மதுரை விமான நிலையம் வந்தடைந்த ராணுவ வீரர் லட்சுமணனின் உடலுக்கு மரியாதை செலுத்தச் சென்ற, நிதியமைச்சர் பி.டி.ஆர். பழனிவேல் ராஜனின் கார் மீது பாஜகவினர் காலணி வீசிய சம்பவம் பரபரப்பை ஏற்படுத்தியுள்ளது.

தீவிரவாதிகள் தாக்குதலில் தமிழக வீரர் வீர மரணம்:

ஜம்மு காஷ்மீர் எல்லையில் ரஜோரி ராணுவ முகாமில், தீவிரவாதிகள் நடத்திய தாக்குதலில் தமிழக வீரர் லட்சுமணன் உட்பட 4 பேர் வீர மரணம் அடைந்தனர். தும்மக்குண்டு அருகே உள்ள டி.புதுப்பட்டி கிராமத்தைச் சேர்ந்தவர் இராணுவ வீரர் லட்சுமணன். இவருக்கு நாட்டின் மீதுள்ள பற்றால் கடந்த 2019ஆம் ஆண்டு ராணுவத்தில் சேர்ந்து, தற்போது நாட்டுக்காக தன் உயிரை விட்டுள்ளார். 

விமான நிலையத்தில் அஞ்சலி:

தீவிரவாத தாக்குதலில் வீர மரணம் அடைந்த லட்சுமணின் உடல்,  காஷ்மீரில் இருந்து ஹைதராபாத் கொண்டு வரப்பட்ட நிலையில், இன்று மதுரை விமான நிலையம் வந்தடைந்தது. அப்போது விமான நிலையத்தில், மறைந்த லட்சுமணனுக்கு தேசியக்கொடி அணிவித்து மலர்வளையம் வைத்து அஞ்சலி செலுத்தப்பட்டது. 

அஞ்சலி செலுத்த வந்த கட்சியினர்:

விமான நிலையம் வந்தடைந்த ராணுவ வீரர் லட்சுமணனின் உடலுக்கு அஞ்சலி செலுத்துவதற்காக தமிழக அரசின் சார்பில், நிதியமைச்சர் பி.டி.ஆர்.  பழனிவேல் தியாகராஜன் வருகை தந்திருந்தார். அப்போது, முதலில் நிதியமைச்சர் அஞ்சலி செலுத்தியபின், பாஜகவினர் அஞ்சலி செலுத்தலாம் என தெரிவிக்கப்பட்டுள்ளது. இதற்கு எதிர்ப்பு தெரிவித்து பாஜகவினர் வாக்குவாதத்தில் ஈடுபட்டனர்.

காலணியை வீசிய பாஜகவினர்:

பாஜகவினர் வாக்குவாதத்தில் ஈடுபட்டிருந்த போது, லட்சுமணனின் உடலுக்கு மரியாதை செலுத்தி விட்டு பி.டி.ஆரின் கார் புறப்பட்டுச் சென்றது. அப்போது, பாஜகவினர் அவர் கார் மீது  காலணியை வீசி எறிந்தனர். இதையடுத்து அங்கு பாதுகாப்புப் பணியில் இருந்த போலீசார், அவர்களை அப்புறப்படுத்திய பின் அமைச்சர் புறப்பட்டார். அஞ்சலி செலுத்த வந்த இடத்தில் கூட இரு தரப்பினருக்கும் இடையே மோதல் ஏற்பட்டது அப்பகுதியில் பரபரப்பை ஏற்படுத்தியது. இதைத்தொடர்ந்து லட்சுமணன் உடலை ஆம்புலன்ஸ் மூலம் அவரது சொந்த ஊரான டி.புதுப்பட்டிக்கு ராணுவ வீரர்கள் எடுத்துச் சென்றனர். 

பாட்டாளி மக்கள் கட்சியினர் என்.எல்.சி நிறுவனத்தை கண்டித்து போராட்டத்தில் ஈடுபட்டனர்.

தமிழர்களை ஏமாற்றும் என்.எல்.சி நிறுவனம்

என்.எல்.சி நிறுவனத்திற்கு தேர்வு செய்யப்பட்ட 299 தொழிலாளர்களில் ஒரு தமிழர் கூட தேர்வு செய்யப்படாதது தமிழர்களுக்கு பெரும் அதிர்ச்சி அளிப்பதாக உள்ளது. நெய்வேலி பழுப்பு நிலக்கரி நிறுவனமான என்.எல்.சி. தமிழ்நாட்டின் தொழில் வளர்ச்சி மற்றும் மின்தேவைக்காக காமராசர் காலத்தில் உருவாக்கப்பட்டது தான் என்.எல்.சி. நிறுவனம். இந்த நிறுவனம் உருவாக்குவதற்கு 30 கிராம மக்கள் தங்களது நிலங்களை அரசுக்கு கொடுத்தனர். அப்போது அவர்களுக்கு வழங்கப்பட்ட உறுதிமொழி, என்.எல்.சி. நிறுவனத்தில் வேலைவாய்ப்பு வழங்கப்படும் என்பது தான்.

 ஆனால், அப்படியான உறுதிமொழியை ஒன்றிய அரசும் என்.எல்.சி நிர்வாகமும் தொடர்ந்து மீறி வருவதாக கூறப்படுகிறது.  அதாவது என்.எல்.சி நிறுவனத்தில் பொறியியல் படித்த பட்டதாரிகளுக்கான வேலை வாய்ப்பை உருவாக்கி, அதனைத் தொடர்ந்து நேர்முகத்தேர்வையும் நடத்தி முடித்திருக்கிறது. இதில் தயாரிக்கப்படும் மின்சாரமும் தனியார் பெருமுதலாளிகளுக்கும், பிற மாநிலங்களுக்கும் தான் கொண்டு செல்லப்படுகிறது.

பாமக போராட்டம்

நெய்வேலி என்.எல்.சி இந்தியா நிறுவனம் அண்மையில் தேர்வு செய்துள்ள  299 பொறியாளர்களில் ஒருவர் கூட தமிழர் இல்லை. பணியில் நியமிக்கப்பட்ட தமிழரல்லாதவர்களை  திரும்பப் பெறக் கோரி பாமகவினர் நெய்வேலி ஆர்.சி.கேட்  அருகே என்.எல்.சி நிறுவனத்தை கண்டித்து கண்டன ஆர்ப்பாட்டம் செய்தனர்

கடலூர் மாவட்டம் நெய்வேலியில் என்.எல்.சி இந்தியா லிமிடெட் நிறுவனம் உள்ளது. இந்த நிறுவனத்தில் சுரங்கம் ஒன்று, சுரங்கம் ஒன்று விரிவாக்கம், சுரங்கம் 2 என மூன்று நிலக்கரி சுரங்கங்கள் உள்ளது இதன் மூலம் நிலக்கரி வெட்டி எடுக்கப்பட்டு மின் உற்பத்தி செய்யப்பட்டு வருகிறது. இந்த நிலையில் அன்மையில் நடைபெற்ற பொறியாளர் தேர்வில் ஒருவர் கூட தமிழர்கள் இல்லை என்.எல்.சி நிறுவனம் தமிழர்களை புறக்கணிக்கிறது. எனவே 299 பொறியாளர்கள் நியமனத்தை ரத்து செய்ய கோரி பாமகவினர் நெய்வேலி ஆர் சி கேட்  அருகே என்.எல்.சி நிறுவனத்தை கண்டித்து ஆர்ப்பாட்டத்தில் ஈடுபட்டனர்.

உணவுத் திருவிழா

சென்னை தீவுத்திடலில் உணவு பாதுகாப்புத்துறை சென்னை சார்பில் நடைபெற்று வரும் 'சிங்கார சென்னை உணவுத் திருவிழாவின் 2-வது நாளான இன்று பள்ளி மாணவர்களுக்கு உணவு தொடர்பான பல்வேறு போட்டிகள் நடைபெற்றது. இந்நிகழ்வில்  சிறப்பு விருந்தினர்களாக சமையல் கலைஞர் தாமு, நடிகர் இமான் அண்ணாச்சி, பட்டிமன்ற பேச்சாளர் சசி லயா உள்ளிட்டோர் கலந்துகொண்டனர். அடுப்பில்லாமல் சமைத்து 1500 பள்ளி மாணவர்கள் TRUMPH உலக சாதனை புத்தகத்தில் இடம் பெற்று சாதனை படைத்தனர். 

உறுதிமொழி

இந்நிகழ்வில் பள்ளி மாணவர்களுக்கு உணவு பாதுகாப்பு குறித்தும் பாரம்பரிய உணவுகளின் பெருமை குறித்தும் பள்ளி மாணவர்களுக்கு விழிப்புணர்வு ஏற்படுத்தப்படவுள்ளது. மேலும் பாரம்பரிய உணவுகளை உட்கொள்வோம் என சமையல் கலைஞர் தாமு வாசிக்க மாணவர்கள் உறுதிமொழி ஏற்றுக்கொண்டனர்.  இந்நிகழ்வில் மாணவர்களிடையே பேசிய பட்டிமன்ற பேச்சாளர் சசிலாயா, தற்கொலை எண்ணத்தை கைவிட வேண்டும். மாணவர்கள் எந்த பிரச்சனையாக இருந்தாலும் பெற்றோரிடம் தெரிவிக்க வேண்டும் என மாணவர்களுக்கு தன்னம்பிக்கை ஆலோசனைகளை வழங்கினார். 

அசத்திய மாணவர்கள்

நிகழ்ச்சியின் ஒரு பகுதியில் சினிமா பாடல்களை ஒலிபரப்ப மாணவர்கள் உற்சாமாக நடனமாடினர். விழாவின் ஒரு பகுதியாக பள்ளி மாணவ மாணவிகள் மாலை நேரங்களில் உண்ணக்கூடிய நொறுக்கு தீனிகளுக்கு பதிலாக சத்தான உணவுகளை தாமாகவே செய்து உண்ணும் வகையில் வழிகாட்டுதல்கள் வழங்கும் விதமாக அடுப்பில்லா சமையல் என்ற பெயரில் புதிய முயற்சியாக பல்வேறு உணவு வகைகள் செய்து சாதனை செய்யும் நிகழ்வு நடைபெற்றது.

அதாவது அடுப்பின்றி மாணவர்களே தாமாக மாலை நேரங்களில் தங்களுக்கு தேவையான ஊட்டச்சத்து உணவுகளை தயாரிக்கும் விதமாக சத்துமாவு உருண்டை, சிறுதானிய உருண்டை , பிரட் சாலட், ஃப்ரூட் சாலட் , மசாலா பயிறு உள்ளிட்ட 10 வகையான தின்பண்டங்கள் மாணவர்களே செய்யும் வண்ணம் பயிற்சி வழங்கப்பட்டு ஒரே நேரத்தில் மாணவர்கள் தின்பண்டங்களை செய்து சாதனை படைத்தனர். 1500க்கும் மேற்பட்ட மாணவர்கள் ஒரே நேரத்தில் உணவு சமைத்த இந்த நிகழ்ச்சி டிரையம்ப் உலக உலக சாதனை புத்தகத்தில் இடம் பெற்றுள்ளது.

தேனி பெரியகுளம் அருகே, குப்பைகள் கொண்டு செல்லும் வாகனத்தில், தேசியக்கொடி எடுத்துச் சென்று பொது மக்களுக்கு விநியோகம் செய்யப்பட்ட சம்பவம் அதிர்ச்சியை ஏற்படுத்தியுள்ளது. 

தேசியக்கொடி விநியோகம்:

நாடு முழுவதும் 75வது ஆண்டு சுதந்திர தின விழா கொண்டாடப்பட உள்ள நிலையில், நாட்டு மக்கள் அனைவரும் தங்களது வீடுகளில் தேசியக்கொடி ஏற்ற வேண்டும் எனப் பிரதமர் மோடி கேட்டுக்கொண்டார். இதைத்தொடர்ந்து, தமிழகத்தில் மாநகராட்சி, நகராட்சி, பேரூராட்சி மற்றும் ஊராட்சிகளில் வீடு வீடாகச் சென்று பொதுமக்களுக்குத் தேசியக் கொடி விநியோகம் செய்யப்படுகிறது. 

குப்பை வண்டியில் தேசியக்கொடி:

இதன் தொடர்ச்சியாக, தேனி மாவட்டம் பெரியகுளம் அருகே, தென்கரை பேரூராட்சி நிர்வாகம் சார்பில், வீடு வீடாகச் சென்று தேசியக் கொடிகள் வழங்க ஏற்பாடு  செய்யப்பட்டது.  இந்நிலையில், பெரியகுளம் தென்கரை பாரதி நகர் பகுதியில், வீடுகள் மற்றும் தெருக்களில் இருந்து குப்பைகளை அள்ளி எடுத்துச் செல்லும் வாகனத்தில், தேசியக்கொடிகள் ஏற்றி வந்து விநியோகம் செய்யப்பட்ட சம்பவம் அதிர்ச்சியை ஏற்படுத்தியுள்ளது.

சமூக ஆர்வலர்கள் கோரிக்கை:

குப்பைகள் அள்ளும் வாகனத்தில் தேசியக் கொடி ஏற்றி வரப்பட்டது காண்போரை முகம் சுளிக்க வைத்தது. அதுமட்டுமின்றி இது தேசியக் கொடியை அவமதிக்கும் செயல் எனவும், இதுகுறித்து மாவட்ட நிர்வாகம் உரிய நடவடிக்கை எடுக்க வேண்டும் எனவும் சமூக ஆர்வலர்கள் கோரிக்கை விடுத்துள்ளனர்.

ஊழலற்று செயல்பட்ட தன்னை பாஜக பயன்படுத்திக் கொள்ள வேண்டுமே தவிர, நான் சென்று என்னை பயன்படுத்திக் கொள்ளுங்கள் என கேட்க முடியாது என நடிகர் எஸ்.வி. சேகர் நாகர்கோவிலில் செய்தியாளர்களுக்கு பேட்டி அளித்தார்.

கன்னியாகுமரி மாவட்டம் நாகர்கோவிலில் உள்ள அற்புத ஶ்ரீ ராகவேந்திர சுவாமக ஆலயத்தில், ஸ்ரீ ராகவேந்திரரின் 351 வது ஆராதனை விழா நடைபெற்றது. இதில் நடிகர் எஸ்.வி.சேகர் சிறப்பு விருந்தினராக கலந்து கொண்டு, ராகவேந்திரரின் தேர்த்திருவிழாவில் பங்கேற்றார். 

பின்னர் ராகவேந்திரர் குறித்த புத்தகத்தை வெளியீட்டார். மேலும், செய்தியாளர்களை சந்தித்த அவர், " வரும் 2024 நாடாளுமன்ற தேர்தலில் மோடி தலைமையிலான பாஜக அரசு, 400 இடங்களை கைப்பற்றி பெரும்பான்மையாக ஆட்சி அமைக்கும், அதே நேரத்தில் தமிழகத்தில் எதிர்த்து பேசி வரும் கட்சியினர் ஆச்சிரியத்தில் வாயடைத்து நிற்பார்கள் " என தெரிவித்தார். மேலும் பேசிய அவரிடம், கனல் கண்ணன் சர்ச்சை பேச்சு குறித்து கேள்வி எழுப்பப்பட்டது. இதற்கு பதிலளித்த அவர்,  இந்த விஷயத்தில் கருத்து சுதந்திரம் ஒவ்வொருவருக்கும் உண்டு. ஆனால் உங்கள் கருத்தை மட்டும் தான் சொல்ல முடியும், என் கருத்தை சொல்ல உரிமை இல்லை என்றால், அது கருத்து சுதந்திரம் இல்லை.. கருத்து திணிப்பு..என்றும் ஊழலற்று செயல்பட்ட தன்னை, பாஜக பயன்படுத்திக் கொள்ள வேண்டுமே தவிர தானே சென்று தன்னை பயன்படுத்திக் கொள்ளுங்கள் என கேட்க முடியாது. சிறப்பாக செயலாற்றும் அண்ணாமலை தன்னை பயன்படுத்திக்கொண்டால் மேலும் சிறப்பாக பணியாற்ற முடியும் என பேசியுள்ளார்.