சிவகங்கை மாவட்டத்திலேயே மிகப் பெரிய கண்மாய் என்ற பெருமையைக் கொண்ட திருப்பத்தூர் பெரிய கண்மாய்க்கு தண்ணீர் வரத்து பாலற்றின் வழியாக வரத் துவங்கியுள்ளது. இந்த பாலாறு கடந்த 17 வருடங்களாக தண்ணீரின்றி வறண்டு காணப்பட்டது.

இந்நிலையில் கடந்த இரண்டு நாட்களாக திருப்பத்தூர், சிங்கம்புணரி, எஸ்.புதூர் ஆகிய பகுதிகளில் சுமார் 84 மில்லி மீட்டர் அளவிற்கு மழை கொட்டி தீர்த்தது. அதோடு நத்தம் அருகில் உள்ள கரந்தமலை பகுதியிலிருந்து ஒவ்வொரு கண்மாயாக நிரம்பி திருப்பத்தூருக்கு பாலாற்று வழியாக தண்ணீர் வந்து கொண்டு இருக்கின்றது. இதனையடுத்து இப்பகுதி மக்கள் மற்றும் சாலையில் பயணிப்பவர்கள் ஆற்றின் இருபுறமும் நின்று தண்ணீர் வருவதை பார்ப்பதற்காக நீண்ட நேரம் காத்திருந்தனர். 

பின்பு தண்ணீர் நெருங்கி வர வர பொதுமக்கள் மற்றும் இளைஞர்கள் மனதில் மகிழ்ச்சி பொங்க, இருகரை தொட்டு கரைபுரண்டு வந்த மழை நீரை மலர்தூவி வரவேற்றனர். இளைஞர்களும், சிறுவர்களும் தண்ணீரை காண்பதற்காக குவிந்து வருகின்றனர். 17 ஆண்டுகளுக்கு பிறகு பாலாற்று வழியாக பெரிய கண்மாய்க்கு தண்ணீர் வரத்து வரதுவங்கியுள்ளது. இதே போன்று தொடர்ந்து ஒரு வாரம் மழை பெய்தால் கடந்த 2005 ல் வெள்ளம் வந்தது போல் இந்த ஆண்டும் வெள்ளம் வரலாம் என எதிர்பார்க்கப்படுகிறது.

மேலும் பல வருடங்களாக பராமரிப்பின்றி காணப்படும் இந்த பாலாற்று படுகையில் கருவேல மரங்கள், சீமை கருவை மரங்கள் காடு போல் வளர்ந்து தண்ணீர் செல்லும் பாதையை மறைத்து உள்ளதால் போர்க்கால அடிப்படையில் இவற்றை அகற்ற இப்பகுதி மக்கள் கோரிக்கை விடுத்துள்ளனர்.

சிவகங்கை மாவட்டம் மானாமதுரை வைகை ஆற்றில் குதித்து தற்கொலைக்கு முயன்ற பெண்ணை சமாதானமாக பேசி போலீசார் மீட்ட சம்பவம் வலைதளத்தில் வேகமாக பரவி வருகிறது. மானாமதுரை பிருந்தாவனம் நகரைச் சேர்ந்த ஆனந்தன் மனைவி மல்லிகா (35) திருமணம் ஆகிய 13 வருடங்கள் ஆகிறது. கணவன் மனைவிக்கு இடையே ஏற்பட்ட தகராறு காரணமாக நேற்று மாலை வைகை ஆற்றில் இறங்கி தற்கொலைக்கு முயன்றுள்ளார்.

வைகை அணையில் இருந்து திறக்கப்பட்ட 7 ஆயிரம் கன அடி தண்ணீர் சென்று கொண்டிருந்த நிலையில் அவ்வழியாக சென்ற பொதுமக்கள் மானாமதுரை போலீசாருக்கு தகவல் கொடுத்தனர்.  பணியில் இருந்த பாலமுருகன், ராஜேஷ் ஆகிய இரு போலீசாரும் ஆற்றில் இறங்கி அந்த பெண்ணை சமாதானமாக பேசி கரைக்கு அழைத்து வந்தனர். பின் பெண்ணின் கணவரை வரவழைத்து கவுன்சிலிங் கொடுத்து வீட்டிற்கு அனுப்பி வைத்தனர். போலீசாரின் இந்த செயல் சமூக வலைதளங்களில் வேகமாக பரவி வருகிறது.

கள்ளக்குறிச்சி மாவட்டம் உளுந்தூர்பேட்டையில் துணை கண்காணிப்பாளர் அலுவலகம் எதிரே சென்னை டு சேலம் நெடுஞ்சாலை அமைந்துள்ளது. தொடர் மழையால் சாலையில் தண்ணீர் பெருக்கெடுத்து ஓடியதால் சாலையின் குறுக்கே  பெரிய வாய்க்கால் போல் பள்ளம் ஏற்பட்டு உள்ளதால் அதிகளவு  வாகனங்கள் செல்வதால் வாகன விபத்துக்கள் ஏற்படும். அபாரமான பள்ளத்தை மூடி சரிசெய்ய வாகன ஓட்டிகளும், சமூக ஆர்வலர்களும் நெடுஞ்சாலை துறை அதிகாரிகளுக்கு தகவல் தெரிவித்தும் எதையும் கண்டுகொள்ளாமல் செவிடன் காதில் சங்கு ஊதுவதுபோல் இருந்தனர். 

அதனால் விபத்து ஏற்படும் முன் வாகன ஓட்டிகளையும், பொதுமக்களையும் பாதுகாக்க வேண்டும் என்று நல்லுள்ளம் கொண்ட காவல்துறையினர் துணை கண்காணிப்பாளர் அலுவலகம் எதிரே சாலையின் குறுக்கே இந்த பெரிய பள்ளத்தை டிஎஸ்பி மணிமொழியன் தலைமையில் சப்-இன்ஸ்பெக்டர் செந்தில் வாசன் தலைமை காவலர்கள் சக்திவேல், திருஞானம், ஆறுமுகம் ஆகிய போலீசார் சாலையோரத்தில் இருந்து  மண்வெட்டியால் மண் எடுத்து பள்ளத்தை முற்றிலும் மூடினார்கள். காவல் துறை அதிகாரிகளின் இச்செயலை செய்வதை அவ்வழியாக சென்ற வாகன ஓட்டிகளும், பொதுமக்கள் மற்றும் சமூக ஆர்வலர்கள் போலீசாரை வெகுவாக பாராட்டினார்கள்.

விபத்தில் சிக்கியவர்களை மருத்துவமனையில் சேர்ப்பவர்களுக்கு ஐந்தாயிரம் ரூபாய் பரிசு வழங்கப்பட உள்ளதாக தமிழக அரசு தெரிவித்துள்ளது. சாலை விபத்தில் பாதிக்கப்பட்டவர்களை மீட்டு பொன்னான நேரத்தில் அருகில் உள்ள மருத்துவமனையில் சிகிச்சைக்காக சேர்த்து உதவி புரியும் நபர்களை ஊக்குவிக்கும் வகையில் மத்திய அரசு திட்டமிட்டுள்ளது.

அந்த வகையில், சாலை விபத்தில் பாதிக்கப்பட்டவர்களை மீட்டு மருத்துவமனையில் சிகிச்சைக்காக சேர்க்கும் நபர்களுக்கு ஐந்தாயிரம் ரூபாய் பரிசாக வழங்கப்படும் என மத்திய சாலைப்போக்குவரத்து மற்றும் நெடுஞ்சாலைத்துறை அமைச்சகம் அறிவித்துள்ளது.  இந்த திட்டத்தை தமிழக போக்குவரத்து துறை செயல்பாட்டிற்கு  கொண்டு வந்துள்ளது.

இதுகுறித்து தமிழக அரசு வெளியிட்டுள்ள அறிக்கையில், இத்திட்டத்தின் முக்கிய நோக்கமானது சாலை விபத்தில் பாதிக்கப்பட்ட நபர்களுக்கு அவசரகால உதவியினை பொதுமக்கள் செய்யவேண்டும் என்றும், ஒரு ஆண்டில் அதிகபட்சம் 5 முறை ஒரு நபருக்கு பரிசுத் தொகை வழங்கப்படும் என்றும் தெரிவிக்கப்பட்டுள்ளது.

குமரிக்கடல் மற்றும் அதனை ஒட்டிய இலங்கை கடற்பகுதியில் நிலவும் வளிமண்டல மேலடுக்கு சுழற்சி காரணமாக தற்போது பரவலாக மழை பெய்து வருகிறது. இதுகுறித்து சென்னை வானிலை ஆய்வு மையம் வெளியிட்டுள்ள அறிக்கையில், இன்று வட கடலோர மாவட்டங்களில் கனமழைக்கு வாய்ப்புள்ளதாக தெரிவிக்கப்பட்டுள்ளது.

மேலும், அரியலூர், சேலம், கோவை உள்பட 9 மாவட்டங்களில் இடிமின்னலுடன் கூடிய கனமழை பெய்ய வாய்ப்புள்ளதாகவும் தெரிவித்துள்ள வானிலை ஆய்வு மையம், சென்னையை பொறுத்தவரை, நாளை வரை இடி மின்னலுடன் கூடிய மிக கனமழை அவ்வப்போது பெய்யக் கூடும் எனவும் அறிவித்துள்ளது. 

தெற்கு அந்தமான் பகுதியில் நாளை புதிய குறைந்த காற்றழுத்த தாழ்வு பகுதி உருவாக வாய்ப்பு உள்ளதாக தெரிவித்துள்ள வானிலை ஆய்வு மையம், இது மேலும் வலுப்பெற்று மேற்கு வட மேற்கு திசையில் நகரக்கூடும் என்றும், இதன் காரணமாக, அடுத்த 3 நாட்களுக்கு குமரிக்கடல், தென்மேற்கு வங்கக்கடல் மற்றும் தென் தமிழக கடலோர பகுதிகளில் இன்று 50 கி.  மீ. வேகம் வரை சூறாவளி காற்று வீசக்கூடும் எனவும் அறிவித்துள்ளது.