டிசம்பர் மாதத்தில் மட்டும் தடை செய்யப்பட்ட பிளாஸ்டிக் பயன்பாடு கண்டறியப்பட்டு, 4 லட்சத்து 35 ஆயிரத்து 600 ரூபாய் அபராதம் வசூலிக்கப்பட்டுள்ளதாக தமிழ்நாடு மாசு கட்டுப்பாட்டு வாரியம் தெரிவித்துள்ளது.

தமிழகத்தில் சுற்றுச்சூழலை பாதுகாக்கும் விதத்தில் ஒருமுறை பயன்படுத்தப்பட்டு தூக்கி எறியப்படும் பிளாஸ்டிக் பொருட்களை தயாரித்தல், சேமித்து வைத்தல், விற்பனை செய்தல் மற்றும் உபயோகித்தல் ஆகியவற்றிற்கு முற்றிலும் தடை விதிக்கப்பட்டுள்ளது. ஒருமுறை பயன்படுத்தப்பட்டு தூக்கி எறியப்படும் பொருட்களான உணவுப்பொருட்களை கட்ட பயன்படுத்தும் பிளாஸ்டிக் உறை, உணவு அருந்தும் மேஜையின் மீது விரிக்கப்படும் பிளாஸ்டிக் தாள், தெர்மாக்கோல் தட்டுகள் போன்ற 14 வகையான பிளாஸ்டிக் பொருட்கள் தடைசெய்யப்பட்டுள்ளது. 

அரசின் அறிவுறுத்தல்களை மீறி தடைசெய்யப்பட்ட பிளாஸ்டிக் பொருட்களை உபயோகப்படுத்துபவர்களிடமிருந்து அப்பொருட்களை மாநகராட்சி பறிமுதல் செய்து அபராதம் விதித்து வருகிறது.  அதன்படி, கடந்த டிசம்பர் மாதம் மட்டும் சென்னை மாநகராட்சிக்கு உட்பட்ட பகுதிகளில் ஐந்தாயிரத்து 759 இடங்களில் தடை செய்யப்பட்ட பிளாஸ்டிக் பயன்பாடு கண்டறியப்பட்டு, 4 லட்சத்து 35 ஆயிரத்து 600 ரூபாய் அபராதம் வசூலிக்கப்பட்டுள்ளது.

தமிழகத்தில் நேற்றைய கொரோனா பாதிப்பு நிலவரம் குறித்து மருத்துவம் மற்றும் மக்கள் நல்வாழ்வுத்துறை அறிக்கை வெளியிட்டுள்ளது. அதன்படி, தமிழகத்தில் நேற்று ஒருநாளில் மட்டும் ஒரு லட்சத்து 54 ஆயிரத்து 912 மாதிரிகள் பரிசோதனை செய்யப்பட்டது. இதில், 28 ஆயிரத்து 561 பேருக்கு தொற்று உறுதி செய்யப்பட்டுள்ளது. இதையடுத்து, மாநிலத்தில் கொரோனா உறுதி செய்யப்பட்டவர்களின் மொத்த எண்ணிக்கை 30 லட்சத்து 42 ஆயிரத்து 796 ஆக உயர்ந்துள்ளது. சென்னையில், நேற்று ஒரே நாளில் மட்டும் ஏழாயிரத்து 520 பேருக்கு தொற்று உறுதி செய்யப்பட்டுள்ளது.

அதே சமயம், நேற்று ஒரே நாளில் 19 ஆயிரத்து 978 பேர் சிகிச்சைக்கு பின் டிஸ்சார்ஜ் செய்யப்பட்டுள்ளனர்.  இதனால் தமிழகத்தில் கொரோனாவில் இருந்து குணமடைந்தவர்களின் மொத்த எண்ணிக்கை 28 லட்சத்து 26 ஆயிரத்து 479 ஆக அதிகரித்துள்ளது.

இந்த நிலையில், கொரோனா வைரஸ் பாதிப்பினால் நேற்று மட்டும் 39 பேர் உயிரிழந்துள்ளனர். இதனால் கொரோனாவுக்கு பலியானோர் எண்ணிக்கை 37 ஆயிரத்து 112 ஆக உயர்ந்துள்ளது. தமிழகம் முழுவதும் கொரோனாவுக்கு சிகிச்சை பெறுவோர் எண்ணிக்கை ஒரு லட்சத்து 79 ஆயிரத்து 205 ஆக அதிகரித்துள்ளது.

தமிழகம் முழுவதும் இரண்டு கோடி குடும்ப அட்டைதாரர்கள் மற்றும் இலங்கை தமிழர் மறுவாழ்வு முகாம்களில் வசிக்கக்கூடியவர்களுக்கு கரும்புடன் கூடிய 21 பொருட்கள் அடங்கிய பொங்கல் பரிசுத் தொகுப்பு நியாயவிலை கடைகள் மூலம் வழங்கப்பட்டு வருகிறது. பொங்கல் பண்டிகை முடிவடைந்தாலும், இம்மாதம் இறுதி வரை குடும்ப அட்டைதாரர்களுக்கு பொங்கல் பரிசு தொகுப்பு வழங்கப்படும் என தமிழக அரசு சார்பில் ஏற்கனவே அறிவிப்பு வெளியிடப்பட்டுள்ளது. பல்வேறு சர்ச்சைகள் காரணமாக நேரடியாகச் சென்று நியாயவிலைக் கடைகளில்  முதலமைச்சர் மு.க.ஸ்டாலின் பல இடங்களில் ஆய்வு மேற்கொண்டார்.

அதேபோல் நியாயவிலைக் கடைகளில் பொங்கல்  பரிசுத் தொகுப்புகளை வழங்கும் பணிகளை, அமைச்சர்கள், நாடாளுமன்ற உறுப்பினர்கள், சட்டமன்ற உறுப்பினர்கள், மாவட்ட ஆட்சித்தலைவர்கள் மற்றும் சம்பந்தப்பட்ட அலுவலர்கள் அனைவரும் தொடர்ந்து கண்காணித்து அனைவருக்கும் தரமான பொங்கல் பரிசுப் பொருள்கள் கிடைப்பதை உறுதிசெய்ய வேண்டும் என்றும் முதலமைச்சர் வலியுறுத்தியுள்ளார்.   

இந்த நிலையில், பொங்கல் தொகுப்பு தரமானதாக இல்லை என்றும், பல்வேறு முறைகேடுகள் நடைபெற்றுள்ளதாகவும் புகார்கள் வந்த வண்ணம் உள்ளது. இந்த புகார்கள் குறித்து முதலமைச்சர் மு.க.ஸ்டாலின், அமைச்சர் மற்றும் துறை அதிகாரிகளுடன் இன்று ஆலோசனை மேற்கொள்ள உள்ளார். இந்த ஆலோசனையில், கொள்முதல் தரம் குறித்தும், மாவட்டம் வாரியாக வரப்பெற்ற புகார்கள் தொடர்பாகவும், பொங்கல் பரிசு தொகுப்பு வழங்கும் பணி குறித்தும் முதலமைச்சர் கேட்டறிவார் என எதிர்பார்க்கப்படுகிறது.

தமிழகத்தில் உள்ள 21 மாநகராட்சிகள், 138 நகராட்சிகள், 490 பேரூராட்சிகள் அடங்கிய நகர்ப்புற உள்ளாட்சிகளுக்கு, விரைவில் தேர்தல் நடைபெற உள்ளது. இதற்கான ஏற்பாடுகளை, மாநில தேர்தல் ஆணையம் செய்து வருகிறது. இந்நிலையில், தேர்தல் தொடர்பான அனைத்து கட்சி கூட்டம், மாநில தேர்தல் ஆணைய அலுவலகத்தில் நேற்று முன்தினம் நடைபெற்றது.

இதில் பங்கேற்ற பெரும்பாலான கட்சிகளின் பிரதிநிதிகள், உச்ச நீதிமன்ற உத்தரவை பின்பற்றி தேர்தலை விரைந்து அறிவிக்க வேண்டும் என்றும், ஒரே கட்டமாக தேர்தலை நடத்த வேண்டும் என்றும் வலியுறுத்தினர். அனைத்து கட்சிகளின் கருத்துகளை கேட்டறிந்த மாநில தேர்தல் ஆணையம், நகர்ப்புற உள்ளாட்சி அமைப்புகளுக்கான தேர்தல் அறிவிப்பை, நாளை வெளியிட திட்டமிட்டுள்ளது.  தேர்தலை அமைதியாக நடத்த, அனைத்து கட்சிகளும் ஒத்துழைப்பு தருமாறு, மாநில தேர்தல் ஆணையம் கேட்டுக் கொண்டு உள்ளது.

இதற்கிடையே, நகர்ப்புற உள்ளாட்சி தேர்தலை ஒத்திவைக்கக்கோரி, சென்னை உயர் நீதிமன்றத்தில் வழக்கு தொடரப்பட்டுள்ளது. இந்த வழக்கை இன்று விசாரிப்பதாக உயர்நீதிமன்றம் தெரிவித்திருந்தது.  அதன்படி இன்றைய வழக்கு விசாரணையின்போது நகர்ப்புற உள்ளாட்சி தேர்தல் விவகாரம் குறித்த பிரச்னைக்கு முடிவு எட்டப்படும் என எதிர்பார்க்கப்படுகிறது.

அதிமுக ஆட்சியின் போது உயர்கல்வித்துறை அமைச்சராக இருந்த கே.பி அன்பழகன், அரசு நிதி முறைகேடு மூலமாக தனது பெயரிலும் உறவினர்களின் பெயரிலும் சொத்துக்களை குவித்திருப்பதாக, கிருஷ்ணமூர்த்தி என்பவர் உயர்நீதிமன்றத்தில் வழக்கு ஒன்றை தொடர்ந்தார்.

அதனடிப்படையில் வருமானத்திற்கு அதிகமாக 11,32,95,755 ரூபாய் சொத்துக்குவிப்பில் ஈடுபட்டதாக கே.பி அன்பழகன், அவரது மனைவி மல்லிகா, அவரது மகன்கள் சசிமோகன், சந்திரமோகன் மற்றும் மருமகள் வைஷ்ணவி ஆகியோர் மீது தர்மபுரி லஞ்ச ஒழிப்பு போலீசார் வழக்குபதிவு செய்தனர்.

இதன் தொடர்ச்சியாக கே.பி அன்பழகனுக்கு சொந்தமான தர்மபுரியில் 53 இடங்கள், சென்னையில் 3 இடங்கள், சேலத்தில் 1 இடம் மற்றும் தெலுங்கானாவில் 1 இடம் என மொத்தம் 58 இடங்களில் லஞ்ச ஒழிப்பு போலீசார் சோதனை மேற்கொண்டனர். இந்த சோதனையில் ரூ. 2,88 கோடி , 6.  637 கிலோ கிராம் தங்க நகைகள், 13.85 கிலோ கிராம் வெள்ளி பொருட்கள் மற்றும் முக்கிய ஆவணங்கள் கண்டுபிடிக்கப்பட்டது.

கைப்பற்றப்பட்ட ஆவணங்களின் அடிப்படையில் முன்னாள் அமைச்சர் கே.பி அன்பழகன் ரூ. 2,65 கோடி  கணக்கில் காட்டாமல் மறைத்துள்ளது கண்டுபிடிக்கப்பட்டுள்ளதாக லஞ்ச ஒழிப்புத்துறை சார்பில் தெரிவிக்கப்பட்டுள்ளது.

மேலும், சோதனையில் வங்கி பெட்டக சாவி மற்றும் வழக்கு தொடர்புடைய முக்கிய ஆவணங்கள் பறிமுதல் செய்யப்ப்ட்டதாகவும், விரைவில் முன்னாள் அமைச்சர் கே.பி அன்பழகனுக்கு சம்மன் அனுப்பி கைப்பற்றப்பட்ட ஆவணங்களின் அடிப்படையில் விசாரணை நடத்தப்படும் எனவும் லஞ்ச ஒழிப்புத்துறை சார்பில் தெரிவிக்கப்பட்டுள்ளது.