.png)
குடியரசுத் துணைத் தலைவர் மாண்புமிகு சி. பி. ராதாகிருஷ்ணன் புது தில்லியில் பெரும்பிடுகு முத்தரையர் இரண்டாம் பேரரசரின் நினைவாகச் சிறப்பு அஞ்சல் தலையை வெளியிட்ட நிகழ்வு, தமிழர்களின் வரலாற்றுப் பெருமைகளை மீண்டும் வெளிச்சத்திற்குக் கொண்டு வந்துள்ளது. சுவரன் மாறன் என்ற பெயரால் அறியப்பட்ட இந்தப் பேரரசர், தமிழ்ப் பண்பாடு மற்றும் வீரத்தின் சின்னமாகப் போற்றப்படுகிறார். தமிழ் மன்னர்கள், தலைவர்கள் ஆகியோரின் பங்களிப்பைப் போற்றி அங்கீகரிக்கும் மத்திய அரசின் தொடர் முயற்சியின் ஒரு பகுதியாக இந்த அஞ்சல் தலை வெளியிடப்பட்டுள்ளது. பிரதமர் நரேந்திர மோடி இந்தச் சிறப்பு வெளியீட்டிற்கு மகிழ்ச்சி தெரிவித்து, இளைஞர்கள் இவரது வரலாற்றை அறிய வேண்டும் என்று அழைப்பு விடுத்திருந்தார்.
முத்தரையர் குலத்தின் வரலாறு:
பெரும்பிடுகு முத்தரையர் இரண்டாம் பேரரசர், ஏழாம் நூற்றாண்டுக்கும் ஒன்பதாம் நூற்றாண்டுக்கும் இடைப்பட்ட காலத்தில் மத்திய தமிழ்நாட்டின் பகுதிகளை ஆட்சி செய்த புகழ்பெற்ற முத்தரையர் வம்சத்தைச் சேர்ந்தவர். இவரது இயற்பெயர் சுவரன் மாறன் ஆகும். இவர் ஏறக்குறைய நாற்பது ஆண்டுகள் திருச்சிராப்பள்ளியைத் தலைநகரமாகக் கொண்டு ஆட்சி புரிந்திருக்கிறார். இவர் பல்லவர்களின் ஆட்சிக் காலத்தில் குறுநில மன்னராக இருந்து, பல்லவப் பேரரசு வலுவிழந்தபோது, அதிகாரம் பெற்றுத் தனிப்பெரும் மன்னராக உருவெடுத்தார். இவர் பன்னிரண்டு போர்களில் பங்கெடுத்ததாகவும், அதில் ஒருபோதும் தோல்வியைத் தழுவியதில்லை என்றும் செந்தலை மீனாட்சி சுந்தரேசுவரர் கோயில் உள்ளிட்ட பல கல்வெட்டுகளில் பொறிக்கப்பட்டுள்ள மெய்க்கீர்த்திகள் கூறுகின்றன.
ஆட்சியின் சிறப்புகள்:
சுவரன் மாறன் என்று அழைக்கப்படும் பெரும்பிடுகு முத்தரையரின் ஆட்சி, சிறந்த நிர்வாக நிலைத்தன்மை, நிலப்பரப்பு விரிவாக்கம், பண்பாட்டு ஆதரவு மற்றும் போர்த் திறமை ஆகியவற்றால் தனித்து நிற்கிறது. இவர், நந்திவர்ம பல்லவனுடன் சேர்ந்து, பாண்டிய மற்றும் சேரப் படைகளுக்கு எதிராகப் பல வெற்றிகளைப் பெற்றுள்ளார். இவர், 'சத்ரு பயங்கரன்' (பகைவர்களுக்குச் சிம்ம சொப்பனம்), 'அபிமான தீரன்' (திமிர் கொண்ட அரசர்களுக்குப் பகைவன்), 'கல்வர் களவன்' (திருடர்களை அழித்தவன்) போன்ற பட்டப் பெயர்களாலும் அறியப்படுகிறார்.
பண்பாட்டுப் பங்களிப்பு:
பெரும்பிடுகு முத்தரையர் போர்த் திறமைகளில் மட்டுமல்லாமல், கலை, இலக்கியம் மற்றும் நீர்ப்பாசனத் துறையிலும் சிறந்து விளங்கினார். சைவ அறிஞர்களை ஆதரித்த இவர், சமணத் துறவிகள் உள்ளிட்டப் பிற சமய அறிஞர்களுடன் விவாதங்கள் நடத்துவதையும் ஊக்கப்படுத்தியுள்ளார். காவிரிச் சமவெளிப் பகுதிகளில் நீர்ப்பாசனப் பணிகளைச் செம்மைப்படுத்தியதற்கான சான்றுகள் தமிழ்நாட்டின் பல பகுதிகளில் உள்ள கல்வெட்டுகளில் காணப்படுகின்றன. கோவில்களுக்கு அவர் வழங்கிய கொடைகள் மற்றும் தமிழ் இலக்கியத்திற்கு அளித்த ஆதரவு பற்றிய தகவல்களும் உள்ளன. முத்தரையர் மன்னர்கள் அமைத்த குடைவரைக் கோவில்கள், பிற்காலச் சோழர்களின் கட்டிடக் கலைக்கும் அடித்தளமாக அமைந்ததாக வரலாற்று ஆய்வாளர்கள் கருதுகின்றனர். நாலடியார் போன்ற நூல்களிலும் இவரது மரபு வழி குறித்த குறிப்புகள் காணப்படுகின்றன.
அஞ்சல் தலையின் முக்கியத்துவம்:
பெரும்பிடுகு முத்தரையர் காலங்கடந்த புகழுக்கு உரியவராக இருந்தபோதும், பாடத்திட்டங்களில் இவரைப் பற்றிய விரிவான தகவல்கள் அரிதாகவே காணப்படுகின்றன. இவரைப் போன்ற புகழடையாத தமிழ் மன்னர்கள் மற்றும் தலைவர்களின் வரலாற்றை வெளிச்சத்திற்குக் கொண்டு வரும் முயற்சியின் ஒரு பகுதியாகவே, மத்திய அரசு இந்தச் சிறப்பு அஞ்சல் தலையை வெளியிட்டுள்ளது. கடந்த 2022 ஆம் ஆண்டில், தி.மு.க. இளைஞரணிச் செயலாளரான உதயநிதி ஸ்டாலினும் மதுரை மாவட்டத்தில் பெரும்பிடுகு முத்தரையரின் முழு உருவச் சிலையைத் திறந்து வைத்துள்ளார். அரசியல் கட்சிகள் கடந்து, முத்தரையர் சமூகத்தின் அடையாளமாக இவர் மத்திய தமிழ்நாட்டில் போற்றப்படுகிறார்.
