விண்வெளிக்கு சுற்றுலா சென்ற பொதுமக்கள் 4 பேர், பத்திரமாக பூமிக்கு திரும்பினர்.

அமெரிக்காவை சேர்ந்த பிரபல கோடீஸ்வரர் எலன் மாஸ்க் என்பவருக்கு சொந்தமான தனியார் விண்வெளி ஆராய்ச்சி நிறுவனமான ஸ்பேஸ் எக்ஸ், பொதுமக்களை விண்வெளிக்கு சுற்றுலா அழைத்து செல்லும் திட்டத்தை வெற்றிகரமாக செயல்படுத்தி வரலாற்று சாதனை படைத்துள்ளது. இந்த லட்சிய பயணத் திட்டத்தில் 2 ஆண்கள் மற்றும் 2 பெண்கள் விண்வெளிக்கு சுற்றுலா சென்றுள்ளனர்.

தொழிலதிபர் ஜாரிட் ஐசக்மேன், மருத்துவர் ஹேலே ஆர்சனாக்ஸ், அமெரிக்க விமானப்படை முன்னாள் வீரர்‌ கிறிஸ் செம்ப்ரோஸ்கி, புவிஅறிவியல் வல்லுநர் சியான் பிராக்டர் ஆகிய 4 பேரும், 3 நாட்கள் பூமியை சுற்றி வலம் வந்து, விண்வெளியில் இருந்து பூமியை புகைப்படம் பிடித்து மகிழ்ந்தனர். இந்நிலையில், சுற்றுலா பயணிகள் 4 பேரை சுமந்து சென்ற ஸ்பேஸ் எக்ஸ் நிறுவனத்தின் விண்கலம், அமெரிக்காவின் புளோரிடாவில் உள்ள அட்லாண்டிக் கடலில் வெற்றிகரமாகத் தரையிறங்கியது.

ஆப்கானிஸ்தானில் தலிபான்கள் ஆட்சி அதிகாரத்தைக் கைப்பற்றியுள்ள நிலையில், அந்நாட்டை சேர்ந்த மக்கள் மற்றும் நாட்டிலிருந்த பிற நாட்டை சேர்ந்த மக்கள் அனைவரும் ஆப்கானிஸ்தானை விட்டு வெளியேறியுள்ளனர். இந்நிலையில் ஆப்கானிஸ்தானில் இருக்கக்கூடிய ஒரு கோடிக்கும் அதிகமான குழந்தைகள் போதிய அளவு உணவு, மருந்து மற்றும் குடிநீர் உள்ளிட்ட அத்தியாவசிய தேவைகள் இன்றி தவித்து வருவதாக யுனிசெப் அமைப்பு தெரிவித்துள்ளது.

 இது குறித்த அந்நாட்டின் யுனிசெப் அமைப்பின் தலைமை தொடர்பு அதிகாரி கூறுகையில், ஐந்து வயதுக்கும் கீழ் உள்ள ஒரு கோடிக்கும் மேற்பட்ட குழந்தைகள் அத்தியாவசிய வசதிகள் மற்றும் போதிய அளவு உணவு கிடைக்காத சூழலில் ஊட்டச்சத்து இன்றி மருத்துவமனைகளில் இருப்பதாகவும், அவர்களுக்கு மனித நேய உதவி அளிக்க வேண்டிய அவசர தேவை உள்ளதாகவும் தெரிவித்துள்ளார். மேலும் கடந்த மாதத்தில் ஊட்டச்சத்து குறைபாட்டால் மருத்துவமனைகளில் அனுமதிக்கப்படும் குழந்தைகளின் எண்ணிக்கை அதிகரித்துள்ளதாகவும் அவர் தெரிவித்துள்ளார்.

அமெரிக்கா உள்ளிட்ட பல நாடுகள் இணைந்து விண்வெளியில் சர்வதேச அளவிலான ஆய்வு மையத்தை அமைத்துள்ளன. இதற்கு போட்டியாக சீனாவும் தனியாக ஒரு விண்வெளி மையத்தை அமைத்துள்ளது. பூமியில் இருந்து 380 கிலோ மீட்டர் தொலைவில் உள்ள இம்மையத்தை கடந்த 3 மாதங்களாக 3 சீன வீரர்கள் அமைத்து வந்தனர். இப்பணி வெற்றிகரமாக முடிந்த நிலையில் அவர்கள் ஷெங்ஜூ என்ற விண்கலம் மூலம் பூமிக்கு திரும்பினர்.

 அவர்கள் வந்த விண்கலம் சீனாவில் உள்ள கோபி பாலைவனத்தில் தரையிறங்கும் காட்சிகளை சீன அரசுத் தொலைக்காட்சி வெளியிட்டுள்ளது. விண்வெளி நிலையத்திலிருந்து புறப்பட்ட விண்கலத்தில் இருந்த வீரர்கள் பூமிக்கு அருகில் வந்தவுடன் பாராசூட் மூலம் தரையிறங்குன்றனர்.

 பின்னர் அவர்களை தொழில்நுட்ப பணியாளர்கள் உரிய முறையில் பாராசூட்டிலிருந்து வெளியேற்றி மருத்துவ பரிசோதனைக்கு அனுப்பினர். அமெரிக்கா, ரஷ்யாவுக்கு அடுத்து 3ஆவது நாடாக விண்வெளிக்கு மனிதர்களை சீனா அனுப்பி வருகிறது. இதுவரை 13 சீனர்கள் விண்வெளிக்கு சென்றுள்ளனர்.

ஆப்கானிஸ்தானை விட்டு அமெரிக்க படைகள் வெளியேறியபோது, காபூல் விமான நிலையத்தை குறிவைத்து ஐ.எஸ். பயங்கரவாத அமைப்பு தற்கொலைப்படை தாக்குதல் நடத்தியது. அதில் 13 அமெரிக்க வீரர்கள் உள்பட 175 பேர் உயிரிழந்துள்ளனர்.

அதற்கு பதிலடி கொடுக்கும் வகையில் அமெரிக்கா நடத்திய ஆளில்லா ட்ரோன் விமான தாக்குதலில், ஒரே குடும்பத்தை சேர்ந்த அப்பாவி மக்கள் 10 பேர் கொல்லப்பட்டனர்.   
இறந்தவர்களில் ஆறு குழந்தைகள் இருந்ததாக கூறப்படுகிறது.

இதற்கு மன்னிப்பு கேட்டுக்கொண்ட அமெரிக்க பாதுகாப்பு செயலாளர் லாயிட் ஆஸ்டின், ட்ரோன் தாக்குதலில் பாதிக்கப்பட்டவர்களுக்கு இரங்கல் தெரிவித்துள்ளார். பயங்கரவாதிகள் கொல்லப்படவில்லை என்றும், இந்த மோசமான தவறில் இருந்து கற்றுக்கொள்ள முயற்சிப்பதாகவும், அவர் அறிக்கையில் குறிப்பிட்டுள்ளார்.

ஸ்பெயினின் லா பால்மாவில் சுமார் 85ஆயிரம் மக்கள் வாழ்ந்து வருகின்றனர். கேனரி தீவுகள் எட்டு தீவுகளால் ஆன ஒரு எரிமலைத் தீவுக்கூட்டமாகும். கடந்த சில நாட்களாக லா பால்மா தீவைச் சுற்றி 4,200 க்கும் மேற்பட்ட நில அதிர்வுகள் உணரப்பட்டுள்ளது. மேலும், இந்த பகுதியில் வரும் நாட்களில் நிலநடுக்கம் அதிகரிக்க வாய்ப்பிருப்பதால் இது எரிமலையாக உருவாக அதிக வாய்ப்புள்ளது என்று அந்நாட்டு தேசிய புவியியல் ஆய்வு மையம்  எச்சரிக்கை விடுத்துள்ளது. 

குறைந்த காலத்தில் அதிகமான நில நடுக்கங்கள் ஏற்பட்டுள்ள காரணத்தால் அங்கு எரிமலை வெடிக்க வாய்ப்புள்ளதாக அந்நாட்டு அதிகாரிகள் தெரிவித்துள்ளனர். இந்நிலையில், இதுவரை ஏற்பட்டுள்ள நிலநடுக்கம் காரணமாக கும்ப்ரே விஜா எரிமலையில் தீப்பிழம்புகள் ஏற்பட்டு லார்வா குழம்பு வெளிவரத் தொடங்கியுள்ளது குறிப்பிடத்தக்கது.