முதலீட்டாளர்களின் முதல் தேர்வாக தமிழ்நாடு உள்ளதாக முதலமைச்சர் மு.க.ஸ்டாலின் பெருமிதம் தெரிவித்துள்ளார். 

பெரம்பலூர் மாவட்டம் எறையூர் சிப்காட் தொழில் பூங்காவில் அமைந்துள்ள பீனிக்ஸ் கோத்தாரி காலணி உற்பத்தி தொழிற்சாலையை முதலமைச்சர் மு.க.ஸ்டாலின், காணொலி காட்சி வாயிலாக திறந்து வைத்தார். சுமார் 400 கோடி ரூபாய் முதலீட்டில் உருவாக்கப்பட்டுள்ள இந்த தொழிற்சாலையின் மூலம், சுமார் 4 ஆயிரம் பேருக்கு வேலை வாய்ப்பு கிடைக்கும் எனவும் தெரிவித்துள்ளார்.

இதையும் படிக்க : ED அனுப்பிய சம்மனுக்கு இடைக்கால தடை விதிப்பு - உயர்நீதிமன்றம் தீர்ப்பு!

தொடர்ந்து நிகழ்ச்சியில் பேசிய முதலமைச்சர் மு.க.ஸ்டாலின், முதலீட்டாளர்கள் அதிகம் விரும்பும் மாநிலமாக தமிழ்நாடு உள்ளதாக பெருமிதம் தெரிவித்தார். அத்துடன், அதற்கு கண்கூடான சாட்சியாக இந்த தொழிற்சாலை அமையும் என்றும் கூறினார். 

தொடர்ந்து பேசியவர், தமிழ்நாட்டின் வளர்ச்சியை பார்க்கும் போது, 2030-ம் ஆண்டிற்குள் ஒரு டிரில்லியன் டாலர் பொருளாதார மாநிலம் என்ற இலக்கை தமிழ்நாடு அடைந்துவிடும் என்றும் முதலமைச்சர் மு.க.ஸ்டாலின் நம்பிக்கை தெரிவித்தார். 

அதிமுக பொது செயலாளர் எடப்பாடி பழனிச்சாமிக்கு எதிராக அக்கட்சியின் முன்னாள் எம்.பி. கே.சி.பழனிசாமி தொடர்ந்த அவதூறு வழக்கை தள்ளுபடி செய்து மாஜிஸ்ட்ரேட் பிறப்பித்த உத்தரவை ரத்து செய்த சென்னை உயர் நீதிமன்றம், அவதூறு வழக்கின் விசாரணையை தொடர உத்தரவிட்டுள்ளது

அதிமுக கட்சியின் போலி உறுப்பினர் அட்டைகளை வழங்கி சட்டவிரோதமாக பணம் வசூலிப்பதாக முன்னாள் எம்பி  கே.சி.பழனிச்சாமிக்கு எதிராக அதிமுக பொதுச் செயலாளர் எடப்பாடி பழனிச்சாமி சென்னை உயர் நீதிமன்றத்தில் உரிமையியல் வழக்கு தாக்கல் செய்திருந்தார். இந்த வழக்கில் தன்னை பற்றி அவர் தெரிவித்த கருத்துகள் தனக்கும், தனது நற்பெயருக்கும் களங்கம் விளைவிக்கும் வகையில் இருப்பதாக கூறி, எடப்பாடி பழனிசாமியை அவதூறு வழக்கின் கீழ் தண்டிக்கக் கோரி சென்னையில் உள்ள ஜார்ஜ் டவுன் நீதிமன்றத்தில் கே.சி.பழனிச்சாமி அவதூறு வழக்கு தாக்கல் செய்திருந்தார்.

அந்த வழக்கை விசாரித்த நீதிமன்றம், கே.சி.பழனிசாமியின் வழக்கை தள்ளுபடி செய்து கடந்த ஆகஸ்ட் மாதம் உத்தரவிட்டிருந்தது. இந்த உத்தரவை ரத்து செய்யக்கோரி கே.சி.பழனிசாமி சென்னை உயர் நீதிமன்றத்தில் மறு ஆய்வு மனுவை தாக்கல் செய்திருந்தார்.

இதையும் படிக்க : ED அனுப்பிய சம்மனுக்கு இடைக்கால தடை விதிப்பு - உயர்நீதிமன்றம் தீர்ப்பு!

இந்த மனு நீதிபதி ஜி.ஜெயச்சந்திரன் முன்பு விசாரணை நடைபெற்றபோது, கே.சி.பழனிச்சாமி தரப்பில் அவதூறு கருத்திற்கான அனைத்து ஆதரங்களும் தாக்கல் செய்யப்பட்ட நிலையில், அவதூறு வழக்கை தள்ளுபடி செய்து உத்தரவிட்டது தவறானது என வாதிடப்பட்டது.

எடப்பாடி பழனிச்சாமி தரப்பில் பொது செயலாளராக ஜெயலலிதா இருந்தபோதே கட்சியிலிருந்து கே.சி.பழனிசாமியை நீக்கியதாகவும், அதன்பின்னர் கட்சி தொடர்பான அவரது செயல்பாடுகளை தடுக்கவே வழக்கு தொடர்ந்ததாகவும், அதில் தெரிவித்த கருத்துகள் அவதூறானவை இல்லை எனவும் வாதிடப்பட்டது.

இதையடுத்து, கட்சியில் இருந்து உறுப்பினர் நீக்கம் தொடர்பான நடைமுறைகளையும், கே.சி.பழனிசாமியை நீக்கியது தொடர்பான ஆவணங்களையும் தாக்கல் செய்ய நீதிமன்றம் உத்தரவிட்டு வழக்கின் மீதான தீர்ப்பு தேதி குறிப்பிடாமல் தள்ளிவைக்கப்பட்டிருந்தது.

ஆனால் ஜெயலலிதா பிறப்பித்த உத்தரவு மற்றும் கே.சி.பழனிசாமிக்கு எதிரான ஆதாரங்கள் ஆகியவற்றை எடப்பாடி பழனிசாமி தாக்கல் செய்யவில்லை. இந்த நிலையில், இன்று தீர்ப்பளித்த நீதிபதி ஜெயச்சந்திரன், அவதூறு வழக்கை ரத்து செய்து ஜார்ஜ் டவுன் மாஜிஸ்ட்ரேட் நீதிமன்றம் பிறப்பித்த உத்தரவை ரத்து செய்வதாக உத்தரவிட்டார்.

மேலும், எடப்பாடி பழனிசாமிக்கு எதிரான அவதூறு வழக்கை தொடர்ந்து நடத்த வேண்டுமென ஜார்ஜ் டவுன் நீதிமன்றத்திற்கு உத்தரவிட்டுள்ளார்.

ஐஏஎஸ் அதிகாரிகளுக்கு அமலாக்கத்துறை அனுப்பிய சம்மனை எதிர்த்து தமிழ்நாடு அரசு தொடர்ந்த வழக்கில், அமலாக்கத்துறை அனுப்பிய சம்மனுக்கு இடைக்கால தடை விதித்து சென்னை உயா்நீதிமன்றம் தீர்ப்பளித்துள்ளது. 

தமிழ்நாட்டில் உள்ள மணல் குவாரிகள் தொடர்பாக வழக்குப்பதிவு செய்த அமலாக்கத்துறை, சோதனைகள் நடத்தி பல்வேறு ஆவணங்களை பறிமுதல் செய்தது. அத்துடன் திருச்சி, தஞ்சாவூர், கரூர், அரியலூர் மற்றும் வேலூர் ஆகிய 5 மாவட்டங்களில் உள்ள மணல் குவாரிகள் மற்றும் அவற்றுக்கு வழங்கப்பட்ட உரிமங்கள் தொடர்பான விவரங்களுடன் ஆஜராகும்படி, அந்தந்த மாவட்ட ஆட்சியர்களுக்கு அமலாக்கத்துறை சம்மன்(நீதிமன்றத்தில் ஆஜராகும் படி) அனுப்பியது.

இந்த சம்மனை ரத்து செய்யக்கோரி தமிழ்நாடு அரசின் சார்பில் வழக்கு தொடரப்பட்டது. இந்த மனு நீதிபதிகள் சுந்தர் மற்றும் சுந்தர் மோகன் அமர்வில் விசாரணைக்கு வந்தது. அப்போது மணல் கொள்ளை பற்றி விசாரிக்க அமலாக்கத் துறைக்கு அதிகாரமில்லை எனவும், மாநில அரசு விவகாரங்களில் அமலாக்கத்துறை தலையிடும் சம்மனுக்கு தடை விதிக்க வேண்டும் என தமிழ்நாடு அரசு சாா்பில் வாதிடப்பட்டது. 

இதையும் படிக்க : செந்தில் பாலாஜி ஜாமின் வழக்கில் Google யை மேற்கோள் காட்டி நீதிபதி கூறிய தீர்ப்பு...!

அமலாக்கத் துறை தரப்பில் ஆஜரான கூடுதல் சொலிசிட்டர் ஜெனரல் சுந்தரேசன் இந்த வழக்கு விசாரணைக்கு உகந்ததல்ல. கனிம வள சட்டம் மட்டுமல்லாமல், இந்திய  ஊழல் தடுப்புச் சட்டப் பிரிவுகளின் கீழும் வழக்குப்பதிவு செய்யப்பட்டுள்ளதாக குறிப்பிட்டார். மேலும் அளவுக்கு அதிகமாக மணல் எடுத்ததன் மூலம், 4 ஆயிரத்து 500 கோடி ரூபாய் பணம் பரிவர்த்தனை நடந்துள்ளதாகவும், இந்த விவகாரத்தில் சம்பந்தப்பட்டவர்களை பாதுகாக்க அரசு முயற்சிக்கிறது எனவும் அமலாக்கத்துறை சாா்பில் குற்றம் சாட்டப்பட்டது. பின்னர் இரு தரப்பு வாதங்களையும் கேட்ட நீதிபதிகள், மனு மீதான தீர்ப்பை இன்று ஒத்திவைத்து உத்தரவிட்டனர். 

இந்நிலையில், ஐஏஎஸ் அதிகாரிகளுக்கு அமலாக்கத்துறை அனுப்பிய சம்மனை எதிர்த்து தமிழ்நாடு அரசு தொடர்ந்த வழக்கில், அமலாக்கத்துறை அனுப்பிய சம்மனுக்கு இடைக்கால தடை விதித்த நீதிபதிகள், சம்மனை எதிர்த்து தமிழ்நாடு அரசும், மாவட்ட ஆட்சியர்களும் தாக்கல் செய்த மனுக்களை ஒத்திவைத்து சென்னை உயர்நீதிமன்றம் தீர்ப்பளித்துள்ளது. அதேசமயம், அமலாக்கத்துறை சார்பில் தாக்கல் செய்த ஆட்சேப (உடன்பாடு இல்லை) மனுவுக்கு பதிலளிக்க தமிழ்நாடு அரசுக்கு 3 வார கால அவகாசம் வழங்கி தீர்ப்பளித்துள்ளது.

விளம்பரத்திற்காகவே தனது வீட்டின் முன்பு போராட்டம் நடத்துவதாக விமர்சித்த நடிகை குஷ்பு, சேரி என்ற வார்த்தைக்கு மன்னிப்பு கேட்க மாட்டேன் என்று ஆணித்தரமாக கூறியுள்ளார். 

பா.ஜ.க. தேசிய செயற்குழு உறுப்பினர் நடிகை குஷ்பு "சேரி மொழி" என்ற வார்த்தையை பயன்படுத்தியதற்கு, பல்வேறு தரப்பில் கண்டனங்கள் எழுந்தன. இதற்கு குஷ்பு மன்னிப்பு கேட்ட வேண்டும் என்ற வாதங்களும் வலுத்து வந்தன. ஆனால் குஷ்பு, "தான் தவறாத எதையும் பேசவில்லை என்றும், சேரி என்பது தவறான வார்த்தை இல்லை " என்றும் விளக்கம் அளித்தார். ஆனால் இதனை ஏற்காத காங்கிரஸ் கட்சியினர், குஷ்பு வீட்டை முற்றுகையிட போவதாக அறிவித்தனர்.   

அதன்படி காங்கிரஸ் எஸ்.சி. துறை மாநில தலைவர் ரஞ்சன்குமார் தலைமையில், 100க்கும் மேற்பட்டோர் சென்னை சாந்தோமில் உள்ள நடிகை குஷ்புவின் வீட்டின் முன்பாக திரண்டு ஆர்பாட்டத்தில் ஈடுபட்டனர். இதில், பெண்கள் மற்றும் வழக்கறிஞர்கள் என பலரும் பங்கேற்று குஷ்பு மன்னிப்பு கேட்க வேண்டும் என்று வலியுறுத்தி முழக்கங்களை எழுப்பினர். அத்துடன், குஷ்புவின் உருவபடத்தின் மீது சாணத்தை ஊற்றி ஆர்ப்பாட்டத்தில் ஈடுபட்டனர். 

ஆர்பாட்டத்தில் ஈடுபட்டவர்கள் பின்னர் போலீசாரால் கைது செய்யப்பட்டனர். இதனைத் தொடர்ந்து செய்தியாளர்களிடம் பேசிய நடிகை குஷ்பு, விளம்பரத்திற்காக, காங்கிரசார், தனது வீட்டின் முன்பு போராட்டம் நடத்துவதாக கூறியதுடன், மன்னிப்பு கேட்க மாட்டேன் என்று திட்டவட்டமாக அறிவித்தார்.

அடுத்த 28 மாதங்களில் சென்னையில் ஓட்டுநர் இல்லா மெட்ரோ ரயில்கள் இயக்கப்படும் என மெட்ரோ ரயில் நிறுவனம் அறிவித்துள்ளது. 

சென்னை மெட்ரோ ரயில் திட்டத்தின் இராண்டாம் கட்டம் திட்டத்தில் ஓட்டுநர் இல்லா மெட்ரோ ரயில்களை உருவாக்க ’அல்ஸ்டோம் டிரான்ஸ்போர்ட் இந்தியா’ நிறுவனத்துடன் 269 கோடி ரூபாயில் ஒப்பந்தம் போடப்பட்டுள்ளதாகவும், அதேபோல், இதற்கான சிக்னல்களை அமைப்பதற்கு ரூ.1620 கோடி மதிப்பிலான ஒப்பந்தம் ’ஹிட்டாச்சி ரயில் எஸ்டிஎஸ்’ நிறுவனத்திடம் வழங்கப்பட்டுள்ளதாகவும் சென்னை மெட்ரோ நிறுவனம் அறிவித்திருந்தது.

இதையும் படிக்க : செந்தில் பாலாஜி ஜாமின் வழக்கில் Google யை மேற்கோள் காட்டி நீதிபதி கூறிய தீர்ப்பு...!

அந்த வகையில், கடந்த ஆண்டு 26 ரயில்கள் வழங்க ஒப்பந்தம் போடப்பட்டிருந்த நிலையில், தற்போது கூடுதலாக 10 ரயில்களுக்கு ஒப்பந்தம் கையெழுத்திடப்பட்டுள்ளதாகவும், அதன்படி மொத்தம் 36 மெட்ரோ ரயில்கள் வழங்கப்படும் என்றும் சென்னை மெட்ரோ ரயில் நிறுவனம் அறிவித்துள்ளது.

இதன் மூலம் அடுத்த 28 மாதங்களில் பூவிருந்தவல்லியில் கட்டப்பட்டு வரும் பணிமனையில் இருந்து 108 பெட்டிகளுடன் கூடிய 36 ஓட்டுநர் இல்லா மெட்ரோ ரயில்கள் இயக்கப்படும் என மெட்ரோ நிர்வாகம் தெரிவித்துள்ளது.