பயப்படாதீங்க! சனி பகவான் உங்களை அழிக்க வரவில்லை.. அவர் உங்களைச் செதுக்க வருகிறார்! சனியின் உண்மையான முகம் இதோ!

ஜோதிட ரீதியாகச் சனி பகவான் என்றாலே பயப்படும் மக்கள் தான் அதிகம். ஆனால், உண்மையில் சனி பகவான் ஒரு கொடூரமான தெய்வம் அல்ல; அவர் ஒரு சிறந்த 'நீதிபதி'. ஒருவர் செய்யும் நற்செயல்களுக்கும் தீச்செயல்களுக்கும் ஏற்பத் தக்க பலன்களை வழங்குவதே அவரது பணி. ஒருவன் தவறான வழியில் செல்லும்போது, அவனுக்குச் சில கஷ்டங்களைக் கொடுத்து அவனைத் திருத்திச் சரியான பாதைக்குக் கொண்டு வருவார். இதனால்தான் அவர் 'கர்ம காரகன்' என்று அழைக்கப்படுகிறார். ஏழரைச் சனி அல்லது அஷ்டமச் சனி காலங்களில் ஒருவருக்கு ஏற்படும் சோதனைகள் அனைத்தும் அவரைப் பக்குவப்படுத்துவதற்காகவே ஏற்படுகின்றன.

சனி பகவான் எந்தப் பாரபட்சமும் இல்லாதவர். அரசனாக இருந்தாலும் சரி, ஆண்டியாக இருந்தாலும் சரி, அவர்களின் கர்ம வினைகளுக்கு ஏற்பவே பலன்களைத் தருவார். "சனி கொடுப்பாரை யார் தடுப்பார்?" என்ற பழமொழிக்கு ஏற்ப, ஒருவருக்குச் சனி பகவான் யோகம் வழங்கத் தொடங்கினால், அவரை யாராலும் தடுக்க முடியாது. அவர் கொடுக்கும் செல்வம் மற்றும் புகழ் நிலைத்து நிற்கும். பொதுவாகச் சனி பகவான் ஒரு மனிதனுக்குப் பொறுமை, ஒழுக்கம் மற்றும் உழைப்பின் மகத்துவத்தைக் கற்றுக்கொடுக்கிறார். ஆடம்பரத்தையும் அகங்காரத்தையும் அழித்து, ஒருவனை உண்மையான மனிதனாக மாற்றுவதே சனியின் நோக்கம்.

சனிக்கிழமைகளில் நல்லெண்ணெய் தீபம் ஏற்றி வழிபடுவதும், காகத்திற்கு உணவிடுவதும் சனியின் அருளைப் பெற உதவும். எல்லாவற்றையும் விட, ஏழைகளுக்கும் ஊனமுற்றவர்களுக்கும் செய்யும் உதவி சனி பகவானை மிகவும் மகிழ்விக்கும். 'தர்மம் தலைகாக்கும்' என்பது சனியின் தாரக மந்திரம். மற்றவர்களுக்குத் தீங்கு நினைக்காமல், நேர்மையாக வாழ்பவர்களுக்குச் சனி பகவான் எப்போதுமே கெடுதல் செய்வதில்லை. எனவே சனியைக் கண்டு பயப்படத் தேவையில்லை; அவரை ஒரு ஆசிரியராக மதித்து அவர் தரும் பாடங்களைக் கற்றுக் கொண்டால், வாழ்க்கை இன்னும் சிறப்பாக அமையும். நீதி தவறாத அந்தச் சனீஸ்வரன், உண்மையான உழைப்பாளிகளுக்கு எப்போதுமே பக்கபலமாக இருப்பார்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.