புதுக்கோட்டை, தூத்துக்குடி, ராமநாதபுரம், விருதுநகர் உள்ளிட்ட 9 மாவட்டங்களில் இன்று கனமழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

வளிமண்டல மேலடுக்கு சுழற்சி மற்றும் வெப்பச்சலனம் காரணமாக தமிழகத்தில் பரவலாக கனமழை பெய்து வருகிறது.  இதுகுறித்து சென்னை வானிலை ஆய்வு மையம் வெளியிட்டுள்ள அறிக்கையில், புதுக்கோட்டை, தூத்துக்குடி, ராமநாதபுரம், விருதுநகர் உள்ளிட்ட 9 மாவட்டங்களில் இன்று கனமழைக்கு வாய்ப்பு இருப்பதாக தெரிவிக்கப்பட்டுள்ளது.  மேலும், டெல்டா மாவட்டங்களில் ஓரிரு இடங்களில் இடி மின்னலுடன் கூடிய கன மழையும், தென் மாவட்டங்கள் மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய மிதமான மழையும் பெய்ய வாய்ப்புள்ளதாக தெரிவித்துள்ள வானிலை ஆய்வு மையம், மேற்கு தொடர்ச்சி மலையையொட்டிய மாவட்டங்கள், வட கடலோர மாவட்டங்கள் மற்றும் அதனை ஒட்டிய உள் மாவட்டங்கள், புதுவை பகுதிகளில் இடி மின்னலுடன் கூடிய மிதமான மழையும் பெய்யக்கூடும் எனவும் தெரிவித்துள்ளது.

சென்னையை பொருத்தவரை அடுத்த 2 நாட்களுக்கு வானம் ஓரளவு மேகமூட்டத்துடன் காணப்படும் என்றும்,  நகரின் சில பகுதிகளில் இடி மின்னலுடன் கூடிய லேசான மழை பெய்யக்கூடும் என்றும் அந்த அறிக்கையில் கூறப்பட்டுள்ளது.

சுகாதாரத் துறை சாா்பில் தமிழகம் முழுவதும் மெகா கொரோனா தடுப்பூசி முகாம் இன்று நடைபெறவுள்ளது. இதில் 15 லட்சம் பேருக்கு தடுப்பூசி செலுத்த இலக்கு நிா்ணயிக்கப்பட்டுள்ளது.

தமிழகத்தில் 3 ஆயிரத்துக்கும் மேற்பட்ட மையங்களில் 18 வயதுக்கு மேற்பட்டவா்களுக்கு கோவாக்சின், கோவிஷீல்டு ஆகிய தடுப்பூசிகள் போடப்பட்டு வருகிறது. தமிழகத்துக்கு தேவையான தடுப்பூசிகளை மத்திய அரசு கொள்முதல் செய்து வழங்குகிறது. கொரோனா மூன்றாவது அலை எச்சரிக்கை இருப்பதாலும், கேரளாவில் தினசரி தொற்று அதிகரித்துள்ளதாலும், தமிழகத்தில் தடுப்பூசி போடும் பணி தீவிரப்படுத்தப்பட்டுள்ளது. அதன் ஒருபகுதியாக, தமிழகம் முழுவதும் கடந்த 12-ம் தேதி 40 ஆயிரம் மையங்களில் கொரோனா தடுப்பூசி முகாம்கள் நடைபெற்றன. குறிப்பாக, கேரளா எல்லையை ஒட்டியுள்ள கன்னியாகுமரி, தென்காசி, தேனி, கோவை, திருப்பூா், நீலகிரி உள்ளிட்ட 9 மாவட்டங்களில் அதிகமான முகாம்கள் அமைக்கப்பட்டன. அன்றைய தினம் ஒரேநாளில் 28 லட்சத்து 91 ஆயிரத்து 21 நபா்களுக்கு தடுப்பூசி போடப்பட்டது.

அக்டோபா் 31-ஆம் தேதிக்குள் தமிழகத்தில் 18 வயதுக்கு மேற்பட்ட அனைவருக்கும் தடுப்பூசி செலுத்த தமிழக அரசு இலக்கு நிா்ணயித்துள்ளது. அதற்காக, வாரம் ஒருமுறை இதுபோன்ற சிறப்பு முகாமை நடத்த திட்டமிட்டுள்ளது. அதன்படி, தமிழகத்தில் ஆரம்ப சுகாதார நிலையங்கள், அரசு மருத்துவமனைகள், அங்கன்வாடி மையங்கள், சத்துணவு மையங்கள், பள்ளிகள் மற்றும் முக்கிய இடங்கள் என மொத்தம் 20 ஆயிரம் மையங்களில் கொரோனா தடுப்பூசி முகாம்கள் இன்று நடைபெறவுள்ளன. 17 லட்சம் எண்ணிக்கையிலான கோவேக்ஸின், கோவிஷீல்ட் ஆகிய தடுப்பூசிகள் மாவட்டங்களுக்கு பிரித்து அனுப்பப்பட்டுள்ளது. குறைந்தது 15 லட்சம் பேருக்காவது தடுப்பூசி செலுத்த இலக்கு நிா்ணயிக்கப்பட்டுள்ளது.

தமிழக ஆளுநராக பதவியேற்றுள்ள ஆர்.என்.ரவிக்கு, முதலமைச்சர் மு.க.ஸ்டாலின் இரண்டு புத்தகங்களை பரிசாக வழங்கியுள்ளார்.  

தமிழர் நாகரிகம் தொடர்பான கீழடி என்ற புத்தகத்தையும், எழுத்தாளர் முத்தையாவால் திருத்தம் செய்யப்பட்ட சென்னை வரலாறு  தொடர்பான மெட்ராஸ் என்ற புத்தகத்தையும் பரிசாக வழங்கியுள்ளார். 

இரண்டு புத்தகங்களும் ஆங்கிலத்தில் மொழி பெயர்க்கப்பட்டவை ஆகும். தமிழ் கலாச்சாரம் முன்னே வந்து நிற்குமாறு உள்ள புத்தகங்களை தேர்ந்தெடுத்து, அதனை விருந்தினர்களுக்கு வழங்குவதை முதலமைச்சர் மு.க.ஸ்டாலின் வாடிக்கையாக வைத்துள்ளார் என்பது குறிப்பிடத்தக்கது.

தமிழகத்தில் விடுபட்ட 9 மாவட்டங்களில் அக்டோபர் 6 மற்றும் 9 ஆகிய தேதிகளில் இரண்டு கட்டங்களாக ஊரக உள்ளாட்சித் தேர்தல் நடைபெற உள்ளது. இதற்கான வேட்பு மனு தாக்கல் தொடங்கி நடைபெற்று வருகிறது. தேர்தல் நடத்தை விதிகள் அமலுக்கு வந்துள்ள நிலையில், பாதுகாப்பு ஏற்பாடுகள் தீவிரப்படுத்தப்பட்டுள்ளன. அந்தந்த மாவட்ட ஆட்சியர்கள் தலைமையில் தேர்தல் குறித்த ஆலோசனைக் கூட்டம் நடத்தப்பட்டு, அறிவுறுத்தல்கள் வழங்கப்படுகின்றன.

இந்தநிலையில், உள்ளாட்சித் தோதலில் போட்டியிடுவோருக்கான வேட்புமனுத் தாக்கல் 15-ம் தேதி தொடங்கி வரும் 22-ஆம் தேதி வரை நடைபெறுகிறது. வேட்புமனு ஆய்வு செப்டம்பா் 23-ஆம் தேதி நடைபெறும். செப்டம்பா் 25-ஆம் தேதி வேட்பு மனுவைத் திரும்பப் பெறலாம் என அறிவிக்கப்பட்டுள்ளது.

இதையடுத்து 9 மாவட்டங்களில் கடந்த 4 நாள்களில் 20 ஆயிரத்து 74 பேர் வேட்புமனு தாக்கல் செய்துள்ளனா். 4 ஆவது நாளான நேற்று கிராம ஊராட்சி வாா்டு உறுப்பினா் பதவிக்கு ஐந்தாயிரத்து 372 பேரும், ஊராட்சித் தலைவா் பதவிக்கு 940 பேரும், ஒன்றியக் குழு உறுப்பினா் பதவிக்கு 207 பேரும், மாவட்ட ஊராட்சி வார்டு உறுப்பினர் பதவிக்கு 13 பேரும் என மொத்தம் ஆறாயிரத்து 532 பேர் தங்களது வேட்பு மனுக்களைத் தாக்கல் செய்துள்ளனா்.

தமிழர்களின் பாரம்பரிய பெருமைமிக்க சிலம்ப விளையாட்டை பாதுகாக்கவும், தமிழர்களின் வீரக் கலையான சிலம்பத்தை உலகறியச் செய்யும் நோக்கத்திலும் மத்திய அரசின் கேலோ இந்தியா திட்டத்தின் கீழ் அங்கீகரிக்கப்பட்ட விளையாட்டு பட்டியலில் சேர்த்திட கோரிக்கை வைக்கப்பட்டது.

இதனையேற்ற, மத்திய அரசின் இளைஞர் விவகாரம் மற்றும் விளையாட்டு அமைச்சகம் சிலம்பம் விளையாட்டிற்கு அங்கீகாரம் வழங்கியுள்ளது. விளையாட்டின் மூலம் அனைத்து தரப்பு மக்களையும் ஊக்குவித்தல் என்ற நோக்கத்தினை கருத்தில் கொண்டு சிலம்பம் விளையாட்டினை சேர்த்துள்ளதாக மத்திய அரசு அறிவித்துள்ள நிலையில், இது தமிழினத்திற்கு பெருமை சேர்த்துள்ளதாக தமிழக விளையாட்டு மேம்பாட்டுத்துறை அமைச்சர் மெய்யநாதன் குறிப்பிட்டுள்ளார். 

மேலும், மற்ற பழங்குடியின விளையாட்டுகளுடன் சேர்த்து சிலம்பத்தையும் மேம்படுத்துவதற்கு உரிய நடவடிக்கைகளை மேற்கொள்ளுமாறு இந்திய விளையாட்டு ஆணையத்தையும் அவர் கேட்டுக்கொண்டுள்ளார்.