.png)
கால்பந்து உலகம் எப்போதும் புதிய நட்சத்திரங்களை உருவாக்கிக் கொண்டே இருக்கும். ஒரு காலத்தில் டியாகோ மரடோனா, பின்னர் ரொனால்டோ, அதன் பிறகு கிறிஸ்டியானோ ரொனால்டோ மற்றும் லியோனல் மெஸ்ஸி ஆகியோர் உலக ரசிகர்களின் மனதை ஆட்சி செய்தனர். இன்று புதிய தலைமுறையாக கிலியன் எம்பாப்பே, லமின் யமால், எர்லிங் ஹாலண்ட் போன்ற இளம் வீரர்கள் உலக கால்பந்தின் எதிர்காலமாக பார்க்கப்படுகின்றனர். ஆனால் 2026 FIFA உலகக் கோப்பை ஒரு விஷயத்தை மீண்டும் நிரூபித்துள்ளது - புதிய நட்சத்திரங்கள் எவ்வளவு பிரகாசித்தாலும், கால்பந்தின் “இறுதி பாஸ்” இன்னும் லியோனல் மெஸ்ஸிதான்.
2022 கத்தார் உலகக் கோப்பையில் அர்ஜென்டினாவை சாம்பியனாக்கிய பிறகு, மெஸ்ஸி சர்வதேச கால்பந்தில் இருந்து ஓய்வு பெறுவார் என்று பலரும் எதிர்பார்த்தனர். உலகக் கோப்பை, கோபா அமெரிக்கா, சாம்பியன்ஸ் லீக், பலான் டி'ஓர் என கால்பந்தில் வெல்ல வேண்டிய அனைத்தையும் வென்றுவிட்ட நிலையில், அவரது பயணம் நிறைவடைந்துவிட்டதாக கருதப்பட்டது. ஆனால் மெஸ்ஸி வேறு விதமாக யோசித்தார். அவர் மீண்டும் உலகக் கோப்பை மேடைக்கு திரும்பினார். அதுவும் வெறும் பங்கேற்பாளராக அல்ல, இன்னும் உலகின் சிறந்த வீரராக.
2026 உலகக் கோப்பையின் தொடக்கத்திலேயே மெஸ்ஸி தனது ஆட்டத்தின் மூலம் அனைவரையும் வியப்பில் ஆழ்த்தியுள்ளார். அல்ஜீரியாவுக்கு எதிரான போட்டியில் ஹாட்ரிக் அடித்த அவர், அதன் பிறகு ஆஸ்திரியாவுக்கு எதிராக இரண்டு கோல்கள் அடித்து உலகக் கோப்பை வரலாற்றில் அதிக கோல்கள் அடித்த வீரர் என்ற புதிய சாதனையை படைத்துள்ளார். தற்போது அவரது உலகக் கோப்பை கோல் எண்ணிக்கை 18 ஆக உயர்ந்துள்ளது. இது பல ஆண்டுகளாக நிலைத்திருந்த மிரோஸ்லாவ் க்ளோஸின் சாதனையையும் முறியடித்துள்ளது.
இந்த சாதனையின் சிறப்பு என்னவென்றால், மெஸ்ஸி இதை தனது ஆறாவது உலகக் கோப்பையில் செய்துள்ளார். உலகக் கோப்பை வரலாற்றில் ஆறு முறை விளையாடிய முதல் வீரர் என்ற பெருமையும் அவருக்கே சொந்தம். 2006ல் தொடங்கிய அவரது உலகக் கோப்பை பயணம், 2026ல்கூட அதே தாக்கத்துடன் தொடர்வது கால்பந்து உலகில் அரிதான நிகழ்வாக பார்க்கப்படுகிறது.
மறுபுறம், கிலியன் எம்பாப்பேவும் அசத்தி வருகிறார். பிரான்ஸ் அணிக்காக விளையாடும் அவர், ஏற்கனவே 16 உலகக் கோப்பை கோல்களை அடித்து மெஸ்ஸியின் சாதனையை நெருங்கி வருகிறார். வெறும் 27 வயதிலேயே உலகக் கோப்பை வரலாற்றின் சிறந்த கோல் அடிப்பவர்களில் ஒருவராக மாறியுள்ளார். பல நிபுணர்கள் எதிர்காலத்தில் மெஸ்ஸியின் சாதனையை முறியடிக்கக்கூடிய வீரர் எம்பாப்பேதான் என்று கருதுகின்றனர்.
அதேபோல், ஸ்பெயினின் இளம் அதிசய வீரர் லமின் யமாலும் உலகக் கவனத்தை ஈர்த்துள்ளார். 18 வயதிலேயே உலகக் கோப்பை மேடையில் கோல் அடித்து சாதனை படைத்துள்ள அவர், கால்பந்தின் அடுத்த சூப்பர் ஸ்டாராக பார்க்கப்படுகிறார். யமாலின் வேகம், பந்தைக் கட்டுப்படுத்தும் திறன் மற்றும் தாக்குதல் பாணி ரசிகர்களை கவர்ந்துள்ளது. இருப்பினும், யமால் கூட சமீபத்தில் மெஸ்ஸியை “கால்பந்து வரலாற்றின் மிகச் சிறந்த வீரர்” என்று புகழ்ந்துள்ளார்.
இந்த உலகக் கோப்பையில் ஒரு சுவாரஸ்யமான தலைமுறை மோதல் நடைபெற்று வருகிறது. ஒரு பக்கம் 39 வயதான மெஸ்ஸி. மறுபக்கம் 27 வயது எம்பாப்பே, 18 வயது யமால், 25 வயது ஹாலண்ட் போன்ற இளம் நட்சத்திரங்கள். கால்பந்தின் எதிர்காலம் இவர்களுடையது என்பது உண்மை. ஆனால் தற்போதைய நிகழ்காலத்தை இன்னும் மெஸ்ஸிதான் நிர்ணயித்து வருகிறார்.
மெஸ்ஸியின் சிறப்பு அவரது கோல்களில் மட்டும் இல்லை. அவர் மைதானத்தில் இருப்பதே ஒரு அணியின் தன்னம்பிக்கையை உயர்த்துகிறது. அவரது பாஸ்கள், ஆட்டத்தை படிக்கும் திறன், சரியான நேரத்தில் சரியான முடிவெடுக்கும் திறமை ஆகியவை இன்னும் உலகத் தரத்தில் உள்ளன. அர்ஜென்டினா பயிற்சியாளர் லியோனல் ஸ்கலோனியும், “மெஸ்ஸி எப்போதும் அணியின் இதயம்” என்று பலமுறை கூறியுள்ளார்.
2026 உலகக் கோப்பை தொடங்குவதற்கு முன்பு, இந்த தொடர் எம்பாப்பேவின் உலகக் கோப்பையாக இருக்கலாம் என்று பலர் கணித்தனர். சிலர் யமாலின் எழுச்சியைப் பற்றி பேசினர். இன்னும் சிலர் ஹாலண்ட் தன் ஆதிக்கத்தை நிரூபிப்பார் என்றனர். ஆனால் போட்டி தொடங்கிய சில நாட்களிலேயே தலைப்புச் செய்திகளை மீண்டும் கைப்பற்றியவர் மெஸ்ஸி. அவரது சாதனைகள், கோல்கள் மற்றும் தலைமையேற்பு திறன் மீண்டும் உலகத்தை அவரைப் பற்றி பேச வைத்துள்ளது.
கால்பந்தில் தலைமுறைகள் மாறிக்கொண்டே இருக்கும். இன்று யமால், எம்பாப்பே, ஹாலண்ட் போன்றவர்கள் எதிர்காலத்தை பிரதிநிதித்துவப்படுத்துகிறார்கள். ஆனால் அந்த எதிர்காலம் முழுமையாக தொடங்குவதற்கு முன், கடந்த இரண்டு தசாப்தங்களாக உலக கால்பந்தை ஆட்சி செய்த ஒரு மன்னன் இன்னும் அரியணையில் அமர்ந்திருக்கிறார். அதனால் தான் உலக கால்பந்து ரசிகர்கள் தற்போது ஒரே குரலில் கூறுகிறார்கள் - “புதிய ஹீரோக்கள் வந்துவிட்டார்கள்... ஆனால் கால்பந்தின் Final Boss இன்னும் லியோனல் மெஸ்ஸிதான்!”
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
