தொழில்நுட்ப வளர்ச்சிக்கு ஏற்ப, முதலீட்டாளர்கள் புதுவித முதலீடுக்கான வழிகளை கண்டறிந்து வருகின்றனர். ஒரு காலத்தில் தங்கம், டாலர் என முதலீடு செய்து வந்தவர்களும் தற்போது கிரிப்டோ கரன்சி என்ற மெய்நிகர் நாணயம் பக்கம் திரும்பியுள்ளனர்.

உலகளவில் பெரும்பாலானோர்,  கிரிப்டோகரன்சி என்ற டிஜிட்டல் பரிவர்த்தனை முறையை பயன்படுத்தி வருவதாக கூறப்படுகிறது. இதற்கு காரணம் இவ்வகை பணபரிவர்த்தனையில் அரசாங்கத்தின் தலையீடு இருக்காது என்பதுடன், இது உலகெங்கும் பயன்படுத்தும் ஒரே கரன்சியாக இருப்பதாகவும் கூறப்படுகிறது.

மெய்நிகர் நாணயங்களான பிட்காயின், ஈத்தரியம், டெதர் ஆகியவற்றை ஒருசில நாடுகளே அங்கீகரித்துள்ளன. ஆனால் மெய் நிகர் நாணயத்தை சிலர் சட்டவிரோதமாக பயன்படுத்தி போதைப்பொருள் உள்ளிட்டவற்றை வாங்கி குற்றச்செயலில் ஈடுபடுகின்றனர். 

இந்த சம்பவம் வெளிச்சத்திற்கு வந்ததை அடுத்து, அதுகுறித்து பாஜக தலைவர் ஜெயந்த் சின்ஹா தலைமையிலான நாடாளுமன்ற குழு ஆலோசனை நடத்தியது. அதன் நன்மைகள், தீமைகள் ஆராயப்பட்ட நிலையில், கிரிப்டோ கரன்சியை தடை செய்ய முடியாது, மாறாக ஒழுங்குமுறைப்படுத்துவது அவசியம் என அறிவுறுத்தப்பட்டது. 

அதன்படி, வருகிற 29ம் தேதி தொடங்கவுள்ள நாடாளுமன்ற குளிர்கால கூட்டத்தொடரில் கிரிப்டோ கரன்சி முறையை ஒழுங்குமுறை படுத்துவதற்கான மசோதாவை தாக்கல் செய்ய மத்திய அரசு திட்டமிட்டுள்ளது. இந்த மசோதா அதிகாரப்பூர்வ டிஜிட்டல் கரன்சியை உருவாக்கவும், தனியார் கிரிப்டோ கரன்சிகளுக்கு தடைவிதிக்கவும் வழிவகை செய்யும் என கூறப்படுகிறது. 
 
இதனிடையே கிரிப்டோ கரன்சி தொடர்பான மசோதா தாக்கல் விவரம் வெளியானதும்,  டிஜிட்டல் கரன்சிகளின் விலை வீழ்ச்சி அடைந்துள்ளது. குறிப்பாக பிட்காயின் விலை 18 புள்ளி 53 சதவீதம் சரிந்துள்ளது.

இதேபோல் ஈதெரியம் 15 புள்ளி 58 சதவீதமும், டெதர் 18 புள்ளி 29 சதவீதமும் சரிந்துள்ளது. நேற்று மாலை, பிட்காயின் விலை மட்டும் சுமார் 41 கோடி ரூபாய் சரிந்ததாக நியூயார்க்கில் உள்ள பிரபல கிரிப்டோ கரன்சி வலைதளம் குறிப்பிட்டுள்ளது. 

ஏர்டெலை தொடர்ந்து, வோடஃபோன் ஐடியா நிறுவனமும் ப்ரீபெய்டு சேவைக்கான கட்டணத்தை 25 சதவீதம் உயர்த்தியுள்ளது.

ஏர்டெல் நிறுவனம் தனது  ப்ரீபெய்டு சேவைக்கான கட்டணத்தை 20 முதல் 25 சதவீதம் வரை உயர்த்தியது வாடிக்கையாளர்களிடையே  அதிர்ச்சியை ஏற்படுத்தியுள்ளது.

இந்தநிலையில் ஏர்டெலை தொடர்ந்து வோடபோன் நிறுவனமும் ப்ரீபெய்டு சேவைக்கான கட்டணத்தை 25 சதவீதம் உயர்த்த உள்ளது. இந்த கட்டண உயர்வானது வருகிற 25ம் தேதி முதல் நடைமுறைக்கு வரவுள்ளது. 

அதன்படி பேசிக் ப்ளானுக்கான கட்டணம் 79 ரூபாயிலிருந்து  99 ரூபாயாக ஆக உயர்த்தப்பட்டுள்ளது. அதேபோல் உச்சபட்ச டாப் அப் கட்டணத்திலும் 500 ரூபாய் உயர்த்தப்பட்டு,  2 ஆயிரத்து 899 ரூபாய் என அறிவிக்கப்பட்டுள்ளது. இந்த கட்டண உயர்வு மூலம், தொழில்துறையில் தற்போது நிலவும் நிதி நெருக்கடி நிலையை சமாளிக்க முடியும் என வோடபோன் ஐடியா தெரிவித்துள்ளது. 
 

ஏர்டெல் நிறுவனம் அதன் பிரீபெய்டு கட்டணத்தை 20 சதவீதம் அளவுக்கு உயர்த்தியுள்ளது.

ஜியோவின் வருகை காரணம் வாடிக்கையாளர் களை தக்க வைத்துக் கொள்ள பல்வேறு சலுகைகளை வழங்கியதன் விளைவாக கடும் நிதி நெருக்கடியில் சிக்கி தவித்த ஏர்டெல் நிறுவனம் அதன் ப்ரிபெய்டு கட்டணங்களை 20 சதவீதம் அளவுக்கு உயர்த்தியுள்ளது.

79 ரூபாய் முதல் 498 ரூபாய் வரைஉள்ள அனைத்து திட்டங்களுக்கும் கட்டணம் உயர்த்தப்பட்டுள்ளது. 

இந்த புதிய கட்டண நடைமுறை நவம்பர் 26- ஆம் தேதி முதல் நடைமுறைக்கு வருகிறது. முன்னதாக 59 லட்சம் வாடிக்கையாளர்களை இழந்த ஏர்டெல் நிறுவனம் மீண்டும் கட்டண உயர்வை அதிகரித்திருப்பது அதன் பங்குதாரர்களிடையே பதற்றத்தை ஏற்படுத்தியுள்ளது.

பிரபல டிஜிட்டல் பரிவர்த்தனைத் தளமான பேடிஎம் முதல் முறையாக இன்று தனது பங்கு விற்பனையை தொடங்கிய நிலையில் முதல் நாளிலேயே 18, 300 கோடி ரூபாய் அளவுக்கு பங்குகள் விற்பனையாகியுள்ளது.

டிஜிட்டல் பரிவர்த்தனைத் தளமான பேடிஎம் நிறுவனத்தின் தலைமை நிறுவனமான ஒன்97 கம்யூனிகேஷன்ஸ் பங்கு விற்பனையின் மூலம் நிதி திரட்ட முடிவு செய்தது.

ஒரு பங்கின் விலை 2,080 முதல் 2,150 ரூபாய் என நிர்ணயிக்கப்பட்டு இன்று முதல் பங்குகளின் விற்பனையை தொடங்கியது. 

விற்பனையை தொடங்கிய சிறிது நேரத்திலேயே முதலீட்டாளர்களிடம் அமோக வரவேற்பை பெற்ற பேடிஎம் பங்குகள், 18,300 கோடி ரூபாய் அளவுக்கு நிதி திரட்டியுள்ளது. இதன் மூலம் நாட்டின் 50 பெறு நிறுவனங்களின் பட்டியலில் பேடிஎம் இணைந்துள்ளது.

இந்தியாவில் கடந்த செப்டம்பர் மாதத்தில் மட்டும் சுமார் 22 லட்சம் வாட்ஸ் அப் பயனாளர்களின் கணக்குகள் முடக்கப்பட்டுள்ளதாக அந்நிறுவனம் அறிவித்துள்ளது.

மத்திய அரசில் புதிய தொழில்நுட்ப விதிகள் நடைமுறைக்கு இணங்க நாட்டின் பாதுகாப்புக்கும், இறையாண்மைக்கும் குந்தகம் விளைவிக்கும் வகையிலான பதிவுகளை வெளியிடும் வாட்ஸ் ஆப் கணக்குகளை அந்நிறுவனம் முடக்கி வருகிறது.

அதன்படி செப்டம்பர் மாதத்தில் எடுக்கப்பட்ட நடவடிக்கைகள் குறித்த மாதாந்திர அறிக்கையை வாட்ஸ் ஆப் வெளியிட்டுள்ளது. 

அதன்படி கடந்த செப்டம்பர் மாதத்தில் மட்டும் விதிமுறைகளை மீறியது தொடர்பாக 22 லட்சத்து 9 ஆயிரம் வாட்ஸ் அப் பயனாளர்களின் கணக்குகள் முடக்கப்பட்டுள்ளதாக வாட்ஸ் ஆப் நிறுவனம் தெரிவித்துள்ளது.