திருப்பூர் மாவட்டம், அவிநாசி அருகேயுள்ள பாப்பாங்குளம் பகுதியில், பதுங்கி இருந்த சிறுத்தை ஒன்று, கடந்த 24-ஆம் தேதி, வயலில் அறுவடை பணியில் ஈடுபட்டிருந்த விவசாயி ஒருவரை தாக்கிவிட்டு தப்பியோடியது. இதுகுறித்து தகவலறிந்து, வந்த வனத்துறையினர் சிறுத்தையை பிடிப்பதற்காகச் சென்றபோது, அவர்களையும் தாக்கிய சிறுத்தை கண்ணிமைக்கும் நேரத்தில் அங்கிருந்து தப்பி சென்றது.

விவசாயியையும், பிடிக்க சென்ற வனத்துறையினரையும் தாக்கி விட்டு தப்பி சென்ற சிறுத்தையை கண்டு அப்பகுதி மக்கள் அச்சப்பட்டு வந்தநிலையில்,   சிறுத்தையை பிடிக்கும் பணியில் வனத்துறையினர் தீவிரமாக ஈடுபட்டு வந்தனர். இதனிடையே தொடர் தேடுதல் வேட்டையில் ஈடுபட்டு வந்த வனத்துறையினர், அம்மாபாளையம் பகுதியில் முட்புதரில் பதுங்கியிருந்த சிறுத்தையை மயக்க ஊசி செலுத்தினர்.  அதன்பின்னர் முட்புதரை சுற்று வளைத்து மயக்க நிலையில் இருந்த சிறுத்தையை வலை மூலம் பிடித்தனர்.

இதற்கிடையில் சிறுத்தை நடமாட்டத்தால் அச்சத்தில் இருந்த அப்பகுதி மக்கள், தற்போது சிறுத்தை பிடிப்பட்டதால் நிம்மதி அடைந்துள்ளனர்.

நாடு முழுவதும் கொரோனா மற்றும் ஒமிக்ரான் தொற்று பாதிப்பு கடந்த சில நாட்களாக தொடர்ந்து அதிகரித்து வந்தது. இதனை கட்டுப்படுத்தும் விதமாக தமிழக அரசு, புதிய கட்டுப்பாடுகள் அமல்படுத்தப்படுத்தியது. அதன்படி, இரவு நேர ஊரடங்கு மற்றும் ஞாயிற்றுக்கிழமைகளில் முழு ஊரடங்கை கடைபிடிக்க உத்தரவிட்டது. ஜனவரி 31-ஆம் தேதி வரை இந்த கட்டுப்பாடுகள் அமல்படுத்தப்படும் என அறிவிக்கப்பட்டிருந்த நிலையில், சுகாதாரத் துறை உள்ளிட்ட பல்வேறு துறை உயர் அதிகாரிகளுடன் முதலமைச்சர் மு.க.ஸ்டாலின் ஆலோசனை நடத்தினார்.   

இந்த நிலையில் நாளை முதல் இரவு நேர ஊரடங்கு மற்றும் ஞாயிற்றுக்கிழமைகளில் முழு ஊரடங்கு திரும்ப பெறப்படுவதாக முதலமைச்சர் மு.க.ஸ்டாலின் அறிவித்துள்ளார். மேலும் பிப்ரவரி 1-ஆம் தேதி முதல் அனைத்து பள்ளிகள், கல்லூரிகள் திறக்கப்படும் என்றும்  மழலையர் விளையாட்டு பள்ளிகள், நர்சரி பள்ளிகள் செயல்பட அனுமதி இல்லை என்றும் குறிப்பிட்டுள்ளார்.

தஞ்சாவூரில் பல்வேறு இடங்களில் காவல் துறையினர் தீவிர வாகன சோதனையில் ஈடுபட்டு வருகின்றனர். இந்த நிலையில் தஞ்சை  போக்குவரத்து ஒழுங்கு பிரிவு காவல் ஆய்வாளர் ரவிச்சந்திரன் ரோந்து பணியில் ஈடுபட்டார். அப்போது அந்த வழியாக மதுபோதையில் தள்ளாபடியே இருசக்கரவாகனத்தில் வந்த நபரை, போலீசார் தடுத்து நிறுத்தினர். 

பின்னர் அவரது தலையில் தண்ணீர் ஊற்றி போதையை தெளிய வைத்த போலீசார், அறிவுரை கூறி அனுப்பி வைத்தனர். இந்த வீடியோ இணையத்தளத்தில் பரவி வைரலாகி வருகிறது.

தமிழகம் முழுவதும் 18 வயதுக்கு குறைந்தவர்கள் பாதுகாப்பற்ற முறையில் வாகனங்களை இயக்குவதால் விபத்துக்கள் ஏற்படுவது அதிகரித்து வருவதை, தடுக்கவே தமிழக அரசு மூலம் விதிமுறைகள் கடுமையாக்கப்பட்டுள்ளன.

அதன்படி உரிய ஓட்டுநர் உரிமம் இல்லாத, 18 வயதுக்கு குறைவான சிறார்களை மோட்டார் வாகன சட்டம் 1988 பிரிவு 4 இன் படி 18 வயதுக்கு குறைவான ஒருவர் பொது இடத்தில் வாகனத்தை ஓட்டக் கூடாது என்பது கட்டாயமாக்கப்பட்டுள்ளது.

இதனை மீறி சிறார்களுக்கு வாகனத்தை ஓட்ட அனுமதிக்கும் பெற்றோர் அல்லது வாகன உரிமையாளர்கள் மீது சட்டப்படி கடுமையான நடவடிக்கை எடுக்கப்படும் என்று கூறியுள்ள நிலையில்,  மதுரை காந்தி மியூசியம் சாலையில் கரும்பாலை பகுதியைச் சேர்ந்த நான்கு சிறார்கள் ஒரு இருசக்கர வாகனத்தில் ஆபத்தான வகையில் வளைவுகளில் சாகச பயணம் மேற்க்கொண்டனர். 

இதனால் பெரும் விபத்து ஏற்பட்டு உயிர்சேதம் ஏற்படும் வாய்ப்புகள் உள்ளதால் போக்குவரத்து துறையினர் உரிய நடவடிக்கை எடுத்து சிறார்களுக்கு இருசக்கர வாகனத்தை இயக்க அனுமதிக்கும் பெற்றோர்கள் மீது உரிய நடவடிக்கை எடுக்கவேண்டும் என்ற கோரிக்கை எழுந்துள்ளது.

தமிழக பாஜக தலைவர் அண்ணாமலையை கைது செய்ய வலியுறுத்தி, ட்விட்டரில் ஹேஷ்டேக் டிரெண்டாகி வருகிறது. 

தஞ்சை மாணவி தற்கொலை குறித்து கருத்து தெரிவித்த பாஜக தலைவர் அண்ணாமலை,  கூற்றினை பொய்யாக்கும் வகையில், மாணவி கடைசியாக காவல் துறைக்கு அளித்த வாக்குமூலம் இணையத்தில் வைரலாகி வருகிறது. 

இந்த நிலையில், தவறான தகவல்களை பரப்பி, பிரச்சினையை பெரிதுபடுத்திய அண்ணாமலையை கைது செய்ய வலியுறுத்தி டிவிட்டரில் Arrest Annamalai என்ற ஹேஷ்டேக் டிரெண்டாகி வருகிறது.