயநிதி ஸ்டாலின் பேண்டை தூக்கிக்கொண்டு நடந்து செல்கிறார், அடுத்து அவருடைய மகன் நடந்து போவார் என்று கூறினார். சென்னை திமுகவின் கோட்டை என்று கூறும் திமுக, சென்னை மக்களுக்கு பெரும் துயரத்தை மட்டுமே ஒவ்வொரு மழைக்காலத்திலும் கொடுத்திருக்கிறது என்று குற்றம் சாட்டினார். இந்த விவகாரத்தை உலகத் திறமை வாய்ந்த நிபுணர்களைக் கொண்டு கையாள வேண்டும் என்று தெரிவித்தார்.