கல்லிடைக்குறிச்சியை அடுத்த மூலச்சி பகுதியை சேர்ந்த ஆறுமுகம் என்பவர் மகள் இந்திராணி, கல்லூரி முடிந்து வீடு திரும்பும்போது மயக்கமடைந்தார். உடனே அக்கம்பக்கத்தினர் இந்திராணியை நெல்லை அரசு மருத்துவமனையில் சேர்த்தனர்.

அங்கு அவர் விஷம் அருந்தி இருந்தது தெரிய வந்த நிலையில், சிகிச்சை பலனின்றி இந்திராணி பரிதாபமாக உயிரிழந்தார்.  இதுகுறித்து கல்லிடைக்குறிச்சி காவல்துறையினர் விசாரித்ததில், இந்திராணி கல்லூரி முடிந்து மேல்படிப்பு படிக்க விரும்பியதாகவும், அதற்கு பணம் இல்லாததால் பெற்றோர் மறுத்த நிலையில், விரக்தி அடைந்து விஷம் அருந்தியதும் தெரிய வந்தது. இச்சம்பவம் அப்பகுதியில் சோகத்தை ஏற்படுத்தியுள்ளது.

ஹஜ் பயணம் மேற்கொள்ள உள்ளவர்களுக்காக தமிழக அரசு சார்பில் 10 கோடி ரூபாய் ஒதுக்கீடு செய்யப்பட்டுள்ளதாக சிறுபான்மையினர் நலத்துறை அமைச்சர் செஞ்சி மஸ்தான் தெரிவித்துள்ளார். 

சென்னை சூளைமேட்டில் செய்தியாளர்களுக்கு பேட்டியளித்த அவர், இந்த ஆண்டு தமிழகத்திலிருந்து ஆயிரத்து 500 பேர் ஹஜ் பயணம் மேற்கொள்ள உள்ளதாகவும், பயணம் மேற்கொள்வதற்கான உணவு, இருப்பிடம் ஆகிய செலவை அரசே ஏற்றுக்கொள்ளும் எனவும் கூறியுள்ளார். 

மேலும் உலமாக்கள் நல வாரியத்தில் பதிவு செய்த உறுப்பினர்கள் அனைவருக்கும் மிதிவண்டிகள் வழங்கப்பட இருப்பதாகவும்,  ஓய்வு பெற்ற உலமாக்கள் 25 ஆயிரம் மானியத்தில் இருசக்கர வாகனம் பெற்றுக் கொள்ளலாம் எனவும் தெரிவித்துள்ளார். 

தமிழகத்தில் குரங்கம்மை நோய் இதுவரை கண்டறியப்படவில்லை எனவும் பொதுமக்கள் அச்சப்படத் தேவையில்லை எனவும் சுகாதாரத்துறை அமைச்சர் மா.சுப்பிரமணியன் தெரிவித்துள்ளார்.

சென்னை சைதாப்பேட்டை திருவள்ளுவர் தெருவில் மழைநீர் வடிகால் அமைக்கும் பணியை அமைச்சர் சுப்பிரமணியன் தொடங்கி வைத்தார். இதைத்தொடர்ந்து செய்தியாளர்களை சந்தித்த அவர், மக்களைத் தேடி மருத்துவம் திட்டத்தின்கீழ் 70 லட்சத்துக்கும் மேற்பட்டோர் பயனடைந்துள்ளதாக கூறினார்.

கிங்ஸ் இன்ஸ்டிட்யூட் மருத்துவனை கட்டிடத் தரம் குறித்து ஆராயப்பட்டு அதன் அடிப்படையில் கான்ட்ராக்டர் மீது சட்டப்படி நடவடிக்கை எடுக்கப்படும் எனவும் அவர் கூறினார்.

கணேஷ் நகரைச் சேர்ந்த 22 வயதான கூலித்தொழிலாளி பிரகாஷ் என்பவரின் வீட்டில், அவரது உறவினரான 14 வயதான 9ம் வகுப்பு மாணவி தங்கியிருந்து படித்து வந்தார்.

இந்நிலையில் இருவருக்கும் இன்று அதிகாலை திருமணம் நடைபெற இருப்பதாக மாவட்ட ஆட்சியருக்கு ரகசியத் தகவல் கிடைத்தது.

இதைத்தொடர்ந்து அவரது உத்தரவின் பேரில் சமூக நலத்துறை குழந்தைத் திருமண தடுப்பு குழுவினர் சம்பவ இடம் சென்று திருமணத்தை தடுத்து நிறுத்தினர். இந்நிலையில் பிரகாஷ் வீட்டுக்கு நேரில் சென்ற மாவட்ட ஆட்சியர் பாஸ்கர பாண்டியன், இருவர் வீட்டாரையும் சந்தித்தார். 

அப்போது பிள்ளைகள் படிக்க அரசு பல சலுகைகள் வழங்கியுள்ளதாகவும் படிக்கும் வயதில் திருமணம் செய்து வைப்பது சட்டப்படி குற்றம் எனவும் அறிவுரை வழங்கினார். தொடர்ந்து இருவரையும் படிக்க வைக்க அறிவுறுத்திய அவர், இருவருக்கும் தேவையான உதவிகளை செய்ய அரசுக்கு பரிந்துரைப்பதாக உறுதியளித்தார். கடந்த ஒரு ஆண்டில் மட்டும் 20 குழந்தைத் திருமணங்களை ராணிப்பேட்டையில் தடுத்து நிறுத்தியதாகவும் அவர் தெரிவித்தார்.

கூடலூர் அடுத்த ஆரூற்றுபாறை கிராமத்தை சேர்ந்த ஆனந்த் தேநீர் கடை நடத்தி வந்தார். காலையில் கடையை திறக்க வந்தபோது அவரை காட்டுயானை தாக்கியது.

இதில் அவர் சம்பவ இடத்திலேயே பரிதாபமாக உயிரிழந்தார்.தொடர்ந்து அங்கு குவிந்த மக்கள் சடலத்தை எடுத்து செல்லவிடாமல் போராட்டம் நடத்தினர். 

அப்போது 5 வருடங்களாக இப்பகுதியில் சுற்றி திரியும் இந்த ஒற்றை யானை இதுவரை 10க்கும் மேற்பட்டோரை தாக்கி கொன்றுள்ளதாகவும், இதுத்தொடர்பாக புகார் அளித்தும் எந்தவித நடவடிக்கையும் எடுக்கப்படவில்லை எனவும் குற்றம்சாட்டினர். இதையடுத்து அப்பகுதியில் போலீசார் பாதுகாப்பு பணியில் ஈடுபட்டுள்ளனர்.