.png)
இந்திய கிரிக்கெட்டில் ஒருநாள் (ODI) போட்டிகளுக்கான புதிய சகாப்தம் தொடங்கியுள்ள நிலையில், முன்னாள் கேப்டன்களான விராட் கோலி மற்றும் ரோஹித் சர்மா ஆகியோரின் எதிர்காலம் குறித்து எழுந்து வந்த விவாதங்களுக்கு இளம் கேப்டன் சுப்மன் கில் முற்றுப்புள்ளி வைத்துள்ளார். 2027-ஆம் ஆண்டு நடைபெறவுள்ள ஐசிசி ஒருநாள் உலகக் கோப்பைக்கான இந்திய அணியின் திட்டங்களில் இந்த இரண்டு அனுபவ வீரர்களும் முக்கியப் பங்கு வகிப்பார்கள் என சுப்மன் கில் உறுதிபடத் தெரிவித்துள்ளார்.
சமீபத்தில், பிசிசிஐ ஒருநாள் போட்டிகளுக்கான கேப்டன் பதவியிலிருந்து ரோஹித் சர்மாவை விடுவித்து, இளம் வீரர் சுப்மன் கில்லுக்கு அப்பொறுப்பை வழங்கியது. ரோஹித் சர்மா தலைமையில் இந்திய அணி 2023 உலகக் கோப்பையில் சிறப்பான ஆட்டத்தை வெளிப்படுத்தி இறுதிப் போட்டி வரை சென்றது, மேலும் 2025 சாம்பியன்ஸ் டிராபி பட்டத்தையும் வென்றது. இருந்தபோதிலும், 2027 உலகக் கோப்பைக்கான நீண்ட காலத் திட்டத்தின் ஒரு பகுதியாக, டெஸ்ட் மற்றும் ஒருநாள் போட்டிகளுக்கு சுப்மன் கில், டி20 போட்டிகளுக்கு சூர்யகுமார் யாதவ் என்ற முடிவை பிசிசிஐ எடுத்தது.
இந்த அதிரடி முடிவானது, இந்திய கிரிக்கெட்டில் தலைமுறை மாற்றம் குறித்த பல்வேறு ஊகங்களை எழுப்பியது. குறிப்பாக, 2027 உலகக் கோப்பையின்போது ரோஹித்துக்கு 40 வயதும், விராட் கோலிக்கு 38 வயதும் ஆகிவிடும் என்பதால், அவர்கள் அணியில் நீடிப்பது குறித்து கிரிக்கெட் வட்டாரத்திலும், ரசிகர்களிடையேயும் பெரிய கேள்வியாக இருந்தது.
மேற்கு இந்தியத் தீவுகளுக்கு எதிரான இரண்டாவது டெஸ்ட் போட்டிக்கு முன்னதாக நடந்த செய்தியாளர் சந்திப்பில், சுப்மன் கில்லிடம் இந்த முக்கியக் கேள்வி கேட்கப்பட்டது. அதற்கு அவர் அளித்த பதில், பல மில்லியன் இந்திய கிரிக்கெட் ரசிகர்களுக்குப் பெரும் நிம்மதியை அளித்துள்ளது.
"ரோஹித் மற்றும் விராட் இருவருக்கும் உள்ள அனுபவமும், திறமையும் விலைமதிப்பற்றது. இந்திய அணிக்காக அவர்கள் பெற்றுத் தந்த வெற்றிகள் மிக அதிகம். இதுபோன்ற திறமையும், தரமும், அனுபவமும் கொண்ட வீரர்கள் உலகில் மிகச் சிலரே உள்ளனர்," என்று சுப்மன் கில் அழுத்தமாகத் தெரிவித்தார். மேலும், "2027 ஒருநாள் உலகக் கோப்பைக்கான எங்கள் திட்டங்களில் அவர்கள் நிச்சயமாக ஒரு பகுதியாக இருப்பார்கள்" என்றும் அவர் உறுதிப்படுத்தினார்.
மேலும் தனது சீனியரான ரோஹித் சர்மாவிடமிருந்து தான் கற்றுக்கொள்ள விரும்பும் தலைமைப் பண்புகள் குறித்தும் பேசிய கில், "ரோஹித்தின் அமைதியான மனப்பான்மையும், டீமில் அவர் உருவாக்கிய நட்புறவும் எனக்கு மிகவும் பிடிக்கும். அந்தப் பண்புகளை என்னுள் நான் வளர்த்துக் கொள்ள விரும்புகிறேன்," என்று கில் குறிப்பிட்டார். மேலும், தனது தலைமையில் வீரர்களின் பாதுகாப்பை உறுதி செய்வது மற்றும் வேகப்பந்து வீச்சாளர்களுக்கான குழுவை (Fast Bowlers Pool) உருவாக்குவது குறித்து தலைமைப் பயிற்சியாளர் கௌதம் கம்பீருடன் ஆக்கப்பூர்வமான உரையாடல்களை மேற்கொள்வதாகவும் அவர் தெரிவித்தார்.
ஆஸ்திரேலியாவுக்கு எதிரான வரவிருக்கும் ஒருநாள் தொடரில், சுப்மன் கில் தலைமையில் ரோஹித் சர்மா மற்றும் விராட் கோலி ஆகியோர் விளையாட உள்ளனர். இது, இந்திய கிரிக்கெட்டில் ஒரு புதிய சகாப்தத்தின் தொடக்கத்தைக் குறிக்கிறது. இது, அனுபவத்தையும், இளமையின் துடிப்பையும் கலந்து, 2027 உலகக் கோப்பைக்காக ஒரு வலிமையான அணியை உருவாக்கும் நோக்கத்தை பிசிசிஐ கொண்டிருக்கிறது என்பதையே சுப்மன் கில்லின் இந்த பேச்சு வெளிப்படுத்துகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
