விவசாய நிலங்களை சேதப்படுத்தும் வன விலங்குகள்:

திண்டுக்கல் மாவட்டம் பழனி அடுத்துள்ள மேற்கு தொடர்ச்சி வனப்பகுதியில் காட்டு யானைகள், மான்கள் உள்ளிட்ட பல வன விலங்குகள் வசித்து வருகின்றன. இந்த நிலையில் வனவிலங்குகள் வனத்தை ஒட்டிய விவசாய நிலங்களுக்குள் புகுந்து பயிர்களை சேதப்படுத்தும் நிகழ்வுகள், அவ்வப்போது நடைபெற்று வருகிறது. 

அச்சத்தில் விவசாயிகள் :

பழனியை அடுத்த ஆயக்குடி, சட்டப்பாறை பட்டா தோட்டத்தில் காட்டு யானை ஒன்று இரண்டு தினங்களுக்கு முன்பு குட்டி ஈன்றுள்ளது. குட்டி யானையின் அருகில் மேலும் நான்கு யானைகள் உள்ளதால் விவசாயிகள் தங்கள் நிலங்களுக்குச் செல்ல அச்சப்பட்டு வருகின்றனர். அதனால் விவசாயிகள், தங்களின் விவசாய நிலங்களுக்கு செல்ல முடியாத நிலை ஏற்பட்டுள்ளது. 

இரண்டாவது நாளாக யானைகள் முகாம் : 

இந்நிலையில் ஒட்டன்சத்திரம் வனத்துறையினர் அந்த பகுதியில் கண்காணிப்பில் ஈடுபட்டு, பட்டாசுகளை வெடித்து யானையை அடர்ந்த வனப்பகுதிக்குள் திருப்பி அனுப்பும் பணியில் ஈடுபட்டு வருகின்றனர். இரண்டாவது நாளாக முகாமிட்டுள்ள யானைகளை வனப்பகுதிக்குள் அனுப்பும் வரை, விவசாயிகள் வனத்தை ஒட்டியுள்ள தங்கள் விவசாய நிலங்களுக்கு பாதுகாப்பாக சென்று வரவும் வனத்துறையினர் அறிவுறுத்தியுள்ளனர்.

பொள்ளாச்சி நகராட்சியில் ஒட்டப்பட்டிருந்த விளம்பர போஸ்டர்கள், சினிமா பிளக்ஸ் பேனர்கள் ஆகியவற்றை அகற்றி நகராட்சி அதிகாரிகள் அதிரடி நடவடிக்கை மேற்கொண்டுள்ளனர். 

என் குப்பை என் பொறுப்பு :

தமிழகத்தில் சுகாதார சீர்கேட்டை விளைவிக்கும் குப்பை இல்லாத மாநிலமாக மாற்ற, 'என் குப்பை என் பொறுப்பு' என்ற அடிப்படையில் மாநகராட்சி, நகராட்சி, ஊராட்சி நிர்வாகங்கள் செயல்பட வேண்டும் என்று தமிழக முதலமைச்சர் அறிவுறுத்தியுள்ளார்.

பொள்ளாச்சி நகராட்சி நிர்வாகம் :

பொள்ளாச்சி நகராட்சி நிர்வாகம் 'என் குப்பை என் பொறுப்பு' என்ற முதலமைச்சரின் அறிவுறுத்தலின் அடிப்படையில் குப்பைகள் இல்லாத நகராட்சியாக மாற்ற வியாபாரிகள், பொதுமக்கள் மற்றும் பள்ளி, கல்லூரி  மாணவர்களிடம் பல்வேறு விழிப்புணர்வுகளை ஏற்படுத்தி வருகின்றனர்.

விளம்பர போஸ்டர்கள் அகற்றம் :

அந்த வகையில், இன்று பொள்ளாச்சி நகராட்சி தலைவர் சியாமளா நவநீதகிருஷ்ணன், நகராட்சி ஆணையாளர் தாணுமூர்த்தி தலைமையிலான அதிகாரிகள் மற்றும் துப்புரவு பணியாளர்கள் சேர்ந்து நகர பகுதிகளில் ஒட்டப்பட்டு இருந்த சினிமா, அரசியல் கட்சி, தனியார் விளம்பர போஸ்டர்கள், மற்றும் பிளாஸ்டிக் பேனர்களை அதிரடியாக அகற்றினர்.

போஸ்டர்கள் ஓட்டுபவர்கள் மீது அபராதம் :

பொள்ளாச்சி நகராட்சியை குப்பை இல்லாத நகராட்சியாக மாற்ற பல்வேறு விழிப்புணர்வுகள் ஏற்படுத்தப்பட்டு வருகிறது. பிளக்ஸ் பேனர்கள், போஸ்டர்கள் இன்ற அகற்றப்பட்டுள்ளதை தொடர்ந்து,  பிளக்ஸ் பேனர்கள், போஸ்டர்கள் ஓட்டுபவர்கள் மீது அபராதம் விதித்து, கடுமையான நடவடிக்கை எடுக்கப்படும் என்று நகராட்சி தலைவர்  சியாமளா நவநீதகிருஷ்ணன் தெரிவித்தார்.

பொதுநல வழக்கு

கோவில் சொத்துக்களை இந்து சமய அறநிலையத் துறை சொத்துக்களாகவோ, கோவில்களை அறநிலைய துறை கோவில்களாகவோ உரிமை கோர அரசுக்கு தடை விதிக்க கோரியும், கோவில்களுக்கு தானமாக வழங்கப்பட்ட சொத்துக்களை, சம்பந்தப்பட்ட கோவில்களின் நலனுக்கு மட்டுமே பயன்படுத்த உத்தரவிட வேண்டும் எனவும் ஸ்ரீரங்கத்தைச் சேர்ந்த ரங்கராஜன் நரசிம்மன் என்பவர் சென்னை உயர் நீதிமன்றத்தில் பொதுநல வழக்குகளை தாக்கல் செய்திருந்தார். 

ஆணையர்

இந்த வழக்கை விசாரித்த தலைமை நீதிபதி முனீஷ்வர்நாத் பண்டாரி மற்றும் நீதிபதி மாலா அமர்வு, அறநிலையத் துறை சட்டப்படி, கோவில் சொத்துக்களை கோவில் நலனுக்காக, அறநிலையத் துறை ஆணையரின் ஒப்புதல் இல்லாமல் குத்தகைக்கு விட அனுமதியில்லை எனச் சுட்டிக்காட்டியது.

இதற்கு மட்டுமே உரிமை

மேலும், கோவில் சொத்துக்களை குத்தகைக்கு வழங்க ஆணையருக்கு அதிகாரம் இருந்தாலும், அதுசம்பந்தமாக அறங்காவலர்களின் ஆட்சேபனைகளை கேட்க வேண்டும் என சட்டத்தில் வலியுறுத்தப்பட்டுள்ளதாக குறிப்பிட்ட நீதிபதிகள், கோவில் சொத்துக்களை அறநிலையத் துறை சொத்துக்களாக கருதக் கூடாது எனவும், அவற்றை அறநிலையத் துறை சட்டப்படி மட்டுமே குத்தகைக்கு  அல்லது வாடகைக்கோ விட வேண்டும் என நீதிபதிகள் விளக்கமளித்துள்ளனர்.

உயர் நீதிமன்றம் விமர்சனம்

ஆர்டர்லி முறை ஒழிப்பு குறித்து நீதிமன்றம் நேற்று கடுமையான விமர்சனங்களை வைத்திருந்த நிலையில் தமிழக டி.ஜி.பி. சைலேந்திரபாபு தலைமையில் காவல்துறை உயர் அதிகாரிகளுடன் ஆலோசனை கூட்டம் நடைபெற்றுள்ளது.

ஆலோசனைக் கூட்டம்

டி.ஜி.பி. அலுவலகத்தில் நடைபெற்ற இந்த ஆலோசனை கூட்டத்தில் சென்னை மாநகர காவல் ஆணையர் சங்கர் ஜிவால், ஏ.டி.ஜி.பி-க்கள் மகேஷ் குமார் அகர்வால் ஏ.டி.ஜி.  பி சங்கர் ஐ.ஜி லோகநாதன் உள்ளிட்ட காவல்துறை உயர் அதிகாரிகள் கலந்து கொண்டனர்.

உடனே அனுப்புங்கள்

இந்த கூட்டத்தில் காவல்துறை அதிகாரிகளின் வீடுகளில் தேவையில்லாமல் அளவுக்கு அதிகமாக இருக்கக்கூடிய ஆர்டர்லிகளை உடனடியாக திருப்பி அனுப்புமாறு டி.ஜி.பி உத்தரவிட்டுள்ளார்.

கடும் நடவடிக்கை

மாவட்ட எஸ்.பி அளவில் இருந்து ஏ.டி.ஜி.பி, டி.ஜி.பி வரையிலான அனைத்து காவல்துறை அதிகாரிகளின்  வீடுகளில் அளவுக்கு அதிகமாக தேவையில்லாமல் பணியாற்றக் கூடிய ஆடர்லிகளை உடனடியாக திருப்பி அனுப்புமாறு டி.ஜி.பி. சைலேந்திரபாபு உத்தரவிட்டு இருக்கிறார்.

இதை செயல்படுத்தாத அதிகாரியின் மீது கடுமையான நடவடிக்கை எடுக்கப்படும் எனவும் உத்தரவில் தெரிவிக்கப்பட்டுள்ளதாக தகவல் வெளியாகி உள்ளது.

சென்னை தீவுத்திடலில் நடைபெற்று வரும் சிங்காரச்சென்னை உணவுத் திருவிழாவில் இன்று முதல் பீப் பிரியாணி இடம்பெற உள்ளது.

சிங்காரச்சென்னை உணவுத் திருவிழா:

பழைய பாரம்பரிய உணவுகளை அனைவருக்கும் நினைவு கூர்வதற்காக வைக்கப்படும் நிகழ்ச்சி தான் இந்த உணவு திருவிழா. அதன்படி சிங்காரச் சென்னை உணவுத்திருவிழா சென்னை தீவித்திடலில் 12, 13, 14 ஆகிய தேதிகளில் நடைபெறும் என்று தமிழக அரசு அறிவித்திருந்தது. அதன்படி 12.08.2022 ஆம் தேதியான நேற்று சென்னை உணவுத்திருவிழா தொடங்கியது.

தொடங்கி வைத்த சுகாதாரத்துறை அமைச்சர்:

தமிழக உணவுப் பாதுகாப்புத்துறை சார்பில் சிங்காரச்சென்னை உணவுத் திருவிழாவை சுகாதாரத்துறை அமைச்சர் மா.சுப்பிரமணியன் நேற்று தொடங்கி வைத்தார். நேற்று தொடங்கப்பட்ட உணவு திருவிழா, 200 அரங்குகளுடன் கூடிய உணவுகளுடன் கோலாகலமாக நடைபெற்றது. 

சர்ச்சை:

கோலாகலமாக நடைபெற்று வரும் உணவு திருவிழா, நாளை வரை நடைபெறவிருக்கும் நிலையில், பீப் பிரியாணி அரங்கு ஏன் இல்லை என்ற சர்ச்சையானது எழுந்தது. 

விளக்கமளித்த மா.சுப்பிரமணியன்:

சென்னை தீவுத்தடலில் நேற்று முதல் நடைபெற்று வரும் உணவுதிருவிழாவில், பீப் பிரியாணி இடம்பெறாததால் ஏற்பட்ட சர்ச்சைக்கு, அமைச்சர் மா.  சுப்பிரமணியன் விளக்கமளித்துள்ளார். “நான் கூட பீப் உண்பவன் தான், ஆனால், பீப் உணவகத்துக்கு யாரும் விண்ணப்பிக்காததால் திருவிழாவில் பீப் இடம்பெறவில்லை” என தெரிவித்திருந்தார். 

இன்று இடம்பெற்ற பீப் பிரியாணி:

நேற்று நடைபெற்ற உணவுத்திருவிழாவில் பீப் பிரியாணி இடம்பெறாததால், சர்ச்சை எழுந்தது. இந்த சர்ச்சையை அடுத்து, அமைச்சர் மா. சுப்பிரமணியன் விளக்கமளித்தார். இந்நிலையில், சென்னை உணவுத்திருவிழாவில் இன்று முதல் பீப் பிரியாணி இடம்பெற்றுள்ளது. அதன்படி இன்று முதல் சுக்குபாய் பிரியாணி அரங்கில் மாட்டிறைச்சி பிரியாணி விநியோகிக்கப்படும் என்று தமிழக அரசு அறிவித்துள்ளது.

பீப் பிரியாணிக்கு முற்றுப்புள்ளி வைத்த சென்னை உணவுத்திருவிழா:

முன்னதாக, திருப்பத்தூர் மற்றும் திண்டுக்கல் மாவட்டங்களில் நடைபெற்ற உணவுத் திருவிழாவில் பீப் பிரியாணி இடம்பெறாதது மிக பெரிய அளவில் சர்ச்சையை ஏற்படுத்தியது. இந்நிலையில் சென்னை உணவுத் திருவிழாவிலும் பீப் பிரியாணி இடம்பெறாமல் இருந்தது சர்ச்சையை ஏற்படுத்தியது. தற்போது அதற்கு முற்றுப்புள்ளி வைக்கும் விதமாக சென்னை தீவுத்திடலில் இன்று நடைபெற்ற சிங்காரச் சென்னை உணவுத் திருவிழா 2022-ல் பிப் பிரியாணி இடம்பெற்றுள்ளது.