போதை தலைக்கேறிய பயணி விமானத்தில் ரகளையில் ஈடுபட்டதால் விமானம் அவசரமாக தரையிறக்கப்பட்ட சம்பவம் பரபரப்பை ஏற்படுத்தியுள்ளது.

கடந்த சனிக்கிழமை கத்தார் தலைநகர் தோகாவில் இருந்து இண்டிகோ விமானம் ஒன்று பெங்களூருக்கு புறப்பட்டுள்ளது. விமானம் நடுவானில் பறந்துக் கொண்டிருக்கும் போது போதை தலைக்கேறிய பயணி ஒருவர் குடிபோதையில் சக பயணிகளுடன் ரகளையில் ஈடுபட்டதாக கூறப்படுகிறது.

இதனால் விமானமானது மும்பை சர்வதேச விமான நிலையத்தில் அவசரமாக தரையிறக்கப்பட்டது.  இதையடுத்து போதை தலைக்கேறி ரகளையில் ஈடுபட்ட பயணியை மும்பை போலீசார் 3 பிரிவுகளின் கீழ் வழக்கு பதிவு செய்து கைது செய்தனர். இதனால் மும்பை விமான நிலையத்தில் சிறிது நேரம் பரபரப்பு ஏற்பட்டது. 

டெல்லியில் ‘புல்டோசர் அரசியலுக்கு’ முற்றுப்புள்ளி வைப்பது தொடர்பாக முதலமைச்சர் கெஜ்ரிவால், எம்.  எல்.ஏக்களுடன் இன்று ஆலோசனை நடத்தினார்.  

டெல்லியின் முதலமைச்சராக கெஜ்ரிவால் இருந்தாலும், 3 மாநகராட்சிகளும் பாஜக வசம் உள்ளன. இதனால் அங்கு கடந்த சில நாட்களாக மக்களின் எதிர்ப்பையும் மீறி புல்டோசர் கொண்டு ஆக்ரமிப்புகள் அகற்றப்பட்டு வருகின்றன.  இதனை எதிர்த்து போராட்டத்தில் இறங்கிய ஆம் ஆத்மி எம்.  எல்.ஏ கைது செய்யப்பட்டார்.

இது  இரு கட்சிகளுக்கும் இடையே மீண்டும் மோதல் போக்கை ஏற்படுத்தியுள்ளது. இந்நிலையில், புல்டோசர் அரசியல் குறித்து விரிவாக விவாதித்து தீர்வு காண சட்டமன்ற உறுப்பினர்களை கூட்டிய முதலமைச்சர் கெஜ்ரிவால், இதனை முடிவுக்கு கொண்டு வருவது தொடர்பான மாற்று வழிகள் குறித்து ஆலோசித்தார். 

மனைவியா் தினம் கொண்டாட வேண்டும் என மத்திய இணையமைச்சர் ராம்தாஸ் அத்வாலே வலியுறுத்தியுள்ளார்.

மகாராஷ்டிர மாநிலம் சாங்லியில் நடைபெற்ற நிகழ்ச்சியில் கலந்துகொண்டு  மத்திய சமூக நீதி மற்றும் அதிகாரமளித்தல் துறை இணை அமைச்சர் ராம்தாஸ் அத்வாலே பேசினார்.

அப்போது நமது நல்லது, கெட்டது என அனைத்திலும் மனைவி நம்முடன் துணையாக இருப்பதாகவும், ஒவ்வொரு ஆண்மகனின் வெற்றிக்குப் பின்னாலும் ஒரு பெண் இருக்கிறாா் என கூறுவார்கள் என்றும் குறிப்பிட்டார்.   எனவே மனைவியா் தினம் கொண்டாடப்பட வேண்டும் எனவும் வலியுறுத்தினார். 

மலை மாவட்ட டாஸ்மாக் கடைகளில் மது வாங்குவோர் காலி பாட்டில்களை வனப்பகுதி மற்றும் சாலையோரம் வீசிச் செல்கின்றனர். சிதறிக் கிடக்கும் பாட்டில்களால் வனவிலங்குகள் காயமடைவதுடன் சுற்றுச்சூழல் பாதிக்கப்படுகிறது.

இதையடுத்து சென்னை உயர் நீதிமன்ற உத்தரவுப்படி, மாவட்டத்தின் 15 இடங்களில் காலி மதுபாட்டில்களை சேகரிக்கும் மையம் தொடங்கப்பட்டுள்ளது. இந்தநிலையில் இன்று முதல் டாஸ்மாக் கடைகளில் விற்பனை செய்யப்படும் மது பாட்டில்களில் 'கூடுதலாக 10 ரூபாய் பெறப்படும் என்ற ‘ஸ்டிக்கர்' ஒட்டப்பட்டு விற்பனை செய்யப்பட உள்ளது. 

பயன்படுத்திய பின்னர் காலி பாட்டில்களை டாஸ்மாக் கடைகளில் கொடுத்து கூடுதலாக செலுத்திய பத்து ரூபாயை திரும்பப் பெற்றுக் கொள்ளலாம்.  சுற்றுச்சூழலை பாதுகாக்க எடுக்கப்பட்டுள்ள இந்த நடவடிக்கைக்கு மது குடிப்போர் முழு ஒத்துழைப்பு வழங்க வேண்டும் என்று மாவட்ட ஆட்சியர் அம்ரித் கேட்டுக் கொண்டுள்ளார்.

காஷ்மீர் ஃபைல்ஸ் படம் குறித்துப் பேசும் பிரதமர் மோடி காஷ்மீர் பண்டிட்டுகளின் இனப்படுகொலை குறித்து பேச மறுப்பதாக காங்கிரஸ் முன்னாள் தலைவர் ராகுல்காந்தி தெரிவித்துள்ளார்.

சதூராவில் வருவாய்த்துறை ஊழியராக பணியாற்றி வந்த ராகுல்பட் என்பவரை அலுவலகத்துக்குள் புகுந்து பயங்கரவாதிகள் சுட்டுக்கொன்றனர். இந்நிலையில் ராகுல் பட்டின் மனைவி கதறும் வீடியோவை தமது  டுவிட்டர் பக்கத்தில் பகிர்ந்த ராகுல்காந்தி, பாதுகாப்பிற்கு பொறுப்பேற்று காஷ்மீரில் அமைதியை ஏற்படுத்துமாறு பிரதமரை வலியுறுத்தியுள்ளார்.  பாஜகவின் கொள்கைகளால் இன்று காஷ்மீரில் பயங்கரவாதம் உச்சம் தொட்டுள்ளது எனவும் அவர் சாடினார்.