இடைநிலை ஆசிரியர்களின் சம வேலைக்கு சம ஊதிய கோரிக்கையை ஆய்வு செய்ய 3 பேர் கொண்டு குழு அமைக்கப்பட்டுள்ளதாக பள்ளிக் கல்வித்துறை அமைச்சர் அன்பில் மகேஷ் தெரிவித்துள்ளார். 

சம வேலைக்கு சம ஊதியம் உள்ளிட்ட கோரிக்கைகளை வலியுறுத்தி சென்னை டிபிஐ வளாகத்தில் இடைநிலை ஆசிரியர்கள், பகுதிநேர ஆசிரியர்கள், டெட் தேர்வில் தேர்ச்சி பெற்ற ஆசிரியர்கள் உள்ளிட்டோர் தொடர் போராட்டத்தில் ஈடுபட்டு வருகின்றனர். 

இவர்களுடன் கல்வித்துறை அதிகாரிகள் நடத்திய 3 கட்ட பேச்சுவார்த்தைகளும் தோல்வி அடைந்தை அடுத்து, அமைச்சர் அன்பில் மகேஷ், பள்ளி கல்வித்துறை இயக்குனர் அறிவொளி மற்றும் தொடக்கக் கல்வித் துறை இயக்குனர் கண்ணப்பன் ஆகியோருடன் சென்னை தலைமைச் செயலகத்தில் ஆலோசனை மேற்கொண்டார்.

பின்னர் செய்தியாளர்களை சந்தித்த அன்பில் மகேஷ், பகுதிநேர ஆசிரியர்களுக்கு 2 ஆயிரத்து 500 ரூபாய் ஊதிய உயர்வு வழங்கப்படும் என்றார். இதேபோல் அவர்களுக்கு 10 லட்சம் ரூபாய் வரை மருத்துவ காப்பீடு வழங்கப்படும் என்று,ம் இதனை அரசே செலுத்தும் என்றும் கூறினார். இதேபோல், டெட் தேர்வில் வெற்றி பெற்று காத்திருக்கும் ஆசிரியர்களுக்கான வயது வரம்பு பொது பிரிவினருக்கு 53 ஆகவும், இதர பிரிவினருக்கு 58 வயதாகவும் உயர்த்தப்படும் என்றார்.

இதையும் படிக்க : "வரும் 11ம் தேதி; கூட்டணி குறித்து முடிவெடுக்கப்படும்” - ஓபிஎஸ்

இதேபோல், இடைநிலை ஆசிரியரிகளின் சம வேலைக்கு  சம ஊதியம் வழங்க வேண்டும் என்ற கோரிக்கையை நிறைவேற்றும் வகையில் 3 பேர் கொண்ட குழு அமைக்கப்படும் என்றும், இந்த குழுவினர் அளிக்கும் அறிக்கையின் அடிப்படையில் நடவடிக்கை எடுக்கப்படும் என்றும் கூறினார். ஆகவே, தமிழ்நாட்டில் நிலவும் கடும் நிதி நெருக்கடிக்கு இடையே அரசு நடவடிக்கைகளை மேற்கொண்டுள்ளதால் ஆசிரியர்கள் தங்களது போராட்டத்தை கைவிட்டு பணிக்கு திரும்ப வேண்டும் என்றும் கேட்டுக் கொண்டார்.

ஆனால், சம வேலை சம ஊதியம் என்ற தங்களின் கோரிக்கை நிறைவேற்றப்படும் என்ற எதிர்பார்ப்பு பொய்த்து போனதால் தங்களது போராட்டம் தொடரும் என இடைநிலை ஆசிரியர் சங்கத்தினர் அறிவித்துள்ளனர். தங்களை முழு நேர ஆசிரியர்களாக நியமிக்கும் வரை தங்களது போராட்டத்தை விடப்போவதில்லை என பகுதிநேர ஆசிரியர்கள் உறுதிபடத் தெரிவித்துள்ளனர்.

இதேபோல், தங்களின் கோரிக்கை குறித்த அரசாணை பிறப்பிக்கப்படும் வரை தங்களது போராட்டம் சாகும் வரை தொடரும் என டெட் ஆசிரியர் சங்கத்தினர் திட்டவட்டமாக தெரிவித்துள்ளனர். 

சென்னையில் வரும் 11ம் தேதி நடைபெறவுள்ள ஓபிஎஸ் ஆதரவு மாவட்ட செயலாளர்கள் கூட்டத்தில், கூட்டணி குறித்து முடிவெடுக்கப்படும் என பண்ருட்டி ராமச்சந்திரன் தொிவித்துள்ளார். 

நாடாளுமன்ற தேர்தல் நடைபெற உள்ள நிலையில், பாஜக-அதிமுக இடையிலான கூட்டணியில் முறிவு ஏற்பட்டுள்ளது. இனி எப்போதும் பாஜகவுடன் கூட்டணி இல்லை என அதிமுக திட்டவட்டமாக அறிவித்துள்ளது. அதிமுகவில் தற்போது எடப்பாடி பழனிச்சாமி அணி மற்றும் ஓ பன்னீர் செல்வம் அணிக்கிடையே கடும் மோதல் போக்கு நிலவி வருகிறது.

இதையும் படிக்க : ஆட்சியர்கள், காவல் அதிகாரிகள் உடனான 2 நாள் மாநாட்டில் முதலமைச்சர் அறிவுறுத்தியது என்னென்ன?

இந்த நிலையில், சென்னை பசுமை வழிச்சாலையில் உள்ள தனது இல்லத்தில் முன்னாள் முதலமைச்சர் ஓ.பன்னீர்செல்வம் தனது ஆதரவாளர்களுடன் ஆலோசனை நடத்தினார்.  சுமார் இரண்டு மணி நேரத்திற்கு மேலாக நடைபெற்ற இந்தக் கூட்டத்தில் பண்ருட்டி ராமச்சந்திரன், வைத்திலிங்கம், மனோஜ் பாண்டியன், புகழேந்தி, கு.ப. கிருஷ்ணன், வெல்லமண்டி நடராஜன், மருது அழகுராஜ் உள்ளிட்ட முக்கிய நிர்வாகிகள் பங்கேற்றனா்.  

இதனை தொடர்ந்து, செய்தியாளர்களை சந்தித்து பேசிய பண்ரூட்டி ராமச்சந்திரன், நாடாளுமன்ற தேர்தலுக்கான பணிகளான பூத் கமிட்டி அமைப்பது தொடர்பாகவும், கட்சியை பலப்படுத்துவது தொடர்பாகவும் ஆலோசனை நடைபெற்றதாக கூறினார்.  மேலும், கூட்டணி குறித்து பாஜக வுடன் தொடர்ந்து பேசி வருவதாகவும், தேர்தல் நேரத்தில் யார் தலைமையில் கூட்டணி அமையும் என்பது பின்னர் அறிவிக்கப்படும் எனவும் தெரிவித்தார்.

மாவட்ட ஆட்சியர்கள் அனைத்து துறைகளையும் ஒருங்கிணைக்கும் பணியின்மூலம் அரசுக்கும், மக்களுக்கும் பாலமாக இருக்க வேண்டும் என முதலமைச்சர் மு.க.ஸ்டாலின் கேட்டுக் கொண்டுள்ளார். 

சென்னை தலைமைச் செயலகத்தில் முதலமைச்சர் மு.க.ஸ்டாலின் தலைமையில் மாவட்ட ஆட்சியர்கள், காவல்துறை உயர் அதிகாரிகள் உடனான மாநாடு நடைபெற்றது. இரண்டு நாள் மாநாட்டின் இறுதியில் முதலமைச்சர் மு.க.ஸ்டாலின் நிறைவு உரையாற்றினார். 

அப்போது பேசிய அவர், அரசு கல்லூரி விடுதிகளில் தங்கிப் பயிலும் மாணவர்களுக்கு உணவுக்கான உதவித் தொகை ஆயிரத்து 100 ரூபாயில் இருந்து ஆயிரத்து 500 ரூபாயாக உயர்த்தி வழங்கப்படும் என்றார். இதன்மூலம் அரசுக்கு 68 கோடியே 77 லட்சம் ரூபாய் கூடுதல் செலவு ஏற்படும் என்றும், மாணவர்களின் நலன் கருதி உதவித் தொகை உயர்த்தி வழங்கப்படுவதாகவும் கூறினார். 

இதையும் படிக்க  : டிசம்பர் தேர்தலையொட்டி, மத்தியபிரதேசம், ராஜஸ்தானுக்கு பிரதமா் சுற்றுப்பயணம்...! 

தமிழக சிறைகளில் உள்ள கைதிகளிடம் நேரடியாக விசாரணை நடத்துவதில் சிக்கல் நீடிப்பதால், வீடியோ கான்பிரன்ஸ் மூலம் ஆஜர்படுத்த நடவடிக்கை எடுக்கப்படும் என உறுதியளித்த முதலமைச்சர், அரசின் நலத்திட்டங்களை முழுமையான ஈடுபாட்டுடன் அதிகாரிகள் நிறைவேற்ற வேண்டும் எனவும், மாவட்ட ஆட்சியர்கள் அனைத்து துறைகளையும் ஒருங்கிணைக்கும் பணியின்மூலம் அரசுக்கும், மக்களுக்கும் பாலமாக இருக்க வேண்டும் எனவும் கேட்டுக் கொண்டார்.  மேலும், மகளிர் உரிமைத் தொகை திட்டத்தில் விடுபட்டவர்களின் விண்ணப்பங்களை விரைவாக ஆய்வு செய்து நடவடிக்கை எடுக்க வேண்டும் என்றும் அப்போது அவர் உத்தரவிட்டார்.

இதேபோல், மாவட்ட ஆட்சியர்கள், காவல்துறை உயர் அதிகாரிகள் மற்றும் வனத்துறை அலுவலர்களுடனான கூட்டத்தில் பல்வேறு அறிவிப்புகளையும் முதலமைச்சர் மு.க.ஸ்டாலின் வெளியிட்டார். 

அதிமுக ஆட்சிக்கு வந்திருந்தால் 2 கோடியே 17 லட்சம் பேருக்கு  மாதம் ஆயிரத்து 500 மற்றும் 6 சிலிண்டர்கள் இலவசமாக வழங்கி இருப்போம் என அதிமுக முன்னாள் அமைச்சர்  செங்கோட்டையன் தெரிவித்துள்ளார். 

கோபிசெட்டிபாளையம் அடுத்துள்ள வெள்ளாங்காட்டு பாளையத்தில் சட்டமன்ற உறுப்பினர் மேம்பாட்டு நிதியிலிருந்து ரூபாய் 15 லட்சம் மதிப்பில் கட்டப்பட்ட நியாய விலை கடையை முன்னாள் அமைச்சரும் சட்டமன்ற உறுப்பினருமான கே.ஏ.செங்கோட்டையன் திறந்து வைத்தார். 

பின்னர் முன்னாள் அமைச்சர் செங்கோட்டையன் சிரைப்புரை ஆற்றியபோது:- 

அதிமுக ஆட்சியில் ஆரம்ப சுகாதார நிலையங்களில் முழு நேரம் சிகிச்சை அளிக்கும் வகையில் நடவடிக்கை மேற்கொள்ளபட்டது எனவும்,  தற்போது 4 மணி நேரம் தான் மருத்துவர்கள் இருக்கும் நிலை உள்ளது,
முழு நேர மருத்துவர்கள் வேண்டும். ர்ன்ச்வும் குறிப்பிட்டார்.

முன்னாள் முதல்வர் ஜெயலலிதா, 2100 இடங்களில் அம்மா கிளினிக்கை கொண்டுவந்தார்.  இது அனைத்து பகுதிகளிலும் இன்று மூடப்பட்டுள்ளது.  இல்லம் தேடி மருத்துவத்தில் மக்கள் கேட்கின்ற மருந்துகளை மட்டுமே தருவார்களே தவிர உடலில் என்ன குறை இருக்கின்றது என்பதை ஆராய முடியாது. 
ஒரு மருத்துவர்,ஒரு செவிலியர் மற்றும் அதற்கான பணியாளர்கள் இருக்கின்ற போது தான் உடலில் உள்ள நோய்களை கண்டறிந்து அதற்கு எந்த மருந்துகளை எடுத்துக் கொள்ளலாம் என்று சிகிச்சை அளிக்க முடியும் எனக் கூறினார்.

அதோடு, மருத்துவர்கள் இல்லாமல் மக்கள் மருந்துகளை வாங்கும் போது, அது தேவைக்கு அதிகமாக இருக்கலாம் அல்லது கூடுதலாக மருந்துகள் தேவைப்படலாம், எந்த நோய்க்கு எந்த மருந்துகளை கொடுக்க வேண்டும் என்பதை பணியாளர்களால் பரிசோதித்து வழங்க முடியாத நிலை உள்ளது”, எனக் கூறினார். 

தொடர்ந்து பேசிய அவர், ஒரு திட்டம் கொண்டு வரும் போது அதில் நன்மை இருக்கின்றதா  என்பதை கூர்ந்து கவனிக்க வேண்டும். மகளிர் உரிமைத் தொகை 1000  பெண்களுக்கு வழங்கப்பட்டுள்ளது. வழங்கப்படாதவர்கள் வருத்தத்தோடு இருக்கிறார்கள்.  அதிமுக ஆட்சிக்கு வந்திருந்தால் 2 கோடியே 17 லட்சம் பேருக்கு  மாதம்  1500 மற்றும் 6 சிலிண்டர்கள் இலவசமாக நிச்சயமாக வழங்கி இருப்போம்”, என தெரிவித்தார்.

 “கர்நாடக தேர்தலில் 2000 ரூபாய் கொடுப்பேன் என்று சொல்லிய வாக்குறுதியை இரண்டே மாதங்களில் நிறைவேற்றப்பட்டது,ஆனால் திமுக இரண்டு ஆண்டு காலம் முடிந்து, தேர்தல் வரவிருப்பதால் கருணை உள்ளத்தோடு முதல்வர் ஸ்டாலின் மகளிர் உரிமைத்தொகை 1000 வழங்கி உள்ளார்”, என சாடினார். 

இதையும் படிக்க   | 2023-24 ஆண்டில் ரூ.1,027 கோடி வரி வசூல்..! சென்னை மாநகராட்சி தகவல்

சென்னை மாநகராட்சியில் 2023-24 நிதியாண்டுக்கான முதல் அரையாண்டில்  1,027 கோடி ரூபாய் வரி  வசூலிக்கப்பட்டுள்ளதாக  சென்னை மாநகராட்சி தகவல் தெரிவித்துள்ளது. 

சென்னை மாநகராட்சிக்குட்பட்ட பகுதிகளில் நிர்வாக ரீதியாக 15 மண்டலங்களும் 200 வார்டுகளும் உள்ளது. இவற்றில், மாநகராட்சிக்கான நிதி ஆதாரமாக பொதுமக்களிடம் இருந்து சொத்து வரி மற்றும் தொழில் வரி வசூலிக்கப்படுகிறது.

இந்நிலையில் 2023-24 நிதியாண்டுக்கான முதல் அரையாண்டில் சொத்து வரி 770 கோடியும் தொழில் வரி 257 கோடி ரூபாயும் வசூலாகியுள்ளதாக சென்னை மாநகராட்சி தகவல் தெரிவித்துள்ளது.

சொத்து வரி மற்றும் தொழில் வரி செலுத்தாமல் நிலுவையில் வைத்துள்ளவர்கள் விரைந்து செலுத்த சென்னை மாநகராட்சி அறிவுறுத்தியுள்ளது.  கால அவகாசம் முடிந்தும் வரி செலுத்தாமல் நிலுவை வைத்துள்ளவர்களுக்கு  2% அபராதம் விதிக்கப்படும் எனவும் நீண்டகாலமாக செலுத்தாதவர்களின் சொத்துக்கள் சீல் வைக்கப்படும் மற்றும் சட்ட நடவடிக்கைகள் எடுக்கப்படும் எனவும் சென்னை மாநகராட்சி எச்சரிக்கை விடுத்துள்ளது.

நீண்ட காலமாக வரி செலுத்தாமல் 5 லட்சம் ரூபாய்க்கும் மேல் நிலுவை வைத்துள்ளவர்களின் பட்டியலையும் சென்னை மாநகராட்சி இணையதளத்தில் வெளியிடப்பட்டுள்ளது.

இதையும் படிக்க   | மருத்துவ ஆவணங்களை முறையாக பராமரிக்க வேண்டும் - மாநில மனித உரிமைகள் ஆணையம் உத்தரவு!