டைனோசர் உலகில் புதிய திருப்பம்! பல ஆண்டுகளாக மறைந்திருந்த ரகசியம் அம்பலம்!

டைனோசர்கள் வாழ்ந்த காலம் எப்படி இருந்திருக்கும்? அவற்றின் உடலில் ரத்தம் எப்படி ஓடியிருக்கும்? அவற்றின் உடல் உறுப்புகள் எவ்வாறு செயல்பட்டிருக்கும்? இத்தகைய கேள்விகளுக்கு விடை தேடி பல ஆண்டுகளாக விஞ்ஞானிகள் ஆய்வு செய்து வருகின்றனர். பொதுவாக, கோடிக்கணக்கான ஆண்டுகளுக்கு முன்பு வாழ்ந்த உயிரினங்களின் எலும்புகள் மட்டுமே புதைபடிவங்களாகக் கிடைக்கும். அவற்றின் மென்மையான திசுக்கள் மற்றும் ரத்தம் போன்ற உயிரியல் பொருட்கள் இவ்வளவு நீண்ட காலம் அப்படியே பாதுகாக்கப்படுவது மிகவும் அரிதானது. ஆனால், தற்போது பிரேசிலில் கண்டெடுக்கப்பட்ட 11.5 கோடி ஆண்டுகள் பழமையான டைனோசர் எலும்பில் ரத்த அண்களை ஒத்த நுண்ணிய அமைப்புகளும், ரத்தத்துடன் தொடர்புடைய வேதிப்பொருட்களின் தடயங்களும் கண்டறியப்பட்டுள்ளன. இந்தக் கண்டுபிடிப்பு அறிவியல் உலகில் பெரும் கவனத்தைப் பெற்றுள்ளது.

ஆய்வில் ஆராய்ச்சியாளர்கள் ஆய்வு செய்த புதைபடிவம், 'Aratasaurus museunacionali' என்ற இறைச்சி உண்ணும் டைனோசருடையது. சுமார் 11.5 கோடி ஆண்டுகளுக்கு முன்பு இன்றைய பிரேசில் நாட்டின் வடகிழக்குப் பகுதியில் இந்த டைனோசர் வாழ்ந்துள்ளது. சுமார் 3.1 மீட்டர் நீளம் கொண்ட இந்த டைனோசர், உயிரிழந்தபோது நான்கு வயது அளவிலான இளம் பருவத்தில் இருந்திருக்கலாம் என்று ஆய்வாளர்கள் கணித்துள்ளனர். இதன் எலும்புகள் கடந்த 2008ஆம் ஆண்டு பிரேசிலின் சியாரா (Ceara) மாநிலத்தில் உள்ள ஒரு சுரங்கப் பகுதியில் கண்டெடுக்கப்பட்டன. பின்னர் அவை ஆய்வுக்காகப் பயன்படுத்தப்பட்டன.

எலும்புகளை ஆராய்ந்தபோது, அவற்றின் உள்ளே ரத்த நாளங்கள் சென்றிருக்கக்கூடிய மிகச்சிறிய பாதைகளில் நீள்வட்ட வடிவிலான நுண்ணிய அமைப்புகள் இருப்பதை விஞ்ஞானிகள் கண்டறிந்தனர். அவற்றின் வடிவம், அளவு மற்றும் அமைப்பு ஆகியவை சிவப்பு ரத்த அண்களைப் போன்றிருந்தன. இதை உறுதிப்படுத்த பல்வேறு நவீன தொழில்நுட்பங்களைப் பயன்படுத்தி ஆய்வுகள் மேற்கொள்ளப்பட்டன. எலக்ட்ரான் நுண்ணோக்கி மூலம் எலும்புகளின் உட்புறம் ஆராயப்பட்டது. மேலும், வேதியியல் பரிசோதனைகள் மூலமாகவும் அந்த நுண்ணிய அமைப்புகளில் என்னென்ன பொருட்கள் உள்ளன என்பது ஆய்வு செய்யப்பட்டது.

இந்த ஆய்வில் மிகவும் முக்கியமானதாகக் கருதப்படுவது 'ஹீம்' (Heme) என்ற வேதிப்பொருளின் தடயங்கள்தான். மனிதர்கள் உள்ளிட்ட பல உயிரினங்களின் ரத்தத்தில் உள்ள ஹீமோகுளோபின் என்ற புரதத்தின் முக்கியமான பகுதிதான் ஹீம். சிவப்பு ரத்த அணுக்களில் காணப்படும் ஹீமோகுளோபின், நுரையீரலில் இருந்து உடலின் மற்ற பகுதிகளுக்கு ஆக்சிஜனைக் கொண்டு செல்ல உதவுகிறது. இந்த ஹீமுடன் தொடர்புடைய வேதிப்பொருட்கள் டைனோசரின் எலும்பில் கண்டறியப்பட்டுள்ளன. இதனால், அந்த நுண்ணிய அமைப்புகள் வெறும் சீரற்ற கனிமப் படிவுகள் அல்ல; அவை பழங்கால ரத்த அண்களின் கனிமமயமான எச்சங்களாக இருக்கலாம் என்ற கருத்துக்கு வலுவான ஆதாரம் கிடைத்துள்ளது.

இவ்வளவு கோடிக்கணக்கான ஆண்டுகள் கடந்தும் இந்தத் தடயங்கள் எப்படிப் பாதுகாக்கப்பட்டன என்பதும் ஆராய்ச்சியாளர்களுக்கு ஆர்வத்தை ஏற்படுத்தியுள்ளது. டைனோசர் உயிரிழந்த பிறகு நுண்ணுயிர்கள் நிறைந்த ஒரு சூழலில் அதன் உடல் புதைக்கப்பட்டிருக்கலாம் என்று ஆய்வாளர்கள் கருதுகின்றனர். ஆக்சிஜன் குறைவான சூழல் மற்றும் மாங்கனீஸ் கொண்ட 'ஹாஸ்மனைட்' (Hausmannite) என்ற கனிமத்தின் படிவம் ஆகியவை உயிரியல் தடயங்கள் சிதையாமல் பாதுகாக்க உதவியிருக்கலாம். இயற்கையான ஒரு பாதுகாப்புப் பெட்டியைப் போல இந்தக் கனிமம் செயல்பட்டிருக்கலாம் என்பது ஆராய்ச்சியாளர்களின் விளக்கம்.

ஆய்வு ஆஸ்திரேலியாவின் கர்டின் பல்கலைக்கழகத்தைச் சேர்ந்த பேராசிரியர் கிளிட்டி கிரைஸ் தலைமையிலான சர்வதேச ஆய்வுக் குழுவால் மேற்கொள்ளப்பட்டது. ஆய்வு முடிவுகள் நவம்பர் 2ஆம் தேதி 'Proceedings of the National Academy of Sciences' என்ற அறிவியல் இதழில் வெளியிடப்பட்டன. இதன் மூலம் டைனோசர் புதைபடிவங்களில் ரத்தத்துடன் தொடர்புடைய மூலக்கூறுகளுக்கான வலுவான வேதியியல் ஆதாரம் கிடைத்துள்ளதாக ஆய்வுக் குழு தெரிவித்துள்ளது.

எலும்பில் காணப்பட்ட நீள்வட்ட வடிவ அமைப்புகள் உண்மையிலேயே சிவப்பு ரத்த அண்கள்தானா என்பதில் சில வெளிப்புற ஆய்வாளர்கள் எச்சரிக்கையுடன் கருத்து தெரிவித்துள்ளனர். அவற்றின் வடிவம் மற்ற ஊர்வன உயிரினங்களின் ரத்த அண்களுடன் முழுமையாகப் பொருந்தவில்லை என்பதும் அவர்களின் கருத்தாக உள்ளது. அதேநேரத்தில், ஹீம் தொடர்பான வேதியியல் தடயங்கள் கண்டறியப்பட்டிருப்பது முக்கியமான ஆதாரமாகப் பார்க்கப்படுகிறது.

இதில் மற்றொரு முக்கியமான விஷயமும் உள்ளது. விஞ்ஞானிகள் டைனோசரின் முழுமையான ரத்தத்தையோ, அதன் டிஎன்ஏவையோ கண்டுபிடிக்கவில்லை. எனவே, இந்தக் கண்டுபிடிப்பால் டைனோசர்களை மீண்டும் உயிர்ப்பிக்க முடியும் என்று அர்த்தமல்ல. கிடைத்திருப்பது பல கோடி ஆண்டுகளுக்கு முன்பு வாழ்ந்த உயிரினத்தின் ரத்தம் தொடர்பான கனிம மற்றும் மூலக்கூறு தடயங்கள்தான்.

இந்த ஆய்வு எதிர்காலத்தில் புதைபடிவ ஆராய்ச்சிக்கு புதிய வழிகளைத் திறக்கக்கூடும். எலும்புகளின் வடிவத்தை மட்டும் வைத்து பழங்கால உயிரினங்களைப் புரிந்துகொண்ட காலம் மாறி, அவற்றின் உடலில் இருந்த வேதிப்பொருட்கள் மூலமாகவும் அவற்றின் வாழ்க்கை முறையை அறிந்துகொள்ளும் வாய்ப்பு உருவாகியுள்ளது. 11.5 கோடி ஆண்டுகளுக்கு முன்பு வாழ்ந்த ஒரு உயிரினத்தின் உடலில் இருந்த ரத்தத்தின் தடயங்கள் இன்றும் விஞ்ஞானிகளிடம் பேசத் தொடங்கியிருப்பது உண்மையிலேயே வியக்க வைக்கும் கண்டுபிடிப்புதான்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்