திருச்சி மாவட்ட ஆட்சியர் அலுவலக சாலையில் மாவட்ட தொழில் மைய அலுவலகம் இயங்கி வருகிறது.

சுயதொழில், சிறுதொழில் புரிவோர் மற்றும் தொழில் முனைவோர் மத்திய மற்றும் மாநில அரசால் வழங்கப்படும் கடன் உதவிகளை பெற்று, தொழில் தொடங்க இந்த அலுவலகத்தின் மூலம் நடவடிக்கை எடுக்கப்பட்டு வருகிறது.

இந்த அலுவலகத்திற்கு சுயதொழில் தொடங்க வரும் தொழில் முனைவோரிடம் அலுவலர்கள் லஞ்சம் பெறுவதாக தொடர் புகார்கள் எழுந்தன. இதனடிப்படையில் திருச்சி லஞ்ச ஒழிப்புத்துறை டிஎஸ்பி மணிகண்டன் தலைமையிலான போலீசார், அங்கு திடீர் சோதனையில் ஈடுபட்டனர். 

இந்த சோதனையில், பொதுமேலாளர் ரவீந்திரன் மற்றும் உதவிபொறியாளர் கம்பன் ஆகியோர் அறையிலிருந்து கணக்கில் வராத 3 லட்சம் ரொக்கம் பறிமுதல் செய்யப்பட்டது. இதனையடுத்து இருவரிடமும் விசாரணை நடத்திய லஞ்ச ஒழிப்பு துறையினர், இருவரின் வீடுகளிலும் நடத்தினர். இதில், லட்சக்கணக்கில் கட்டுக்கட்டாக பணம் மற்றும் தங்க நகைகள் பறிமுதல் செய்யப்பட்டுள்ளதாக தகவல்கள் தெரிவிக்கின்றன.

நெல்லை மாவட்டம், அடைமிதிப்பான்குளம் கிராமத்தில் உள்ள 300 அடி ஆழம் கொண்ட தனியார் கல் குவாரியில், நேற்று முன்தினம் இரவு வழக்கம் போல் கற்களை அள்ளும் பணியில் ஊழியர்கள் ஈடுபட்டு கொண்டிருந்தனர்.

அப்போது, எதிர்பாராதவிதமாக ராட்சச பாறை சரிந்து விழுந்ததில் 6 தொழிலாளிகள் கற்களின் இடிபாடுகளுக்குள் சிக்கிக்கொண்டனர். தகவலறிந்து விரைந்து வந்த காவல்துறை மற்றும் தீயணைப்பு துறையினர் மீட்புப் பணியில் ஈடுபட்டனர். கடும் போராட்டத்திற்கு பிறகு ஆறு பேரில் விஜய் மற்றும் முருகன் ஆகிய இருவர் மட்டும் உயிருடன் மீட்கப்பட்டனர்.

 இதனை தொடர்ந்து, சுமார் 17 மணி நேர போராட்டத்திற்குப் பின், செல்வம் என்பவர் மீட்கப்பட்டு உடனடியாக நெல்லை அரசு மருத்துவமனையில் அனுமதிக்கப்பட்டார். ஆனால், சிகிச்சை பலனின்றி அவர் பரிதாபமாக உயிரிழந்தார்.

இந்நிலையில் எஞ்சிய 3 பேரை மீட்கும் பணியில் தேசிய பேரிடர் மீட்பு படையினர் தீவிரமாக ஈடுபட்டுள்ளனர்.  கற்களுக்கு இடையே சிக்கியிருக்கும் 3 பேரை மீட்க தேசிய பேரிடர் மீட்பு படையினர் இரண்டு குழுக்களாக பிரிந்து மீட்பு பணியை மேற்கொண்டுள்ளனர்.

இதனிடையே நெல்லையில் செய்தியாளர்களிடம் பேசிய அமைச்சர் ராஜகண்ணப்பன், சட்டவிரோதமாக செயல்படும் குவாரிகள் மீது  சட்டப்படி நடவடிக்கை எடுக்கப்படும் என்றார்.

இந்நிலையில் கற்குவியலில் சிக்கிய நபர்களை மீட்கும் பணி நிறுத்தப்பட்டுள்ளது. இது தொடர்பாக செய்தியாளர்களிடம் பேசிய மீட்புக்குழுவினர், பாறைகள் சரிந்து மேலும் விபத்து  ஏற்படக்கூடிய வாய்ப்பு இருப்பதால் மீட்பு பணிகளை தற்காலிகமாக நிறுத்திவிட்டு மீட்பு உபகரணங்களுடன் வெளியேறி விட்டதாக கூறினர்.

இதனிடையே கல்குவாரி விபத்தில்  சிக்கி உயரிழந்த 3 பேரின் உடல்களை தேடும் பணி மீண்டும் தொடங்கியுள்ளது.

பெரம்பலூர் அருகே புதியவழித்திடத்தில் அரசு பேருந்து போக்குவரத்தை அமைச்சர்  சிவசங்கர் தொடங்கி வைத்தார்.

நிகழ்ச்சிக்கு பின் செய்தியாளர்களிடம் பேசிய அவர், வெளி மாநிலங்களுக்கான அரசு பேருந்து போக்குவரத்துக்கான கட்டண விகிதத்தை ஆராய்ந்து கட்டண உயர்வு பட்டியல் தயார் செய்யப்பட்டுள்ளதாகவும்,  கட்டண உயர்வு குறித்து முதலமைச்சர் இதுவரை எந்த உத்தரவும் பிறப்பிக்கவில்லை என்றும் கூறினார். 

மேலும், தமிழகத்தில் பேருந்து கட்டணம் உயர்த்தப்படுவதாக சிலர் வதந்திகளை பரப்பி வருவதாகவும், அதனை யாரும் நம்ப வேண்டாம் என்றும் கேட்டுக்கொண்டார்.

திருச்செந்தூர் சுப்பிரமணிய சுவாமி கோவிலில் 137 அடி ராஜகோபுரம் உள்ளது. இதன் உச்சியில் 9 கலசங்கள் உள்ளன.

இந்நிலையில், 137 அடி ராஜகோபுரத்தின் கலசத்தின் அருகே மர்ம நபர் ஒருவர் ஏறியிருப்பது பக்தர்களுக்கு தெரியவந்துள்ளது. இதையடுத்து, பக்தர்கள் போலீசாருக்கும், தீயணைப்பு துறையிருக்கும் தகவல் கொடுத்துள்ளனர். சம்பவ இடத்திற்கு வந்த திருச்செந்தூர் தீயணைப்பு  மீட்பு படையினர், கயிறு மற்றும் தார்பாய்களுடன் வந்து மீட்பு பணியில் ஈடுபட்டனர்.

ராஜகோபுரத்தின் உட்பகுதி படிகள் வழியாக தீயணைப்பு துறையினரும், போலீசாரும் ராஜகோபுரத்தின் மேல்பகுதிக்கு சென்றனர்.  அங்கு கலசத்தின் அருகே அமர்ந்து இருந்த மர்ம நபரிடம் நைசாக பேசி பத்திரமாக மீட்பு கீழே இறங்கினர். பின்னர் அவரிடம் நடத்திய விசாரணையில் அவர் சிவகங்கை மாவட்டம் கச்சாத்தநல்லூரை சேர்ந்த முருகேசன் மகன் முத்து(24) என தெரியவந்தது.

மேலும் அவர் கூறுகையில், ராஜகோபுத்தின் சிற்பங்கள் பெயிண்ட் மற்றும் பாலீஷ் செய்யாமல் இருப்பதால் ராஜகோத்தை பாலீஸ் செய்ய சென்றதாக தெரிவித்தார். அவர் மனநலம் பாதிக்கப்பட்டவராக இருக்கலாம் என அதிகாரிகள் தெரிவித்தனர். ராஜகோபுரத்தில் ஏறிய நபரை சுமார் ஒரு மணி நேரத்தில் தீயணைப்பு துறையினர் மீட்ட சம்பவம் அப்பகுதியில் பரபரப்பை ஏற்படுத்தியது.

வட தமிழக கடலோரம் மற்றும் வட தமிழக உள் மாவட்டங்களின் மேல் நிலவும் வளி மண்டல கீழடுக்கு சுழற்சி மற்றும் வெப்பச்சலனம் காரணமாக,  இன்று நீலகிரி, கோவை, திருப்பூர், தேனி, திண்டுக்கல், தென்காசி, ஈரோடு, சேலம்,  நாமக்கல், கிருஷ்ணகிரி, தர்மபுரி, திருப்பத்தூர், கள்ளக்குறிச்சி, கரூர், திருச்சி மற்றும்  திருவண்ணாமலை மாவட்டங்களில் ஓரிரு இடங்களில் கனமழை பெய்ய வாய்ப்புள்ளதாக கூறப்பட்டுள்ளது.

நாளை மற்றும் மறுநாள் 16 மாவட்டங்களுடன் கூடுதலாக பெரம்பலூர் மாவட்டத்திலும் கனமழை நீடிக்கும் என வானிலை மையம் கணித்துள்ளது.

சென்னையை பொறுத்தவரை, அடுத்த 48 மணி நேரத்திற்கு வானம் பொதுவாக மேகமூட்டத்துடன் காணப்படும் என்றும் நகரின் சில இடங்களில் இடி மின்னலுடன் லேசானது முதல் மிதமான   மழை பெய்யக்கூடும் என்றும்  தெரிவிக்கப்பட்டுள்ளது. 

இதனிடையே  இலட்சதீவு, கர்நாடகா,  கேரளா மற்றும் அதனை ஒட்டிய தென் கிழக்கு அரபிக் கடல் பகுதிகள், மன்னார் வளைகுடா, குமரிக் கடல்பகுதி, தென் மேற்கு வங்கக்கடல் பகுதிகள்  மற்றும் தென் தமிழக கடலோர பகுதிகளில் பலத்த சூரைக்காற்று வீசக்கூடும் என்பதால்  வருகிற 20ம் தேதி வரை மீனவர்கள் கடலுக்கு செல்ல வேண்டாம் என வானிலை ஆய்வு மையம் அறிவுறுத்தியுள்ளது.