.png)
CSK அணியின் தலைமைப் பயிற்சியாளராக ஸ்டீபன் ஃபிளமிங் விட்டுச் சென்ற இடத்தை நிரப்பப்போவது யார் என்ற கேள்வி ரசிகர்களிடம் மிகுந்த எதிர்பார்ப்பை ஏற்படுத்தியிருந்தது.
சிலர் இயான் மோர்கன் என்றனர்; சிலர் ஹேமந்த் பதானி என்றனர். சிலர் மைக்கேல் ஹஸ்ஸியாகக் கூட இருக்கலாம் எனக் கணித்தனர். ஆனால், யாரும் எதிர்பாராத விதமாக அந்த இடத்தைப் பிடித்திருக்கிறார் ஜாகீர் கான். இது அவரது முதல் தலைமைப் பயிற்சியாளர் பொறுப்பு. இதுவரை Mumbai Indians-ல் cricket operations/development roles மற்றும் LSG-ல் mentor role ஆகியவற்றில் அனுபவம் கொண்டிருக்கிறார் ஜாகீர் கான்.
சமீப காலங்களில் பயிற்சியாளர்கள் IPL-ல் மைதானத்துக்குள் வந்து ஆலோசனை வழங்கும் அளவுக்கு முக்கியத்துவம் பெற்றுள்ளனர். இந்தச் சூழலில், முன்னாள் கேப்டனும் அணியின் மூத்த வீரருமான தோனி, ஜாகீர் கானை பரிந்துரைத்ததாக செய்திகள் கூறுகின்றன. இவரது இணைப்பு அணிக்கு எந்த வகையில் பயனளிக்கும் என்பதைச் சில தரவுகளுடன் பார்க்கலாம்.
5 முறை கோப்பைகளை வென்ற சென்னை சூப்பர் கிங்ஸ் அணி, கடந்த 3 சீசன்களாக பிளே-ஆஃப் கூட செல்ல முடியாத நிலையில் உள்ளது. கடந்த சீசனில் 14 போட்டிகளில் விளையாடி, 8-வது இடத்தில் முடித்தது. இது மிகப் பெரிய பின்னடைவாகப் பார்க்கப்படுகிறது.
குறிப்பாக, அணியின் மிக அவசரமான மற்றும் அவசியமான தேவை நல்ல பந்துவீச்சு. நல்ல பந்துவீச்சாளர்கள் = நல்ல பந்துவீச்சு எனக் கூற முடியாது! ஏற்கெனவே சிறந்த வீரர்கள் இருந்தாலும், அவர்களது டெக்னிக்குகளிலும் பயன்பாட்டிலும் குறிப்பிடத்தக்க மாற்றம் வேண்டும்.
2026-ல் CSK வென்ற போட்டிகளில் பந்துவீச்சு சராசரி (ரன்கள்/விக்கெட்) 18.98 ஆகவும், தோல்விகளில் 46.25 ஆகவும் இருந்தது. வித்தியாசம் 27.27. இதுதான் அணியின் வெற்றி, தோல்விகளை முடிவு செய்திருக்கிறது.
2026 IPL-ல் தொடக்கத்தில் CSK விளையாடிய 4 தோல்விகளில், பந்துவீச்சு சராசரியாக 10.5+ எக்கானமியில் இருந்தது. குறிப்பாக RR, PBKS, RCB, SRH அணிகள் 128/2 (CSK நிர்ணயித்த 127 ரன்கள் இலக்கை 12.1 ஓவர்களில் எட்டியது), 210/5, 250/3, 194/9 என CSK-வுக்கு எதிராக பெரிய மற்றும் சவாலான ஸ்கோர்களை எட்டின.
கடந்த சீசனில் டெத் ஓவர்களில் கடுமையாக சொதப்பியது சென்னை சூப்பர் கிங்ஸ். சீசனில் ஒட்டுமொத்த டெத் ஓவர் எக்கானமி 10.27 ஆக இருந்தது. இதில் ஜாகீர் கானின் அனுபவம் நேரடியாக உதவும்.
அணியின் முக்கிய வலது கை வேகப்பந்துவீச்சாளராக அன்சுல் கம்போஜ், கடந்த சீசனில் 24 விக்கெட்டுகளை வீழ்த்தியிருந்தார்.
அதில் 10 விக்கெட்டுகளை டெத் ஓவர்களில் மட்டுமே வீழ்த்தியிருக்கிறார். டெத் ஓவர்களில் அவரது எக்கானமியும் குறைவாகவே உள்ளது. ஆனால், பவர்பிளேவில் அதிகம் பயன்படுத்தப்பட்டுள்ளார். ஜாகீர் கான் இவருக்கு நிலையான ரோலை வழங்கக் கூடும்.
ஒரு சிறந்த இடது கை வேகப்பந்துவீச்சாளரான ஜாகீர் கான், பேட்ஸ்மேனுக்கு ஏற்றவாறு பந்தின் வேகம், கோணம், நீளம் ஆகியவற்றை மாற்றுவதில் வீரர்களுக்கு சிறந்த ஆலோசனைகளை வழங்க முடியும்.
மேலும், சென்னை சூப்பர் கிங்ஸ் அணியிடம் இப்போது கலீல் அகமது, முகேஷ் சவுத்ரி, குர்ஜப்நீத் சிங், ஸ்பென்சர் ஜான்சன் ஆகிய இடது கை வேகப்பந்துவீச்சாளர்கள் உள்ளனர். இவர்களில் கலீல் அகமது ஏற்கெனவே ஜாகீர் கானுடன் இணைந்து விளையாடியிருக்கிறார்.
"டெல்லி டேர்டெவில்ஸ் அணியில் நான் இருந்த இரண்டு ஆண்டுகளில் ஜாகீர் பாயுடன் நிறைய நேரம் செலவிட்டிருக்கிறேன். வெவ்வேறு ஆடுகளங்களில் எப்படிப் பந்துவீசுவது என்பது பற்றி அவர் எப்போதும் விவாதித்துக்கொண்டே இருப்பார்... அவருடைய ஆலோசனைகளால் நான் ஒரு சிறந்த பந்துவீச்சாளராக ஆனேன் என்று நினைக்கிறேன்" என கலீல் 2018ல் பேசியதை இப்போது நினைவுகூறலாம்.
ஜாகீர் இந்திய அணியில் விளையாடிய காலத்தில், நீண்ட பயிற்சிகளின் மூலம் மெதுவான பந்துகளை வீசத் தொடங்கினார். இளைஞனாக வேகமாக வீசும் திறனுடன் அணிக்குள் நுழைந்த அவர், உள்ளுணர்வைப் பயன்படுத்திப் பந்துகளை மாற்றும் ‘இன்டெலிஜென்ட்’ வீரராகப் பரிணமித்தார். இந்தப் பரிணாம வளர்ச்சியை சென்னை சூப்பர் கிங்ஸின் இளம் வீரர்களுக்கு வழங்க சரியான தேர்வாக அணி நிர்வாகம் ஜாகீர் கானைப் பார்த்திருக்கலாம்.
ஜேமி ஓவர்டன், சிவம் துபே ஆகியோரது பந்துவீச்சிலும் இத்தகைய தாக்கம் தேவைப்படுகிறது. வேகப்பந்துவீச்சு மட்டுமல்லாமல், ஸ்பின்னர்களைப் பவர் பிளேவில் பயன்படுத்துவது, ரன்களைக் கட்டுப்படுத்துவது ஆகியவற்றிலும் இவரது உள்ளீடுகள் முக்கியமானதாக அமையும். கடந்த சீசனில் பவர் பிளேவிலேயே உளவியல் ரீதியாக சென்னை வீரர்கள் தோற்கடிக்கப்பட்ட நிகழ்வுகள் அடிக்கடி நடந்தன.
2026-ல் முதல் 3 போட்டிகளில் CSK பந்துவீச்சாளர்கள் பவர் பிளேவில் 2 விக்கெட்டுகளை மட்டுமே எடுத்தனர். எக்கானமி 10.72 ஆக இருந்தது. பின்னர் அகீல் ஹொசைன் சேர்க்கப்பட்ட பிறகு, அடுத்த 7 போட்டிகளில் 12 விக்கெட்டுகளை எடுத்தனர். ஹொசைனின் பவர் பிளே எக்கானமி 6.44 ஆக இருந்தது. ஆனால், நூர் அகமது பவர் பிளேவில் பலனளிக்கும் ஸ்பின்னராக இல்லை. ஜாகீர் தலைமையில் இந்த வித்தியாசத்தைக் கொண்டு அவர்களுக்கான ரோல்கள் உருவாக்கப்படும் என எதிர்பார்க்கலாம்.
ஜாகீர் கானை தலைமைப் பயிற்சியாளராகத் தேர்வு செய்ததில் தோனியின் பங்கும் முக்கியமானது என அணியின் உரிமையாளர் விஸ்வநாதன் உறுதி செய்துள்ளார். இந்த ஆண்டு விளையாடுவாரா, மாட்டாரா எனத் தெரியாவிட்டாலும், அணியுடன் இணைந்துதான் தோனி செயல்பட்டு வருகிறார் என்பது தெளிவாகியுள்ளது. ஜாகீர் கான் உள்ளே வந்தது இவரின் மாஸ்டர் பிளான்.
தோனி தலைமையிலான இந்திய அணி 2011-ம் ஆண்டு உலகக் கோப்பையை வென்றபோது, அந்தத் தொடரில் அதிகபட்சமாக 21 விக்கெட்டுகளை வீழ்த்திய வீரர் ஜாகீர் கான். ஐபிஎல்-லில் 2017-ல் ஓய்வு பெறுவதற்கு முன்பு ராயல் சேலஞ்சர்ஸ் பெங்களூரு, மும்பை இந்தியன்ஸ் மற்றும் டெல்லி கேப்பிட்டல்ஸ் அணிகளில் விளையாடினார்.
“ஜாகீர் கானை பந்துவீச்சின் சச்சின் டெண்டுல்கர்” என தோனி புகழ்ந்தது வெறும் வார்த்தைகள் அல்ல. அதன் பலன்களை வரும் சீசனில் ரசிகர்கள் சுவைப்பார்களா என்பதைப் பார்க்கலாம்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
